ਬਿਓਰੋ। ਕਪੂਰਥਲਾ ਦੇ ਨਿਜਾਮਪੁਰ ਰੋਡ ਗੁਰਦੁਆਰਾ ਸਾਹਿਬ ਵਿਖੇ ਐਤਵਾਰ ਸਵੇਰੇ ਹੋਈ ਬੇਅਦਬੀ ਦੀ ਕੋਸ਼ਿਸ਼ ਅਤੇ ਮੁਲਜ਼ਮ ਦੇ ਕਤਲ ਮਾਮਲੇ ਵਿੱਚ ਇੱਕ ਵੱਡਾ ਖੁਲਾਸਾ ਹੋਇਆ ਹੈ। ਦਰਅਸਲ, ਬਿਹਾਰ ਦੇ ਪਟਨਾ ਦੀ ਰਹਿਣ ਵਾਲੀ ਇੱਕ ਮਹਿਲਾ ਨੇ ਦਾਅਵਾ ਕੀਤਾ ਹੈ ਕਿ ਮ੍ਰਿਤਕ ਨੌਜਵਾਨ ਉਸਦਾ ਭਰਾ ਹੈ ਅਤੇ ਉਸਦਾ ਨਾਂਅ ਅੰਕਿਤ ਹੈ। ਮਹਿਲਾ ਮੁਤਾਬਕ, ਕਾਫੀ ਸਮੇਂ ਤੋਂ ਉਹ ਆਪਣੇ ਭਰਾ ਨਾਲ ਸੰਪਰਕ ਕਰਨ ਦੀ ਕੋਸ਼ਿਸ਼ ਕਰ ਰਹੀ ਸੀ, ਪਰ ਉਸਨੂੰ ਕੁਝ ਪਤਾ ਨਹੀਂ ਲੱਗ ਰਿਹਾ ਸੀ।
ਮਹਿਲਾ ਨੇ ਖੁਦ ਹੀ ਪੁਲਿਸ ਨੂੰ ਕੀਤਾ ਫੋਨ
ਜਾਣਕਾਰੀ ਮੁਤਾਬਕ, ਇਸ ਮਹਿਲਾ ਨੇ ਪੰਜਾਬ ਪੁਲਿਸ ਨਾਲ ਖੁਦ ਹੀ ਫੋਨ ‘ਤੇ ਸੰਪਰਕ ਕੀਤਾ ਅਤੇ ਕਿਹਾ ਕਿ ਇਸ ਘਟਨਾ ਵਿੱਚ ਮਾਰਿਆ ਜਾਣ ਵਾਲਾ ਸ਼ਖਸ ਉਸਦਾ ਭਰਾ ਹੈ। ਉਸਨੇ ਪੁਲਿਸ ਨੂੰ ਆਪਣੇ ਭਰਾ ਦੇ ਆਧਾਰ ਕਾਰਡ ਸਣੇ ਤਮਾਮ ਦਸਤਾਵੇਜ਼ ਭੇਜੇ ਹਨ। ਇਸਦੇ ਨਾਲ ਹੀ ਉਸਦੀਆਂ ਪੁਰਾਣੀਆਂ ਤਸਵੀਰਾਂ ਵੀ ਭੇਜੀਆਂ ਹਨ। ਇਹਨਾਂ ਤਸਵੀਰਾਂ ਦੇ ਜ਼ਰੀਏ ਕਥਿਤ ਭੈਣ-ਭਰਾ ਦੀਆਂ ਸ਼ਕਲਾਂ ਮਿਲਾਈਆਂ ਗਈਆਂ।
ਬਹਿਰਹਾਲ, ਹੁਣ ਮਹਿਲਾ ਆਪਣੇ ਪਰਿਵਾਰ ਦੇ ਨਾਲ ਪੰਜਾਬ ਪਹੁੰਚ ਰਹੀ ਹੈ, ਜਿਸ ਤੋਂ ਬਾਅਦ ਲਾਸ਼ ਦੀ ਸ਼ਿਨਾਖਤ ਕਰਕੇ ਹੀ ਕੁਝ ਪੁਖਤਾ ਕਿਹਾ ਜਾ ਸਕੇਗਾ। ਪੁਲਿਸ ਇਸ ਪਹਿਲੂ ‘ਤੇ ਵੀ ਜਾਂਚ ਕਰ ਰਹੀ ਹੈ ਕਿ ਕਥਿਤ ਤੌਰ ‘ਤੇ ਅੰਕਿਤ ਨਾਮੀ ਇਹ ਸ਼ਖਸ ਪੰਜਾਬ ਕਦੋਂ ਤੇ ਕਿਵੇਂ ਪਹੁੰਚਿਆ।
ਦਰਬਾਰ ਸਾਹਿਬ ਦੀ ਘਟਨਾ ਤੋਂ ਬਾਅਦ ਵੀ ਕੀਤਾ ਸੀ ਦਾਅਵਾ
ਕਾਬਿਲੇਗੌਰ ਹੈ ਕਿ ਇਸ ਮਹਿਲਾ ਨੇ ਦਰਬਾਰ ਸਾਹਿਬ ਵਿਖੇ ਹੋਈ ਬੇਅਦਬੀ ਮਾਮਲੇ ਵਿੱਚ ਵੀ ਮਾਰੇ ਗਏ ਮੁਲਜ਼ਮ ਨੂੰ ਆਪਣਾ ਭਰਾ ਦੱਸਿਆ ਸੀ। ਮਹਿਲਾ ਨੇ ਅੰਮ੍ਰਿਤਸਰ ਪੁਲਿਸ ਨੂੰ ਫੋਨ ਕਰਕੇ ਇਹ ਦਾਅਵਾ ਕੀਤਾ ਸੀ। ਹਾਲਾਂਕਿ ਜਦੋਂ ਪੁਲਿਸ ਨੇ ਉਸਨੂੰ ਮੁਲਜ਼ਮ ਦੀ ਸਾਫ ਤਸਵੀਰ ਭੇਜੀ, ਤਾਂ ਉਸਨੇ ਇਨਕਾਰ ਕਰ ਦਿੱਤਾ। ਬਹਿਰਹਾਲ, ਕਪੂਰਥਲਾ ‘ਚ ਨਿਸ਼ਾਨ ਸਾਹਿਬ ਦੀ ਹੋਈ ਕਥਿਤ ਬੇਅਦਬੀ ਦੇ ਮਾਮਲੇ ‘ਚ ਪੁਲਿਸ ਇਸ ਦਾਅਵੇ ਨੂੰ ਗੰਭੀਰਤਾ ਨਾਲ ਲੈ ਰਹੀ ਹੈ।
