ਬਿਓਰੋ। ਪੰਜਾਬ ਵਿੱਚ 2022 ਦੀ ਸ਼ੁਰੂਆਤ ਵਿੱਚ ਹੋਣ ਵਾਲੀਆਂ ਵਿਧਾਨ ਸਭਾ ਚੋਣਾਂ ਨੂੰ ਲੈ ਕੇ ਚੋਣ ਕਮਿਸ਼ਨ ਨੇ ਤਿਆਰੀਆਂ ਤੇਜ਼ ਕਰ ਦਿੱਤੀਆਂ ਹਨ। ਦੇਸ਼ ਦੇ ਮੁੱਖ ਚੋਣ ਕਮਿਸ਼ਨਰ ਸੁਸ਼ੀਲ ਚੰਦਰਾ ਨੇ ਚੰਡੀਗੜ੍ਹ ਪਹੁੰਚ ਕੇ 2 ਦਿਨ ਤੱਕ ਤਿਆਰੀਆਂ ਦਾ ਜਾਇਜਾ ਲਿਆ। ਮੈਰਾਥਨ ਮੀਟਿੰਗ ਤੋਂ ਬਾਅਦ ਉਹਨਾਂ ਨੇ ਪੰਜਾਬ ਦੇ ਅਫ਼ਸਰਾਂ ਨੂੰ ਚੇਤਾਵਨੀ ਦਿੱਤੀ ਕਿ ਜੋ ਵੀ ਕੋਈ ਪੱਖਪਾਤ ਕਰੇਗਾ ਜਾਂ ਢੰਗ ਨਾਲ ਕੰਮ ਨਹੀਂ ਕਰੇਗਾ, ਤਾਂ ਉਹ ਚੋਣ ਡਿਊਟੀ ‘ਤੇ ਨਹੀਂ ਰਹੇਗਾ।
ਚੰਡੀਗੜ੍ਹ ਵਿੱਚ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦੇ ਹੋਏ ਚੰਦਰਾ ਨੇ ਕਿਹਾ ਕਿ 4 ਘੰਟੇ ਦੀ ਮੀਟਿੰਗ ਵਿੱਚ ਉਹ ਪੰਜਾਬ ਦੇ ਸਾਰੇ DC, ਪੁਲਿਸ ਕਮਿਸ਼ਨਰ ਅਤੇ SSP ਨੂੰ ਵੇਖ ਚੁੱਕੇ ਹਨ। ਕੌਣ ਕਿੰਨਾ ਫਿੱਟ ਹੈ, ਇਹ ਸਾਨੂੰ ਪਤਾ ਲੱਗ ਚੁੱਕਿਆ ਹੈ। ਇਸ ਲਈ ਪੰਜਾਬ ਵਿੱਚ ਸ਼ਾਂਤੀਪੂਰਣ ਚੋਣਾਂ ਲਈ ਕਮਿਸ਼ਨ ਹਰ ਤਰ੍ਹਾਂ ਦਾ ਕਦਮ ਚੁੱਕੇਗਾ। ਇਸਦੇ ਲਈ DGP ਅਤੇ ਪੁਲਿਸ ਅਫ਼ਸਰਾਂ ਨਾਲ ਚਰਚਾ ਕਰਕੇ ਜਲਦ ਕੇਂਦਰੀ ਸੁਰੱਖਿਆ ਬਲਾਂ ਦੀਆਂ ਕੰਪਨੀਆਂ ਸੱਦੇ ਜਾਣ ‘ਤੇ ਫੈਸਲਾ ਲਿਆ ਜਾਵੇਗਾ।
ਇਸ ਵਾਰ 1 ਕਰੋੜ ਤੋਂ ਵੱਧ ਮਹਿਲਾ ਵੋਟਰ
