ਬਿਓਰੋ। ਪੰਜਾਬ ਕਾਂਗਰਸ ਪ੍ਰਧਾਨ ਦੇ ਅਹੁਦੇ ਤੋਂ ਅਸਤੀਫਾ ਦੇਣ ਵਾਲੇ ਨਵਜੋਤ ਸਿੱਧੂ ਆਪਣੀ “AG ਹਟਾਓ, DGP ਹਟਾਓ” ਮੁਹਿੰਮ ‘ਤੇ ਲਗਾਤਾਰ ਅੜੇ ਹੋਏ ਹਨ। ਆਪਣੇ ਤਾਜਾ ਟਵੀਟ ਵਿੱਚ ਸਿੱਧੂ ਨੇ ਸੂਬੇ ਦੀ ਚੰਨੀ ਸਰਕਾਰ ਨੂੰ ਸਿੱਧੀ ਚੇਤਾਵਨੀ ਦਿੱਤੀ ਹੈ। ਉਹਨਾਂ ਕਿਹਾ ਕਿ ਜੇਕਰ ਇਹ ਦੋਵੇਂ ਅਫ਼ਸਰ ਨਾ ਹਟਾਏ ਗਏ, ਤਾਂ ਸਰਕਾਰ ਪੰਜਾਬ ਦੇ ਲੋਕਾਂ ਨੂੰ ਮੂੰਹ ਨਹੀਂ ਵਿਖਾ ਸਕੇਗੀ।
ਨਵਜੋਤ ਸਿੱਧੂ ਨੇ ਟਵਿਟਰ ‘ਤੇ ਲਿਖਿਆ, “ਬੇਅਦਬੀ ਕੇਸ ਵਿੱਚ ਇਨਸਾਫ਼ ਅਤੇ ਡਰੱਗ ਤਸਕਰੀ ਦੇ ਮੁੱਖ ਮੁਲਜ਼ਮ ਦੀ ਗ੍ਰਿਫ਼ਤਾਰੀ ਦੇ ਮੁੱਦੇ ‘ਤੇ ਹੀ 2017 ਵਿੱਚ ਸਾਡੀ ਸਰਕਾਰ ਬਣੀ ਸੀ। ਇਸ ਮੁੱਦੇ ‘ਤੇ ਅਸਫਲਤਾ ਦੇ ਚਲਦੇ ਹੀ ਲੋਕਾਂ ਨੇ ਪਿਛਲੇ ਸੀਐੱਮ ਨੂੰ ਹਟਾ ਦਿੱਤਾ। ਹੁਣ AG ਤੇ DGP ਦੀ ਨਿਯੁਕਤੀ ਨੇ ਪੀੜਤਾਂ ਦੇ ਜ਼ਖਮਾਂ ‘ਤੇ ਲੂਣ ਛਿੜਕਿਆ ਹੈ। ਉਹਨਾਂ ਨੂੰ ਹਟਾਇਆ ਜਾਣਾ ਚਾਹੀਦਾ ਹੈ, ਨਹੀਂ ਤਾਂ ਅਸੀਂ ਮੂੰਹ ਵਿਖਾਉਣ ਦੇ ਕਾਬਲ ਨਹੀਂ ਰਹਾਂਗੇ।”
ਹਾਲੇ DGP ਦੀ ਨਿਯੁਕਤੀ ਹੋਈ ਹੀ ਨਹੀਂ- ਚੰਨੀ
ਸਿੱਧੂ ਵੱਲੋ ਚੰਨੀ ਸਰਕਾਰ ‘ਤੇ ਲਗਾਤਾਰ ਕੀਤੇ ਜਾ ਰਹੇ ਹਮਲਿਆਂ ਦਾ ਸੀਐੱਮ ਚਰਨਜੀਤ ਸਿੰਘ ਚੰਨੀ ਨੇ ਵੀ ਜਵਾਬ ਦਿੱਤਾ ਹੈ। ਸੀਐੱਮ ਨੇ ਕਿਹਾ ਕਿ ਹਾਲੇ DGP ਦੀ ਨਿਯੁਕਤੀ ਹੋਈ ਹੀ ਨਹੀਂ। ਇਕਬਾਲਪ੍ਰੀਤ ਸਿੰਘ ਸਹੋਤਾ ਨੂੰ ਮਹਿਜ਼ ਕਾਰਜਕਾਰੀ DGP ਨਿਯੁਕਤ ਕੀਤਾ ਗਿਆ ਹੈ। ਉਹ ਅਸਥਾਈ ਤੌਰ ‘ਤੇ DGP ਵਜੋਂ ਕੰਮ ਕਰ ਰਹੇ ਹਨ। ਉਹਨਾਂ ਕਿਹਾ, “ਨਵੇਂ DGP ਲਈ ਅਸੀਂ UPSC ਨੂੰ 10 ਅਫ਼ਸਰਾਂ ਦੇ ਨਾਂਅ ਭੇਜੇ ਹਨ। ਉਥੋਂ ਜਿਹੜਾ ਪੈਨਲ ਆਵੇਗਾ, ਸਿੱਧੂ ਨਾਲ ਚਰਚਾ ਕਰਕੇ ਨਵੇਂ DGP ਦੀ ਨਿਯੁਕਤੀ ਕਰ ਦਿੱਤੀ ਜਾਵੇਗੀ। ਇਸ ਬਾਰੇ ਸਿੱਧੂ ਨੂੰ ਵੀ ਸਭ ਪਤਾ ਹੈ।” ਮੁੱਖ ਮੰਤਰੀ ਨੇ ਮੁੜ ਦੋਹਰਾਇਆ ਕਿ ਸਿੱਧੂ ਪਾਰਟੀ ਪ੍ਰਧਾਨ ਹਨ। ਉਹਨਾਂ ਨੂੰ ਜੇਕਰ ਕੋਈ ਫ਼ੈਸਲਾ ਜਾਂ ਗੱਲ ਚੰਗੀ ਨਹੀਂ ਲੱਗ ਰਹੀ, ਤਾਂ ਉਹ ਪਾਰਟੀ ਫੋਰਮ ‘ਤੇ ਆਪਣੀ ਗੱਲ ਰੱਖ ਸਕਦੇ ਹਨ।
ਸਿੱਧੂ ਨੇ ਕੱਲ੍ਹ ਵੀ ਵਿਖਾਏ ਸਨ ਸੀਐੱਮ ਨੂੰ ਤੇਵਰ !
