ਕਿਸਾਨ ਅੰਦੋਲਨ ਦਾ ਪਹਿਲੇ ਦਿਨ ਤੋਂ ਭਰਪੂਰ ਸਮਰਥਨ ਕਰ ਰਹੇ ਦਿਲਜੀਤ ਦੋਸਾਂਝ ਅੱਜ ਫਿਰ ਟਵਿਟਰ ‘ਤੇ ਕੰਗਨਾ ਰਣੌਤ ਨਾਲ ਭਿੜ ਗਏ ਹਨ। ਦਰਅਸਲ, ਜਦੋਂ ਨੌਰਵੇ ਦੀ ਪੌਪ ਸਟਾਰ ਰਿਹਾਨਾ ਨੇ ਕਿਸਾਨਾਂ ਦੇ ਸਮਰਥਨ ਵਿੱਚ ਇੱਕ ਟਵੀਟ ਕੀਤਾ, ਤਾਂ ਦਿਲਜੀਤ ਨੇ ਕੁਝ ਹੀ ਘੰਟਿਆਂ ਵਿੱਚ ਰਿਹਾਨਾ ‘ਤੇ ਇੱਕ ਗਾਣਾ ਰਿਲੀਜ਼ ਕਰ ਦਿੱਤਾ। ਗਾਣਾ ਰਿਲੀਜ਼ ਹੁੰਦੇ ਹੀ ਕੰਗਨਾ ਨੇ ਦਿਲਜੀਤ ਨੂੰ ਘੇਰਨਾ ਸ਼ੁਰੂ ਕਰ ਦਿੱਤਾ।
ਕੰਗਨਾ ਨੇ ਲਿਖਿਆ, “ਇਸ ਨੇ ਵੀ ਆਪਣੇ 2 ਰੁਪਏ ਬਣਾਉਣੇ ਹਨ, ਇਹ ਸਭ ਕਦੋਂ ਤੋਂ ਪਲਾਨ ਹੋ ਰਿਹਾ ਹੈ? ਵੀਡੀਓ ਦੀ ਤਿਆਰੀ ਅਤੇ ਅਨਾਊਂਸਮੈਂਟ ਲਈ ਇੱਕ ਮਹੀਨਾ ਤਾਂ ਘੱਟੋ-ਘੱਟ ਲੱਗੇਗਾ। ਤੇ ਉਦਾਰਵਾਦੀ ਸਾਨੂੰ ਕਹਿ ਰਹੇ ਨੇ ਕਿ ਅਸੀਂ ਯਕੀਨ ਕਰੀਏ ਇਹ ਸਭ ਆਰਗੈਨਿਕ ਹੈ। ਹਾ ਹਾ”
ਕੰਗਨਾ ਦੇ ਟਵੀਟ ‘ਤੇ ਦਿਲਜੀਤ ਨੇ ਪਲਟਵਾਰ ਕੀਤਾ ਤੇ ਲਿਖਿਆ, “2 ਰੁਪਏ…ਆਪਣੇ ਵਾਲਾ ਕੰਮ ਨਾ ਦੱਸ ਮੈਨੂੰ। ਗਾਣਾ ਤਾਂ ਅੱਧੇ ਘੰਟੇ ਵਿੱਚ ਬਣਾ ਲੈਂਦੇ ਹਾਂ ਅਸੀਂ। ਤੇਰੇ ‘ਤੇ ਬਣਾਉਣ ਨੂੰ ਜੀ ਨਹੀਂ ਕਰਦਾ ਮਿੰਟ ਤਾਂ 2 ਹੀ ਲੱਗਣੇ ਆ। ਹਰ ਜਗ੍ਹਾ ਤੂੰ ਬੋਲਣਾ ਹੁੰਦਾ। ਜਾ ਯਾਰ ਬੋਰ ਨਾ ਕਰ। ਕੰਮ ਕਰ ਆਪਣਾ।”
