ਬਿਓਰੋ। ਪੰਜਾਬ ਵਿਧਾਨ ਸਭਾ ਚੋਣਾਂ ਵਿੱਚ ਇਸ ਵਾਰ ਅੰਮ੍ਰਿਤਸਰ ਈਸਟ ਸੀਟ ਸੂਬੇ ਦੀ ਸਭ ਤੋਂ ਹੌਟ ਸੀਟ ਬਣ ਸਕਦੀ ਹੈ। ਜਾਣਕਾਰੀ ਮੁਤਾਬਕ, ਅਕਾਲੀ ਦਲ ਅਤੇ ਬੀਜੇਪੀ ਦੋਵੇਂ ਹੀ ਇਸ ਸੀਟ ‘ਤੇ ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਦੇ ਖਿਲਾਫ਼ ਕੋਈ ਵੱਡਾ ਚਿਹਰਾ ਉਤਾਰਨ ਦੀ ਤਿਆਰੀ ਕਰ ਰਹੇ ਹਨ।
ਸਿੱਧੂ ਖਿਲਾਫ਼ ਮਜੀਠੀਆ ਲੜਨਗੇ ਚੋਣ ?
ਚਰਚਾ ਹੈ ਕਿ ਅਕਾਲੀ ਦਲ ਸਿੱਧੂ ਦੇ ਖਿਲਾਫ਼ ਬਿਕਰਮ ਮਜੀਠੀਆ ਨੂੰ ਉਤਾਰਨ ‘ਤੇ ਵਿਚਾਰ ਕਰ ਰਹੀ ਹੈ। ਖੁਦ ਮਜੀਠੀਆ ਵੀ ਕਹਿ ਚੁੱਕੇ ਹਨ ਕਿ ਜੇਕਰ ਪਾਰਟੀ ਕਹੇਗੀ, ਤਾਂ ਉਹ ਇਸ ਮੁਕਾਬਲੇ ਲਈ ਤਿਆਰ ਹਨ। ਦੱਸ ਦਈਏ ਕਿ ਮਜੀਠੀਆ ਫਿਲਹਾਲ ਮਜੀਠਾ ਹਲਕੇ ਤੋਂ ਪਾਰਟੀ ਦੇ ਉਮੀਦਵਾਰ ਹਨ ਅਤੇ ਹੋ ਸਕਦਾ ਹੈ ਕਿ ਉਹਨਾਂ ਨੂੰ ਮਜੀਠੇ ਦੇ ਨਾਲ-ਨਾਲ ਪਾਰਟੀ ਅੰਮ੍ਰਿਤਸਰ ਈਸਟ ਤੋਂ ਵੀ ਮੈਦਾਨ ਵਿੱਚ ਉਤਾਰ ਦੇਵੇ। ਇਹ ਸੰਭਾਵਨਾ ਇਸ ਲਈ ਵੀ ਵੱਧ ਹੈ, ਕਿਉਂਕਿ ਪਾਰਟੀ ਨੇ ਲੰਬੀ ਅਤੇ ਅੰਮ੍ਰਿਤਸਰ ਈਸਟ ਨੂੰ ਛੱਡ ਕੇ ਸਾਰੀਆਂ ਸੀਟਾਂ ਤੋਂ ਉਮੀਦਵਾਰ ਐਲਾਨ ਦਿੱਤੇ ਹਨ।
ਬੀਜੇਪੀ ਵੀ ਉਤਾਰੇਗੀ ਵੱਡਾ ਚਿਹਰਾ?
ਕੈਪਟਨ ਦੇ ਨਾਲ ਮਿਲ ਕੇ ਚੋਣ ਮੈਦਾਨ ਵਿੱਚ ਉਤਰੀ ਬੀਜੇਪੀ ਵੀ ਇਸ ਵਾਰ ਸਿੱਧੂ ਦੇ ਖਿਲਾਫ਼ ਕੋਈ ਵੱਡਾ ਚਿਹਰਾ ਉਤਾਰਨ ਦੀ ਤਿਆਰੀ ਵਿੱਚ ਹੈ। ਇਸਦੇ ਲਈ ਪਾਰਟੀ ਦੇ ਕਈ ਵੱਡੇ ਲੀਡਰਾਂ ਦੇ ਨਾਂਅ ਵੀ ਚਰਚਾ ਵਿੱਚ ਹਨ। ਹਾਲਾਂਕਿ ਪਹਿਲਾਂ ਚਰਚਾ ਸੀ ਕਿ ਕੈਪਟਨ ਖੁਦ ਪਟਿਆਲਾ ਦੇ ਨਾਲ-ਨਾਲ ਅੰਮ੍ਰਿਤਸਰ ਵਿੱਚ ਸਿੱਧੂ ਦੇ ਖ਼ਿਲਾਫ਼ ਮੈਦਾਨ ਵਿੱਚ ਉਤਰ ਸਕਦੇ ਹਨ, ਪਰ ਹੁਣ ਕੈਪਟਨ ਨੇ ਸਾਫ਼ ਕਰ ਦਿੱਤਾ ਹੈ ਕਿ ਉਹ ਅੰਮ੍ਰਿਤਸਰ ਵਿੱਚ ਚੋਣ ਨਹੀਂ ਲੜਨਗੇ। ਹਾਲਾਂਕਿ ਉਨ੍ਹਾਂ ਦਾ ਸਾਫ਼ ਕਹਿਣਾ ਹੈ ਕਿ ਉਹ ਸਿੱਧੂ ਨੂੰ ਹਰਾਉਣ ਲਈ ਕੋਈ ਕਸਰ ਵੀ ਨਹੀਂ ਛੱਡਣਗੇ। ਬਹਿਰਹਾਲ, ਹੁਣ ਨਿਗਾਹਾਂ ਬੀਜੇਪੀ ‘ਤੇ ਟਿਕੀਆਂ ਹਨ, ਕਿ ਉਹ ਸਿੱਧੂ ਦੇ ਖਿਲਾਫ਼ ਕਿਸ ਨੂੰ ਮੈਦਾਨ ਵਿੱਚ ਉਤਾਰੇਗੀ।
‘ਆਪ’ ਨੇ ਖੇਡਿਆ ਹੈ ਮਹਿਲਾ ਕਾਰਡ
ਸਿੱਧੂ ਦੇ ਖਿਲਾਫ਼ ਆਮ ਆਦਮੀ ਪਾਰਟੀ ਨੇ ਆਪਣੀ ਸਥਾਨਕ ਲੀਡਰ ਜੀਵਨਜੋਤ ਕੌਰ ਨੂੰ ਮੈਦਾਨ ਵਿੱਚ ਉਤਾਰਿਆ ਹੈ। ਜੀਵਨਜੋਤ ਲਈ ਇਹ ਪਹਿਲੀ ਚੋਣ ਹੈ, ਪਰ ਉਹ ਸਿੱਧੂ ਨੂੰ ਕਰੜੀ ਟੱਕਰ ਦੇਣ ਦਾ ਦਮ ਭਰ ਰਹੀ ਹੈ।
