ਬਿਓਰੋ। ਆਮ ਆਦਮੀ ਪਾਰਟੀ ਦੇ ਕੌਮੀ ਕਨਵੀਨਰ ਅਤੇ ਦਿੱਲੀ ਦੇ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਨੇ ਬੁੱਧਵਾਰ ਨੂੰ ਬਾਦਲਾਂ ਦੇ ਗੜ੍ਹ ਲੰਬੀ ਤੋਂ ਚੁਣਾਵੀ ਹੁੰਕਾਰ ਭਰੀ। ਹਾਲਾਂਕਿ ਉਹਨਾਂ ਦੇ ਨਿਸ਼ਾਨੇ ‘ਤੇ ਬਾਦਲਾਂ ਤੋਂ ਵੱਧ ਸੂਬੇ ਦੀ ਚੰਨੀ ਸਰਕਾਰ ਰਹੀ। ਕੇਜਰੀਵਾਲ ਨੇ ਪੂਰੇ ਭਾਸ਼ਣ ਵਿੱਚ ਬਾਦਲਾਂ ਦਾ ਨਾਂਅ ਤੱਕ ਨਹੀਂ ਲਿਆ, ਜਦਕਿ ਚੰਨੀ ‘ਤੇ ਗਿਣ-ਗਿਣ ਕੇ ਹਮਲੇ ਬੋਲੇ।
ਕੇਜਰੀਵਾਲ ਨੇ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਨੂੰ ਡਰਾਮੇਬਾਜ਼ ਦੱਸਿਆ ਅਤੇ ਕਿਹਾ ਕਿ ਸੁਰਖੀਆਂ ਵਿੱਚ ਰਹਿਣ ਲਈ ਉਹ ਕੁਝ ਵੀ ਕਹਿੰਦੇ ਹਨ। ਉਹਨਾਂ ਤੰਜ ਕਸਦੇ ਹੋਏ ਕਿਹਾ ਕਿ ਚੰਨੀ ਪਹਿਲੇ ਮੁੱਖ ਮੰਤਰੀ ਹਨ, ਜੋ ਕਹਿੰਦੇ ਹਨ ਕਿ ਲੋਕ ਉਹਨਾਂ ਨੂੰ ਬਾਥਰੂਮ ਵਿੱਚ ਵੀ ਮਿਲਣ ਆਉਂਦੇ ਹਨ।
ਪੰਜਾਬ ਵਿੱਚ ਆਮ ਆਦਮੀ ਪਾਰਟੀ ਨੂੰ ਬਹੁਤ ਸਾਰਾ ਪਿਆਰ ਦੇ ਰਹੇ ਹਨ ਲੋਕ। ਲੰਬੀ ਹਲਕੇ ਵਿੱਚ ਜਨਸਭਾ https://t.co/vvU347vo7P
— Arvind Kejriwal (@ArvindKejriwal) December 16, 2021
ਪੰਜਾਬ ‘ਚ ਸਰਕਸ ਪਾਰਟੀ ਦੀ ਸਰਕਾਰ- ਕੇਜਰੀਵਾਲ
ਕੇਜਰੀਵਾਲ ਨੇ ਕਾਂਗਰਸ ਨੂੰ ਸਰਕਸ ਪਾਰਟੀ ਦੱਸਿਆ। ਉਹਨਾਂ ਕਿਹਾ ਕਿ ਕਾਂਗਰਸ ਦੇ ਆਗੂਆਂ ਦੀ ਆਪਸ ਵਿੱਚ ਹੀ ਨਹੀਂ ਬਣਦੀ। ਕੈਬਨਿਟ ਵਿੱਚ ਹੀ ਗੁੱਥਮਗੁੱਥਾ ਹੁੰਦੇ ਰਹਿੰਦੇ ਹਨ। ਉਹਨਾਂ ਕਿਹਾ ਕਿ ਇਹ ਅੱਜ ਤੱਕ ਦੀ ਸਭ ਤੋਂ ਭ੍ਰਿਸ਼ਟ ਸਰਕਾਰ ਹੈ। ਕੇਜਰੀਵਾਲ ਨੇ ਕਿਹਾ, “ਚੰਨੀ ਜੀ ਕਹਿੰਦੇ ਹਨ ਕਿ ਉਹਨਾਂ ਨੂੰ ਗੁੱਲੀ ਡੰਡਾ ਖੇਡਣਾ ਆਉਂਦਾ ਹੈ, ਬੰਟੇ ਖੇਡਣੇ ਆਉਂਦੇ ਹਨ, ਦੁੱਧ ਚੌਣਾ ਆਉਂਦਾ ਹੈ।” ਇਸਦੇ ਜਵਾਬ ਵਿੱਚ ਉਹਨਾਂ ਨੇ ਕਿਹਾ, “ਮੈਨੂੰ ਇਹ ਸਭ ਨਹੀਂ ਆਉਂਦਾ। ਸਕੂਲ ਬਣਾਉਣਾ ਆਉਂਦਾ ਹੈ। ਹਸਪਤਾਲ ਬਣਾਉਣਾ ਆਉਂਦਾ ਹੈ ਅਤੇ ਬਿਜਲੀ ਬਿੱਲ ਜੀਰੋ ਕਰਨਾ ਆਉਂਦਾ ਹੈ।”
ਹੁਣ ਤੱਕ ਦੀ ਸਭ ਤੋਂ ਭ੍ਰਿਸ਼ਟ ਸਰਕਾਰ- ਕੇਜਰੀਵਾਲ
ਕੇਜਰੀਵਾਲ ਨੇ ਕਿਹਾ ਕਿ ਇਹ ਅੱਜ ਤੱਕ ਦੀ ਸਭ ਤੋਂ ਭ੍ਰਿਸ਼ਟ ਸਰਕਾਰ ਹੈ। ਵਿਧਾਇਕ ਤੋਂ ਲੈ ਕੇ ਮੰਤਰੀ ਤੱਕ ਸਭ ਕਮਾਉਣ ਵਿੱਚ ਲੱਗੇ ਹੋਏ ਹਨ। ਇਥੋਂ ਤੱਕ ਕਿ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਦੇ ਹਲਕੇ ਵਿੱਚ ਵੀ ਰੇਤ ਚੋਰੀ ਹੋ ਰਹੀ ਹੈ ਅਤੇ ਇਹ ਸਭ ਉਹਨਾਂ ਦੀ ਮਿਲੀਭੁਗਤ ਨਾਲ ਹੋ ਰਿਹਾ ਹੈ।
ਕੇਜਰੀਵਾਲ ਨੇ ਲੋਕਾਂ ਤੋਂ ਮੰਗਿਆ ਇੱਕ ਮੌਕਾ
ਆਪਣੀ ਹਰ ਰੈਲੀ ਵਾਂਗ ਹੀ ਇਸ ਵਾਰ ਵੀ ਕੇਜਰੀਵਾਲ ਨੇ ਆਪਣੇ ਭਾਸ਼ਣ ਦੇ ਅਖੀਰ ਵਿੱਚ ਲੋਕਾਂ ਤੋਂ ਆਪਣੇ ਲਈ ਇੱਕ ਮੌਕਾ ਮੰਗਿਆ। ਉਹਨਾਂ ਨੇ ਲੋਕਾਂ ਨੂੰ ਅਪੀਲ ਕਰਦੇ ਹੋਏ ਕਿਹਾ, “ਪੰਜਾਬ ‘ਚ 25 ਸਾਲ ਕਾਂਗਰਸ ਅਤੇ 19 ਸਾਲ ਅਕਾਲੀਆਂ ਨੇ ਰਾਜ ਕੀਤਾ ਹੈ। ਆਮ ਆਦਮੀ ਪਾਰਟੀ ਨੂੰ ਸਿਰਫ਼ 5 ਸਾਲ ਦੇ ਦਿਓ। ਜੇਕਰ ਸਰਕਾਰ ਦਾ ਕੰਮਕਾਜ ਪਸੰਦ ਨਾ ਆਏ, ਤਾਂ ਉਸ ਨੂੰ ਹਟਾ ਦਿਓ। ਜਿਹਨਾਂ ਕਾਂਗਰਸੀ ਤੇ ਅਕਾਲੀਆਂ ਨੇ 25 ਅਤੇ 19 ਸਾਲਾਂ ਵਿੱਚ ਕੁਝ ਨਹੀਂ ਕੀਤਾ, ਉਹ ਹੁਣ ਕੀ ਕਰਨਗੇ।”
