ਚੰਡੀਗੜ੍ਹ। ਪੰਜਾਬ ਦੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਸਿਆਸੀ ਮਾਮਲਿਆਂ ‘ਤੇ ਫੈਸਲੇ ਅਤੇ ਲੋਕਾਂ ਦੀਆਂ ਸਮੱਸਿਆਵਾਂ ਦੇ ਹੱਲ ਲਈ 4 ਮੈਂਬਰੀ ਕਮੇਟੀ ਦਾ ਗਠਨ ਕੀਤਾ ਹੈ। ਇਸ ਕਮੇਟੀ ਦੀ ਕਮਾਨ ਮੰਡੀ ਬੋਰਡ ਦੇ ਚੇਅਰਮੈਨ ਲਾਲ ਸਿੰਘ ਨੂੰ ਸੌਂਪੀ ਗਈ ਹੈ, ਜਦਕਿ ਉਹਨਾਂ ਤੋਂ ਇਲਾਵਾ ਲੁਧਿਆਣਾ ਕੇਂਦਰੀ ਤੋਂ ਵਿਧਾਇਕ ਸੁਰਿੰਦਰ ਡਾਵਰ, ਚੱਬੇਵਾਲ ਦੇ ਵਿਧਾਇਕ ਡਾ. ਰਾਜ ਕੁਮਾਰ ਚੱਬੇਵਾਲ ਅਤੇ ਫ਼ਰੀਦਕੋਟ ਤੋਂ ਵਿਧਾਇਕ ਕੁਸ਼ਲਦੀਪ ਢਿੱਲੋਂ ਹੋਣਗੇ। ਇਹ ਸਾਰੇ ਮੈਂਬਰ ਮੁੱਖ ਮੰਤਰੀ ਦੀ ਸਰਕਾਰੀ ਰਿਹਾਇਸ਼ ‘ਤੇ ਬੈਠਣਗੇ ਅਤੇ ਸਮੱਸਿਆਵਾਂ ਦਾ ਹੱਲ ਕੱਢਣਗੇ।
ਮੁੱਖ ਮੰਤਰੀ ਦਫਤਰ ਤੋਂ ਜਾਰੀ ਕੀਤੇ ਗਏ ਪੱਤਰ ਵਿੱਚ ਸਪੱਸ਼ਟ ਕੀਤਾ ਗਿਆ ਹੈ ਕਿ ਸੀਐੱਮ ਰਿਹਾਇਸ਼ ‘ਤੇ ਕਈ ਲੋਕ ਆਪਣੇ ਸਿਆਸੀ ਅਤੇ ਸੂਬਾ ਪੱਧਰੀ ਮੁੱਦੇ ਲਿਆਉਂਦੇ ਹਨ। ਅਜਿਹੇ ਮੁੱਦਿਆਂ ਨੂੰ ਹੱਲ ਕਰਨ ਲਈ ਹੀ ਚਾਰ ਮੈਂਬਰੀ ਕਮੇਟੀ ਦਾ ਗਠਨ ਕੀਤਾ ਗਿਆ ਹੈ।
ਢਿੱਲੋਂ ਦੀ ਕੈਪਟਨ ਧੜੇ ‘ਚ ਵਾਪਸੀ
ਸਭ ਤੋਂ ਅਹਿਮ ਗੱਲ ਇਹ ਵੀ ਹੈ ਕਿ ਕਮੇਟੀ ਦੇ ਗਠਨ ਦੇ ਨਾਲ ਹੀ ਕੁਸ਼ਲਦੀਪ ਢਿੱਲੋਂ ਦੀ ਕੈਪਟਨ ਧੜੇ ਵਿੱਚ ਵਾਪਸੀ ਹੋ ਗਈ ਹੈ। ਢਿੱਲੋਂ ਕਈ ਦਿਨਾਂ ਤੋਂ ਸਿੱਧੂ ਧੜੇ ਵਿੱਚ ਨਜ਼ਰ ਆ ਰਹੇ ਸਨ। ਢਿੱਲੋਂ ਉਸ ਬੈਠਕ ਵਿੱਚ ਹੀ ਮੌਜੂਦ ਸਨ, ਜਿਸ ਵਿੱਚ ਕੈਪਟਨ ਖਿਲਾਫ਼ ਗੈਰ-ਭਰੋਸਗੀ ਮਤੇ ‘ਤੇ ਚਰਚਾ ਹੋਈ ਸੀ। ਢਿੱਲੋਂ ਦਾ ਕੈਪਟਨ ਧੜੇ ਵਿੱਚ ਵਾਪਸ ਆਉਣਾ ਨਵਜੋਤ ਸਿੰਘ ਸਿੱਧੂ ਲਈ ਵੱਡਾ ਝਟਕਾ ਵੀ ਮੰਨਿਆ ਜਾ ਰਿਹਾ ਹੈ।
ਹੁਣ ਸੀਐੱਮ ਰਿਹਾਇਸ਼ ‘ਤੇ ਲੱਗੇਗਾ ‘ਦਰਬਾਰ’
ਮੰਨਿਆ ਜਾ ਰਿਹਾ ਹੈ ਕਿ ਮੁੱਖ ਮੰਤਰੀ ਨੇ ਇਹ ਫੈਸਲਾ ਇਸ ਲਈ ਵੀ ਲਿਆ ਹੈ, ਕਿਉਂਕਿ ਨਵਜੋਤ ਸਿੰਘ ਸਿੱਧੂ ਵੱਲੋਂ ਕਾਂਗਰਸ ਭਵਨ ਵਿੱਚ ਹਫਤੇ ਵਿੱਚ 5 ਦਿਨ ਇੱਕ ਮੰਤਰੀ ਦੇ ਬੈਠਣ ਦੇ ਪ੍ਰੋਗਰਾਮ ਵਿੱਚ ਵੱਡੀ ਗਿਣਤੀ ਵਿੱਚ ਲੋਕ ਆਪਣੇ ਕੰਮ ਕਰਵਾਉਣ ਲਈ ਉਥੇ ਪਹੁੰਚ ਰਹੇ ਸਨ। ਹੁਣ ਸੀਐੱਮ ਰਿਹਾਇਸ਼ ‘ਤੇ ਸਿਆਸੀ ਮਾਮਲਿਆਂ ਨੂੰ ਸੁਣਨ ਅਤੇ ਸੁਲਝਾਉਣ ਦੀ ਕਮਾਨ ਲਾਲ ਸਿੰਘ ਦੇ ਹੱਥਾਂ ਵਿੱਚ ਇਸ ਲਈ ਵੀ ਸੌਂਪੀ ਗਈ ਹੈ, ਕਿਉਂਕਿ ਉਹ ਨਾ ਸਿਰਫ਼ ਸਾਬਕਾ ਮੰਤਰੀ ਹਨ, ਬਲਕਿ ਕਾਂਗਰਸ ਦੇ ਕਾਰਜਕਾਰੀ ਪ੍ਰਧਾਨ ਵੀ ਰਹਿ ਚੁੱਕੇ ਹਨ। ਸੂਬੇ ਵਿੱਚ ਚਾਹੇ ਵਿਧਾਨ ਸਭਾ ਚੋਣਾਂ ਹੋਂ ਜਾਂ ਸਥਾਨਕ ਚੋਣਾਂ ਜਾਂ ਫਿਰ ਪੰਚਾਇਤੀ ਚੋਣਾਂ..ਲਾਲ ਸਿੰਘ ਨੂੰ ਸਿਆਸੀ ਮਾਮਲਿਆਂ ਦਾ ਚੰਗਾ ਤਜ਼ਰਬਾ ਹੈ।
ਕਮੇਟੀ ‘ਚ ‘ਜਾਤੀਗਤ’ ਸੰਤੁਲਨ
ਮੁੱਖ ਮੰਤਰੀ ਨੇ ਕਮੇਟੀ ਬਣਾਉਣ ਸਮੇਂ ਜਾਤੀਗਤ ਸੰਤੁਲਨ ਦਾ ਵੀ ਧਿਆਨ ਰੱਖਿਆ ਹੈ। ਡਾ. ਰਾਜ ਕੁਮਾਰ ਚੱਬੇਵਾਲ ਦਲਿਤ ਸਮਾਜ ਤੋਂ ਹਨ, ਤਾਂ ਸੁਰਿੰਦਰ ਡਾਵਰ ਪਾਰਟੀ ਦੇ ਹਿੰਦੂ ਚਿਹਰੇ ਹਨ। ਕੁਸ਼ਲਦੀਪ ਢਿੱਲੋਂ ਜੱਟ ਹਨ, ਤਾਂ ਲਾਲ ਸਿੰਘ OBC ਭਾਈਚਾਰੇ ਨਾਲ ਤਾਲੁੱਕ ਰਖਦੇ ਹਨ।
