ਚੰਡੀਗੜ੍ਹ। ਪੰਜਾਬ ਦੀਆਂ ਵਿਧਾਨ ਸਭਾ ਚੋਣਾਂ ਨੇੜੇ ਆਉਦੇ ਹੀ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਬੇਅਦਬੀ, ਉਸ ਨਾਲ ਜੁੜੇ ਗੋਲੀ ਕਾਂਡ ਅਚੇ ਡਰੱਗਜ਼ ਦਾ ਮਾਮਲਾ ਮੁੜ ਗਰਮਾਉਣ ਲੱਗਿਆ ਹੈ। ਸੀਐੱਮ ਬਣਨ ਤੋਂ ਬਾਅਦ ਪਹਿਲੀ ਵਾਰ ਕੋਟਕਪੂਰਾ ਪਹੁੰਚੇ ਚੰਨੀ ਨੇ ਦਾਅਵਾ ਕੀਤਾ ਕਿ ਇਸ ਸਭ ਦੇ ਲਈ ਬਾਦਲ ਜਿੰਮੇਵਾਰ ਹਨ। ਉਹਨਾਂ ਕਿਹਾ ਕਿ ਮਾਮਲਾ ਕੋਰਟ ਵਿੱਚ ਹੈ, ਇਸ ਲਈ ਉਹ ਜਿਆਦਾ ਨਹੀਂ ਬੋਲਣਗੇ, ਪਰ ਸਜਾ ਜ਼ਰੂਰ ਮਿਲੇਗੀ।
‘ਸਾਜਿਸ਼ ਰਚਣ ਵਾਲਿਆਂ ਨਾਲ ਮਿਲੇ ਹੋਏ ਸਨ ਬਾਦਲ’
CM ਚੰਨੀ ਨੇ ਕਿਹਾ, “ਫਰੀਦਕੋਟ ਵਿੱਚ ਹੋਈ ਬੇਅਦਬੀ, ਉਸ ਤੋਂ ਬਾਅਦ ਬਹਿਬਲ ਕਲਾਂ ਅਤੇ ਕੋਟਕਪੂਰਾ ਵਿੱਚ ਹੋਏ ਗੋਲੀਕਾਂਡ ‘ਚ ਬਾਦਲ ਇਸਦ ਸਾਜਿਸ਼ ਰਚਣ ਵਾਲਿਆਂ ਨਾਲ ਮਿਲੇ ਹੋਏ ਸਨ।” ਉਹਨਾਂ ਕਿਹਾ ਕਿ ਇਹ ਗੋਲੀਆਂ ਬੇਅਦਬੀ ਦੇ ਵਿਰੋਧ ‘ਚ ਸ਼ਾਂਤੀਪੂਰਵਕ ਪ੍ਰਦਰਸ਼ਨ ਕਰਨ ਵਾਲਿਆਂ ‘ਤੇ ਨਹੀਂ, ਬਲਕਿ ਸਾਡੀ ਛਾਤੀ ‘ਤੇ ਚੱਲੀਆਂ ਸਨ।
ਅਕਾਲੀ ਦਲ ਵੀ ਸਰਕਾਰ ‘ਤੇ ਹਮਲਾਵਰ
ਹਾਲ ਹੀ ਵਿੱਚ ਅਕਾਲੀ ਦਲ ਨੇ ਸਰਕਾਰ ‘ਤੇ ਬੇਅਦਬੀ, ਗੋਲੀਕਾਂਡ ਅਤੇ ਡਰੱਗਜ਼ ਕੇਸ ਵਿੱਚ ਉਹਨਾਂ ਨੂੰ ਫਸਾਉਣ ਦੀ ਸਾਜਿਸ਼ ਦਾ ਇਲਜਾਮ ਲਗਾਇਆ ਸੀ। ਉਹਨਾਂ ਦਾ ਕਹਿਣਾ ਹੈ ਕਿ ਸੀਐੱਮ ਚੰਨੀ, ਡਿਪਟੀ ਸੀਐੱਮ ਸੁਖਜਿੰਦਰ ਰੰਧਾਵਾ, ਪੰਜਾਬ ਕਾਂਗਰਸ ਪ੍ਰਧਾਨ ਨਵਜੋਤ ਸਿੱਧੂ ਨੇ DGP ਇਕਬਾਲਪ੍ਰੀਤ ਸਹੋਤਾ ਦੇ ਨਾਲ ਮੀਟਿੰਗ ਕੀਤੀ, ਜਿਸ ਵਿੱਚ ਇਹਨਾਂ ਦੋਵੇਂ ਮਾਮਲਿਆਂ ਵਿੱਚ ਬਾਦਲ ਪਰਿਵਾਰ ਅਤੇ ਅਕਾਲੀ ਦਲ ਨੂੰ ਫਸਾਉਣ ਦੀ ਸਾਜਿਸ਼ ਰਚੀ ਗਈ।
ਬੇਅਦਬੀ ਮਾਮਲੇ ‘ਤੇ ਹੀ ਕੈਪਟਨ ਦਾ ਤਖਤਾਪਲਟ
ਪਿਛਲੇ 6 ਸਾਲਾਂ ਤੋਂ ਪੰਜਾਬ ਦੀ ਸਿਆਸਤ ਵਿੱਚ ਬੇਅਦਬੀ ਦਾ ਮੁੱਦਾ ਵੱਡਾ ਸਿਆਸੀ ਮੁੱਦਾ ਹੈ। 2017 ਵਿੱਚ ਅਕਾਲੀ ਦਲ ਦੀ ਹਾਰ ‘ਚ ਇਸ ਨੂੰ ਇੱਕ ਵੱਡਾ ਕਾਰਨ ਮੰਨਿਆ ਗਿਆ। ਕੈਪਟਨ ਦੇ ਚੋਣ ਵਾਅਦਿਆਂ ਵਿੱਚ ਵੀ ਬੇਅਦਬੀ ਦਾ ਮਾਮਲਾ ਪ੍ਰਮੁੱਖ ਸੀ, ਪਰ ਕੋਈ ਕਾਰਵਾਈ ਨਹੀਂ ਹੋਈ। ਕਾਂਗਰਸ ਵਿੱਚ ਕੈਪਟਨ ਖਿਲਾਫ਼ ਬਗਾਵਤ ਕਰਨ ਵਾਲੇ ਮੰਤਰੀ ਅਤੇ ਵਿਧਾਇਕ ਮੁੱਖ ਤੌਰ ‘ਤੇ ਬੇਅਦਬੀ ਮਾਮਲੇ ਵਿੱਚ ਕਾਰਵਾਈ ਨਾ ਹੋਣ ਤੋਂ ਨਰਾਜ਼ ਸਨ। ਬਹਿਰਹਾਲ, ਹੁਣ ਸੱਤਾ ਬਦਲ ਚੁੱਕੀ ਹੈ..ਪਰ 70 ਦਿਨ ਬੀਤ ਜਾਣ ਦੇ ਬਾਵਜੂਦ ਕੋਈ ਐਕਸ਼ਨ ਹੀਂ ਹੋਇਆ ਹੈ। ਲਿਹਾਜਾ ਚੰਨੀ ਸਰਕਾਰ ਵੀ ਕਟਹਿਰੇ ਵਿੱਚ ਹੈ।
