ਨਿਊਜ਼ ਡੈਸਕ। ਪੰਜਾਬ ਦੇ ਨਵੇਂ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਹੋਣਗੇ। ਉਹ ਸੋਮਵਾਰ ਸਵੇਰੇ 11 ਵਜੇ ਅਹੁਦੇ ਅਤੇ ਭੇਦ ਗੁਪਤ ਰੱਖਣ ਦੀ ਸਹੁੰ ਚੁੱਕਣਗੇ। ਪਰ ਚੰਨੀ ਦਾ ਨਾਂਅ ਸਾਹਮਣੇ ਆਉਣਾ ਹਰ ਪੰਜਾਬੀ ਲਈ ਹੈਰਾਨ ਕਰ ਦੇਣ ਵਾਲਾ ਸੀ, ਕਿਉਂਕਿ ਇਸ ਐਲਾਨ ਤੋਂ 2 ਘੰਟੇ ਪਹਿਲਾਂ ਤੱਕ ਸੁਖਜਿੰਦਰ ਰੰਧਾਵਾ ਦਾ ਨਾਂਅ ਫਾਈਨਲ ਮੰਨਿਆ ਜਾ ਰਿਹਾ ਸੀ। ਅਜਿਹੇ ਵਿੱਚ ਵੱਡਾ ਸਵਾਲ ਇਹ ਉਠਦਾ ਹੈ ਕਿ 2 ਘੰਟਿਆਂ ਵਿੱਚ ਅਜਿਹਾ ਕੀ ਹੋਇਆ, ਕਿ ਅਚਾਨਕ ਚੰਨੀ ਦੇ ਨਾਂਅ ‘ਤੇ ਮੁਹਰ ਲਗਾ ਦਿੱਤੀ ਗਈ।
ਰੰਧਾਵਾ ਦੇ ਨਾਂਅ ‘ਤੇ ਸਿੱਧੂ ਨਹੀਂ ਸਨ ਰਾਜੀ !
ਸੂਤਰਾਂ ਮੁਤਾਬਕ, ਬੇਸ਼ੱਕ ਕਾਂਗਰਸ ਦੇ ਵਧੇਰੇਤਰ ਵਿਧਾਇਕ ਸੁਖਜਿੰਦਰ ਰੰਧਾਵਾ ਨੂੰ ਮੁੱਖ ਮੰਤਰੀ ਬਣਾਏ ਜਾਣ ਦੇ ਹੱਕ ਵਿੱਚ ਸਨ, ਪਰ ਸਿੱਧੂ ਧੜਾ ਇਸਦੇ ਲਈ ਰਾਜੀ ਨਹੀਂ ਸੀ। ਬੇਸ਼ੱਕ ਸੁਖਜਿੰਦਰ ਸਿੰਘ ਰੰਧਾਵਾ ਸਿੱਧੂ ਧੜੇ ਦੇ ਮੰਨੇ ਜਾਂਦੇ ਹਨ, ਪਰ ਸੂਤਰ ਦੱਸਦੇ ਹਨ ਕਿ ਖੁਦ ਨਵਜੋਤ ਸਿੱਧੂ ਹੀ ਉਹਨਾਂ ਦੇ ਸੀਐੱਮ ਬਣਨ ਦੀ ਰਾਹ ਵਿੱਚ ਰੋੜਾ ਬਣ ਗਏ। ਦਰਅਸਲ, ਸਿੱਧੂ ਬਤੌਰ ਮੁੱਖ ਮੰਤਰੀ ਖੁਦ ਆਪਣੀ ਦਾਅਵੇਦਾਰੀ ਠੋਕ ਰਹੇ ਸਨ, ਪਰ ਕਿਉਂਕਿ ਉਹ ਪਾਰਟੀ ਪ੍ਰਧਾਨ ਹਨ, ਇਸ ਲਈ ਹਾਈਕਮਾਂਡ ਉਹਨਾਂ ਦੇ ਨਾਂਅ ‘ਤੇ ਰਾਜੀ ਨਹੀਂ ਹੋਇਆ।
ਚੰਨੀ ਸਿਰਫ਼ ਚਿਹਰਾ, ਸਰਕਾਰ ਸਿੱਧੂ ਦੇ ਹੱਥ?
ਜਦੋਂ ਹਾਈਕਮਾਂਡ ਨਵਜੋਤ ਸਿੱਧੂ ਦੇ ਨਾਂਅ ‘ਤੇ ਸਹਿਮਤ ਨਹੀਂ ਹੋਇਆ, ਤਾਂ ਸਿੱਧੂ ਧੜੇ ਨੇ ਦਲਿਤ ਮੁੱਖ ਮੰਤਰੀ ਬਣਾਏ ਜਾਣ ਦੀ ਮੰਗ ਕੀਤੀ। ਸਿੱਧੂ ਧੜੇ ਦੀ ਇਸੇ ਮੰਗ ਨੂੰ ਮੁੱਖ ਰਖਦਿਆਂ ਚਰਨਜੀਤ ਸਿੰਘ ਚੰਨੀ ਨੂੰ ਵਿਧਾਇਕ ਦਲ ਦਾ ਲੀਡਰ ਚੁਣ ਲਿਆ ਗਿਆ।
ਇਸਦੀ ਸਭ ਤੋਂ ਵੱਡੀ ਵਜ੍ਹਾ ਮਾਹਰ ਇਹ ਵੀ ਦੱਸਦੇ ਹਨ ਕਿ ਸਿੱਧੂ ਅਜਿਹਾ ਸੀਐੱਮ ਚਾਹੁੰਦੇ ਸਨ, ਜੋ ਉਹਨਾਂ ਦੀ ਗੱਲ ਸੁਣੇ। ਸੁਖਜਿੰਦਰ ਰੰਧਾਵਾ ਦਾ ਸੁਭਾਅ ਅਜਿਹਾ ਨਹੀਂ ਹੈ। ਇਸਦੇ ਉਲਟ ਚਰਨਜੀਤ ਚੰਨੀ ਸਿੱਧੂ ਦੀ ਹਰ ਗੱਲ ਸੁਣ ਕੇ ਚੱਲਣਗੇ। ਯਾਨੀ ਸਰਕਾਰ ਦੇ ਸਭ ਤੋਂ ਤਾਕਤਵਰ ਅਹੁਦੇ ‘ਤੇ ਬੇਸ਼ੱਕ ਚੰਨੀ ਵਿਰਾਜਮਾਨ ਹੋ ਰਹੇ ਹੋਣ, ਪਰ ਸਰਕਾਰ ਦੀ ਵਾਗ਼ਡੋਰ ਸਿੱਧੂ ਦੇ ਹੱਥ ਵਿੱਚ ਹੀ ਰਹੇਗੀ।
ਦਲਿਤ ਵੋਟ ਬੈਂਕ ‘ਤੇ ਵੀ ਕਾਂਗਰਸ ਦੀ ਨਜ਼ਰ
ਚਰਨਜੀਤ ਚੰਨੀ ਦੇ ਸਹਾਰੇ ਕਾਂਗਰਸ ਨੇ ਪੰਜਾਬ ਦੇ 32 ਫਡੀਸਦ ਦਲਿਤ ਵੋਟ ਬੈਂਕ ‘ਤੇ ਵੀ ਨਿਸ਼ਾਨਾ ਸਾਧਿਆ ਹੈ। ਦਰਅਸਲ, ਅਗਾਮੀ ਵਿਧਾਨ ਸਭਾ ਚੋਣਾਂ ਲਈ ਪੰਜਾਬ ਦੀ ਹਰ ਪਾਰਟੀ ਆਪੋ-ਆਪਣੇ ਤਰੀਕੇ ਨਾਲ ਦਲਿਤ ਕਾਰਡ ਖੇਡ ਰਹੀ ਹੈ। ਸ਼੍ਰੋਮਣੀ ਅਕਾਲੀ ਦਲ ਨੇ ਸੂਬੇ ਵਿੱਚ ਸਰਕਾਰ ਬਣਨ ‘ਤੇ ਦਲਿਤ ਚਿਹਰੇ ਨੂੰ ਡਿਪਟੀ ਸੀਐੱਮ ਬਣਾਏ ਜਾਣ ਦਾ ਐਲਾਨ ਕੀਤਾ ਹੈ, ਜਦਕਿ ਬੀਜੇਪੀ ਦਲਿਤ ਨੂੰ ਮੁੱਖ ਮੰਤਰੀ ਬਣਾਏ ਜਾਣ ਦਾ ਐਲਾਨ ਕਰ ਚੁੱਕੀ ਹੈ। ਓਧਰ ਆਮ ਆਦਮੀ ਪਾਰਟੀ ਨੇ ਪਹਿਲਾਂ ਹੀ ਦਲਿਤ ਆਗੂ ਹਰਪਾਲ ਚੀਮਾ ਨੂੰ ਪੰਜਾਬ ਵਿਧਾਨ ਸਭਾ ਵਿੱਚ ਵਿਰੋਧੀ ਧਿਰ ਦੇ ਲੀਡਰ ਦਾ ਅਹੁਦਾ ਦਿੱਤਾ ਹੋਇਆ ਹੈ।