ਨਵਜੋਤ ਸਿੱਧੂ ਨੇ ਬੀਤੇ ਦਿਨ ਵੀ ਟਵੀਟ ਕਰਕੇ ਇਸ ਵੱਲ ਇਸ਼ਾਰਾ ਕੀਤਾ ਸੀ ਕਿ ਉਹ ਨਿਯੁਕਤੀਆਂ ਰੱਦ ਕਰਵਾਏ ਬਿਨ੍ਹਾਂ ਨਹੀਂ ਮੰਨਣਗੇ। ਸਿੱਧੂ ਨੇ ਕਿਹਾ ਸੀ, “ਅਹੁਦਾ ਰਹੇ ਜਾਂ ਨਾ ਰਹੇ, ਰਾਹੁਲ ਗਾਂਧੀ ਅਤੇ ਪ੍ਰਿਅੰਕਾ ਗਾਂਧੀ ਨਾਲ ਖੜ੍ਹਾ ਰਹਾਂਗਾ। ਸਾਰੀਆਂ ਨਕਾਰਾਤਮਕ ਤਾਕਤਾਂ ਮੈਨੂੰ ਹਰਾਉਣ ਦੀ ਕੋਸ਼ਿਸ਼ ਕਰਦੀਆਂ ਰਹਿਣ, ਪਰ ਮੈ ਸਕਾਰਾਤਮਕ ਰਵੱਈਏ ਨਾਲ ਪੰਜਾਬ, ਪੰਜਾਬੀਅਤ ਅਤੇ ਹਰ ਪੰਜਾਬੀ ਦੀ ਜਿੱਤ ਲਈ ਕੰਮ ਕਰਦਾ ਰਹਾਂਗਾ।”
ਚੰਨੀ ਦੇ ਫਾਰਮੂਲੇ ਤੋਂ ਸਹਿਮਤ ਨਹੀਂ ਸਿੱਧੂ !
ਨਵਜੋਤ ਸਿੱਧੂ ਦਾ ਇਹ ਟਵੀਟ ਦੱਸਣ ਲਈ ਕਾਫੀ ਹੈ ਕਿ ਉਹ ਸੀਐੱਮ ਚਰਨਜੀਤ ਚੰਨੀ ਨਾਲ ਬਣੇ ਸਹਿਮਤੀ ਦੇ ਫਾਰਮੂਲੇ ‘ਤੇ ਸਹਿਮਤ ਨਹੀਂ ਹਨ। ਸੂਤਰ ਦੱਸਦੇ ਹਨ ਕਿ ਸਿੱਧੂ ਦੀ ਜਿਦ ਸੀ ਕਿ ਇਕਬਾਲਪ੍ਰੀਤ ਸਹੋਤਾ ਨੂੰ ਤੁਰੰਤ DGP ਦੇ ਅਹੁਦੇ ਤੋਂ ਲਾਂਭੇ ਕੀਤਾ ਜਾਵੇ, ਪਰ ਸਰਕਾਰ ਅਜਿਹਾ ਕਰਨ ਲਈ ਰਾਜੀ ਨਹੀਂ ਸੀ। ਹਾਲਾਂਕਿ ਸਰਕਾਰ ਨੇ 10 ਅਫ਼ਸਰਾਂ ਦਾ ਪੈਨਲ UPSC ਨੂੰ ਭੇਜ ਦਿੱਤਾ ਹੈ, ਜਿਹਨਾਂ ‘ਚੋਂ 3 ਨਾਂਅ ਕਦੋਂ ਆਉਣਗੇ, ਹਾਲੇ ਪਤਾ ਨਹੀਂ। ਲਿਹਾਜਾ ਸਿੱਧੂ ਨਹੀਂ ਚਾਹੁੰਦੇ ਕਿ ਚੋਣ ਜਾਬਤਾ ਲੱਗਣ ਤੱਕ ਸਰਕਾਰ ਸਹੋਤਾ ਨਾਲ ਵੀ ਕੰਮ ਨਾ ਚਲਾਉਂਦੀ ਰਹੇ।
ਓਧਰ, AG ਏਪੀਐੱਸ ਦਿਓਲ ਨੂੰ ਹਟਾਏ ਜਾਣ ਦੀ ਸਿੱਧੂ ਦੀ ਮੰਗ ‘ਤੇ ਵੀ ਸਰਕਾਰ ਰਾਜੀ ਨਹੀਂ ਹੋਈ। ਹਾਲਾਂਕਿ ਸਰਕਾਰ ਨੇ ਬੇਅਦਬੀ ਅਤੇ ਗੋਲੀਕਾਂਡ ਲਈ ਐਡਵੋਕੇਟ ਆਰ.ਐੱਸ. ਬੈਂਸ ਨੂੰ ਸਪੈਸ਼ਲ ਪ੍ਰੋਸਿਕਿਊਟਰ ਨਿਯੁਕਤ ਕਰ ਦਿੱਤਾ ਹੈ, ਪਰ ਸਿੱਧੂ ਇਸ ਨਾਲ ਵੀ ਸਹਿਮਤ ਨਹੀਂ।
