ਚੰਡੀਗੜ੍ਹ। ਪੰਜਾਬ ਕਾਂਗਰਸ ਪ੍ਰਧਾਨ ਦੇ ਅਹੁਦੇ ਤੋਂ ਅਸਤੀਫਾ ਦੇਣ ਮਗਰੋਂ ਨਵਜੋਤ ਸਿੰਘ ਸਿੱਧੂ ਪਹਿਲੀ ਵਾਰ ਸਾਹਮਣੇ ਆਏ। ਸੋਸ਼ਲ ਮੀਡੀਆ ‘ਤੇ ਵੀਡੀਓ ਜਾਰੀ ਕਰਕੇ ਸਿੱਧੂ ਨੇ ਸੂਬੇ ਦੀ ਚੰਨੀ ਸਰਕਾਰ ‘ਕੇ ਹਮਲਾ ਬੋਲਿਆ ਹੈ। ਸਿੱਧੂ ਨੇ AG ਤੇ DGP ਦੀ ਨਿਯੁਕਤੀ ਸਣੇ ਕੈਬਨਿਟ ਵਿਸਥਾਰ ‘ਚ ਦਾਗੀ ਮੰਤਰੀ ਲਏ ਜਾਣ ਦਾ ਮੁੱਦਾ ਚੁੱਕ ਕੇ ਸਰਕਾਰ ਦੀ ਨੀਅਤ ‘ਤੇ ਸਵਾਲ ਖੜ੍ਹੇ ਕੀਤੇ ਹਨ।
‘ਮੁਲਜ਼ਮਾਂ ਦੇ ਪਹਿਰੇਦਾਰਾਂ ਤੋਂ ਇਨਸਾਫ਼ ਦੀ ਉਮੀਦ ਗਲਤ’
ਬੇਅਦਬੀ ਕਾਂਡ ਦਾ ਜਿਕਰ ਕਰਦਿਆਂ ਨਵਜੋਤ ਸਿੱਧੂ ਨੇ ਕਿਹਾ, “ਜਿਸ ਇਨਸਾਫ਼ ਲਈ ਪੂਰਾ ਪੰਜਾਬ ਰਾਹ ਵੇਖ ਰਿਹਾ ਹੈ, ਉਸ ਇਨਸਾਫ਼ ਦਾ ਜਿੰਮਾ ਅਜਿਹੇ ਲੋਕਾਂ ਨੂੰ ਕਿਵੇਂ ਦੇ ਸਕਦੇ ਹਾਂ, ਜਿਹਨਾਂ ਨੇ ਪੂਰੇ ਮਾਮਲੇ ਵਿੱਚ ਬਾਦਲਾਂ ਨੂੰ ਕਲੀਨ ਚਿੱਟ ਦਿੱਤੀ ਹੋਵੇ ਅਤੇ ਛੋਟੇ-ਛੋਟੇ ਮੁੰਡਿਆਂ ‘ਤੇ ਤਸ਼ੱਦਦ ਢਾਈ ਹੋਵੇ। ਜਿਹਨਾਂ ਨੇ ਮੁਲਜ਼ਮਾਂ ਨੂੰ ਬਲੈਂਕੇਟ ਬੇਲ ਦਵਾਈ ਹੋਵੇ।“ ਦਰਅਸਲ, ਸਿੱਧੂ ਦਾ ਇਸ਼ਾਰਾ ਸੂਬੇ ਦੇ ਕਾਰਜਕਾਰੀ DGP ਲਾਏ ਗਏ ਇਕਬਾਲਪ੍ਰੀਤ ਸਿੰਘ ਸਹੋਤਾ ਅਤੇ AG ਨਿਯੁਕਤ ਕੀਤੇ ਗਏ ਅਮਰਪ੍ਰੀਤ ਸਿੰਘ ਦਿਓਲ ਵੱਲ ਹੈ।
- ਯਾਦ ਰਹੇ ਕਿ ਸਹੋਤਾ ਬੇਅਦਬੀ ਕੇਸ ਦੀ ਜਾਂਚ ਲਈ ਬਣੀ ਪਹਿਲੀ SIT ਦੇ ਪ੍ਰਮੁੱਖ ਸਨ। ਉਸ ਵੇਲੇ ਉਹਨਾਂ ਨੇ ਆਪਣੀ ਜਾਂਚ ਵਿੱਚ ਤਤਕਾਲੀ ਬਾਦਲ ਸਰਕਾਰ ਨੂੰ ਕਲੀਨ ਚਿੱਟ ਦੇ ਦਿੱਤੀ ਸੀ। ਉਹਨਾਂ ਨੇ ਇਸ ਮਾਮਲੇ ਵਿੱਚ ਕੁਝ ਨੌਜਵਾਨਾਂ ਨੂੰ ਗ੍ਰਿਫ਼ਤਾਰ ਵੀ ਕੀਤਾ ਸੀ।
- ਦੂਜਾ, AG ਏਪੀਐੱਸ ਦਿਓਲ ਕੋਟਕਪੂਰਾ ਗੋਲੀਕਾਂਡ ਵਿੱਚ ਸਾਬਕਾ DGP ਸੁਮੇਧ ਸੈਣੀ ਅਤੇ IG ਪਰਮਰਾਜ ਉਮਰਾਨੰਗਲ ਦੇ ਵਕੀਲ ਰਹਿ ਚੁੱਕੇ ਹਨ। ਉਹਨਾਂ ਨੇ ਦੋਵਾਂ ਨੂੰ ਬਲੈਂਕੇਟ ਬੇਲ ਦਵਾਈ ਸੀ।
हक़-सच की लड़ाई आखिरी दम तक लड़ता रहूंगा … pic.twitter.com/LWnBF8JQxu
— Navjot Singh Sidhu (@sherryontopp) September 29, 2021
‘ਹਾਈਕਮਾਂਡ ਨੂੰ ਗੁੰਮਰਾਹ ਨਹੀਂ ਹੋਣ ਦਵਾਂਗਾ’
ਸਿੱਧੂ ਨੇ ਕਿਹਾ ਕਿ ਜੋ ਲੋਕ ਮਸਲਿਆਂ ਦੀ ਗੱਲ ਕਰਦੇ ਸਨ, ਉਹ ਕਿਥੇ ਹਨ? ਕੀ ਅਸੀਂ ਇਹਨਾਂ ਸਾਧਨਾਂ ਨਾਲ ਆਪਣੇ ਮੁਕਾਮ ਤੱਕ ਪਹੁੰਚਾਂਗੇ? ਉਹਨਾਂ ਕਿਹਾ, “ਮੈਂ ਨਾ ਤਾਂ ਹਾਈਕਮਾਂਡ ਨੂੰ ਗੁੰਮਰਾਹ ਕਰ ਸਕਦਾ ਹਾਂ ਤੇ ਨਾ ਹੀ ਗੁੰਮਰਾਹ ਹੋਣ ਦੇ ਸਕਦਾ ਹਾਂ।”
ਅੜਾਂਗਾ ਵੀ ਤੇ ਲੜਾਂਗਾ ਵੀ- ਨਵਜੋਤ ਸਿੱਧੂ
ਸਿੱਧੂ ਨੇ ਕਿਹਾ ਕਿ ਉਹਨਾਂ ਦੀ ਕਿਸੇ ਨਾਲ ਕੋਈ ਨਿੱਜੀ ਲੜਾਈ ਨਹੀਂ ਹੈ ਤੇ ਨਾ ਹੀ ਕੋਈ ਕਿੜ ਹੈ। ਉਹਨਾਂ ਕਿਹਾ ਕਿ ਮੁੱਦਿਆਂ ਨਾਲ ਸਮਝੌਤਾ ਹੁੰਦਾ ਵੇਖ ਕੇ ਉਹ ਚੁੱਪ ਨਹੀਂ ਬੈਠ ਸਕਦੇ। ਉਹਨਾਂ ਕਿਹਾ, “ਇਨਸਾਫ਼ ਲਈ ਲੜਨ ਅਤੇ ਪੰਜਾਬ ਦੇ ਲੋਕਾਂ ਦੀ ਬਿਹਤਰੀ ਦੀ ਲੜਾਈ ਲਈ ਮੈਂ ਕਿਸੇ ਵੀ ਚੀਜ਼ ਦੀ ਕੁਰਬਾਨੀ ਦਵਾਂਗਾ। ਮੈਂ ਸਿਧਾਂਤਾਂ ‘ਤੇ ਖੜ੍ਹਾ ਹਾਂ, ਇਸ ਲਈ ਮੈਨੂੰ ਕਿਸੇ ਵੀ ਚੀਜ਼ ਬਾਰੇ ਸੋਚਣ ਦੀ ਲੋੜ ਨਹੀਂ।” ਸਿੱਧੂ ਨੇ ਠੋਕ ਕੇ ਕਿਹਾ, “ਦਾਗੀ ਲੀਡਰਾਂ ਤੇ ਦਾਗੀ ਅਫਸਰਾਂ ਦਾ ਸਿਸਟਮ ਤਾਂ ਭੰਨਿਆ ਸੀ, ਦੋਬਾਰਾ ਉਹਨਾਂ ਨੂੰ ਲਿਆ ਕੇ ਓਹੀ ਸਿਸਟਮ ਖੜ੍ਹਾ ਨਹੀਂ ਕੀਤਾ ਜਾ ਸਕਦਾ। ਇਸ ਲਈ ਮੈਂ ਅੜਾਂਗਾ ਵੀ ਤੇ ਲੜਾਂਗਾ ਵੀ। ਜੇਕਰ ਸਭ ਕੁਝ ਜਾਂਦਾ ਹੈ, ਤਾਂ ਜਾਵੇ।”
ਅੰਤ ਵਿੱਚ ਸਿੱਧੂ ਨੇ ਕਿਹਾ:-
ਅਸੂਲੋਂ ਪਰ ਆਂਚ ਆਏ ਤੋਹ ਟਕਰਾਨਾ ਜ਼ਰੂਰੀ ਹੈ…
ਜਿੰਦਾ ਹੋ ਤੋਹ ਜਿੰਦਾ ਨਜ਼ਰ ਆਨਾ ਜ਼ਰੂਰੀ ਹੈ…!!!
ਲਾਹੌਰ ਵਿੱਚ ਅੰਗ੍ਰੇਜਾਂ ਖਿਲਾਫ਼ ਲੜਾਈ ਵਿੱਚ ਇਹ ਬਜੁਰਗਾਂ ਦਾ ਨਾਅਰਾ ਸੀ। ਮੇਰੀ ਰੂਹ ਦੀ ਵੀ ਇਹੀ ਅਵਾਜ਼ ਹੈ। ਪੰਜਾਬ ਨੂੰ ਜਿਤਾਉਣ ਲਈ ਕੋਈ ਸਮਝੌਤਾ ਨਹੀਂ ਹੋਵੇਗਾ।
