ਨਿਊਜ਼ ਡੈਸਕ। ਨਵਜੋਤ ਸਿੰਘ ਸਿੱਧੂ ਨੇ ਪੰਜਾਬ ਪ੍ਰਦੇਸ਼ ਕਾਂਗਰਸ ਕਮੇਟੀ ਦੇ ਪ੍ਰਧਾਨ ਦੇ ਅਹੁਦੇ ਤੋਂ ਅਸਤੀਫਾ ਦੇ ਦਿੱਤਾ ਹੈ। ਆਪਣੇ ਅਸਤੀਫੇ ਵਿੱਚ ਉਹਨਾਂ ਨੇ ਸਿਰਫ਼ ਇੰਨਾ ਲਿਖਿਆ ਕਿ ਉਹ ਪੰਜਾਬ ਦੇ ਭਵਿੱਖ ਨਾਲ ਸਮਝੌਤਾ ਨਹੀਂ ਕਰ ਸਕਦੇ। ਅਜਿਹੇ ਵਿੱਚ ਸਿਆਸੀ ਗਲਿਆਰਿਆਂ ਵਿੱਚ ਚਰਚਾ ਆਮ ਹੈ ਕਿ ਸਿੱਧੂ ਨੂੰ ਅਜਿਹਾ ਕਿਹੜਾ ਸਮਝੌਤਾ ਕਰਨਾ ਪੈ ਰਿਹਾ ਸੀ, ਜਿਸ ਕਾਰਨ ਉਹਨਾਂ ਨੂੰ ਕਰੀਬ ਸਵਾ 2 ਮਹੀਨੇ ਬਾਅਦ ਹੀ ਆਪਣੀ ਪ੍ਰਧਾਨਗੀ ਛੱਡਣੀ ਪੈ ਗਈ।
ਇਸ ਰਿਪੋਰਟ ਵਿੱਚ ਅਸੀਂ ਉਹਨਾਂ ਸਾਰੇ ਪਹਿਲੂਆਂ ‘ਤੇ ਇੱਕ ਨਜ਼ਰ ਮਾਰਦੇ ਹਾਂ, ਜੋ ਸਿੱਧੂ ਦੇ ਅਸਤੀਫੇ ਦੇਣ ਦੇ ਕਾਰਨਾਂ ਵਿੱਚ ਇੱਕ ਤੋਂ ਬਾਅਦ ਇੱਕ ਕਰਕੇ ਜੁੜਦੇ ਚਲੇ ਗਏ ਅਤੇ ਆਖਰ ਉਹਨਾਂ ਨੇ ਅਸਤੀਫਾ ਦੇਣ ਦਾ ਮਨ ਬਣਾ ਲਿਆ। ਹਾਲਾਂਕਿ ਸ਼ੁਰੂਆਤ ਵਿੱਚ ਪੰਜਾਬ ਦੀ ਸਿਆਸੀ ਹਵਾ ਉਹਨਾਂ ਦੇ ਇਸ਼ਾਰੇ ਨਾਲ ਹੀ ਵਹਿੰਦੀ ਨਜ਼ਰ ਆਈ, ਪਰ ਹੌਲੀ-ਹੌਲੀ ਹਵਾ ਦਾ ਰੁਖ ਬਦਲਿਆ ਅਤੇ ਕੈਪਟਨ ਅਮਰਿੰਦਰ ਸਿੰਘ ਦਾ ਤਖਤਾਪਲਟ ਕਰਨ ਵਾਲੇ ਸਿੱਧੂ ਆਖਰਕਾਰ ਆਪਣਾ ਹੀ ਅਸਤੀਫਾ ਦੇ ਬੈਠੇ।
