ਬਿਓਰੋ। ਸ਼ਨੀਵਾਰ ਸ਼ਾਮ ਨੂੰ ਅੰਮ੍ਰਿਤਸਰ ਵਿੱਚ ਦਰਬਾਰ ਸਾਹਿਬ ਵਿਖੇ ਬੇਅਦਬੀ ਦੀ ਜੋ ਘਟਨਾ ਵਾਪਰੀ, ਉਸਦੀ ਕਿਸੇ ਨੇ ਕਲਪਨਾ ਵੀ ਨਹੀਂ ਕੀਤੀ ਸੀ। ਪਰ ਇਸਦੇ ਕੁਝ ਹੀ ਮਿੰਟਾਂ ਬਾਅਦ ਜਦੋਂ ਮੁਲਜ਼ਮ ਨੂੰ ਭੀੜ ਵੱਲੋਂ ਕੁੱਟ-ਕੁੱਟ ਕੇ ਮੌਤ ਦੇ ਘਾਟ ਉਤਾਰੇ ਜਾਣ ਦੀ ਖ਼ਬਰ ਆਈ, ਤਾਂ ਇਸ ਨੂੰ ਸੰਗਤ ਦਾ ਗੁੱਸਾ ਕਹਿ ਕੇ ਸਹੀ ਠਹਿਰਾਇਆ ਜਾਣ ਲੱਗਿਆ। ਹਾਲਾਂਕਿ ਉਹਨਾਂ ਲੋਕਾਂ ਦੀ ਵੀ ਗਿਣਤੀ ਘੱਟ ਨਹੀਂ, ਜੋ ਇਸ ਕਾਰੇ ਦੀ ਸਖਤ ਸ਼ਬਦਾਂ ਵਿੱਚ ਨਿੰਦਾ ਕਰ ਰਹੇ ਹਨ।
ਪਹਿਲਾਂ ਦਰਬਾਰ ਸਾਹਿਬ ਤੇ ਫਿਰ ਕਪੂਰਥਲਾ ਤੋਂ ਸਾਹਮਣੇ ਆਈਆਂ ਅਜਿਹੀਆਂ ਵਾਰਦਾਤਾਂ ਤੋਂ ਬਾਅਦ ਪੰਜਾਬ ਵਿੱਚ ਸੱਤਾ ‘ਤੇ ਕਾਬਜ਼ ਕਾਂਗਰਸ ਦੀ ਸੂਬਾ ਇਕਾਈ ਦੇ ਆਗੂ ਬੇਸ਼ੱਕ ਮੌਬ ਲਿੰਚਿੰਗ ਨੂੰ ਜਾਇਜ਼ ਠਹਿਰਾ ਰਹੇ ਹੋਣ ਜਾਂ ਇਸ ‘ਤੇ ਕੁਝ ਜਿਆਦਾ ਬੋਲਣ ਤੋਂ ਬੱਚ ਰਹੇ ਹੋਣ, ਪਰ ਪਾਰਟੀ ਦੇ ਰਾਜ ਸਭਾ ਸਾਂਸਦ ਅਭਿਸ਼ੇਕ ਮਨੂ ਸਿੰਘਵੀ ਨੇ ਇਸਦੀ ਖੁੱਲ੍ਹ ਕੇ ਖਿਲਾਫਤ ਕੀਤੀ ਹੈ। ਇੱਕ ਟਵੀਟ ਵਿੱਚ ਸਿੰਘਵੀ ਨੇ ਲਿਖਿਆ, “ਬੇਅਦਬੀ ਭਿਆਨਕ ਹੈ, ਪਰ ਇੱਕ ਸੱਭਿਅਕ ਸਮਾਜ ਵਿੱਚ ਲਿੰਚਿੰਗ, ਬੇਅਦਬੀ ਤੋਂ ਵੀ ਵੱਧ ਭਿਆਨਕ ਹੈ। ਮੈਂ ਅਥਾਰਿਟੀਜ਼ ਨੂੰ ਵਿਨਤੀ ਕਰਦਾ ਹਾਂ ਕਿ ਲਿੰਚਿੰਗ ਕਰਨ ਵਾਲਿਆਂ ‘ਤੇ ਸਖਤ ਕਾਰਵਾਈ ਕੀਤੀ ਜਾਵੇ, ਜਿਹਨਾਂ ਨੇ ਕਾਨੂੰਨ ਹਥ ਵਿੱਚ ਲਿਆ ਹੈ। ਅਜਿਹਾ ਕੰਮ ਕਰਨ ਵਾਲਿਆਂ ਲਈ ਸਖਤ ਕਾਰਵਾਈ ਇੱਕ ਮਿਸਾਲ ਹੋਣੀ ਚਾਹੀਦੀ ਹੈ।“
Sacrilege is horrendous but lynching in a civilized country is no less horrendous. I request the authorities to take strict action against all who took law into their own hand & make an example out of them.
