ਬਿਓਰੋ। ਬੀਜੇਪੀ ਨਾਲ ਹੱਥ ਮਿਲਾਉਣ ਦੀ ਤਿਆਰੀ ਕਰ ਰਹੇ ਪੰਜਾਬ ਦੇ ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਸੋਮਵਾਰ ਨੂੰ ਹਰਿਆਣਾ ਦੇ ਮੁੱਖ ਮੰਤਰੀ ਮਨੋਹਰ ਲਾਲ ਨਾਲ ਚੰਡੀਗੜ੍ਹ ਵਿੱਚ ਉਹਨਾਂ ਦੀ ਰਿਹਾਇਸ਼ ਵਿਖੇ ਮੁਲਾਕਾਤ ਕੀਤੀ। ਦੋਵਾਂ ਵਿਚਕਾਰ ਪੰਜਾਬ ਦੇ ਸਿਆਸੀ ਹਾਲਾਤ ਅਤੇ ਕਿਸਾਨੀ ਮੁੱਦੇ ‘ਤੇ ਚਰਚਾ ਹੋਈ। ਹਾਲਾਂਕਿ ਕੈਪਟਨ ਨੇ ਇਸ ਨੂੰ ਮਹਿਜ਼ ਸ਼ਿਸ਼ਟਾਚਾਰ ਮੁਲਾਕਾਤ ਦੱਸਿਆ ਅਤੇ ਕਿਹਾ ਕਿ ਉਹ ਸਿਰਫ਼ ਸ਼ਿਸ਼ਟਾਚਾਰ ਦੇ ਨਾਤੇ ਕੌਫੀ ਪੀਣ ਲਈ ਮੁੱਖ ਮੰਤਰੀ ਕੋਲ ਆਏ ਸਨ।
ਮੁਲਾਕਾਤ ਤੋਂ ਬਾਅਦ ਕੈਪਟਨ ਨੇ ਕਿਹਾ ਕਿ 2022 ਵਿੱਚ ਪੰਜਾਬ ‘ਚ ਉਹ ਸਹਿਯੋਗੀਆਂ ਨਾਲ ਮਿਲ ਕੇ ਸਰਕਾਰ ਬਣਾਉਣਗੇ। ਕੈਪਟਨ ਨੇ ਕਿਹਾ ਕਿ ਪੰਜਾਬ ਵਿੱਚ ਉਹਨਾਂ ਵੱਲੋਂ ਤੇਜੀ ਨਾਲ ਮੈਂਬਰਸ਼ਿਪ ਡਰਾਈਵ ਚਲਾਈ ਜਾ ਰਹੀ ਹੈ। ਬੀਜੇਪੀ ਨਾਲ ਸੀਟ ਸ਼ੇਅਰਿੰਗ ਦੇ ਸਵਾਲ ‘ਤੇ ਉਹਨਾਂ ਨੇ ਕਿਹਾ ਕਿ ਉਹ ਜਲਦ ਹੀ ਦਿੱਲੀ ਜਾ ਕੇ ਬੀਜੇਪੀ ਹਾਈਕਮਾਂਡ ਨਾਲ ਮੁਲਾਕਾਤ ਕਰਨਗੇ।
ਜਲਦ ਕਈ ਕਾਂਗਰਸੀ ਨਾਲ ਆਉਣਗੇ- ਕੈਪਟਨ
ਕੈਪਟਨ ਅਮਰਿੰਦਰ ਸਿੰਘ ਨੇ ਦਾਅਵਾ ਕੀਤਾ ਕਿ ਪੰਜਾਬ ਵਿੱਚ ਵਿਧਾਨ ਸਭਾ ਚੋਣਾਂ ਲਈ ਚੋਣ ਜਾਬਤਾ ਲੱਗਦੇ ਹੀ ਕਈ ਕਾਂਗਰਸੀ ਉਹਨਾਂ ਦੀ ਪਾਰਟੀ ਪੰਜਾਬ ਲੋਕ ਕਾਂਗਰਸ ਨਾਲ ਜੁੜਨਗੇ। ਉਹਨਾਂ ਕਿਹਾ, “ਜੇਕਰ ਹੁਣ ਕੋਈ ਆਇਆ, ਤਾਂ ਸਰਕਾਰ ਉਹਨਾਂ ਦੇ ਵਿਕਾਸ ਕਾਰਜ ਰੋਕ ਦਵੇਗੀ। ਇਸੇ ਕਾਰਨ ਮੈਂ ਸਾਰਿਆਂ ਨੂੰ ਕਿਹਾ ਹੈ ਕਿ ਉਹ ਆਪਣਾ ਕੰਮ ਕਰਦੇ ਰਹਿਣ। ਚੋਣ ਜਾਬਤਾ ਲੱਗਦੇ ਹੀ ਸਰਕਾਰ ਦੀ ਪਾਵਰ ਖਤਮ ਹੋ ਜਾਵੇਗੀ, ਤਾਂ ਫਿਰ ਖੁੱਲ੍ਹ ਕੇ ਕਾਂਗਰਸੀ ਸਾਡੇ ਨਾਲ ਆਉਣਗੇ।”
ਤਕਰਾਰ ਭੁੱਲ ਕੇ ‘ਮਨੋਹਰ ਦੁਆਰ’ ਪਹੁੰਚੇ ਕੈਪਟਨ
ਕਿਸਾਨ ਅੰਦੋਲਨ ਦੌਰਾਨ ਕੈਪਟਨ ਅਤੇ ਮਨੋਹਰ ਲਾਲ ਦੇ ਰਿਸ਼ਤਿਆਂ ਵਿੱਚ ਤਲਖੀ ਆ ਗਈ ਸੀ। ਪਿਛਲੇ ਸਾਲ ਜਦੋਂ ਕਿਸਾਨਾਂ ਨੇ ਦਿੱਲੀ ਕੂਚ ਕੀਤਾ ਸੀ, ਤਾਂ ਪੰਜਾਬ ਦੇ ਤਤਕਾਲੀ ਸੀਐੱਮ ਕੈਪਟਨ ਅਮਰਿੰਦਰ ਸਿੰਘ ਖੁੱਲ੍ਹ ਕੇ ਕਿਸਾਨ ਅੰਦੋਲਨ ਦੇ ਸਮਰਥਨ ਵਿੱਚ ਸਨ। ਉਸ ਵੇਲੇ ਮਨੋਹਰ ਲਾਲ ਨੇ ਕੈਪਟਨ ‘ਤੇ ਅੰਦੋਲਨਕਾਰੀ ਕਿਸਾਨਾਂ ਨੂੰ ਉਕਸਾਉਣ ਅਤੇ ਵਧਾਵਾ ਦੇਣ ਦੇ ਇਲਜਾਮ ਲਾਏ ਸਨ।