- 18 ਜੁਲਾਈ ਦਾ ਦਿਨ ਨਵਜੋਤ ਸਿੰਘ ਸਿੱਧੂ ਦੇ ਸਿਆਸੀ ਕਰੀਅਰ ਦਾ ਬੇਹੱਦ ਅਹਿਮ ਦਿਨ ਸੀ। ਇਹ ਉਹ ਦਿਨ ਸੀ, ਜਦੋਂ ਆਪਣੀ ਹੀ ਸਰਕਾਰ ਖਿਲਾਫ਼ ਬਗਾਵਤ ਦਾ ਝੰਡਾ ਬੁਲੰਦ ਕਰਨ ਵਾਲੇ ਸਿੱਧੂ ਨੂੰ ਕੈਪਟਨ ਅਮਰਿੰਦਰ ਸਿੰਘ ਦੇ ਵਿਰੋਧ ਦੇ ਬਾਵਜੂਦ ਸੂਬਾ ਕਾਂਗਰਸ ਦਾ ਪ੍ਰਧਾਨ ਲਾ ਦਿੱਤਾ ਗਿਆ। ਉਸ ਦਿਨ ਜਦੋਂ ਸਿੱਧੂ ਮੀਡੀਆ ਦੇ ਸਾਹਮਣੇ ਆਏ, ਤਾਂ ਉਹਨਾਂ ਦੇ ਚਿਹਰੇ ‘ਤੇ ਇੱਕ ਵੱਖਰੀ ਹੀ ਚਮਕ ਸੀ, ਜਿਵੇਂ ਕਿਸੇ ਜੰਗ ਵਿੱਚ ਫਤਹਿ ਹਾਸਲ ਕਰ ਲਈ ਹੋਵੇ।
- ਇਸ ਤੋਂ ਬਾਅਦ ਇੱਕ ਤੋਂ ਬਾਅਦ ਇੱਕ ਦਿਨ ਅਜਿਹਾ ਜੁੜਦਾ ਚਲਾ ਗਿਆ, ਜਦੋਂ ਪੰਜਾਬ ਦੀ ਸਾਰੀ ਆਬੋ-ਹਵਾ ਸਿੱਧੂ ਦੇ ਹੀ ਪੱਖ ਵਿੱਚ ਵਹਿੰਦੀ ਨਜਰ ਆ ਰਹੀ ਹੋਵੇ। ਸਿੱਧੂ ਆਪਣੀ ਟੀਮ ਵਿੱਚ ਆਏ ਦਿਨ ਆਪਣੇ ਚਹੇਤੇ ਚਿਹਰਿਆਂ ਨੂੰ ਸ਼ਾਮਲ ਕਰਦੇ ਰਹੇ, ਜਿਸ ‘ਤੇ ਹਾਈਕਮਾਂਡ ਨੇ ਵੀ ਕਦੇ ਇਤਰਾਜ਼ ਨਹੀਂ ਜਤਾਇਆ।
- ਫਿਰ ਆਇਆ 24 ਅਗਸਤ ਦਾ ਉਹ ਦਿਨ, ਜਦੋਂ ਸਿੱਧੂ ਧੜੇ ਦੇ 4 ਮੰਤਰੀਆਂ ਨੇ ਖੁੱਲ੍ਹ ਕੇ ਤਤਕਾਲੀ ਸੀਐੱਮ ਕੈਪਟਨ ਅਮਰਿੰਦਰ ਸਿੰਘ ਖਿਲਾਫ਼ ਮੋਰਚਾ ਖੋਲ੍ਹ ਦਿੱਤਾ ਅਤੇ ਉਹਨਾਂ ਨੂੰ ਬੇ-ਭਰੋਸਗੀ ਜਾਹਿਰ ਕਰਦੇ ਹੋਏ ਉਹਨਾਂ ਨੂੰ ਕੁਰਸੀ ਤੋਂ ਹਟਾਉਣ ਦੀ ਮੰਗ ਕਰ ਦਿੱਤੀ। ਬਾਗੀ ਮੰਤਰੀ ਬਕਾਇਦਾ ਦੇਹਰਾਦੂਨ ਜਾ ਕੇ ਸੂਬਾ ਕਾਂਗਰਸ ਇੰਚਾਰਜ ਹਰੀਸ਼ ਰਾਵਤ ਨਾਲ ਮੁਲਾਕਾਤ ਵੀ ਕਰਕੇ ਆਏ। ਹਾਲਾਂਕਿ ਰਿਪੋਰਟਾਂ ਆਈਆਂ ਕਿ ਹਰੀਸ਼ ਰਾਵਤ ਨੇ ਉਹਨਾਂ ਦੀ ਇੱਕ ਨਹੀਂ ਸੁਣੀ। ਬੇਸ਼ੱਕ ਇਸ ਪੂਰੀ ਸਿਆਸੀ ਹਲਚਲ ਨੇ ਪੰਜਾਬ ਵਿੱਚ ਤਖਤਾਪਲਟ ਦੀ ਚਰਚਾ ਜ਼ਰੂਰ ਛੇੜ ਦਿੱਤੀ ਸੀ।
- ਖੈਰ, ਸਾਰਾ ਘਟਨਾਕ੍ਰਮ ਬਗਾਵਤੀ ਖੇਡ ਤਲੇ ਜਿਉਂ ਦਾ ਤਿਉਂ ਚਲਦਾ ਰਿਹਾ। ਪਰ ਇੱਕ ਦਿਨ ਅਚਾਨਕ ਸੂਬੇ ਦੇ ਵਧੇਰੇਤਰ ਵਿਧਾਇਕਾਂ ਨੇ ਹਾਈਕਮਾਂਡ ਨੂੰ ਸੁਨੇਹਾ ਲਗਾ ਦਿੱਤਾ ਕਿ ਕਾਂਗਰਸ ਵਿਧਾਇਕ ਦਲ ਦੀ ਬੈਠਕ ਸੱਦੀ ਜਾਵੇ।
- ਆਖਰ 17 ਸਤੰਬਰ ਦੀ ਰਾਤ ਕਾਂਗਰਸ ਹਾਈਕਮਾਂਡ ਦਾ ਸੁਨੇਹਾ ਆਉਂਦਾ ਹੈ ਕਿ ਅਗਲੇ ਦਿਨ ਯਾਨੀ 18 ਸਤੰਬਰ ਨੂੰ ਪੰਜਾਬ ਕਾਂਗਰਸ ਵਿਧਾਇਕ ਦਲ ਦੀ ਬੈਠਕ ਸੱਦੀ ਗਈ ਹੈ। ਦਿਲਚਸਪ ਇਹ ਸੀ ਕਿ ਇਸ ਬੈਠਕ ਬਾਰੇ ਵਿਧਾਇਕ ਦਲ ਦੇ ਲੀਡਰ ਯਾਨੀ ਤਤਕਾਲੀ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੂੰ ਹੀ ਸੂਚਿਤ ਨਹੀਂ ਕੀਤਾ ਗਿਆ। ਇਸ ਬੈਠਕ ਲਈ ਬਕਾਇਦਾ ਕਾਂਗਰਸ ਵੱਲੋਂ 2 ਆਬਜ਼ਰਵਰ ਅਤੇ ਪੰਜਾਬ ਕਾਂਗਰਸ ਇੰਚਾਰਜ ਹਰੀਸ਼ ਰਾਵਤ ਨੂੰ ਪੰਜਾਬ ਭੇਜਿਆ ਜਾਂਦਾ ਹੈ। ਸਾਫ਼ ਸੀ ਕਿ ਬੈਠਕ ਕੈਪਟਨ ਅਮਰਿੰਦਰ ਸਿੰਘ ਖਿਲਾਫ਼ ਬੇ-ਭਰੋਸਗੀ ਮਤਾ ਲਿਆਉਣ ਲਈ ਸੱਦੀ ਗਈ ਹੈ।