— Abhishek Singhvi (@DrAMSinghvi) December 19, 2021
ਕਾਨੂੰਨ ਸਜਾ ਦੇਣ ‘ਚ ਅਸਫਲ- ਜਥੇਦਾਰ
ਕਾਂਗਰਸੀ ਆਗੂ ਦੇ ਇਸ ਬਿਆਨ ਤੋਂ ਬਾਅਦ ਸਿੱਖ ਜਥੇਬੰਦੀਆਂ ਦਾ ਭੜਕ ਜਾਣਾ ਲਾਜ਼ਮੀ ਸੀ। ਕੁਝ ਅਜਿਹਾ ਹੀ ਬਿਆਨ ਸਿੱਖਾਂ ਦੀ ਸਿਰਮੌਰ ਸੰਸਥਾ ਸ੍ਰੀ ਅਕਾਲ ਤਖਤ ਸਾਹਿਬ ਦੇ ਜਥੇਦਾਰ ਗਿਆਨੀ ਹਰਪ੍ਰੀਤ ਸਿੰਘ ਵੱਲੋਂ ਆਇਆ ਹੈ। ਉਹਨਾਂ ਕਿਹਾ, “ਬੇਅਦਬੀ ਕਰਨ ਵਾਲੇ ਨੂੰ ਮਾਰਨ ਦੀ ਨੌਬਤ ਕਿਉਂ ਆਈ? ਜਦੋਂ ਕਾਨੂੰਨ ਬੇਅਦਬੀ ਕਰਨ ਵਾਲੇ ਦੋਸ਼ੀਆਂ ਨੂੰ ਸਜਾ ਨਹੀਂ ਦੇ ਸਕਿਆ। ਅਜਿਹੇ ‘ਚ ਸਿੱਖ ਸਮਾਜ ਕੀ ਕਰਦਾ? 1984 ਵਿੱਚ ਹੋਏ ਸਿੱਖ ਕਤਲੇਆਮ ਦੇ ਪੀੜਤ ਇਨਸਾਫ਼ ਦੀ ਉਮੀਦ ਵਿੱਚ ਦੁਨੀਆ ਤੋਂ ਵਿਦਾ ਹੋ ਗਏ। ਕੁਝ ਜਿੰਦਗੀ ਦੇ ਆਖਰੀ ਸਾਹ ਗਿਣ ਰਹੇ ਹਨ। ਉਹ ਹੁਣ ਕੀ ਕਰਨ, ਅਭਿਸ਼ੇਕ ਮਨੂ ਸਿੰਘਵੀ ਨੂੰ ਇਹ ਦੱਸਣਾ ਚਾਹੀਦਾ ਹੈ।“
SGPC ਨੇ ਕਿਹਾ, “ਕਤਲ ਸੈਲਫ ਡਿਫੈਂਸ ‘ਚ ਕੀਤਾ ਗਿਆ”
ਓਧਰ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਪ੍ਰਧਾਨ ਹਰਜਿੰਦਰ ਸਿੰਘ ਧਾਮੀ ਨੇ ਕਿਹਾ ਕਿ ਨੌਜਵਾਨ ਨੂੰ ਮਾਰੇ ਜਾਣ ਦੇ ਮੁੱਦੇ ‘ਤੇ ਗਲਤ ਬਿਆਨਬਾਜੀ ਨਹੀਂ ਕੀਤੀ ਜਾਣੀ ਚਾਹੀਦੀ। ਉਹਨਾਂ ਕਿਹਾ, “ਭਾਰਤ ਸਰਕਾਰ ਦਾ ਨਿਯਮ ਹੈ ਕਿ ਸੈਲਫ ਡਿਫੈਂਸ ‘ਚ ਗੋਲੀ ਵੀ ਮਾਰ ਦਿੱਤੀ ਜਾਵੇ, ਤਾਂ ਗਲਤ ਨਹੀਂ ਹੁੰਦਾ। ਇਥੇ ਵੀ ਅਜਿਹਾ ਹੀ ਹੋਇਆ ਹੈ।” ਉਹਨਾਂ ਕਿਹਾ ਕਿ ਨੌਜਵਾਨ ਨੇ ਸ੍ਰੀਸਾਹਿਬ ਨੂੰ ਚੁੱਕ ਕੇ ਗੁਰੂ ਮਹਾਰਾਜ ‘ਤੇ ਪ੍ਰਹਾਰ ਕਰਨ ਦੀ ਕੋਸ਼ਿਸ਼ ਕੀਤੀ ਸੀ, ਉਸੇ ਦੇ ਡਿਫੈਂਸ ਵਿੱਚ ਇਹ ਪ੍ਰਤੀਕਿਰਿਆ ਸਾਹਮਣੇ ਆਈ ਹੈ।
ਕਾਂਗਰਸ ’80 ਦੇ ਦਹਾਕੇ ਵਾਲੀ ਵਿਚਾਰਧਾਰਾ ‘ਤੇ ਚੱਲੀ- BJP
ਬੀਜੇਪੀ ਦੇ ਆਗੂ ਅਤੇ DSGMC ਦੇ ਸਾਬਕਾ ਪ੍ਰਧਾਨ ਮਨਜਿੰਦਰ ਸਿਰਸਾ ਨੇ ਵੀ ਸਿੰਘਵੀ ਦੇ ਟਵੀਟ ‘ਤੇ ਤਿੱਖੀ ਪ੍ਰਤੀਕਿਰਿਆ ਦਿੱਤੀ ਹੈ। ਉਹਨਾਂ ਕਿਹਾ, “ਕਾਂਗਰਸ 80 ਦੇ ਦਹਾਕੇ ਵਾਲੀ ਆਪਣੀ ਸੋਚ ‘ਤੇ ਤੁਰ ਪਈ ਹੈ। ਪਹਿਲਾਂ ਗੁਰੂ ਘਰਾਂ ‘ਚ ਹਮਲੇ ਕਰਵਾਓ, ਸਿੱਖਾਂ ਨੂੰ ਭੜਕਾਓ, ਗੁੱਸਾ ਦਵਾਓ, ਇਨਸਾਫ਼ ਨਾ ਦਵਾਓ ਤੇ ਫੇਰ ਦਹਿਸ਼ਤਗਰਦ ਕਹਿ ਕੇ ਉਹਨਾਂ ਨੂੰ ਮਰਵਾਉਣ ਦਾ ਕੰਮ ਕਰੋ।“ ਉਹਨਾਂ ਕਿਹਾ ਕਿ ਪੰਜਾਬ ਵਿੱਚ ਕਾਂਗਰਸ ਦੀ ਹੀ ਸਰਕਾਰ ਹੈ, ਇਸ ਲਈ ਸਿੰਘਵੀ ਨੂੰ ਆਪਣੀ ਸਰਕਾਰ ਦੀ ਨਕਾਮੀ ਵੱਲ ਧਿਆਨ ਦੇਣਾ ਚਾਹੀਦਾ ਹੈ। ਉਹਨਾਂ ਕਿਹਾ ਕਿ ਸਰਕਾਰ ਨੂੰ ਇਹ ਘਟਨਾ ਹੋਣ ਨਹੀਂ ਦੇਣੀ ਚਾਹੀਦੀ ਸੀ।
Bizarre Tweet!@INCIndia controls Punjab Gov, police & intelligence. What stops them frm getting at root of things?