ਇਸ ਟਵੀਟ ਦੇ ਜਵਾਬ ਵਿੱਚ ਕੰਗਨਾ ਨੇ ਦਿਲਜੀਤ ਨੂੰ ਖਾਲਿਸਤਾਨੀ ਕਹਿ ਦਿੱਤਾ। ਕੰਗਨਾ ਨੇ ਕਿਹਾ, “ਮੇਰਾ ਇੱਕ ਹੀ ਕੰਮ ਹੈ ਦੇਸ਼ ਭਗਤੀ। ਓਹੀ ਕਰਦੀ ਹਾਂ ਸਾਰਾ ਦਿਨ। ਮੈਂ ਤਾਂ ਓਹੀ ਕਰਾਂਗੀ ਪਰ ਤੇਰਾ ਕੰਮ ਤੈਨੂੰ ਨਹੀਂ ਕਰਨ ਦਵਾਂਗੀ ਖਾਲਿਸਤਾਨੀ”
ਦਿਲਜੀਤ ਨੇ ਇੱਕ ਵਾਰ ਫਿਰ ਕੰਗਨਾ ਨੂੰ ਜਵਾਬ ਦਿੱਤਾ ਤੇ ਰੱਬ ਨਾ ਬਣਨ ਦੀ ਸਲਾਹ ਦੇ ਦਿੱਤੀ। ਦਿਲਜੀਤ ਨੇ ਲਿਖਿਆ, “ਲੈ ਕੋਈ ਤੁਕ ਬਣਦੀ ਆ ਤੇਰੀ…ਨਾ ਕੋਈ ਸਿਰ ਨਾ ਪੈਰ…ਰੱਬ ਨਹੀਂ ਬਣੀਦਾ ਹੁੰਦਾ…ਮੈਂ ਨਹੀਂ ਕਰਨ ਦਵਾਂਗੀ…ਤੂੰ ਕੌਣ ਆਂ ਯਾਰ…ਧੱਕੇ ਨਾਲ ਹੀ ਵਧਦੀ ਜਾਂਦੀ ਆਂ…ਜਾ ਯਾਰ…ਤੇਰੀ ਕੋਈ ਗੱਲ ਨਹੀਂ ਕਰ ਰਿਹਾ।”
ਇਸ ਟਵੀਟ ਤੋਂ ਬਾਅਦ ਕੰਗਨਾ ਹੋਰ ਭੜਕੀ ਤੇ ਕਿਹਾ, “ਤੇਰੀ ਕੈਨੇਡਾ ਗੈਂਗ ਕੁਝ ਵੀ ਨਹੀਂ ਕਰ ਸਕੇਗੀ। ਖਾਲਿਸਤਾਨ ਸਿਰਫ ਤੁਹਾਡੇ ਵਰਗੇ ਲੋਕਾਂ ਦੇ ਦਿਮਾਗ ਦੀ ਜੋ ਖਾਲੀ ਜਗ੍ਹਾ ਰਹੇਗੀ ਉਸਦਾ ਨਾਂਅ ਰਹੇਗਾ। ਅਸੀਂ ਇਸ ਦੇਸ਼ ਦੇ ਟੁਕੜੇ ਨਹੀਂ ਹੋਣ ਦਵਾਂਗੇ। ਕਰ ਲਓ ਜਿੰਨੇ ਚਾਹੇ ਦੰਗੇ ਤੇ ਹੜਤਾਲਾਂ”
ਦਿਲਜੀਤ ਨੇ ਇਸ ਟਵੀਟ ਦਾ ਵੀ ਬੇਬਾਕੀ ਨਾਲ ਜਵਾਬ ਦਿੱਤਾ ਤੇ ਕਿਹਾ, “ਔ ਤੇਰੀ ਕੱਲੀ ਦਾ ਨਹੀਂ ਹੈਗਾ ਦੇਸ਼। ਕੀ ਹੋ ਗਿਆ ਤੈਨੂੰ…? ਦੇਸ਼ ਸਾਰਿਆਂ ਦਾ ਭਾਈ…ਹੋਸ਼ ਕਰ ਹੋਸ਼…ਇੰਡੀਆ ਸਾਡਾ ਵੀ ਆ ਭਾਈ…ਤੂੰ ਜਾ ਯਾਰ…ਬੋਰ ਨਾ ਕਰ।”