- ਇਸ ਬੈਠਕ ਬਾਰੇ ਪਤਾ ਲੱਗਦੇ ਹੀ ਕੈਪਟਨ ਅਮਰਿੰਦਰ ਸਿੰਘ ਨੇ ਅਸਤੀਫਾ ਦੇਣ ਦਾ ਮਨ ਬਣਾਇਆ ਅਤੇ ਸ਼ਾਮ ਹੁੰਦੇ-ਹੁੰਦੇ ਇਹ ਕਹਿ ਕੇ ਆਪਣਾ ਅਹੁਦਾ ਛੱਡ ਦਿੱਤਾ ਕਿ ਉਹ ਕਾਂਗਰਸ ਪਾਰਟੀ ਵਿੱਚ ਹੋਰ ਜਲਾਲਤ ਬਰਦਾਸ਼ਤ ਨਹੀਂ ਕਰ ਸਕਦੇ।
ਕੈਪਟਨ ਦੇ ਅਸਤੀਫੇ ਮਗਰੋਂ ਹੀ ਸਿੱਧੂ ਦੀ ਉਲਟੀ ਗਿਣਤੀ ਵੀ ਸ਼ੁਰੂ ਹੋ ਗਈ। ਇੱਕ ਤੋਂ ਬਾਅਦ ਇੱਕ ਅਜਿਹੇ ਘਟਨਾਕ੍ਰਮ ਹੋਏ, ਜੋ ਸਿੱਧੂ ਦੇ ਅਸਤੀਫ਼ੇ ਦਾ ਕਾਰਨ ਬਣੇ।
- ਕੈਪਟਨ ਅਮਰਿੰਦਰ ਸਿੰਘ ਦੇ ਅਸਤੀਫੇ ਤੋਂ ਬਾਅਦ ਪੰਜਾਬ ਦੇ ਨਵੇਂ ਸੀਐੱਮ ਦੀ ਚੋਣ ਲਈ ਮੁੜ ਕਾਂਗਰਸ ਵਿਧਾਇਕ ਦਲ ਦੀ ਬੈਠਕ ਸੱਦੀ ਗਈ। ਚਰਚਾ ਸੀ ਕਿ ਹਾਈਕਮਾਂਡ ਨੇ ਸੁਨੀਲ ਜਾਖੜ ਨੂੰ ਪੰਜਾਬ ਦਾ ਪਹਿਲਾ ਹਿੰਦੂ ਸੀਐੱਮ ਬਣਾਏ ਜਾਣ ਦਾ ਮਨ ਬਣਾ ਲਿਆ ਹੈ। ਸੂਤਰ ਦੱਸਦੇ ਹਨ ਕਿ ਜਾਖੜ ਦੇ ਨਾਂਅ ‘ਤੇ ਸਿੱਧੂ ਵੀ ਰਾਜੀ ਸਨ, ਪਰ ਜਿਵੇਂ ਹੀ ਸੀਨੀਅਰ ਕਾਂਗਰਸੀ ਆਗੂ ਅੰਬਿਕਾ ਸੋਨੀ ਨੇ ਸਿੱਖ ਸਟੇਟ-ਸਿੱਖ ਸੀਐੱਮ ਦਾ ਮੁੱਦਾ ਚੁੱਕਿਆ, ਤਾਂ ਨਵਜੋਤ ਸਿੱਧੂ ਨੇ ਸੀਐੱਮ ਅਹੁਦੇ ਲਈ ਆਪਣੀ ਦਾਅਵੇਦਾਰੀ ਠੋਕ ਦਿੱਤੀ। ਚਰਚਾ ਸੁਖਜਿੰਦਰ ਰੰਧਾਵਾ ਦੇ ਨਾਂਅ ਦੀ ਹੋਈ, ਤਾਂ ਸਿੱਧੂ ਨੇ ਕਿਹਾ ਕਿ ਜੇਕਰ ਜੱਟ ਸਿੱਖ ਹੀ ਬਣਾਉਣਾ ਹੈ, ਤਾਂ ਮੈਨੂੰ ਮੁੱਖ ਮੰਤਰੀ ਬਣਾਓ।
