ਬਿਓਰੋ। ਪੰਜਾਬ ਚੋਣਾਂ ਵਿੱਚ ਕਾਂਗਰਸ ਪਾਰਟੀ ਵੱਲੋਂ ਸੀਐੱਮ ਦਾ ਚਿਹਰਾ ਕੌਣ ਹੋਵੇਗਾ, ਬੇਸ਼ੱਕ ਅਜੇ ਤੱਕ ਇਸਦਾ ਰਸਮੀ ਐਲਾਨ ਨਹੀਂ ਕੀਤਾ ਗਿਆ। ਪਰ ਇੱਕ ਸਰਵੇ ਵਿੱਚ ਮੌਜੂਦਾ ਸੀਐੱਮ ਚਰਨਜੀਤ ਸਿੰਘ ਚੰਨੀ ਨੇ ਸਾਰਿਆਂ ਨੂੰ ਪਿੱਛੇ ਛੱਡ ਦਿੱਤਾ ਹੈ। ਇਹ ਸਰਵੇ ਕਿਸੇ ਏਜੰਸੀ ਨੇ ਨਹੀਂ ਕੀਤਾ ਹੈ, ਬਲਕਿ ਕਾਂਗਰਸ ਪਾਰਟੀ ਦੇ ਸਾਬਕਾ ਪ੍ਰਧਾਨ ਰਾਹੁਲ ਗਾਂਧੀ ਦੇ ਇੱਕ ਖਾਸ ਸਹਿਯੋਗੀ ਨਿਖਿਲ ਅਲਵਾ ਨੇ ਆਪਣੇ ਨਿੱਜੀ ਟਵਿਟਰ ਹੈਂਡਲ ‘ਤੇ ਕੀਤਾ ਹੈ।
ਉਹਨਾਂ ਨੇ ਆਪਣੇ ਸਰਵੇ ਵਿੱਚ ਲੋਕਾਂ ਨੂੰ 3 ਵਿਕਲਪ ਦਿੱਤੇ। ਇਹਨਾਂ ਵਿੱਚ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ, ਨਵਜੋਤ ਸਿੰਘ ਸਿੱਧੂ ਅਤੇ ਸੁਨੀਲ ਜਾਖੜ ਦਾ ਨਾਂਅ ਸ਼ਾਮਲ ਕੀਤਾ ਹੈ। ਵੀਰਵਾਰ ਸ਼ਾਮ ਤੱਕ ਇਸ ਪੋਲ ਵਿੱਚ 1283 ਲੋਕਾਂ ਨੇ ਹਿੱਸਾ ਲਿਆ। 68.7 ਫੀਸਦ ਲੋਕਾਂ ਨੇ ਚਰਨਜੀਤ ਸਿੰਘ ਚੰਨੀ ਨੂੰ ਮੁੱਖ ਮੰਤਰੀ ਦਾ ਚਿਹਰਾ ਦੱਸਿਆ। ਇਸ ਤੋਂ ਬਾਅਦ 11.5 ਫੀਸਦ ਲੋਕਾਂ ਨੇ ਨਵਜੋਤ ਸਿੰਘ ਸਿੱਧੂ ਅਤੇ 9.3 ਫ਼ੀਸਦ ਲੋਕਾਂ ਨੇ ਸੁਨੀਲ ਜਾਖੜ ਦੇ ਨਾਮ ‘ਤੇ ਵੋਟ ਦਿੱਤਾ। ਹਾਲਾਂਕਿ ਅਜੇ ਤੱਕ ਇਸ ਸਰਵੇ ਨੂੰ ਲੈ ਕੇ ਪਾਰਟੀ ਨੇ ਅਧਿਕਾਰਤ ਤੌਰ ‘ਤੇ ਕੋਈ ਟਿੱਪਣੀ ਨਹੀਂ ਕੀਤੀ ਹੈ। ਇਹ ਟਵਿਟਰ ਪੋਲ ਕਾਂਗਰਸ ਪਾਰਟੀ ਦੀ ਸੀਨੀਅਰ ਆਗੂ ਮਾਰਗਰੇਟ ਅਲਵਾ ਦੇ ਪੁੱਤਰ ਨਿਖਿਲ ਅਲਵਾ ਨੇ ਕੀਤਾ ਹੈ। ਨਿਖਿਲ ਕਈ ਸਾਲਾਂ ਤੋਂ ਰਾਹੁਲ ਗਾਂਧੀ ਦੇ ਨਾਲ ਹਨ। ਨਿਖਿਲ ਨੂੰ ਰਾਹੁਲ ਗਾਂਧੀ ਦੇ ਖਾਸ ਸਹਿਯੋਗੀ ਅਤੇ ਮੀਡੀਆ ਰਣਨੀਤੀਕਾਰ ਦੇ ਤੌਰ ‘ਤੇ ਵੇਖਿਆ ਜਾਂਦਾ ਹੈ।
