October 4, 2022
(Amritsar)
ਅਟਾਰੀ ਬਾਰਡਰ ਦੇ ਜ਼ਰੀਏ ਪਾਕਿਸਤਾਨੀ ਨਸ਼ਾ ਤਸਕਰਾਂ ਵੱਲੋਂ ਭੇਜੀ ਗਈ 3 ਕਰੋੜ ਰੁਪਏ ਦੀ ਨਸ਼ੇ ਦੀ ਖੇਪ ਬਰਾਮਦ ਕੀਤੀ ਗਈ ਹੈ। ਇਹ ਖੇਪ ਬੇਹੱਦ ਸ਼ਾਤਰ ਢੰਗ ਨਾਲ ਲਿਆਂਦੀ ਜਾ ਰਹੀ ਸੀ। ਟਰੱਕ ਦੇ ਹੇਠਾਂ ਚੁੰਬਕ ਦੇ ਨਾਲ ਕਾਲੇ ਪੈਕੇਟ ‘ਚ ਚਿਪਕਾ ਕੇ ਇਹ ਖੇਪ ਰੱਖੀ ਗਈ ਸੀ। ਬਾਰਡਰ ‘ਤੇ ਚੈਕਿੰਗ ਦੌਰਾਨ BSF ਜਵਾਨਾਂ ਦੀ ਨਜ਼ਰ ਨਸ਼ੇ ਦੀ ਖੇਪ ‘ਤੇ ਪੈ ਗਈ। ਇਸ ਬਾਰੇ ਜਦੋਂ ਡਰਾਈਵਰ ਤੋਂ ਪੁੱਛਿਆ ਗਿਆ, ਤਾਂ ਉਹ ਕੁਝ ਦੱਸ ਨਹੀਂ ਸਕਿਆ। BSF ਨੇ ਪੈਕੇਟ ਜ਼ਬਤ ਕਰ ਲਿਆ।
ਚੁੰਬਕ ਲੱਗੇ ਪੈਕੇਟ ਤੋਂ ਮਿਲਿਆ 400 ਗ੍ਰਾਮ ਨਸ਼ਾ
ਪੈਕੇਟ ਦਾ ਭਾਰ ਕਰੀਬ 400 ਗ੍ਰਾਮ ਹੈ। ਕੌਮਾਂਤਰੀ ਬਜ਼ਾਰ ਵਿੱਚ ਇਸਦੀ ਕੀਮਤ 3 ਕਰੋੜ ਰੁਪਏ ਦੇ ਕਰੀਬ ਦੱਸੀ ਜਾ ਰਹੀ ਹੈ। ਕਸਟਮ ਵਿਭਾਗ ਨੇ ਨਸ਼ੇ ਦੀ ਇਸ ਖੇਪ ਨੂੰ ਜ਼ਬਤ ਕਰ ਲਿਆ ਹੈ। BSF ਅਤੇ ਨਾਰਕੋਟਿਕਸ ਕੰਰੋਲ ਬਿਓਰੋ(NCB) ਨੇ ਪਾਕਿਸਤਾਨੀ ਡਰਾਈਵਰ ਨੂੰ ਗ੍ਰਿਫ਼ਤਾਰ ਕਰਕੇ ਉਸ ਕੋਲੋਂ ਪੁੱਛਗਿੱਛ ਸ਼ੁਰੂ ਕਰ ਦਿੱਤੀ ਹੈ।
ਬਲੂਚਿਸਤਾਨ ਦਾ ਰਹਿਣ ਵਾਲਾ ਹੈ ਮੁਲਜ਼ਮ ਡਰਾਈਵਰ
ਫੜੇ ਗਏ ਡਰਾਈਵਰ ਦੀ ਪਛਾਣ ਬਲੂਚਿਸਤਾਨ ਵਾਸੀ ਅਬਦੁਲ ਵਾਸ਼ੀ ਦੇ ਤੌਰ ‘ਤੇ ਹੋਈ ਹੈ। ਡਰਾਈਵਰ ਨੂੰ ਫੜ ਕੇ ਪੁੱਛਗਿੱਛ ਸ਼ੁਰੂ ਕਰ ਦਿੱਤੀ ਗਈ ਹੈ। ਪੁਰਾਣਾ ਰਿਕਾਰਡ ਖੰਗਾਲਿਆ ਜਾ ਰਿਹਾ ਹੈ। ਇਸ ਤੋਂ ਪਹਿਲਾਂ ਉਹ ਕਿੰਨੀ ਵਾਰ ICP ‘ਤੇ ਸਾਮਾਨ ਲੈ ਕੇ ਪਹੁੰਚਿਆ, ਤਾਂ ਜੋ ਇਸਦੇ ਜ਼ਰੀਏ ਪਹਿਲਾਂ ਹੋ ਚੁੱਕੀ ਤਸਕਰੀ ਬਾਰੇ ਵੀ ਪਤਾ ਲੱਗ ਸਕੇ।
ਅਫਗਾਨਿਸਤਾਨ ਦੇ ਰਸਤੇ ਭੇਜਿਆ ਜਾ ਰਿਹਾ ਨਸ਼ਾ
ਪੁਲਵਾਮਾ ਹਮਲੇ ਤੋਂ ਬਾਅਦ ਭਾਰਤ ਨੇ ਪਾਕਿਸਤਾਨ ਨਾਲ ਵਪਾਰਕ ਰਿਸ਼ਤੇ ਖਤਮ ਕਰ ਦਿੱਤੇ। ਅੰਮ੍ਰਿਤਸਰ ਦੇ ਅਟਾਰੀ ਬਾਰਡਰ ‘ਤੇ ਇੰਟੀਗ੍ਰੇਟੇਡ ਚੈੱਕ ਪੇਸਟ(ICP) ਦੇ ਮਾਧਿਅਮ ਨਾਲ ਸਿਰਫ਼ ਅਫਗਾਨਿਸਤਾਨ ਤੋਂ ਆਉਣ ਵਾਲੇ ਸਾਮਾਨ ਨੂੰ ਰਿਸੀਵ ਕੀਤਾ ਜਾ ਰਿਹਾ ਹੈ। ਇਸਦੀ ਆੜ ਵਿੱਚ ਪਾਕਿਸਤਾਨੀ ਤਸਕਰ ਲਗਾਤਾਰ ਨਸ਼ੀਲੇ ਪਦਾਰਥ ਭੇਜ ਰਹੇ ਹਨ।
