ਨਿਊਜ਼ ਡੈਸਕ। 6 ਸਾਲ ਪਹਿਲਾਂ ਪੰਜਾਬ ਵਿੱਚ ਇੱਕ ਅਜਿਹੀ ਵਾਰਦਾਤ ਹੋਈ, ਜਿਸਨੇ ਸੂਬੇ ਵਿੱਚ ਅੱਜ ਤੱਕ ਤਰਥੱਲੀ ਮਚਾਈ ਹੋਈ ਹੈ। ਆਲਮ ਇਹ ਹੈ ਕਿ ਪੰਜਾਬ ਦੀ ਸਿਆਸਤ ਆਏ ਦਿਨ ਇਸੇ ਇੱਕ ਮੁੱਦੇ ਦੇ ਆਲੇ-ਦੁਆਲੇ ਘੁੰਮਦੀ ਹੈ। ਇਥੋਂ ਤੱਕ ਕਿ ਹਾਲ ਹੀ ਵਿੱਚ ਪੰਜਾਬ ਵਿੱਚ ਹੋਏ ਸੱਤਾ ਦੇ ਤਖਤਾ ਪਲਟ ਵਿੱਚ ਵੀ ਇਸ ਮੁੱਦੇ ਦੀ ਭੂਮਿਕਾ ਬੇਹੱਦ ਅਹਿਮ ਰਹੀ। ਇਹ ਮੁੱਦਾ ਸਿੱਖਾਂ ਦੇ ਪਾਵਨ ਗ੍ਰੰਥ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਬੇਅਦਬੀ ਦਾ ਹੈ।
ਬੇਅਦਬੀ ਦੇ ਇਸ ਸਭ ਤੋਂ ਵੱਡੇ ਤੇ ਅਹਿਮ ਮਾਮਲੇ ਵਿੱਚ ਮੁਲਜ਼ਮ ਡੇਰਾ ਪ੍ਰੇਮੀਆਂ ਦੇ ਉਸ ਕਬੂਲਨਾਮੇ ਦੀ EXCLUSIVE ਕਾਪੀ “NewsDateline ਪੰਜਾਬ” ਦੇ ਹੱਥ ਲੱਗੀ ਹੈ, ਜੋ ਸਿੱਧੇ-ਸਿੱਧੇ ਡੇਰਾ ਸੱਚਾ ਸੌਦਾ ਸਿਰਸਾ ਦੇ ਮੁਖੀ ਗੁਰਮੀਤ ਸਿੰਘ ਰਾਮ ਰਹੀਮ ਨੂੰ ਕਟਹਿਰੇ ਵਿੱਚ ਖੜ੍ਹਾ ਕਰਦੀ ਹੈ। ਖਾਸਕਰ ਡੇਰਾ ਪ੍ਰੇਮੀ ਪ੍ਰਦੀਪ ਕੁਮਾਰ ਦਾ ਬਿਆਨ, ਜਿਸ ਵਿੱਚ ਉਸਨੇ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਬੇਅਦਬੀ ਲਈ ਸਿੱਧੇ-ਸਿੱਧੇ ਰਾਮ ਰਹੀਮ ਨੂੰ ਜਿੰਮੇਵਾਰ ਠਹਿਰਾਇਆ ਹੈ। ਇਹ ਬਿਆਨ ਮਹਿਜ਼ ਇੱਕ ਸਾਲ ਪੁਰਾਣਾ ਹੈ। ਪਿਛਲੇ ਸਾਲ 6 ਜੁਲਾਈ ਨੂੰ ਪ੍ਰਦੀਪ ਕੁਮਾਰ ਨੇ ਬੇਅਦਬੀ ਮਾਮਲੇ ਵਿੱਚ ਰਾਮ ਰਹੀਮ ਦਾ ਨਾਂਅ ਲਿਆ ਸੀ, ਹਾਲਾਂਕਿ ਇਸ ਤੋਂ ਪਹਿਲਾਂ 3 ਜੁਲਾਈ ਨੂੰ ਪ੍ਰਦੀਪ ਨੇ ਬਿਨ੍ਹਾਂ ਰਾਮ ਰਹੀਮ ਦਾ ਨਾਂਅ ਲਏ ਇਸ ਵਾਰਦਾਤ ਵਿੱਚ ਆਪਣੀ ਸ਼ਮੂਲੀਅਤ ਕਬੂਲੀ ਸੀ।
3 ਜੁਲਾਈ, 2020 ਨੂੰ ਦਿੱਤੇ ਆਪਣੇ ਕਬੂਲਨਾਮੇ ਵਿੱਚ ਪ੍ਰਦੀਪ ਕੁਮਾਰ ਨੇ ਕਿਹਾ ਸੀ:-
ਸਾਡਾ ਸਾਰਾ ਪਰਿਵਾਰ ਪ੍ਰੇਮੀ ਹੈ ਅਤੇ ਮੈਂ ਪਿੰਡ ਦਾ ਭੰਗੀਦਾਸ ਵੀ ਰਿਹਾ ਹਾਂ। ਸਾਲ 2015 ਨੂੰ ਸਾਡੇ ਪਿੰਡ ਹਰਜਿੰਦਰ ਸਿੰਘ ਮਾਝੀ ਦੇ ਦੀਵਾਨ ਲੱਗਣੇ ਸਨ, ਜਿਸਦਾ ਅਸੀਂ ਪ੍ਰੇਮੀ ਵਿਰੋਧ ਕਰਦੇ ਸੀ, ਕਿਉਂਕਿ ਹਰਜਿੰਦਰ ਮਾਝੀ ਦੀਵਾਨਾਂ ਵਿੱਚ ਪ੍ਰੇਮੀਆਂ ਦੇ ਖਿਲਾਫ ਬੋਲਦਾ ਸੀ। ਜਦੋਂ ਦੀਵਾਨ ਲੱਗਣੇ ਤੈਅ ਹੋ ਗਏ, ਤਾਂ ਮੈਂ ਗੁਰਦੇਵ ਸਿੰਘ, ਸੁਖਦੇਵ ਸਿੰਘ ਜਟਾਣਾ ਆਦਿ ਪ੍ਰੇਮੀ ਇਕੱਠੇ ਹੋ ਕੇ ਦੀਵਾਨਾਂ ਦਾ ਵਿਰੋਧ ਕਰਦੇ ਹੋਏ ਸਾਡੇ ਪ੍ਰੇਮੀਆਂ ਦੀ 25 ਮੈਂਬਰੀ ਕਮੇਟੀ ਦੇ ਮੈਂਬਰ ਗੋਪਾਲ ਕ੍ਰਿਸ਼ਨ ਵਾਸੀ ਬਰਗਾੜੀ ਪਾਸ ਗਏ, ਜਿਸਨੇ ਸਾਨੂੰ ਥਾਣਾ ਬਾਜਾਖਾਨਾ ਵਿਖੇ ਇਤਲਾਹ ਦੇਣ ਲਈ ਭੇਜ ਦਿੱਤਾ। ਅਸੀਂ ਥਾਣੇ ਇਤਲਾਹ ਦੇ ਦਿੱਤੀ ਕਿ ਹਰਜਿੰਦਰ ਮਾਝੀ ਦੇ ਦੀਵਾਨ ਨਹੀਂ ਲੱਗਣੇ ਚਾਹੀਦੇ, ਕਿਉਂਕਿ ਉਹ ਸਾਡੇ ਪਿਤਾ ਦੀ (ਸੰਤ ਗੁਰਮੀਤ ਸਿੰਘ ਰਾਮ ਰਹੀਮ) ਦੇ ਖਿਲਾਫ਼ ਭੱਦੀ ਸ਼ਬਦਾਵਲੀ ਦੀ ਵਰਤੋਂ ਕਰਦਾ ਹੈ। ਬਾਜਾਖਾਨਾ ਪੁਲਿਸ ਨੇ ਉਸੇ ਦਿਨ ਮੌਕੇ ‘ਤੇ ਆ ਕੇ ਦੋਵੇਂ ਧਿਰਾਂ ਦੀ ਸੁਲ੍ਹਾ ਸਫਾਈ ਕਰਾ ਦਿੱਤੀ ਸੀ ਅਤੇ ਗੁਰਦੁਆਰਾ ਕਮੇਟੀ ਨੇ ਜਿੰਮੇਵਾਰੀ ਲਈ ਸੀ ਕਿ ਭਾਈ ਹਰਜਿੰਦਰ ਮਾਝੀ ਦੀਵਾਨਾਂ ਦੌਰਾਨ ਡੇਰਾ ਸਿਰਸਾ ਅਤੇ ਸੰਤ ਗੁਰਮੀਤ ਸਿੰਘ ਰਾਮ ਰਹੀਮ ਖਿਲਾਫ਼ ਨਹੀਂ ਬੋਲਣਗੇ, ਜਿਸ ‘ਤੇ ਦੋਵੇਂ ਧਿਰਾਂ ਰਾਜੀ ਹੋ ਗਈਆਂ ਸਨ ਅਤੇ ਮਿਤੀ 20-3-2015 ਤੋਂ ਲੈ ਕੇ ਮਿਤੀ 22-3-2015 ਤੱਕ ਸ਼ਾਮ 7.00 ਵਜੇ ਤੋਂ 10.00 ਵਜੇ ਤੱਕ ਹਰਜਿੰਦਰ ਮਾਝੀ ਦੇ ਦੀਵਾਨ ਲਗਾਏ ਗਏ ਸੀ, ਜਿਸ ਵਿੱਚ ਨੇੜੇ ਦੇ ਪਿੰਡਾਂ ਦੀ ਸੰਗਤ ਵੀ ਆਈ ਸੀ। ਦੀਵਾਨਾਂ ਦੇ ਆਖਰੀ ਦਿਨ ਹਰਜਿੰਦਰ ਮਾਝੀ ਨੇ ਦੀਵਾਨ ਸ਼ੁਰੂ ਕਰਨ ਵਕਤ ਹੀ ਸਿੱਖੀ ਸਿਧਾਂਤਾਂ ਦੀ ਵਿਆਖਿਆ ਕਰਦੇ ਹੋਏ ਕਿਹਾ ਸੀ ਸੰਗਤ ਵਿੱਚ ਓਹੀ ਗੁਰੂ ਦੇ ਸਿੱਖ ਬੈਠਣ, ਜਿਹਨਾਂ ਨੇ ਕੋਈ ਧਾਗਾ ਤਵੀਤ ਜਾਂ ਲਾਕਟ ਨਹੀਂ ਪਾਇਆ ਹੋਇਆ। ਜੋ ਸੱਚੇ ਸਿੱਖ ਨਹੀਂ ਹਨ, ਉਹ ਦੀਵਾਨ ਛੱਡ ਕੇ ਜਾ ਸਕਦੇ ਹਨ, ਜਿਸ ਕਰਕੇ ਕੁਝ ਕੁ ਲੋਕਾਂ ਨੇ ਆਪਣੇ ਗਲਾਂ ਵਿੱਚ ਪਾਏ ਡੇਰਾ ਸੱਚਾ ਸੌਦਾ ਦੇ ਲਾਕਟ ਲਾਹ ਕੇ ਗੋਲਕ ਪਾਸ ਰੱਖ ਦਿੱਤੇ ਸੀ ਅਤੇ ਕੁਝ ਹੋਰ ਵਿਅਕਤੀਆਂ ਨੇ ਪ੍ਰਭਾਵਿਤ ਹੋ ਕੇ ਲਾਕਟ ਦਰੀਆਂ ਥੱਲੇ ਛੁਪਾ ਦਿੱਤੇ ਹਨ। ਜੋ ਇਸ ਗੱਲ ਦਾ ਸਾਰੇ ਪ੍ਰੇਮੀਆਂ ਨੂੰ ਬਹੁਤ ਦੁੱਖ ਲੱਗਾ। ਜਿਸ ‘ਤੇ ਮੈਂ, ਗੁਰਦੇਵ ਸਿੰਘ ਪ੍ਰੇਮੀ ਅਤੇ ਸੁਖਦੇਵ ਸਿੰਘ ਜਟਾਣਾ ਪ੍ਰੇਮੀਆਂ ਦੇ ਬਰਗਾੜੀ ਬਲਾਕ ਦੇ ਪ੍ਰਧਾਨ ਗੋਪਾਲ ਕ੍ਰਿਸ਼ਨ ਕੋਲ ਬਰਗਾੜੀ ਜਾ ਕੇ ਸਾਰੀ ਗੱਲਬਾਤ ਦੱਸੀ, ਜਿਸਨੇ ਸਾਡੀ ਗੱਲ ਸੁਣ ਕੇ ਕਿਹਾ ਕਿ ਇਹ ਕੰਮ ਮੇਰੇ ਵੱਸ ਦਾ ਨਹੀਂ ਆਪਾਂ ਇਸ ਸਬੰਧੀ ਮਹਿੰਦਰਪਾਲ ਬਿੱਟੂ ਨੂੰ ਕੋਟਕਪੂਰੇ ਜਾ ਕੇ ਮਿਲਦੇ ਹਾਂ, ਤਾਂ ਅਸੀਂ ਸਾਰੇ ਡੇਰਾ ਸੱਚਾ ਸੌਦਾ ਕੋਟਕਪੂਰਾ ਵਿਖੇ ਮਹਿੰਦਰਪਾਲ ਬਿੱਟੂ ਨੂੰ ਜਾ ਕੇ ਮਿਲੇ ਤੇ ਹਰਜਿੰਦਰ ਸਿੰਘ ਮਾਝੀ ਵੱਲੋਂ ਦੀਵਾਨਾਂ ਵਿੱਚ ਡੇਰਾ ਪ੍ਰੇਮੀਆਂ ਦੇ ਖਿਲਾਫ਼ ਬੋਲਣ ਅਤੇ ਲਾਕਟ ਲਹਾਉਣ ਬਾਰੇ ਸਾਰੀ ਗੱਲਬਾਤ ਦੱਸੀ, ਜਿਸਨੇ ਸਾਡੀ ਸਾਰੀ ਗੱਲਬਾਤ ਸੁਣ ਕੇ ਸਾਡੇ ਸਾਹਮਣੇ ਹੀ ਹਰਸ਼ ਧੂਰੀ, ਪਰਦੀਪ ਕਲੇਰ, ਸੰਦੀਪ ਬਰੇਟਾ ਵਗੈਰਾ ਜੋ ਸਾਡੀ ਡੇਰੇ ਦੀ ਨੈਸ਼ਨਲ ਕਮੇਟੀ ਦੇ ਮੈਂਬਰ ਹਨ, ਨਾਲ ਗੱਲਬਾਤ ਕਰਕੇ ਸਾਡੇ ਨਾਲ ਹੋਏ ਧੱਕੇ ਅਤੇ ਸਾਡੇ ਪਿਤਾ ਜੀ ਦੇ ਇਸ ਲਾਕਟ ਦੀ ਹੋਈ ਬੇਇੱਜਤੀ ਬਾਰੇ ਦੱਸਿਆ ਤਾਂ ਉਸਨੇ ਮਹਿੰਦਰਪਾਲ ਬਿੱਟੂ ਨੂੰ ਇਹ ਗੱਲ ਕਹੀ, “ਜਿਵੇਂ ਕਛਿਹਰੇ ਵਾਲੇ #$%#@#$#! ਸਿੱਖਾਂ ਨੇ ਸਾਡੇ ਪਿਤਾ ਜੀ ਦੀ ਨਿਸ਼ਾਨੀ ਨੂੰ ਮਿੱਟੀ ਵਿੱਚ ਰੋਲਿਆ ਹੈ ਉਸੇ ਤਰ੍ਹਾਂ ਇਹਨਾਂ ਦੇ ਗੁਰੂ ਨੂੰ ਵੀ ਰੋਲ ਦਿਓ” ਤੇ ਆਪਾਂ ਪਿੰਡ ਬੁਰਜ ਜਵਾਹਰ ਸਿੰਘ ਵਾਲਾ ਵਿੱਚ ਹੀ ਆਪਣੇ ਗੁਰੂ ਦੀ ਹੋਈ ਬੇਇੱਜ਼ਤੀ ਦਾ ਬਦਲਾ ਲੈਣਾ ਹੈ। ਅਸੀਂ ਸਾਰੇ ਗੱਲਬਾਤ ਕਰਕੇ ਵਾਪਸ ਘਰ ਆ ਗਏ। ਉਸ ਤੋਂ ਬਾਅਦ ਮੈਂ ਡੇਰੇ ਵਿਖੇ ਜਦੋਂ MSG-2 ਰਿਲੀਜ਼ ਹੋਈ, ਤਾਂ ਕੋਟਕਪੂਰਾ ਡੇਰਾ ਸੱਚਾ ਸੌਦਾ ਸਿਰਸਾ ਵੱਲੋਂ ਤਿਆਰ ਕੀਤੇ ਸ਼ਾਪਿੰਗ ਮਾਲ ਵਿੱਚ ਡਿਊਟੀ ਕਰਦਾ ਸੀ, ਜਿਥੇ ਮੈਨੂੰ ਸੁਖਜਿੰਦਰ ਸਿੰਘ ਉਰਫ ਸਨੀ, ਰਣਦੀਪ ਸਿੰਘ ਉਰਫ ਨੀਲਾ, ਸ਼ਕਤੀ ਸਿੰਘ ਜੋ ਬਿੱਟੂ ਦੇ ਖਾਸ ਬੰਦੇ ਹਨ, ਡੇਰੇ ਵਿੱਚ ਮਿਲੇ, ਜਿਹਨਾਂ ਨੇ ਮੈਨੂੰ ਕਿਹਾ ਕਿ ਬੁਰਜ ਜਵਾਹਰ ਸਿੰਘ ਵਾਲੇ ਪ੍ਰੇਮੀਆਂ ਤੋਂ ਤਾਂ ਕੁਝ ਹੋਇਆ ਨਹੀਂ, ਪਰ ਅਸੀਂ ਪਿਤਾ ਜੀ ਦੀ ਲਾਜ ਰੱਖੀ ਹੈ, ਸਾਡੇ ਪਿਤਾ ਜੀ ਦੀ ਬੁਰਜ ਜਵਾਹਰ ਸਿੰਘ ਵਾਲੇ ਦੀਵਾਨਾਂ ਵਿੱਚ ਹੋਈ ਬੇਇੱਜਤੀ ਦਾ ਬਦਲਾ ਅਸੀਂ ਪਿੰਡ ਦੇ ਗੁਰਦੁਆਰੇ ਵਿੱਚੋਂ ਇਹਨਾਂ ਵੱਡੇ #$%#@# ਸਿੱਖਾਂ ਦਾ ਗ੍ਰੰਥ ਚੋਰੀ ਕਰਕੇ, ਇਹਨਾਂ ਨੂੰ ਚੈਲੇਂਜ ਕਰਨ ਵਾਲੇ ਪੋਸਟਰ ਲਗਾ ਕੇ ਅਤੇ ਇਹਨਾਂ ਦੇ ਗੁਰੂ ਦੇ ਪੰਨੇ ਪਾੜ ਕੇ ਗਲੀਆਂ ਵਿੱਚ ਰੋਲ ਕੇ ਬਦਲਾ ਲੈ ਲਿਆ ਹੈ। ਇਸ ਸਬੰਧੀ ਮੈਂ ਪਹਿਲਾਂ ਵੀ ਕਈ ਵਾਰੀ ਦੱਸ ਚੁੱਕਾ ਹਾਂ, ਅੱਜ ਵੀ ਮੈਂ ਆਪ ਪਾਸ ਸਾਰਾ ਕੁਝ ਸੱਚ ਦੱਸ ਦਿੱਤਾ ਹੈ।