- ਸਿੱਧੂ ਪਹਿਲਾਂ ਹੀ ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਸਨ, ਇਸ ਲਈ ਹਾਈਕਮਾਂਡ ਉਹਨਾਂ ਦੇ ਨਾਂਅ ‘ਤੇ ਸਹਿਮਤ ਨਹੀਂ ਹੋਇਆ। ਹਾਈਕਮਾਂਡ ਸੁਖਜਿੰਦਰ ਰੰਧਾਵਾ ਦੇ ਨਾਂਅ ਨੂੰ ਲਗਭਗ ਮਨਜੂਰੀ ਦੇ ਚੁੱਕਿਆ ਸੀ। ਇਹ ਖ਼ਬਰ ਰੰਧਾਵਾ ਤੇ ਉਹਨਾਂ ਦੇ ਸਮਰਥਕਾਂ ਤੱਕ ਵੀ ਪਹੁੰਚ ਗਈ, ਜਿਸ ਤੋਂ ਬਾਅਦ ਜਸ਼ਨ ਵੀ ਮਨਾਏ ਜਾਣ ਲੱਗੇ। ਪਰ ਕਿਉਂਕਿ ਸਿੱਧੂ, ਰੰਧਾਵਾ ਦੇ ਨਾਂਅ ‘ਤੇ ਮਨ੍ਹਾਂ ਕਰ ਚੁੱਕੇ ਸਨ ਤਾਂ ਹਾਈਕਮਾਂਡ ਨੇ ਉਹਨਾਂ ਦੀ ਥਾਂ SC ਕੈਟੇਗਰੀ ਤੋਂ ਆਉਣ ਵਾਲੇ ਚਰਨਜੀਤ ਸਿੰਘ ਚੰਨੀ ਨੂੰ ਸੂਬੇ ਦੀ ਕਮਾਨ ਸੌਂਪ ਦਿੱਤੀ।
- ਚੰਨੀ ਨੂੰ ਸੀਐੱਮ ਬਣਾਏ ਜਾਣ ‘ਤੇ ਸਿੱਧੂ ਖੁਸ਼ ਹਨ, ਕਿਉਂਕਿ ਸਿੱਧੂ ਮੰਨਦੇ ਸਨ ਕਿ ਚੰਨੀ ਓਹੀ ਕਰਨਗੇ ਜੋ ਸਿੱਧੂ ਉਹਨਾਂ ਨੂੰ ਕਰਨ ਲਈ ਕਹਿਣਗ। ਜਦਕਿ ਇਸਦੇ ਉਲਟ ਰੰਧਾਵਾ ਕਿਸੇ ਦੀ ਨਾ ਸੁਣਨ ਵਾਲਿਆਂ ਵਿੱਚੋਂ ਹਨ। ਸਿੱਧੂ ਜਗ੍ਹਾ-ਜਗ੍ਹਾ ਚੰਨੀ ਦੇ ਨਾਲ ਨਜ਼ਰ ਆਉਣ ਲੱਗੇ। ਕਦੇ ਸਿੱਧੂ ਨੂੰ ਸੀਐੱਮ ਦੇ ਮੋਢੇ ‘ਤੇ ਹੱਥ ਰੱਖੇ ਵੇਖਿਆ ਗਿਆ, ਤਾਂ ਕਦੇ ਉਹਨਾਂ ਦਾ ਹੱਥ ਫੜ ਕੇ ਅੱਗੇ ਕਰਦੇ ਹੋਏ। ਚਰਚਾ ਇਹ ਹੋਣ ਲੱਗੀ ਕਿ ਸਿੱਧੂ ਬਤੌਰ ਸੁਪਰ CM ਕੰਮ ਕਰ ਰਹੇ ਹਨ।