ਮੁੱਖ ਚੋਣ ਅਧਿਕਾਰੀ ਨੇ ਦੱਸਿਆ ਕਿ ਪੰਜਾਬ ਵਿੱਚ ਇਸ ਵਾਰ ਕੁੱਲ 2.2 ਕਰੋੜ ਵੋਟਰਾਂ ਵਿੱਚੋਂ 1 ਕਰੋੜ ਤੋਂ ਵੱਧ ਮਹਿਲਾ ਵੋਟਰ ਹਨ। ਇਸ ਵਾਰ ਮਹਿਲਾ ਅਤੇ ਪੁਰਸ਼ ਵੋਟਰਾਂ ਦਾ ਅਨੁਪਾਤ ਵੀ ਸੁਧਰਿਆ ਹੈ। ਉਹਨਾਂ ਦੱਸਿਆ ਕਿ ਪਿਛਲੀਆਂ ਚੋਣਾਂ ਵਿੱਚ ਇੱਕ ਹਜਾਰ ਪੁਰਸ਼ ਵੋਟਰਾਂ ਦੇ ਪਿੱਛੇ 898 ਮਹਿਲਾਵਾਂ ਸਨ, ਜੋ ਇਸ ਵਾਰ ਵੱਧ ਕੇ 902 ਹੋ ਗਈਆਂ ਹਨ। ਹਾਲਾਂਕਿ ਆਖਰੀ ਲਿਸਟ 5 ਜਨਵਰੀ ਨੂੰ ਆਵੇਗੀ।
ਇਸ ਤੋਂ ਇਲਾਵਾ ਇਸ ਵਾਰ 1 ਲੱਖ 40 ਹਜਾਰ 835 ਦਿਵਿਆਂਗ ਵੋਟਰ ਹੋਣਗੇ। 5 ਲੱਖ 16 ਹਜਾਰ 567 ਵੋਟਰ 80 ਤੋਂ ਵੀ ਵੱਧ ਉਮਰ ਦੇ ਹਨ, ਜਿਹਨਾਂ ਦੀ ਸੁਵਿਧਾ ਦੇ ਹਿਸਾਬ ਨਾਲ ਉਹਨਾਂ ਦੇ ਘਰ ਜਾਂ ਪੋਲਿੰਗ ਬੂਥ ਵਿੱਚ ਵੋਟ ਪਾਉਣ ਲਈ ਇੰਤਜਾਮ ਕੀਤੇ ਜਾਣਗੇ।
ਵੋਟਿੰਗ ਵਧਾਉਣਾ ਵੱਡੀ ਚੁਣੌਤੀ
ਪੰਜਾਬ ਵਿੱਚ ਲੋਅ ਵਾਟਰ ਟਰਨਆਊਟ ‘ਤੇ ਕਮਿਸ਼ਨ ਨੇ ਚਿੰਤਾ ਜਾਹਿਰ ਕੀਤੀ। ਮੁੱਖ ਚੋਣ ਕਮਿਸ਼ਨਰ ਨੇ ਕਿਹਾ ਕਿ ਇਸ ਬਾਰੇ ਜਿਲ੍ਹਾ ਚੋਣ ਅਫ਼ਸਰਾਂ ਨਾਲ ਮੀਟਿੰਗ ਕੀਤੀ ਗਈ ਹੈ। 2017 ਦੀਆਂ ਚੋਣਾਂ ਵਿੱਚ ਵੋਟਰ ਟਰਨਆਊਟ 77.4% ਸੀ, ਪਰ 2019 ਦੀਆਂ ਚੋਣਾਂ ਵਿੱਚ ਇਹ 65.96% ਰਹਿ ਗਿਆ। ਲਿਹਾਜਾ ਇਸ ਵਾਰ ਘੱਟ ਪੋਲਿੰਗ ਵਾਲੇ 500 ਪੋਲਿੰਗ ਬੂਥ ਚੁਣੇ ਗਏ ਹਨ, ਜਿਥੇ ਲੋਕਾਂ ਨੂੰ ਜਾਗਰੂਕ ਕਰਕੇ ਵੋਟਿੰਗ ਲਈ ਪ੍ਰੇਰਿਤ ਕੀਤਾ ਜਾਵੇਗਾ।
