ਬਿਓਰੋ। ਪੰਜਾਬ ਵਿੱਚ ਵਿਧਾਨ ਸਭਾ ਚੋਣਾਂ ਨੇੜੇ ਆਉਂਦੇ ਹੀ ਹੁਣ ‘ਆਮ ਆਦਮੀ’ ‘ਤੇ ਸਿਆਸੀ ਜੰਗ ਸ਼ੁਰੂ ਹੋ ਗਈ ਹੈ। ਪਿਛਲੇ ਦਿਨੀਂ ਆਮ ਆਦਮੀ ਪਾਰਟੀ ਦੇ ਕਨਵੀਨਰ ਅਰਵਿੰਦ ਕੇਜਰੀਵਾਲ ਨੇ ਸੀਐੱਮ ਚਰਨਜੀਤ ਸਿੰਘ ਚੰਨੀ ਨੂੰ ਨਕਲੀ ਆਮ ਆਦਮੀ ਕਿਹਾ ਸੀ। ਹੁਣ ਸੀਐੱਮ ਚੰਨੀ ਨੇ ਇਸਦਾ ਕਰਾਰਾ ਜਵਾਬ ਦਿੱਤਾ ਹੈ।
ਸੀਐੱਮ ਚੰਨੀ ਨੇ ਕੇਜਰੀਵਾਲ ‘ਤੇ ਹਮਲਾ ਬੋਲਦੇ ਹੋਏ ਕਿਹਾ, “ਕੋਈ ਉਹਨਾਂ ਨੂੰ ਪੁੱਛੇ ਕਿ ਉਹਨਾਂ ਨੂੰ ਮੱਝ ਦਾ ਦੁੱਧ ਚੌਣਾ ਆਉਂਦਾ ਹੈ? ਮੈਨੂੰ ਤਾਂ ਪਤਾ ਹੈ, ਪਰ ਕੀ ਉਹਨਾਂ ਨੂੰ ਆਮ ਆਦਮੀ ਦੇ ਬਾਰੇ ਕੁਝ ਵੀ ਪਤਾ ਹੈ?” ਉਹਨਾਂ ਕਿਹਾ ਕਿ ਕੇਜਰੀਵਾਲ ਨਹੀਂ ਸਮਝਣਗੇ ਕਿ ਕੱਚੇ ਮਕਾਨ ਵਿੱਚ ਗਰਮੀ ਕਿਵੇਂ ਲਗਦੀ ਹੈ। ਕਿਵੇਂ ਆਮ ਆਦਮੀ ਰਾਤ ਨੂੰ ਛੱਤ ‘ਤੇ ਉੱਪਰ-ਥੱਲੇ ਗਿੱਲੀ ਚੱਦਰ ਲਗਾ ਕੇ ਸੌਂਦਾ ਹੈ।
‘ਆਪ’ ਦੀ ਸੱਚਾਈ ਸਾਹਮਣੇ ਆਈ- ਚੰਨੀ
ਸੀਐੱਮ ਚੰਨੀ ਨੇ ਕਿਹਾ, “ਜਿਸ ਨੂੰ ਸਿਆਸੀ ਚਮਤਕਾਰ ਸਮਝ ਕੇ ਲੋਕ ‘ਆਪ’ ਨਾਲ ਜੁੜੇ ਸਨ, ਉਹ ਡਰਾਮਾ ਨਿਕਲ ਆਈ। ਸਭ ਨੂੰ ਪਤਾ ਲੱਗ ਗਿਆ ਕਿ ਉਹ ਸਿਰਫ਼ ਇੱਕ ਸਿਆਸੀ ਸੋਚ ਸੀ, ਜੋ ਪੰਜਾਬ ‘ਤੇ ਰਾਜ਼ ਕਰਨ ਲਈ ਆਈ ਸੀ। ਇਸ ਲਈ ਹੁਣ ਸਭ ਵਾਪਸ ਕਾਂਗਰਸ ਦੇ ਕੋਲ ਆ ਰਹੇ ਹਨ।”
ਪੰਜਾਬ ‘ਚ ‘ਆਮ ਆਦਮੀ’ ਦਾ ਰਾਜ਼- ਚੰਨੀ