ਜਵਾਬ ਵਿੱਚ ਕੰਗਨਾ ਰਣੌਤ ਨੇ ਦਿਲਜੀਤ ਨੂੰ ਖਾਲਿਸਤਾਨੀ ਗਤੀਵਿਧੀਆਂ ਦੀ ਨਿਖੇਧੀ ਕਰਨ ਦੀ ਚੁਣੌਤੀ ਦੇ ਦਿੱਤੀ। ਆਪਣੇ ਟਵੀਟ ਵਿੱਚ ਕੰਗਨਾ ਨੇ ਲਿਖਿਆ, “ਦੇਸ਼ ਸਿਰਫ ਭਾਰਤੀਆਂ ਦਾ ਹੈ, ਖਾਲਿਸਤਾਨੀਆਂ ਦਾ ਨਹੀਂ, ਬੋਲ ਤੂੰ ਖਾਲਿਸਤਾਨੀ ਨਹੀਂ ਹੈਂ, ਕਿਰਪਾ ਕਰਕੇ ਕਹਿ ਦੇ ਕਿ ਤੂੰ ਪ੍ਰਦਰਸ਼ਨ ਵਿੱਚ ਖਾਲਿਸਤਾਨੀ ਗਤੀਵਿਧੀਆਂ ਦੀ ਨਿਖੇਧੀ ਕਰਦਾ ਹੈਂ। ਜੇਕਰ ਤੂੰ ਕਿਹਾ, ਤਾਂ ਮੈਂ ਮੁਆਫੀ ਮੰਗਾਂਗੀ ਤੇ ਕਹਾਂਗੀ ਕਿ ਤੂੰ ਸੱਚਾ ਦੇਸ਼ ਭਗਤ ਹੈਂ”
ਕੰਗਨਾ ਦੇ ਇਸ ਟਵੀਟ ਦੇ ਜਵਾਬ ਵਿੱਚ ਦਿਲਜੀਤ ਨੇ ਫੇਰ ਕਿਹਾ ਕਿ ਬੋਰ ਨਾ ਕਰ। ਉਹਨਾਂ ਟਵੀਟ ਕੀਤਾ, “ਅਸੀਂ ਭਾਈ ਭਾਰਤ ਦੇ ਨਾਲ ਹਾਂ। ਜੋ ਵੀ ਕੋਈ ਗਲਤ ਕਰ ਰਿਹਾ, ਉਹ ਸਰਕਾਰ ਵੇਖੇਗੀ। ਉਹ ਉਹਨਾਂ ਦਾ ਕੰਮ ਹੈ। ਤੂੰ ਤੇ ਮੈਂ ਥੋੜ੍ਹੇ ਤੈਅ ਕਰਾਂਗੇ। ਮੈਂ ਵੇਖਿਆ ਤੂੰ ਗੀਲਾ ਪੀਣ ਪੈ ਲੈਣੀ ਹੈਂ ਗੱਲ ਦਾ…ਤੇਰੀ ਗੱਲ ਮੁੱਕਦੀ ਨਹੀਂ। ਜਾ ਯਾਰ, ਬਹੁਤ ਬੋਰ ਕਰਦੀ ਆਂ ਤੂੰ”
ਜਵਾਬ ਵਿੱਚ ਕੰਗਨਾ ਨੇ ਫਿਰ ਕਿਹਾ, “ਮੈਨੂੰ ਪਤਾ ਸੀ ਕਿ ਤੂੰ ਕਦੇ ਨਹੀਂ ਬੋਲੇਂਗਾ ਕਿ ਤੂੰ ਖਾਲਿਸਤਾਨੀ ਨਹੀਂ ਹੈਂ। ਇਹ ਸਾਰੇ ਵੇਖ ਲੈਣ…ਭੇਡ ਦੀ ਖਾਲ ਵਿੱਚ ਭੇੜੀਏ। ਜੈ ਹਿੰਦ”
