ਕਰਨਾਲ। ਹਰਿਆਣਾ ਦੇ ਕਰਨਾਲ ਵਿੱਚ ਕਿਸਾਨਾਂ ਨੇ ਜਿਲ੍ਹਾ ਪ੍ਰਸ਼ਾਸਨ ਨਾਲ ਗੱਲਬਾਤ ਫੇਲ੍ਹ ਹੋਣ ਤੋਂ ਬਾਅਦ ਜਿਲ੍ਹਾ ਸਕੱਤਰੇਤ ਦੇ ਬਾਹਰ ਡੇਰਾ ਲਗਾ ਲਿਆ ਹੈ। ਕਿਸਾਨ ਦਿੱਲੀ ਬਾਰਡਰ ਦੀ ਹੀ ਤਰ੍ਹਾਂ ਇਥੇ ਵੀ ਮੋਰਚਾ ਲਗਾਉਣ ਦੀ ਤਿਆਰੀ ਕਰ ਰਹੇ ਹਨ। ਰਾਤ ਕਰੀਬ ਸਾਢੇ 10 ਵਜੇ ਕਿਸਾਨਾਂ ਨੇ ਸਕੱਤਰੇਤ ਦੇ ਬਾਹਰ ਸੌਣ ਲਈ ਦਰੀਆਂ ਵਿਛਾ ਲਈਆਂ ਹਨ।
ਧਰਨੇ ‘ਚ ਰਾਕੇਸ਼ ਟਿਕੈਤ, ਬਲਬੀਰ ਸਿੰਘ ਰਾਜੇਵਾਲ, ਯੋਗੇਂਦਰ ਯਾਦਵ ਤੇ ਗੁਰਨਾਮ ਸਿੰਘ ਚਢੂਨੀ ਸਣੇ ਤਮਾਮ ਆਗੂ ਮੌਜੂਦ ਹਨ। ਕਿਸਾਨਾਂ ਨੇ ਡੀਜੇ ਦਾ ਇੰਤਜਾਮ ਵੀ ਕਰ ਲਿਆ ਹੈ। ਕਿਸਾਨਾਂ ਦੇ ਆਲੇ-ਦੁਆਲੇ ਤੈਨਾਤ ਪੁਲਿਸਕਰਮੀਆਂ ਅਤੇ ਪੈਰਾਮਿਲਟਰੀ ਫੋਰਸ ਦੇ ਜਵਾਨਾਂ ਨੇ ਵੀ ਇਥੇ ਵੀ ਮੈਟ ਵਿਛਾ ਲਏ ਹਨ।
ਗੁਰਦੁਆਰਿਆਂ ਤੋਂ ਆਇਆ 20 ਹਜਾਰ ਲੋਕਾਂ ਦਾ ਖਾਣਾ
ਜਾਣਕਾਰੀ ਮੁਤਾਬਕ, 2 ਗੁਰਦੁਆਰਿਆਂ ਨਿਰਮਲ ਕੁਟੀਆ ਅਤੇ ਡੇਰਾ ਕਾਰ ਸੇਵਾ ਵੱਲੋਂ ਪ੍ਰਦਰਸ਼ਨਕਾਰੀ ਕਿਸਾਨਾਂ ਅਤੇ ਪੁਲਿਸ ਜਵਾਨਾਂ ਲਈ ਲੰਗਰ ਪਹੁੰਚਾਇਆ ਗਿਆ। ਦੋਵੇਂ ਗੁਰਦੁਆਰਿਆਂ ਤੋਂ ਕਰੀਬ 20 ਹਜਾਰ ਲੋਕਾਂ ਦਾ ਲੰਗਰ ਲਿਆ ਕੇ ਵੰਡਿਆ ਗਿਆ।
ਬੈਰੀਕੇਡ ਤੋੜ ਕੇ ਸਕੱਤਰੇਤ ਪਹੁੰਚੇ ਕਿਸਾਨ