ਇਸ ਤੋਂ ਬਾਅਦ ਜਦੋਂ 6 ਜੁਲਾਈ, 2020 ਨੂੰ ਪ੍ਰਦੀਪ ਕੁਮਾਰ ਨੇ ਇਸ ਮਾਮਲੇ ਵਿੱਚ ਸਿੱਧੇ ਤੌਰ ‘ਤੇ ਰਾਮ ਰਹੀਮ ਦਾ ਨਾਂਅ ਲਿਆ, ਉਦੋਂ ਪ੍ਰਦੀਪ ਨੇ ਕਿਹਾ:-
ਮੈਂ ਆਪ ਪਾਸ ਪਹਿਲਾਂ ਮਿਤੀ 3-7-2020 ਨੂੰ ਆਪਣਾ ਬਿਆਨ ਲਿਖਵਾ ਚੁੱਕਿਆ ਹਾਂ। ਉਸ ਦਿਨ ਮੈਂ ਇਹ ਗੱਲ ਦੱਸਣੀ ਭੁੱਲ ਗਿਆ ਸੀ ਕਿ ਜੋ ਸਾਡੇ ਪਿੰਡ ਬੁਰਜ ਜਵਾਹਰ ਸਿੰਘ ਵਾਲਾ ਗੁਰਦੁਆਰਾ ਸਾਹਿਬ ਵਿਚੋਂ ਡੇਰਾ ਪ੍ਰੇਮੀਆਂ ਵੱਲੋਂ ਮਿਤੀ 1-6-2015 ਨੂੰ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦਾ ਪਾਵਨ ਸਰੂਪ ਚੋਰੀ ਕਰਕੇ ਉਸਦੇ ਅੰਗ ਬਰਗਾੜੀ ਵਿੱਚ ਖਿਲਾਰ ਕੇ ਬੇਅਦਬੀ ਕੀਤੀ ਸੀ। ਦਰਅਸਲ, ਇਸ ਕਹਾਣੀ ਪਿੱਛੇ ਡੇਰਾ ਸੱਚਾ ਸੌਦਾ ਦੇ ਉਸ ਸਮੇਂ ਦੇ ਮੁਖੀ ਗੁਰਮੀਤ ਸਿੰਘ ਰਾਮ ਰਹੀਮ ਦਾ ਹੱਥ ਹੈ, ਕਿਉਂਕਿ ਜਦੋਂ ਵੀ ਮੈਂ ਮਹਿੰਦਰਪਾਲ ਬਿੱਟੂ ਨੂੰ ਨਾਮ ਚਰਚਾ ਘਰ ਕੋਟਕਪੂਰਾ ਵਿੱਚ ਮਿਲਦਾ ਸੀ, ਤਾਂ ਉਦੋ ਬਿੱਟੂ ਇਹੀ ਗੱਲ ਕਹਿੰਦਾ ਸੀ ਕਿ ਤੁਹਾਡੇ ਪਿੰਡ ਮਾਝੀ ਨੇ ਦੀਵਾਨ ਵਿੱਚ ਸਾਡੇ ਪਿਤਾ ਜੀ ਦੇ ਨਾਮ ਅਤੇ ਨਿਸ਼ਾਨੀਆਂ ਨੂੰ ਮਿੱਟੀ ਵਿੱਚ ਰੋਲਿਆ ਹੈ। ਅਸੀਂ ਵੀ ਸਿੱਖਾਂ ਦੇ ਗੁਰੂ ਦੇ ਅੰਗ ਪਿੰਡ ਬੁਰਜ ਜਵਾਹਰ ਸਿੰਘ ਵਾਲਾ ਵਿੱਚ ਹੀ ਰੋਲ ਕੇ ਪਿਤਾ ਜੀ ਦੇ ਨਾਮ ਅਤੇ ਉਹਨਾਂ ਦੀਆਂ ਨਿਸ਼ਾਨੀਆਂ ਦੀ ਹੋਈ ਬੇਇੱਜ਼ਤੀ ਦਾ ਬਦਲਾ ਜ਼ਰੂਰ ਲਵਾਂਗੇ। ਮਹਿੰਦਰਪਾਲ ਬਿੱਟੂ, ਜੋ ਡੇਰੇ ਦੀ 45 ਮੈਂਬਰੀ ਕਮੇਟੀ ਦਾ ਮੈਂਬਰ ਸੀ, ਜੋ ਵੀ ਉਹ ਕੰਮ ਕਰਨ ਲਈ ਕਹਿੰਦਾ ਸੀ, ਉਹ ਹੁਕਮ ਡੇਰਾ ਮੁਖੀ ਗੁਰਮੀਤ ਰਾਮ ਰਹੀਮ ਦਾ ਹੀ ਹੁੰਦਾ ਸੀ। ਗੁਰਮੀਤ ਰਾਮ ਰਹੀਮ ਦੇ ਕਹਿਣ ‘ਤੇ ਹੀ ਉਸਦੇ ਚੇਲਿਆਂ ਨੇ ਗੁਰੂ ਗ੍ਰੰਥ ਸਾਹਿਬ ਜੀ ਦਦਾ ਪਾਵਨ ਸਰੂਪ ਸਾਡੇ ਪਿੰਡ ਬੁਰਜ ਜਵਾਹਰ ਸਿੰਘ ਵਾਲਾ ਤੋਂ ਚੋਰੀ ਕਰਕੇ ਗੁਰੂ ਸਾਹਿਬ ਦੀ ਬੇਅਦਬੀ ਕੀਤੀ ਹੈ। ਮਹਿੰਦਰਪਾਲ ਬਿੱਟੂ ਨੇ ਮੇਰੇ ਸਾਹਮਣੇ ਵੀ ਫੋਨ ‘ਤੇ ਗੱਲ ਕੀਤੀ ਸੀ ਅਤੇ ਕਿਹਾ ਸੀ ਕਿ ਮੈਂ ਪਿਤਾ ਜੀ ਗੁਰਮੀਤ ਰਾਮ ਰਹੀਮ ਨਾਲ ਗੱਲ ਕਰ ਲਈ ਹੈ, ਜਿਸਨੇ ਕਿਹਾ ਹੈ ਕਿ ਜਿਵੇਂ ਇਹਨਾਂ #@$%$# ਸਿੱਖਾਂ ਨੇ ਮੇਰਾ ਨਾਮ ਅਤੇ ਮੇਰੀ ਨਿਸ਼ਾਨੀ ਮਿੱਟੀ ਵਿੱਚ ਰੋਲੀ ਹੈ, ਉਸੇ ਤਰ੍ਹਾਂ ਇਹਨਾਂ ਦੇ ਗ੍ਰੰਥ ਸਾਹਿਬ ਨੂੰ ਵੀ ਮਿਰੱਟੀ ਵਿੱਚ ਮਿਲਾ ਦਿਓ, ਤਾਂ ਦੋ ਇਹਨਾਂ $#%$# ਨੂੰ ਸਬਕ ਮਿਲ ਜਾਵੇ। ਇਸ ਕੰਮ ਦਾ ਅਸਲ ਦੋਸ਼ੀ ਡੇਰਾ ਸਿਰਸਾ ਦਾ ਮੁਖੀ ਗੁਰਮੀਤ ਸਿੰਘ ਰਾਮ ਰਹੀਮ ਹੈ, ਜਿਸਨੂੰ ਇਸ ਕੇਸ ਵਿੱਚ ਗ੍ਰਿਫ਼ਤਾਰ ਕਰਕੇ ਉਸਨੂੰ ਸਖਤ ਤੋਂ ਸਖਤ ਸਜਾ ਮਿਲਣੀ ਚਾਹੀਦੀ ਹੈ।
ਨਾ ਸਿਰਫ਼ ਪ੍ਰਦੀਪ ਕੁਮਾਰ, ਬਲਕਿ ਬੇਅਦਬੀ ਕੇਸ ਦੇ ਮੁੱਖ ਮੁਲਜ਼ਮ ਮਹਿੰਦਰਪਾਲ ਸਿੰਘ ਬਿੱਟੂ ਦਾ ਕਬੂਲਨਾਮਾ ਵੀ “NewsDateline ਪੰਜਾਬ” ਦੇ ਹੱਥ ਲੱਗਿਆ ਹੈ। ਡੇਰੇ ਦੀ 45 ਮੈਂਬਰੀ ਕਮੇਟੀ ਦੇ ਮੈਂਬਰ ਮਹਿੰਦਰਪਾਲ ਸਿੰਘ ਬਿੱਟੂ ਨੇ ਆਪਣੇ ਕਬੂਲਨਾਮੇ ਵਿੱਚ ਕਿਹਾ:-
ਮੈਂ ਸਾਲ 1985 ਵਿੱਚ ਡੇਰਾ ਸੱਚਾ ਸੌਦਾ ਤੋਂ ਨਾਮ ਦਾਨ ਲਿਆ ਸੀ ਅਤੇ ਸਾਲ 2000 ਵਿੱਚ ਸ਼ਹਿਰ ਦਾ ਭੰਗੀਦਾਸ ਬਣਿਆ ਸੀ। ਸਾਲ 2006 ਵਿੱਚ ਮੈਂ ਸਟੇਟ ਕਮੇਟੀ ਮੈਂਬਰ (ਡੇਰਾ ਸੱਚਾ ਸੌਦਾ) ਬਣਿਆ ਸੀ, ਜੋ ਕਿ 45 ਮੈਂਬਰ ਹੁੰਦੇ ਹਨ, ਜੋ ਪੂਰੇ ਸਟੇਟ ਨੂੰ ਕੰਟਰੋਲ ਕਰਦੇ ਹਨ। ਮੈਂ ਡੇਰੇ ਦੀਆਂ ਸਾਰੀਆਂ ਸਰਗਰਮੀਆਂ ਵਿੱਚ ਵੱਧ-ਚੜ੍ਹ ਕੇ ਹਿੱਸਾ ਲੈਂਦਾ ਰਿਹਾ ਹਾਂ। ਸੰਨ 2009 ਦੀ ਗੱਲ ਹੈ, ਬਾਜਾਖਾਨਾ ਵਿਖੇ ਦਾਦੂਵਾਲ ਦਾ ਸਮਾਗਮ ਹੋਇਆ ਸੀ, ਜਿਸ ਵਿੱਚ ਉਸਨੇ ਸਾਡੇ ਡੇਰੇ ਦੇ ਧਰਮ ਗੁਰੂ ਸੰਤ ਗੁਰਮੀਤ ਰਾਮ ਰਹੀਮ ਦੇ ਖਿਲਾਫ਼ ਗਲਤ ਸ਼ਬਦ ਵਰਤੇ ਸਨ ਅਤੇ ਉਹਨਾਂ ਨੂੰ ਮੰਦਾ ਆਖਿਆ ਸੀ, ਜਿਸਦੇ ਵਿਰੋਧ ਵਿੱਚ ਅਸੀਂ ਵੀ ਉਥੇ ਇਕ ਇਕੱਠ ਕੀਤਾ, ਤਾਂ ਜੋ ਪੁਲਿਸ ਉੱਪਰ ਦਬਦਬਾ ਬਣਾਇਆ ਜਾ ਸਕੇ ਅਤੇ ਦਾਦੂਵਾਲ ਨੂੰ ਇਹ ਸਭ ਕਰਨ ਤੋਂ ਰੋਕਿਆ ਜਾ ਸਕੇ। ਫਿਰ ਸੰਨ 2011 ਵਿੱਚ ਪਿੰਡ ਧੱਲੇਕੇ ਵਿਖੇ ਡੇਰਾ ਪ੍ਰੇਮੀਆਂ ਅਤੇ ਕੱਟੜ ਪੰਥੀਆਂ ਵਿੱਚ ਝਗੜਾ ਹੋਇਆ ਸੀ, ਜਿਸ ਵਿੱਚ ਇੱਕ ਪੁਲਿਸ ਅਧਿਕਾਰੀ ਨੇ ਸਾਡੇ ਡੇਰਾ ਪ੍ਰੇਮੀ ਨਾਲ ਵਧੀਕੀ ਕੀਤੀ ਅਤੇ ਉਸ ਨੂੰ ਜਿਪਸੀ ਪਿੱਛੇ ਪਾ ਕੇ ਘਸੀਟਿਆ, ਜਿਸਦੇ ਵਿਰੋਧ ਵਿੱਚ ਮੋਗਾ ਵਿੱਚ ਸਥਿਤ ਨਾਮ ਚਰਚਾ ਘਰ ਵਿੱਚ ਸਾਡਾ ਇੱਕ ਇਕੱਠ ਹੋਇਆ, ਜਿਸਦੀ ਅਗਵਾਈ ਮੈਂ ਅਤੇ ਮੇਰੇ ਨਾਲ ਜਗਜੀਤ ਸਿੰਘ ਬੀਜਾਪੁਰ, ਗੁਰਜੀਤ ਸਿੰਘ ਮੋਗਾ, ਹਰਜੀਤ ਸਿੰਘ ਅਬੋਹਰ, ਹਰਿੰਦਰ ਸ਼ਰਮਾ ਸੰਗਰੂਰ, ਬਲਦੇਵ ਕ੍ਰੀਸ਼ਨ ਸੁਨਾਮ, ਪਿਰਥੀ ਸਿੰਘ ਬਾਘਾਪੁਰਾਣਾ ਅਤੇ ਹੋਰ ਆਗੂਆਂ ਨੇ ਕੀਤੀ, ਜਿਨ੍ਹਾਂ ਦੇ ਨਾਮ ਮੈਨੂੰ ਯਾਦ ਨਹੀਂ ਹਨ, ਕਿਉਂਕਿ ਉਹ ਚਾਰ ਹਜਾਰ ਬੰਦਿਆਂ ਦਾ ਇਕੱਠ ਸੀ। ਮੈਨੂੰ ਅਤੇ ਮੇਰੇ ਨਾਲ ਜਗਜੀਤ ਸਿੰਘ, ਜੋਰਾ ਸਿੰਘ ਅਤੇ ਗੁਰਜੀਤ ਸਿੰਘ ਨੂੰ ਮੋਗਾ ਦੇ ਉਸ ਸਮੇਂ ਦੇ SSP ਸ੍ਰੀ ਸਨੇਹਦੀਪ ਸ਼ਰਮਾ ਨੇ ਗੱਲਬਾਤ ਕਰਨ ਲਈ ਬੁਲਾਇਆ ਅਤੇ ਪਿਛੋਂ ਕੁਝ ਨੌਜਵਾਨ ਡੇਰਾ ਪ੍ਰੇਮੀ ਭੜਕ ਗਏ, ਜਿਨ੍ਹਾਂ ਨੇ PRTC ਬੱਸ ਦੀ ਭੰਨਤੋੜ ਕੀਤੀ ਅਤੇ ਉਸਦੇ ਇੱਕ ਟਾਇਰ ਨੂੰ ਅੱਗ ਲਾ ਦਿੱਤੀ। ਉਸ ਤੋਂ ਬਾਅਦ ਭਿੱਖੀ ਵਿਖੇ ਵੀ ਦਾਦੂਵਾਲ ਦਾ ਇੱਕ ਸਮਾਗਮ ਹੋਇਆ, ਜਿਸਦੇ ਵਿਰੋਧ ਵਿੱਚ ਅਸੀਂ ਇਕੱਠੇ ਹੋਏ, ਜਿਥੇ ਪੁਲਿਸ ਨੇ ਸਾਨੂੰ ਪਾਸੇ ਕਰ ਦਿੱਤਾ ਅਤੇ ਪੁਲਿਸ ਦੀ ਦਾਦੂਵਾਲ ਦੇ ਬੰਦਿਆਂ ਨਾਲ ਝੜਪ ਹੋ ਗਈ। ਮੈਨੂੰ ਅਤੇ ਮੇਰੇ ਸਾਥੀਆਂ ਨੂੰ ਗੈਰ-ਕਾਨੂੰਨੀ ਕੰਮ ਕਰਨ ਲਈ ਹਦਾਇਤਾਂ ਦੇਣ ਵਾਲੇ ਹਰਸ਼ ਧੂਰੀ, ਪ੍ਰਦੀਪ ਕਲੇਰ ਅਤੇ ਸੰਦੀਪ ਬਰੇਟਾ ਉਸਦੇ ਨਾਲ ਸੀ। ਜਿਨ੍ਹਾਂ ਨੇ ਮੈਨੂੰ ਕਿਹਾ ਕਿ ਦਾਦੂਵਾਲ ਦਾ ਕੰਡਾ ਹੀ ਕਢਣਾ ਪੈਣਾ ਹੈ ਅਤੇ ਉਸਨੂੰ ਜਾਨੋਂ ਮਾਰ ਦਿਓ, ਜਿਸ ਤੋਂ ਬਾਅਦ ਮੈਂ ਕੋਟਕਪੂਰੇ ਗਿਆ ਅਤੇ ਉਥੇ ਜਾ ਕੇ 2 ਆਦਮੀਆਂ ਨਾਲ ਗੱਲ ਕੀਤੀ, ਜਿਨ੍ਹਾਂ ਦੇ ਨਾਮ ਸੁਖਜਿੰਦਰ ਸਿੰਘ ਉਰਫ ਸੰਨੀ ਕੰਡਾ ਅਤੇ ਨੀਲਾ ਫ਼ਰੀਦਕੋਟ ਹਨ। ਉਹਨਾਂ ਨੇ ਮੈਨੂੰ ਕਿਹਾ ਕਿ ਤੁਸੀਂ ਸਾਡੇ ਨਾਲ ਸੰਗਤ ਭੇਜ ਦਿਓ, ਅਸੀਂ ਇਸ ਵਾਰ ਦਾਦੂਵਾਲ ਦੇ ਖਿਲਾਫ ਕੁਝ ਨਾ ਕੁਝ ਕਰਕੇ ਹੀ ਮੁੜਾਂਗੇ, ਜਿਸ ‘ਤੇ ਅਸੀਂ ਕੋਟਕਪੂਰਾ ਨਾਮ ਚਰਚਾ ਘਰ ਵਿੱਚ ਇਕੱਠ ਕੀਤਾ, ਜਿਸ ਵਿੱਚ ਬਲਾਕ ਕਮੇਟੀਆਂ ਦੇ ਜੋਨਾਂ ਦੇ 15 ਮੈਂਬਰ ਆਏ, ਪਰ ਕਿਸੇ ਨੇ ਵੀ ਹਾਮੀ ਨਹੀਂ ਭਰੀ ਅਤੇ ਸਾਡਾ ਮਿਸ਼ਨ ਫੇਲ੍ਹ ਹੋ ਗਿਆ। ਜਦੋਂ ਜਦੋਂ ਮੈਂ ਡੇਰਾ ਸਿਰਸਾ ਜਾਂਦਾ ਸੀ, ਉਥੇ ਹਰਸ਼ ਅਤੇ ਪ੍ਰਦੀਪ ਦੋਵੇਂ ਗੈਰ-ਕਾਨੂੰਨੀ ਕੰਮ ਕਰਨ ਲਈ ਉਕਸਾਉਂਦੇ ਸੀ ਅਤੇ ਕਹਿੰਦੇ ਸੀ ਦਾਦੂਵਾਲ ਦੇ ਖਿਲਾਫ਼ ਕੁਝ ਕਰੋ, ਕਿਉਂਕਿ ਉਹ ਨਾ ਤਾਂ ਸਾਡੀ ਫਿਲਮ ਲੱਗਣ ਦਿੰਦਾ ਹੈ, ਨਾ ਨਾਮ ਚਰਚਾ ਕਰਨ ਦਿੰਦਾ ਹੈ ਅਤੇ ਨਾ ਹੀ ਕੋਈ ਹੋਰ ਕੰਮ ਕਰਨ ਦਿੰਦਾ ਹੈ।
ਉਸ ਤੋਂ ਬਾਅਦ ਪਿੰਡ ਬੁਰਜ ਜਵਾਹਰ ਸਿੰਘ ਵਾਲਾ ਵਿਖੇ ਕਥਾ ਵਾਚਕ ਮਾਝੀ ਦਾ ਇੱਕ ਸਮਾਗਮ ਹੋਇਆ, ਜਿਸ ਤੋਂ ਪ੍ਰਭਾਵਿਤ ਹੋ ਕੇ ਸਾਡੇ ਕਈ ਡੇਰਾ ਪ੍ਰੇਮੀਆਂ ਨੇ ਡੇਰੇ ਵੱਲੋਂ ਦਿੱਤੇ ਲੌਕਟ ਲਾਹ ਕੇ ਸੁੱਟ ਦਿੱਤੇ, ਜਿਸ ਬਾਰੇ ਮੈਨੂੰ ਬਰਗਾੜੀ ਨਾਮ ਚਰਚਾ ਘਰ ਵਿੱਚ ਪਤਾ ਲੱਗਾ। ਇਸ ਬਾਰੇ ਮੈਂ ਹਰਸ਼ ਅਤੇ ਪ੍ਰਦੀਪ ਨੂੰ ਇਤਲਾਹ ਕੀਤੀ, ਜਿਹਨਾਂ ਨੇ ਮੈਨੂੰ ਕਿਹਾ ਕਿ ਜੇਕਰ ਇਹ ਸਾਡੇ ਗੁਰੂ ਨੂੰ ਪੈਰਾਂ ਵਿੱਚ ਰੋਲਦੇ ਹਨ, ਤਾਂ ਤੁਸੀਂ ਵੀ ਕੁਝ ਕਰੋ, ਜਿਸ ‘ਤੇ ਮੈਂ, ਸੰਨੀ ਕੰਡਾ ਅਤੇ ਨੀਲਾ ਨੇ ਮੀਟਿੰਗ ਕਰਕੇ ਸਲਾਹ ਕੀਤੀ ਕਿ ਅਸੀਂ ਇਨ੍ਹਾਂ ਦਾ ਗੁਰੂ ਚੋਰੀ ਕਰਕੇ ਲੈ ਜਾਵਾਂਗੇ, ਜਿਸ ਉੱਪਰ ਇਹਨਾਂ ਦੋਵਾਂ ਨੇ ਹੋਰ ਪ੍ਰੇਮੀਆਂ ਨਾਲ ਮਿਲ ਕੇ ਬੁਰਜ ਜਵਾਹਰ ਸਿੰਘ ਵਾਲਾ ਸਥਿਤ ਗੁਰਦੁਆਰੇ ਤੋਂ ਗੁਰੂ ਗ੍ਰੰਥ ਸਾਹਿਬ ਚੋਰੀ ਕਰ ਲਿਆ, ਉਸ ਸਮੇਂ ਮੈਂ ਇਨ੍ਹਾਂ ਦੇ ਨਾਲ ਨਹੀਂ ਸੀ, ਜਿਸ ਬਾਰੇ ਮੈਨੂੰ ਇਨ੍ਹਾਂ ਨੇ 2 ਦਿਨ ਬਾਅਦ ਦੱਸਿਆ। ਇਨ੍ਹਾਂ ਨੇ ਮੈਨੂੰ ਕਿਹਾ ਕਿ ਗੁਰੂ ਗ੍ਰੰਥ ਸਾਡੇ ਕੋਲ ਹੈ, ਤੁਸੀਂ ਫਿਕਰ ਨਾ ਕਰੋ, ਉਸ ਤੋਂ 3 ਮਹੀਨੇ ਬਾਅਦ ਮੈਂ ਨੀਲਾ ਫਰੀਦਕੋਟ, ਸੰਨੀ ਕੰਡਾ ਤੇ ਸ਼ਕਤੀ ਸਿੰਘ ਇਕੱਠੇ ਹੋਏ ਅਤੇ ਇਨ੍ਹਾਂ ਨੇ ਕਿਹਾ ਕਿ ਅਸੀਂ ਪੋਸਟਰ ਲਾ ਕੇ ਕੱਟੜਪੰਥੀਆਂ ਨੂੰ ਚੈਲੇਂਜ ਕਰਨਾ ਹੈ, ਜਿਥੇ ਇਹ ਵੀ ਲਿਖਿਆ ਗਿਆ ਕਿ ਅਸੀਂ ਗੁਰੂ ਗ੍ਰੰਥ ਸਾਹਿਬ ਦੇ ਪੇਜ ਫਾੜ ਕੇ ਸੁੱਟਾਂਗੇ। ਉਥੇ ਉਸ ਪੋਸਟਰ ਦਾ ਇੱਕ ਕੱਚਾ ਪੇਜ ਮੈਂ ਲਿਖਿਆ, ਜਿਸ ਵਿੱਚ ਸਾਡੀ ਚਾਰਾਂ ਦੀ ਰਾਏ ਸੀ। ਇਸ ਤੋਂ ਹਫਤਾ ਦੱਸ ਦਿਨ ਬਾਅਦ ਇਨ੍ਹਾਂ ਨੇ ਇਸ ਕਾਰਵਾਈ ਨੂੰ ਅੰਜਾਮ ਦਿੱਤਾ, ਜਿਸ ਵਿੱਚ ਮੈਂ ਇਨ੍ਹਾਂ ਦੇ ਨਾਲ ਨਹੀਂ ਸੀ ਗਿਆ। ਇਨ੍ਹਾਂ ਨੇ ਬਰਗਾੜੀ ਵਿੱਚ ਪੋਸਟਰ ਲਗਾਏ ਅਤੇ ਗੁਰੂ ਗ੍ਰੰਥ ਸਾਹਿਬ ਦੇ ਪੱਤਰੇ ਖਿਲਾਰੇ, ਜਿਸ ਬਾਰੇ ਇਨ੍ਹਾਂ ਨੇ ਮੈਨੂੰ ਅਗਲੇ ਦਿਨ ਦੱਸਿਆ। ਉਸ ਤੋਂ ਬਾਅਦ ਕੋਟਕਪੂਰਾ ਸ਼ਹਿਰ ਵਿੱਚ ਬਹੁਤ ਰੌਲਾ ਪੈ ਗਿਆ ਅਤੇ ਇਨ੍ਹਾਂ ਨੇ ਮੇਰੇ ਨਾਲ ਗੱਲ ਕੀਤੀ, ਜਿਸ ‘ਤੇ ਮੈਂ ਹਰਸ਼ ਨਾਲ ਗੱਲ ਕੀਤੀ, ਜਿਸਨੇ ਮੈਨੂੰ ਕਿਹਾ ਕਿ ਤੁਸੀਂ ਘਬਰਾਓ ਨਾ ਅਤੇ ਕਿਸੇ ਨੂੰ ਕੁਝ ਨਾ ਦੱਸਿਓ ਸਾਡੀ ਊਪਰਲੇ ਲੈਵਲ ‘ਤੇ ਸੂਤ ਹੈ ਜਦੋਂ ਕੋਈ ਗੱਲ ਹੋਈ ਤਾਂ ਅਸੀਂ ਆਪੇ ਸਾਂਭ ਲਵਾਂਗੇ। ਜਿਸਦੇ ਵਿਰੋਧ ਵਿੱਚ ਥਾਂ-ਥਾਂ ‘ਤੇ ਧਰਨੇ ਲਗਣ ਲੱਗ ਪਏ ਅਤੇ ਮੈਨੂੰ ਇਨ੍ਹਾਂ ਮੁੰਡਿਆਂ ਨੇ ਕਿਹਾ ਕਿ ਹੁਣ ਤੁਸੀਂ ਗੁਰੂ ਗ੍ਰੰਥ ਸਾਂਭੋ, ਸਾਨੂੰ ਤਾਂ ਡਰ ਲੱਗਦਾ ਹੈ, ਜਿਸ ‘ਤੇ ਮੈਂ ਇਨ੍ਹਾਂ ਨੂੰ ਸਲਾਹ ਦਿੱਤੀ ਕਿ ਅਜੇ ਖੜ੍ਹ ਜਾਓ, ਜਿਥੇ ਪਿਆ ਹੈ ਪਿਆ ਰਹਿਣ ਦਿਓ। ਇਸ ਤੋਂ ਬਾਅਦ 15 ਦਿਨ ਬਾਅਦ ਜਦੋਂ ਟਿਕਾਅ ਹੋ ਗਿਆ, ਮੈਂ ਅਤੇ ਸੰਨੀ ਨਾਮ ਚਰਚਾ ਘਰ ਵਿੱਚ ਮਿਲੇ, ਜਿਥੇ ਮੈਂ ਸੰਨੀ ਨੂੰ ਕਿਹਾ ਕੱਲ੍ਹ ਮੈਨੂੰ ਗੁਰੂ ਗ੍ਰੰਥ ਸਾਹਿਬ ਫੜਾ ਦਿਓ। ਉਸਨੇ ਮੈਨੂੰ ਸੰਧੂਆਂ ਪਿੰਡ ਵਿੱਚ ਬੁਲਾ ਕੇ ਗੁਰੂ ਗ੍ਰੰਥ ਸਾਹਿਬ ਦੇਣ ਦੀ ਗੱਲ ਕਹੀ ਅਤੇ ਮੈਨੂੰ ਸੰਧੂਆਂ ਵਿਖੇ ਦੇ ਦਿੱਤਾ, ਜੋ ਮੈਂ ਜਾ ਕੇ ਸੁੱਟ ਦਿੱਤਾ, ਜਿਸਦਾ ਮੈਨੂੰ ਬਹੁਤ ਦੁੱਖ ਹੈ ਅਤੇ ਪਛਤਾਵਾ ਹੈ। ਮੈਂ ਗੁੰਮਰਾਹ ਹੋ ਗਿਆ ਸੀ ਅਤੇ ਮੈਂ ਇਦਾਂ ਦਾ ਬੰਦਾ ਨਹੀਂ ਹਾਂ। ਮੇਰਾ ਆਪਣਾ ਵਿਆਹ ਵੀ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦੀ ਹਾਜ਼ਰੀ ਵਿੱਚ ਹੋਇਆ ਸੀ। ਮੈਂ ਆਪਣੇ ਕੀਤੇ ‘ਤੇ ਸ਼ਰਮਿੰਦਾ ਹਾਂ ਅਤੇ ਦੋਵੇਂ ਹੱਥ ਜੋੜ ਕੇ ਗੁਰੂ ਨੂੰ ਹਾਜ਼ਰ ਨਾਜ਼ਰ ਜਾਣਦਿਆਂ ਮੈਂ ਆਪਣੇ ਕੀਤੇ ਦੀ ਮੁਆਫੀ ਮੰਗਦਾ ਹਾਂ। ਗੁਰੂ ਅਤੇ ਅਦਾਲਤ ਮੇਰੇ ਕੀਤੇ ਗੁਨਾਹ ਲਈ ਬਖਸ਼ ਦੇਣ। ਮੈਂ ਫਿਰ ਕਦੇ ਇਦਾਂ ਦਾ ਕੁਝ ਨਹੀਂ ਕਰਾਂਗਾ। ਮੈਨੂੰ ਮੁਆਫ਼ ਕੀਤਾ ਜਾਵੇ। ਮੈਨੂੰ ਆਪਣੇ ਕੀਤੇ ਦਾ ਅਫ਼ਸੋਸ ਹੈ।
