ਚੰਡੀਗੜ੍ਹ। ਪੰਜਾਬ ਵਿੱਚ ਪ੍ਰਧਾਨ ਮੰਤਰੀ ਨਰੇਂਦਰ ਮੋਦੀ ਦਾ ਕਾਫਲਾ ਰੋਕਿਆ ਜਾਣਾ ਖਾਲਿਸਤਾਨੀ ਸਾਜਿਸ਼ ਦਾ ਹਿੱਸਾ ਸੀ। ਇਹ ਦਾਅਵਾ ਇੰਗਲੈਂਡ ਤੋਂ ਆਏ ਇੱਕ ਆਟੋਮੇਟਿਡ ਕਾਲ ਵਿੱਚ ਕੀਤਾ ਗਿਆ ਹੈ। ਇਹ ਕਾਲ ਸੁਪਰੀਮ ਕੋਰਟ ਦੇ ਕਈ ਵਕੀਲਾਂ ਨੂੰ ਆਈ ਹੈ, ਜਿਸ ਵਿੱਚ ਧਮਕੀ ਭਰੇ ਅੰਦਾਜ਼ ਵਿੱਚ ਉਹਨਾਂ ਨੂੰ ਪੀਐੱਮ ਦੀ ਸੁਰੱਖਿਆ ਕੁਤਾਹੀ ਮਾਮਲੇ ਤੋਂ ਦੂਰ ਰਹਿਣ ਲਈ ਕਿਹਾ ਗਿਆ ਹੈ।
ਵਕੀਲਾਂ ਨੂੰ ਆਈ ਕਾਲ ‘ਚ ਕੀ ਕਿਹਾ ਗਿਆ?
ਦਰਅਸਲ, ਸੋਮਵਾਰ ਨੂੰ ਪੀਐੱਮ ਦੀ ਕੁਤਾਹੀ ਮਾਮਲੇ ਨੂੰ ਲੈ ਕੇ ਸੁਪਰੀਮ ਕੋਰਟ ‘ਚ ਅਹਿਮ ਸੁਣਵਾਈ ਸੀ, ਜਿਸ ਤੋਂ ਠੀਕ ਪਹਿਲਾਂ ਕਈ ਵਕੀਲਾਂ ਦੇ ਫੋਨ ‘ਤੇ ਇਹ ਧਮਕੀ ਭਰੀ ਕਾਲ ਆਈ। ਇਸ ਵਿੱਚ ਕਿਹਾ ਗਿਆ, “ਪੀਐੱਮ ਦਾ ਕਾਫਲਾ ਰੋਕਣ ਲਈ SFJ ਜਿੰਮੇਵਾਰ ਹੈ। ਸੁਪਰੀਮ ਕੋਰਟ ਪੰਜਾਬ ਦੇ ਕਿਸਾਨਾਂ ਅਤੇ ਸਿੱਖਾਂ ਦੇ ਖਿਲਾਫ਼ ਮਾਮਲਿਆਂ ਵਿੱਚ ਮੋਦੀ ਦੀ ਮਦਦ ਨਾ ਕਰੇ। ਜੇਕਰ ਮਦਦ ਹੋਈ, ਤਾਂ ਨਤੀਜੇ ਚੰਗੇ ਨਹੀਂ ਹੋਣਗੇ।”
ਕਾਲ ਵਿੱਚ 1984 ਦੇ ਸਿੱਖ ਵਿਰੋਧੀ ਦੰਗਿਆਂ ਦਾ ਵੀ ਜਿਕਰ ਕੀਤਾ ਗਿਆ ਅਤੇ ਕਿਹਾ ਗਿਆ ਕਿ ਉਹਨਾਂ ਦੰਗਿਆਂ ਦੇ ਕਿਸੇ ਵੀ ਦੋਸ਼ੀ ਨੂੰ ਅੱਜ ਤੱਕ ਸਜਾ ਨਹੀਂ ਮਿਲੀ।
ਕੇਂਦਰ ਸਰਕਾਰ ਤੋਂ ਕਾਰਵਾਈ ਦੀ ਮੰਗ
ਇੰਗਲੈਂਡ ਦੇ ਨੰਬਰ ਤੋਂ ਆਏ ਇਸ ਕਾਲ ਬਾਰੇ ਜਾਣਕਾਰੀ ਦਿੰਦੇ ਹੋਏ ਸੁਪਰੀਮ ਕੋਰਟ ਦੇ ਵਕੀਲਾਂ ਨੇ ਕਿਹਾ, “ਪੀਐੱਮ ਦੀ ਸੁਰੱਖਿਆ ‘ਚ ਕੁਤਾਹੀ ਮਾਮਲੇ ਦੀ ਸੁਣਵਾਈ ਤੋਂ ਠੀਕ ਪਹਿਲਾਂ ਆਈ ਇਸ ਕਾਲ ਨੂੰ ਹਲਕੇ ਵਿੱਚ ਨਹੀਂ ਲੈਣਾ ਚਾਹੀਦਾ। ਕੇਂਦਰੀ ਗ੍ਰਹਿ ਮੰਤਰਾਲੇ ਨੂੰ ਇਸਦਾ ਨੋਟਿਸ ਲੈ ਕੇ ਉਚਿਤ ਕਾਰਵਾਈ ਕਰਨੀ ਚਾਹੀਦੀ ਹੈ।”
ਕਾਫਲਾ ਪਰਤਣ ‘ਤੇ ਵੀ ਜਾਰੀ ਕੀਤੀ ਸੀ ਵੀਡੀਓ
ਕਾਬਿਲੇਗੌਰ ਹੈ ਕਿ ਸਿੱਖਸ ਫਾਰ ਜਸਟਿਸ ਦੇ ਪ੍ਰਮੁੱਖ ਗੁਰਪਤਵੰਤ ਸਿੰਘ ਪੰਨੂ ਨੇ ਪੀਐੱਮ ਮੋਦੀ ਦੇ ਰੈਲੀ ਨੂੰ ਸੰਬੋਧਿਤ ਕੀਤੇ ਬਿਨ੍ਹਾਂ ਵਾਪਸ ਪਰਤਣ ‘ਤੇ ਖੁਸ਼ੀ ਜਾਹਿਰ ਕੀਤੀ ਸੀ। ਵੀਡੀਓ ਜਾਰੀ ਕਰਕੇ ਪੰਨੂੰ ਨੇ ਕਿਹਾ ਸੀ ਕਿ ਤਿਰੰਗੇ ਵਾਲੇ ਪੀਐੱਮ ਨੂੰ ਪੰਜਾਬ ਤੋਂ ਵਾਪਸ ਕਰ ਦਿੱਤਾ ਗਿਆ। ਇਸ ਤੋਂ ਬਾਅਦ ਪੰਜਾਬ ਵਿੱਚ ਖਾਲਿਸਤਾਨ ਮੁਹਿੰਮ ਦੀ ਸ਼ੁਰੂਆਤ ਹੋ ਗਈ ਹੈ।