ਦਿਲਜੀਤ ਦੋਸਾਂਝ ਨੇ ਇੱਕ ਵਾਰ ਫਿਰ ਕੰਗਨਾ ਨੂੰ ਖਰੀ-ਖਰੀ ਸੁਣਾਈ। ਤੇ ਕਿਹਾ, “ਲੈ…ਇਹ ਚਾਹੁੰਦੀ ਆ ਬੰਦਾ ਇਹਦੇ ਨਾਲ ਸਾਰਾ ਦਿਨ ਲੱਗਾ ਰਹੇ। ਅਸੀਂ ਭਾਰਤੀ ਹਾਂ…ਤੂੰ ਕੱਲੀ ਨਹੀਂ ਭਾਰਤੀ। ਆਪਣਾ ਜਵਾਬ ਆਪ ਹੀ ਬਣਾ ਕੇ ਖੁਸ਼ ਹੋ ਜਾਂਦੀ ਆ। ਐਵੇਂ ਨਾ ਸਰਟੀਫਿਕੇਟ ਚੁੱਕੀ ਫਿਰਿਆ ਕਰ ਕਿ ਕੱਲੀ ਤੂੰ ਹੀ ਦੇਸ਼ ਭਗਤ ਹੈਂ। ਭੇਡ ਜਿਹੀ ਨਾ ਹੋਵੇ ਤਾਂ”
ਇਸ ਤੋਂ ਬਾਅਦ ਤਾਂ ਦਿਲਜੀਤ ਨੇ ਕੰਨਾਂ ਨੂੰ ਹੀ ਹੱਥ ਲਾ ਲਏ ਤੇ ਕਿਹਾ, “ਅੱਜ ਤੋਂ ਬਾਅਦ ਮੈਂ ਤੇਰਾ ਕੋਈ ਜਵਾਬ ਨਹੀਂ ਦੇਣਾ। ਕਿਉਂਕਿ ਤੈਨੂੰ ਪੈ ਗਿਆ ਸਵਾਦ ਟਵੀਟ-ਟਵੀਟ ਖੇਡਣ ਦਾ। ਬੰਦੇ ਨੂੰ 100 ਕੰਮ ਹੁੰਦੇ ਆ। ਵੈਸੇ ਵੀ ਕੋਈ ਤੁਕ ਨਹੀਂ ਬਣਦਾ ਤੇਰੀਆਂ ਗੱਲਾਂ ਦਾ। ਬੰਦਾ ਕਿੰਨਾ ਚਿਰ ਮੱਥਾ ਮਾਰ ਲਊ ਤੇਰੇ ਨਾਲ। ਨਾਲੇ ਤੈਨੂੰ ਕੋਈ ਜਵਾਬ ਦੇਵੇ…ਤੂੰ ਮਾਸਟਰਨੀ ਲੱਗੀ ਆਂ?”
ਹਾਲਾਂਕਿ ਕੰਗਨਾ ਨੇ ਫੇਰ ਵੀ ਹਾਰ ਨਹੀਂ ਮੰਨੀ ਤੇ ਫੇਰ ਕਿਹਾ, “ਚੱਲ ਠੀਕ ਹੈ, ਸਿਰਫ ਬੋਲ ਦੇ ਤੂੰ ਖਾਲਿਸਤਾਨੀ ਨਹੀਂ ਹੈ, ਕਿਉਂ ਇੰਨੀਆਂ ਗੱਲਾਂ ਘੁਮਾ ਰਿਹੈਂ? ਬੋਲ ਦੇ..ਕਿਉਂ ਨਹੀਂ ਬੋਲ ਸਕਦਾ? ਸਾਰੀ ਚਰਚਾ ਖਤਮ ਹੋ ਜਾਵੇਗੀ ਮੇਰਾ ਸ਼ੱਕ ਵੀ ਦੂਰ ਹੋ ਜਾਵੇਗਾ। ਕਿਰਪਾ ਕਰਕੇ ਕਹਿ ਦੇ…”