ਦਰਅਸਲ, ਪਿਛਲੇ ਦਿਨੀਂ ਹੋਏ ਲਾਠੀਚਾਰਜ ਦੇ ਵਿਰੋਧ ਵਿੱਚ ਕਿਸਾਨਾਂ ਵੱਲੋਂ ਮੰਗਲਵਾਰ ਨੂੰ ਮਹਾਂਪੰਚਾਇਤ ਸੱਦੀ ਗਈ ਸੀ, ਪਰ ਇਸੇ ਦੌਰਾਨ ਪ੍ਰਸ਼ਾਸਨ ਵੱਲੋਂ ਗੱਲਬਾਤ ਦਾ ਸੱਦਾ ਆਇਆ ਅਤੇ ਕਿਸਾਨਾਂ ਦਾ 11 ਮੈਂਬਰੀ ਵਫਦ ਪ੍ਰਸ਼ਾਸਨ ਨਾਲ ਗੱਲਬਾਤ ਲਈ ਗਿਆ। ਕਈ ਘੰਟੇ ਚੱਲੀ ਬੈਠਕ ਬੇਨਤੀਜਾ ਰਹੀ ਅਤੇ ਹਜਾਰਾਂ ਦੀ ਗਿਣਤੀ ਵਿੱਚ ਕਿਸਾਨਾਂ ਨੇ ਸਕੱਤਰੇਤ ਵੱਲ ਕੂਚ ਕਰ ਦਿੱਤਾ।
#WATCH Protesting farmers gherao Mini Secretariat in Karnal, after concluding Kisan Mahapanchayat at Anaj Mandi . #Haryana pic.twitter.com/qxMxm3v6LB
— ANI (@ANI) September 7, 2021
ਪੁਲਿਸ ਨੇ ਕਿਸਾਨਾਂ ਨੂੰ ਰੋਕਣ ਲਈ ਕਈ ਥਾਈਂ ਬੈਰੀਕੇਡ ਲਾਏ ਸਨ, ਪਰ ਕਿਸਾਨਾਂ ਦੀ ਜ਼ਬਰਦਸਤ ਭੀੜ ਅੱਗੇ ਪੁਲਿਸ ਦੇ ਸਾਰੇ ਇੰਤਜਾਮ ਧਰੇ ਦੇ ਧਰੇ ਰਹਿ ਗਏ।
ਕੀ ਹਨ ਕਿਸਾਨਾਂ ਦੀਆਂ ਮੰਗਾਂ?
• ਕਿਸਾਨਾਂ ਦੇ ਸਿਰ ਫੋੜਨ ਦਾ ਆਦੇਸ਼ ਦੇਣ ਵਾਲੇ SDM ਖਿਲਾਫ਼ 302 ਦਾ ਪਰਚਾ ਦਰਜ ਹੋਵੇ ਅਤੇ ਉਹਨਾਂ ਨੂੰ ਬਰਖਾਸਤ ਕੀਤਾ ਜਾਵੇ। (ਸਰਕਾਰ ਵੱਲੋਂ SDM ਦਾ ਤਬਾਦਲਾ ਕੀਤਾ ਗਿਆ ਹੈ)
• ਲਾਠੀਚਾਰਜ ਵਿੱਚ ਜਾਨ ਗਵਾਉਣ ਵਾਲੇ ਕਿਸਾਨ ਦੇ ਪਰਿਵਾਰ ਨੂੰ 25 ਲੱਖ ਰੁਪਏ ਮੁਆਵਜਾ ਅਤੇ ਸਰਕਾਰੀ ਨੌਕਰੀ ਦਿੱਤੀ ਜਾਵੇ।
• ਲਾਠੀਚਾਰਜ ਵਿੱਚ ਜ਼ਖਮੀ ਹੋਏ ਕਿਸਾਨਾਂ ਨੂੰ 2-2 ਲੱਖ ਦਾ ਮੁਆਵਜਾ ਦਿੱਤਾ ਜਾਵੇ।