ਸੀਐੱਮ ਚਰਨਜੀਤ ਚੰਨੀ ਨੇ ‘ਆਪ’ ਵਿਧਾਇਕ ਰੁਪਿੰਦਰ ਕੌਰ ਰੂਬੀ ਨੂੰ ਕਾਂਗਰਸ ਵਿੱਚ ਸ਼ਾਮਲ ਕਰਨ ਤੋਂ ਬਾਅਦ ਕਿਹਾ ਕਿ ਪੰਜਾਬ ਵਿੱਚ ‘ਆਮ ਆਦਮੀ’ ਦਾ ਰਾਜ਼ ਆ ਚੁੱਕਿਆ ਹੈ। ਪਿਛਲੇ 50 ਦਿਨਾਂ ਤੋਂ ਪੰਜਾਬ ਵਿੱਚ ਆਮ ਆਦਮੀ ਦੀ ਹੀ ਸਰਕਾਰ ਚੱਲ ਰਹੀ ਹੈ।
ਆਮ ਆਦਮੀ ਪਾਰਟੀ ਹੁਣ ਬਹੁਮਤ ‘ਚ ਨਹੀਂ- ਚੰਨੀ
ਚੰਨੀ ਨੇ ਕਿਹਾ ਕਿ ਆਮ ਆਦਮੀ ਪਾਰਟੀ ਹੁਣ ਵਿਧਾਨ ਸਭਾ ਵਿੱਚ ਵੀ ਬਹੁਮਤ ਵਿੱਚ ਨਹੀਂ ਹੈ। ਚੰਨੀ ਨੇ ਅਜਿਹਾ ਇਸ ਲਈ ਕਿਹਾ, ਕਿਉਂਕਿ ਪਿਛਲੀਆਂ ਚੋਣਾਂ ਵਿੱਚ ‘ਆਪ’ ਨੂੰ 20 ਸੀਟਾਂ ਹਾਸਲ ਹੋਈਆਂ ਸਨ ਅਤੇ ਅਕਾਲੀ ਦਲ ਨੂੰ 15…ਜਿਸਦੇ ਚਲਦੇ ਵਿਧਾਨ ਸਭਾ ਵਿੱਚ ਆਮ ਆਦਮੀ ਪਾਰਟੀ ਨੂੰ ਵਿਰੋਧੀ ਧਿਰ ਦਾ ਦਰਜਾ ਮਿਲਿਆ, ਪਰ ਹੁਣ ਤੱਕ 6 ਵਿਧਾਇਕ ਪਾਰਟੀ ਨੂੰ ਅਲਵਿਦਾ ਆਖ ਚੁੱਕੇ ਹਨ। ਅਜਿਹੇ ਵਿੱਚ ‘ਆਪ’ ਹੁਣ ਵਿਰੋਧੀ ਧਿਰ ਦੇ ਅੰਕੜੇ ਵਿੱਚ ਅਕਾਲੀ ਦਲ ਤੋਂ ਹੇਠਾਂ ਆ ਚੁੱਕਿਆ ਹੈ।
ਪਹਿਲਾਂ ਕੱਪੜਿਆਂ ਨੂੰ ਲੈ ਕੇ ਵੀ ਭਿੜ ਚੁੱਕੇ
ਦਿਲਚਸਪ ਹੈ ਕਿ ਸੀਐਮ ਚਰਨਜੀਤ ਸਿੰਘ ਚੰਨੀ ਅਤੇ ਕੇਜਰੀਵਾਲ ਪਹਿਲਾਂ ਪਹਿਨਾਵੇ ਨੂੰ ਲੈ ਕੇ ਵੀ ਭਿੜ ਚੁੱਕੇ ਹਨ। ਦਰਅਸਲ, ਇੱਕ ਇੰਟਰਵਿਊ ਵਿੱਚ ਚੰਨੀ ਨੇ ਕਿਹਾ ਸੀ ਕਿ ਕੇਜਰੀਵਾਲ ਕੱਪੜਿਆਂ ਦੇ ਨਾਂਅ ‘ਤੇ ਡਰਾਮਾ ਕਰਦੇ ਹਨ। ਅਸਲ ਵਿੱਚ ਉਹ ਖੁਦ ਨੂੰ ਆਮ ਆਦਮੀ ਵਿਖਾਉਣ ਲਈ ਢੌਂਗ ਕਰਦੇ ਹਨ। ਚੰਨੀ ਦੇ ਹਮਲੇ ‘ਤੇ ਕੇਜਰੀਵਾਲ ਨੇ ਜਵਾਬ ਦਿੱਤਾ ਸੀ ਕਿ ਤੁਹਾਨੂੰ ਮੇਰੇ ਕੱਪੜੇ ਪਸੰਦ ਹੋਣ ਜਾਂ ਨਾ ਹੋਣ, ਪਰ ਜਨਤਾ ਮੈਨੂੰ ਇਦਾਂ ਹੀ ਪਿਆਰ ਕਰਦੀ ਹੈ।