- ਕਰੀਬ 3 ਦਿਨ ਸੀਐੱਮ ਚੰਨੀ ਨਾਲ ਵਿਚਰਨ ਤੋਂ ਬਾਅਦ ਆਖਰ ਸਿੱਧੂ ਤਸਵੀਰ ‘ਚੋਂ ਗਾਇਬ ਹੋਣ ਲੱਗੇ। ਸੂਤਰ ਦੱਸਦੇ ਹਨ ਕਿ ਹਾਈਕਮਾਂਡ ਦੇ ਇਤਰਾਜ਼ ਤੋਂ ਬਾਅਦ ਸਿੱਧੂ ਨੂੰ ਪਿੱਛੇ ਹਟਣਾ ਪਿਆ। ਹਾਲਾਂਕਿ ਇਸਦਾ ਇੱਕ ਕਾਰਨ ਸੀਐੱਮ ਤੇ ਸਿੱਧੂ ਦਾ ਅੰਮ੍ਰਿਤਸਰ ਦੌਰਾ ਵੀ ਹੋ ਸਕਦਾ ਹੈ। ਦਰਅਸਲ, ਅੰਮ੍ਰਿਤਸਰ ਦੌਰੇ ‘ਤੇ ਚੰਨੀ ਨੇ ਸਿੱਧੂ ਨੂੰ ਉਸ ਵੇਲੇ ਸੀਐੱਮ ਦੀ ਪਾਵਰ ਦਾ ਅਹਿਸਾਸ ਕਰਵਾ ਦਿੱਤਾ ਸੀ, ਜਦੋਂ ਸਿੱਧੂ ਅੰਮ੍ਰਿਤਸਰ ਇੰਪਰੂਵਮੈਂਟ ਟਰੱਸਟ ਦੇ ਨਵੇਂ ਲਾਏ ਚੇਅਰਮੈਨ ਨੂੰ ਆਪਣੇ ਹੱਥੀਂ ਨਿਯੁਕਤੀ ਪੱਤਰ ਦੇਣ ਲੱਗੇ, ਤਾਂ ਚੰਨੀ ਨੇ ਉਹਨਾਂ ਦੇ ਹੱਥੋ ਨਿਯੁਕਤੀ ਪੱਤਰ ਵਾਪਸ ਲੈ ਲਿਆ। ਚੰਨੀ ਨੇ ਚਸ਼ਮਾ ਲਗਾ ਕੇ ਪਹਿਲਾਂ ਚੰਗੀ ਤਰ੍ਹਾਂ ਨਿਯੁਕਤੀ ਪੱਤਰ ਪੜ੍ਹਿਆ ਤੇ ਫਿਰ ਨਾਂਅ ਬੁਲਾ ਕੇ ਨਵੇਂ ਚੇਅਰਮੈਨ ਨੂੰ ਨਿਯੁਕਤੀ ਪੱਤਰ ਸੌਂਪਿਆ। ਮਾਹਰ ਦੱਸਦੇ ਹਨ ਕਿ ਸਿੱਧੂ ਨੇ ਇਸ ਨੂੰ ਆਪਣੀ ਮੁੱਛ ਦਾ ਸਵਾਲ ਬਣਾ ਲਿਆ।
- ਇਸ ਘਟਨਾ ਤੋਂ ਬਾਅਦ ਸਿੱਧੂ, ਸੀਐੱਮ ਚੰਨੀ ਨਾਲ ਕਿਸੇ ਵੀ ਦੌਰੇ ‘ਤੇ ਨਜ਼ਰ ਨਹੀਂ ਆਏ। ਹਾਲਾਂਕਿ ਅੰਦਰਖਾਤੇ ਲਏ ਗਏ ਕੁਝ ਫੈਸਲਿਆਂ ਦੇ ਚਲਦੇ ਸਿੱਧੂ ਲਗਾਤਾਰ ਸਰਕਾਰ ਤੋ ਖਫਾ ਚਲਦੇ ਆ ਰਹੇ ਹਨ।
