ਬਿਓਰੋ। ਆਪਣੀ ਹੀ ਸਰਕਾਰ ‘ਤੇੇ ਲਗਾਤਾਰ ਸਵਾਲ ਚੁੱਕ ਰਹੇ ਪੰਜਾਬ ਕਾਂਗਰਸ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਨੂੰ ਹੁਣ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਨੇ ਆਪਣੇ ਅੰਦਾਜ਼ ਵਿੱਚ ਜਵਾਬ ਦਿੱਤਾ ਹੈ। ਸਿੱਧੂ ਵੱਲੋਂ ਸੋਨੀਆ ਗਾਂਧੀ ਨੂੰ ਭੇਜੇ 13 ਏਜੰਡਿਆਂ ‘ਤੇ ਸੀਐੱਮ ਚੰਨੀ ਨੇ ਕਿਹਾ ਕਿ ਏਜੰੰਡੇ 13 ਹੋਣ ਜਾਂ 18 ਹੋਣ, 21 ਹੋਣ ਜਾਂ 24 ਸਾਰਿਆਂ ‘ਤੇ ਕੰਮ ਹੋਵੇਗਾ। ਕੋਈ ਵੀ ਪਹਿਲੂ ਛੋੜਿਆ ਨਹੀਂ ਜਾਵੇਗਾ। ਉਹਨਾਂ ਕਿਹਾ ਕਿ ਜੇਕਰ ਸਿੱਧੂ ਚਾਹੁਣ, ਤਾਂ ਅਗਲੀ ਕੈਬਨਿਟ ਦੀ ਬੈਠਕ ਵਿੱਚ ਉਹਨਾਂ ਨੂੰ ਨਾਲ ਬਿਠਾ ਲਿਆ ਜਾਵੇਗਾ।
ਚੰਨੀ ਨੇ ਕਿਹਾ, “ਸਿੱਧੂ ਸਾਡੇ ਪ੍ਰਧਾਨ ਹਨ ਅਤੇ ਉਹਨਾਂ ਨੂੰ ਮੁੱਦੇ ਚੁੱਕਣ ਦਾ ਹੱਕ ਹੈ। ਸਿੱਧੂ ਦੇ ਉੱਪਰ ਹਾਈਕਮਾਂਡ ਹੈ ਅਤੇ ਉਹ ਉਹਨਾਂ ਨੂੰ ਵੀ ਜਾਣਕਾਰੀ ਦਿੰਦੇ ਰਹਿੰਦੇ ਹਨ। ਪਾਰਟੀ ਦੀ ਵਿਚਾਰਧਾਰਾ ‘ਤੇ ਕੰਮ ਕਰਨਾ ਸਾਡੀ ਡਿਊਟੀ ਹੈ ਅਤੇ ਸਰਕਾਰ ਆਪਣਾ ਫਰਜ਼ ਪੂਰਾ ਕਰੇਗੀ।” ਚੰਨੀ ਨੇ ਅਖੀਰ ਵਿੱਚ ਇਹ ਕਹਿ ਕੇ ਸਿੱਧੂ ‘ਤੇ ਤੰਜ ਕਸਿਆ, “ਘਰ-ਘਰ ਚੱਲੀ ਗੱਲ, ਚੰਨੀ ਸਰਕਾਰ ਕਰੇਗੀ ਮਸਲੇ ਹੱਲ।”
ਸਿੱਧੂ ਨੇ ਹਾਈਕਮਾਂਡ ਨੂੰ ਭੇਜਿਆ ਸੀ 13 ਨੁਕਾਤੀ ਏਜੰਡਾ
ਦੱਸ ਦਈਏ ਕਿ ਨਵਜੋਤ ਸਿੰਘ ਸਿੱਧੂ ਨੇ ਐਤਵਾਰ ਨੂੰ ਆਪਣੇ ਸੋਸ਼ਲ ਮੀਡੀਆ ਅਕਾਊਂਟ ‘ਤੇ ਕਾਂਗਰਸ ਪ੍ਰਧਾਨ ਸੋਨੀਆ ਗਾਂਧੀ ਦੇ ਨਾਂਅ ਲਿਖੀ ਚਿੱਠੀ ਜਨਤੱਕ ਕੀਤੀ ਸੀ। ਸਿੱਧੂ ਨੇ ਇਸ ਚਿੱਠੀ ਵਿੱਚ ਪੰਜਾਬ ਦੇ 13 ਮੁੱਖ ਮੁੱਦਿਆਂ ਦਾ ਜਿਕਰ ਕਰਦਿਆਂ ਸੋਨੀਆ ਗਾਂਧੀ ਨੂੰ ਅਪੀਲ ਕੀਤੀ ਸੀ ਕਿ ਉਹ ਪੰਜਾਬ ਦੀ ਚੰਨੀ ਸਰਕਾਰ ਨੂੰ ਇਹ ਮੁੱਦੇ ਪਹਿਲਤਾ ਦੇ ਅਧਾਰ ‘ਤੇ ਹੱਲ ਕਰਨ ਦਾ ਆਦੇਸ਼ ਦੇਣ। ਇਸਦੇ ਨਾਲ ਹੀ ਸਿੱਧੂ ਨੇ ਅਗਾਮੀ ਚੋਣਾਂ ਲਈ ਮੈਨੀਫੈਸਟੋ ਦੇ ਮੁੱਦੇ ਡਿਸਕਸ ਕਰਨ ਲਈ ਸੋਨੀਆ ਗਾਂਧੀ ਤੋਂ ਮੁਲਾਕਾਤ ਦਾ ਸਮਾਂ ਵੀ ਮੰਗਿਆ ਹੈ।