ਚੰਨੀ ਦੇ ਸਮਰਥਨ ‘ਚ ਉਤਰ ਚੁੱਕੇ ਕਈ ਮੰਤਰੀ
ਸੀਐੱਮ ਫੇਸ ਦੀ ਲੜਾਈ ਵਿੱਚ ਕਈ ਮੰਤਰੀ ਖੁੱਲ੍ਹ ਕੇ ਚੰਨੀ ਦਾ ਸਮਰਥਨ ਕਰ ਚੁੱਕੇ ਹਨ ਅਤੇ ਹਾਈਕਮਾਂਡ ਤੋਂ ਚੰਨੀ ਨੂੰ ਸੀਐੱਮ ਫੇਸ ਐਲਾਨੇ ਜਾਣ ਦੀ ਮੰਗ ਕਰ ਚੁੱਕੇ ਹਨ। ਇਨ੍ਹਾਂ ਵਿੱਚ ਕੈਬਨਿਟ ਮੰਤਰੀ ਬ੍ਰਹਮ ਮਹਿੰਦਰਾ, ਤ੍ਰਿਪਤ ਰਜਿੰਦਰ ਸਿੰਘ ਬਾਜਵਾ, ਸੁਖਜਿੰਦਰ ਰੰਧਾਵਾ ਅਤੇ ਰਾਣਾ ਗੁਰਜੀਤ ਸਿੰਘ ਸ਼ਾਮਲ ਹਨ।
ਸਿੱਧੂ ਨਾਲ ਨਜ਼ਰ ਨਹੀਂ ਆ ਰਹੇ ਦਿੱਗਜ
ਦਿਲਚਸਪ ਕਿ ਕਾਂਗਰਸ ਦੀ ਇਸ ਅੰਦਰੂਨੀ ਜੰਗ ਵਿੱਚ ਸਿੱਧੂ ਇਕੱਲੇ ਪੈਂਦੇ ਨਜ਼ਰ ਆ ਰਹੇ ਹਨ। ਇਥੋਂ ਤੱਕ ਕਿ ਕੈਪਟਨ ਦੇ ਤਖਤਾਪਲਟ ਵਿੱਚ ਜੋ ਕਾਂਗਰਸੀ ਕਦੇ ਸਿੱਧੂ ਦੇ ਨਾਲ ਕਦਮਤਾਲ ਕਰ ਰਹੇ ਸਨ, ਉਹ ਵੀ ਹੁਣ ਨਾਲ ਨਜ਼ਰ ਨਹੀਂ ਆ ਰਹੇ। ਰਾਜਾ ਵੜਿੰਗ ਅਤੇ ਪਰਗਟ ਸਿੰਘ ਵਰਗੇ ਸਿੱਧੂ ਦੇ ਕਰੀਬੀ ਵੀ ਉਨ੍ਹਾਂ ਤੋਂ ਕਿਨਾਰਾ ਕਰਦੇ ਨਜ਼ਰ ਆ ਰਹੇ ਹਨ। ਅਜਿਹੇ ਵਿਚ ਸਿੱਧੂ ਦੀ ਰਾਹ ਆਸਾਨ ਨਹੀਂ ਹੈ।
ਪਹਿਲਾਂ ਸਿੱਧੂ ਨੇ ਹੀ ਚੁੱਕੀ ਸੀ CM ਫੇਸ ਐਲਾਨਣ ਦੀ ਮੰਗ
ਸੀਐੱਮ ਫੇਸ ਨੂੰ ਲੈ ਕੇ ਚੱਲ ਰਹੀ ਇਹ ਸਿਆਸੀ ਜੰਗ ਦਰਅਸਲ ਸਿੱਧੂ ਨੇ ਹੀ ਸ਼ੁਰੂ ਕੀਤੀ ਸੀ। ਹਾਲ ਹੀ ਵਿੱਚ ਸਿੱਧੂ ਨੇ ਕਿਹਾ ਸੀ ਕਿ ਕਾਂਗਰਸ ਨੂੰ ਆਪਣੀ ਬਰਾਤ ਦਾ ਲਾੜਾ ਐਲਾਨ ਦੇਣਾ ਚਾਹੀਦਾ ਹੈ। ਜੇਕਰ ਪਾਰਟੀ ਅਜਿਹਾ ਨਹੀਂ ਕਰਦੀ, ਤਾਂ ਉਸ ਨੂੰ ਨੁਕਸਾਨ ਹੋਵੇਗਾ। ਪਰ ਜਦੋਂ ਹਾਈਕਮਾਂਡ ਦਾ ਸਾਥ ਸਿੱਧੂ ਨੂੰ ਨਹੀਂ ਮਿਲਿਆ, ਤਾਂ ਉਹਨਾਂ ਦੇ ਸੁਰ ਬਦਲ ਗਏ। ਹੁਣ ਸਿੱਧੂ ਕਹਿ ਰਹੇ ਹਨ ਕਿ ਹਾਈਕਮਾਂਡ ਸਿਆਣੀ ਹੈ ਤੇ ਪੂਰੀ ਰਣਨੀਤੀ ਦੇ ਤਹਿਤ ਕੰਮ ਕਰ ਰਹੀ ਹੈ।