- ਚੰਨੀ ਦੇ ਸੀਐੱਮ ਬਣਦੇ ਹੀ ਸਿੱਧੂ ਚਾਹੁੰਦੇ ਸਨ ਕਿ ਐਡਵੋਕੇਟ ਡੀ.ਐੱਸ. ਪਟਵਾਲੀਆ ਸੂਬੇ ਦੇ ਨਵੇਂ ਐਡਵੋਕੇਟ ਜਨਰਲ ਬਣਾਏ ਜਾਣ। ਉਹਨਾਂ ਦੇ ਨਾਂਅ ਦੀ ਫਾਈਲ ਅੱਗੇ ਵੀ ਭੇਜ ਦਿੱਤੀ ਗਈ, ਪਰ ਸੂਤਰਾਂ ਮੁਤਾਬਕ ਕੁਝ ਆਗੂਆਂ ਦੇ ਵਿਰੋਧ ਦੇ ਚਲਦੇ ਪਟਵਾਲੀਆ ਨੂੰ ਹਟਾ ਕੇ ਅਨਮੋਲ ਰਤਨ ਸਿੱਧੂ ਨੂੰ ਏਜੀ ਲਗਏ ਜਾਣ ਦੀ ਚਰਚਾ ਹੋਣ ਲੱਗੀ। ਹਾਲਾਂਕਿ ਆਖਰਕਾਰ ਇਹ ਅਹੁਦਾ ਸੀਨੀਅਰ ਵਕੀਲ ਅਮਰਪ੍ਰੀਤ ਸਿੰਘ ਦਿਓਲ ਨੂੰ ਦਿੱਤਾ ਗਿਆ।
- ਸੂਬੇ ਦੇ ਨਵੇਂ DGP ਲਾਏ ਜਾਣ ਮੌਕੇ ਵੀ ਚਰਚਾ ਸੀ ਕਿ ਸਿੱਧੂ, ਸਿਧਾਰਥ ਚਟੋਪਾਧਿਆਏ ਨੂੰ DGP ਲਾਉਣਾ ਚਾਹੁੰਦੇ ਸਨ। ਇਸਦੇ ਬਾਵਜੂਦ ਜਦੋਂ ਦਿਨਕਰ ਗੁਪਤਾ ਛੁੱਟੀ ‘ਤੇ ਗਏ, ਤਾਂ ਇਕਬਾਲਪ੍ਰੀਤ ਸਿੰਘ ਸਹੋਤਾ ਨੂੰ DGP ਦਾ ਚਾਰਜ ਦੇ ਦਿੱਤਾ ਗਿਆ।
- ਇਹਨਾਂ ਸਭ ਨਿਯੁਕਤੀਆਂ ਨੂੰ ਤਾਂ ਸਿੱਧੂ ਫੇਰ ਵੀ ਕਿਸੇ ਤਰ੍ਹਾਂ ਬਰਦਾਸ਼ਤ ਕਰ ਗਏ, ਪਰ ਉਹਨਾਂ ਨੂੰ ਸਭ ਤੋਂ ਵੱਡਾ ਧੱਕਾ ਉਸ ਵੇਲੇ ਲੱਗਿਆ, ਜਦੋਂ ਸਿੱਧੂ ਦੇ ਵਿਰੋਧ ਦੇ ਬਾਵਜੂਦ ਗੈਰ-ਕਾਨੂੰਨੀ ਮਾਈਨਿੰਗ ਦੇ ਇਲਜਾਮਾਂ ਵਿੱਚ ਘਿਰੇ ਰਾਣਾ ਗੁਰਜੀਤ ਸਿੰਘ ਅਤੇ ਕੈਪਟਨ ਅਮਰਿੰਦਰ ਸਿੰਘ ਦੀ ਰਿਸ਼ਤੇਦਾਰ ਅਰੁਣਾ ਚੌਧਰੀ ਨੂੰ ਪੰਜਾਬ ਕੈਬਨਿਟ ਵਿੱਚ ਜਗ੍ਹਾ ਦਿੱਤੀ ਗਈ।