Words are nothing without actionStop playing same double game Indira Gandhi played of attacking Sikh Faith, denying justice & painting Sikhs “horrendous” like 80s https://t.co/1hUpEWT8p4 pic.twitter.com/Al5KHEndMG
— Manjinder Singh Sirsa (@mssirsa) December 20, 2021
ਪੰਜਾਬ ‘ਚ ਲਗਭਗ ਹਰ ਪਾਰਟੀ ਨੇ ਧਾਰੀ ਚੁੱਪ
ਪੰਜਾਬ ਵਿੱਚ ਬੇਅਦਬੀ ਦਾ ਮੁੱਦਾ ਸਿੱਖ ਸਮਾਜ ਦੀਆਂ ਭਾਵਨਾਵਾਂ ਨਾਲ ਜੁੜਿਆ ਸਭ ਤੋਂ ਅਹਿਮ ਮੁੱਦਾ ਹੈ। ਸੂਬੇ ਦੀ ਕਾਂਗਰਸ ਸਰਕਾਰ ਬੇਅਦਬੀ ਦੇ ਮੁਲਜ਼ਮਾਂ ਨੂੰ ਭੀੜ ਵੱਲੋਂ ਮਾਰੇ ਜਾਣ ‘ਤੇ ਕੁਝ ਨਹੀਂ ਕਹਿ ਰਹੀ। ਇਤੋਂ ਤੱਕ ਕਿ ਸੂਬੇ ਦੇ ਡਿਪਟੀ ਸੀਐੱਮ ਸੁਖਜਿੰਦਰ ਰੰਧਾਵਾ ਇਸ ਨੂੰ ਭੀੜ ਦੀ ਭਾਵਨਾ ਕਰਾਰ ਦੇ ਚੁੱਕੇ ਹਨ। ਨਾਲ ਹੀ ਅਕਾਲੀ ਦਲ ਤੋਂ ਲੈ ਕੇ ਆਮ ਆਦਮੀ ਪਾਰਟੀ ਤੱਕ ਇਸ ਮੁੱਦੇ ਨੂੰ ਲੈ ਕੇ ਕਾਂਗਰਸ ਨੂੰ ਘੇਰਨ ਵਿੱਚ ਲੱਗੀ ਹੈ। ਹਾਲਾਂਕਿ ਭੀੜ ਵੱਲੋਂ ਮੌਕੇ ‘ਤੇ ਮੁਲਜ਼ਮਾਂ ਨੂੰ ਕਤਲ ਕੀਤੇ ਜਾਣ ਬਾਰੇ ਕੋਈ ਕੁਝ ਨਹੀਂ ਕਹਿ ਰਿਹਾ। ਜਾਹਿਰ ਹੈ ਸਿੱਖਾਂ ਦੀ ਬਹੁਤਾਤ ਵਾਲੇ ਇਸ ਸੂਬੇ ਵਿੱਚ ਚੋਣਾਂ ਦੇ ਭਖਦੇ ਮਾਹੌਲ ਵਿਚਾਲੇ ਕੋਈ ਵੀ ਸਿੱਖ ਸਮਾਜ ਦੀ ਨਰਾਜ਼ਗੀ ਮੋਲ ਨਹੀਂ ਲੈਣਾ ਚਾਹੁੰਦਾ।
ਜਾਖੜ ਨੇ ਲਿੰਚਿੰਗ ਨੂੰ ਗਲਤ ਠਹਿਰਾਇਆ
ਇਸ ਸਭ ਦੇ ਵਿਚਾਲੇ ਪੰਜਾਬ ਦੀ ਕਾਂਗਰਸ ਲੀਡਰਸ਼ਿਪ ਵਿੱਚ ਸੁਨੀਲ ਜਾਖੜ ਇਕਲੌਤੇ ਅਜਿਹੇ ਲੀਡਰ ਹਨ, ਜੋ ਸੂਬੇ ਦੀਆਂ ਤਮਾਮ ਪਾਰਟੀਆਂ ਦੇ ਨੁਮਾਇੰਦਿਆਂ ਤੋਂ ਵੱਖ ਲਿੰਚਿੰਗ ਨੂੰ ਗਲਤ ਠਹਿਰਾ ਰਹੇ ਹਨ। ਜਾਖੜ ਦਾ ਕਹਿਣਾ ਹੈ ਕਿ ਮੁਲਜ਼ਮ ਨੂੰ ਫੜੇ ਜਾਣ ਤੋਂ ਬਾਅਦ ਉਸ ਨੂੰ ਸਜਾ ਦੇਣ ਦੀ ਬਜਾਏ ਉਸ ਨੂੰ ਜਾਂਚ ਲਈ ਸੌਂਪਣਾ ਚਾਹੀਦਾ ਹੈ, ਤਾਂ ਜੋ ਮਾਮਲੇ ਦੀ ਜੜ ਤੱਕ ਪਹੁੰਚ ਕੇ ਐਕਸ਼ਨ ਲਿਆ ਜਾ ਸਕੇ।