- ਖੈਰ, ਕੈਬਨਿਟ ਵਿੱਚ ਤਾਂ ਸਿੱਧੂ ਦੇ ਵਿਰੋਧ ਦੇ ਬਾਵਜੂਦ 2 ਵਜੀਰ ਸ਼ਾਮਲ ਕਰ ਲਏ ਗਏ, ਪਰ ਸਿੱਧੂ ਇਸ ਨਾਲ ਵੀ ਸਮਝੌਤਾ ਕਰਨ ਨੂੰ ਤਿਆਰ ਸਨ। ਬਸ਼ਰਤੇ ਵਿਭਾਗਾਂ ਦੀ ਵੰਡ ਵਿੱਚ ਉਹਨਾਂ ਦੀ ਸੁਣੀ ਜਾਂਦੀ। ਸਿੱਧੂ ਚਾਹੁੰਦੇ ਸਨ ਕਿ ਗ੍ਰਹਿ ਵਿਭਾਗ ਸੀਐੱਮ ਚੰਨੀ ਆਪਣੇ ਕੋਲ ਰੱਖਣ, ਤਾਂ ਜੋ ਸਿੱਧੂ ਆਪਣੇ ਇਸ ਵਿਭਾਗ ‘ਤੇ ਪੂਰਾ ਕੰਟਰੋਲ ਰੱਖ ਸਕਣ। ਪਰ ਅਜਿਹਾ ਹੋਇਆ ਨਹੀਂ, ਸਿੱਧੂ ਦੀ ਖੁਆਇਸ਼ ਦੇ ਉਲਟ ਗ੍ਰਹਿ ਮੰਤਰਾਲਾ ਡਿਪਟੀ ਸੀਐੱਮ ਸੁਖਜਿੰਦਰ ਰੰਧਾਵਾ ਨੂੰ ਦੇ ਦਿੱਤਾ ਗਿਆ। ਸ਼ਾਇਦ ਇਹੀ ਕਾਰਨ ਰਿਹਾ ਕਿ ਵਿਭਾਗਾਂ ਦੀ ਵੰਡ ਹੁੰਦੇ ਹੀ ਸਿੱਧੂ ਨੇ ਪੰਜਾਬ ਕਾਂਗਰਸ ਦੀ ਪ੍ਰਧਾਨਗੀ ਛੱਡ ਦਿੱਤੀ।
ਇਸ ਸਭ ਦੇ ਵਿਚਾਲੇ ਚਰਚਾ ਇਹ ਵੀ ਆਮ ਹੈ ਕਿ ਸੀਐੱਮ ਚਰਨਜੀਤ ਸਿੰਘ ਚੰਨੀ ਦੀ ਵਧਦੀ ਲੋਕਪ੍ਰਿਅਤਾ ਵਿ ਸਿੱਧੂ ਨੂੰ ਅੰਦਰਖਾਤੇ ਪਰੇਸ਼ਾਨ ਜ਼ਰੂਰ ਕਰ ਰਹੀ ਹੋਵੇਗੀ। ਕਿਉਂਕਿ ਪਿਛਲੇ ਦਿਨੀਂ ਚੰਨੀ ਜਿਵੇਂ ਆਪਣੀ ਸੁਰੱਖਿਆ ਹਟਾ ਕੇ ਵਾਰ-ਵਾਰ ਆਮ ਲੋਕਾਂ ਨੂੰ ਮਿਲਦੇ ਰਹੇ ਉਸ ਨਾਲ ਉਹ ਅਗਾਮੀ ਚੋਣਾਂ ਲਈ ਬਤੌਰ ਸੀਐੱਮ ਉਮੀਦਵਾਰ ਆਪਣੀ ਕੁਰਸੀ ਜ਼ਰੂਰ ਪੱਕੀ ਕਰ ਸਕਦੇ ਹਨ। ਇਹ ਇਸ ਲਈ ਵੀ ਦਿਲਚਸਪ ਹੈ, ਕਿਉਂਕਿ ਸਿੱਧੂ ਨੂੰ ਪੰਜਾਬ ਕਾਂਗਰਸ ਇੰਚਾਰਜ ਹਰੀਸ਼ ਰਾਵਤ ਅਗਾਮੀ ਚੋਣਾਂ ਲਈ ਪੰਜਾਬ ਦੇ ਫੇਸ ਵਜੋਂ ਪੇਸ਼ ਕਰ ਚੁੱਕੇ ਹਨ।
