ਬਿਓਰੋ। ਪੰਜਾਬ ਵਿੱਚ ਮਾਈਨਿੰਗ ਕੇਸ ਨੂੰ ਲੈ ਕੇ ED ਦੀ ਛਾਪੇਮਾਰੀ ‘ਤੇ ਛਿੜੀ ਸਿਆਸੀ ਜੰਗ ਹੁਣ ਚੋਣ ਕਮਿਸ਼ਨ ਕੋਲ ਪਹੁੰਚ ਗਈ ਹੈ। ਕਾਂਗਰਸ ਨੇ ਚੋਣ ਕਮਿਸ਼ਨ ਕੋਲ ਸ਼ਿਕਾਇਤ ਦਰਜ ਕਰਦੇ ਹੋਏ ED ਦੀ ਕਾਰਵਾਈ ਨੂੰ ਸਿਆਸਤ ਤੋਂ ਪ੍ਰੇਰਿਤ ਦੱਸਿਆ ਹੈ। ਚੋਣ ਕਮਿਸ਼ਨ ਵਿੱਚ ਕਾਂਗਰਸ ਨੇ ਕਿਹਾ ਕਿ ED ਦੇ ਜ਼ਰੀਏ ਸੀਐੱਮ ਚਰਨਜੀਤ ਚੰਨੀ ਅਤੇ ਕਾਂਗਰਸ ਨੂੰ ਬਦਨਾਮ ਕਰਨ ਦੀ ਸਾਜ਼ਿਸ਼ ਰਚੀ ਜਾ ਰਹੀ ਹੈ। ਕਾਂਗਰਸ ਨੇ ਚੋਣ ਕਮਿਸ਼ਨ ਤੋਂ ED ਦੀ ਕਾਰਵਾਈ ‘ਤੇ ਰੋਕ ਲਗਾਉਣ ਦੀ ਵੀ ਮੰਗ ਕੀਤੀ। ਕਾਂਗਰਸ ਨੇ ਕਿਹਾ ਕਿ ਕਮਿਸ਼ਨ ਨੇ ਆਪਣੇ ਪੱਧਰ ‘ਤੇ ਮਾਮਲੇ ਦੀ ਜਾਣਕਾਰੀ ਲੈ ਕੇ ਸੁਣਵਾਈ ਦਾ ਭਰੋਸਾ ਦਿੱਤਾ ਹੈ।
ਚੰਨੀ ਦੇ ਬਚਾਅ ਵਿੱਚ ਕਾਂਗਰਸ, ਪਰ ਸਿੱਧੂ ਖਾਮੋਸ਼ !
ਇਸ ਮਾਮਲੇ ਵਿੱਚ ਕਾਂਗਰਸ ਖੁੱਲ੍ਹ ਕੇ ਚੰਨੀ ਦਾ ਬਚਾਅ ਕਰ ਰਹੀ ਹੈ। ਚੋਣ ਕਮਿਸ਼ਨ ਪਹੁੰਚੇ ਕਾਂਗਰਸ ਦੇ ਵਫ਼ਦ ਵਿੱਚ ਰਣਦੀਪ ਸੁਰਜੇਵਾਲਾ, ਅਭਿਸ਼ੇਕ ਮਨੂ ਸਿੰਘਵੀ ਅਤੇ ਹਰੀਸ਼ ਚੌਧਰੀ ਸ਼ਾਮਲ ਸਨ। ਚੰਨੀ ਦੇ ਮੰਤਰੀ ਵੀ ਖੁੱਲ੍ਹ ਕੇ ਉਨ੍ਹਾਂ ਦਾ ਬਚਾਅ ਕਰ ਰਹੇ ਹਨ, ਪਰ ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਜ਼ਿਆਦਾ ਕਹਿਣ ਤੋਂ ਬੱਚ ਰਹੇ ਹਨ। ਸਿੱਧੂ ਨੇ ਹੁਣ ਤੱਕ ਇਸ ਮਾਮਲੇ ਵਿੱਚ ਚੰਨੀ ਦਾ ਬਚਾਅ ਨਹੀਂ ਕੀਤਾ ਹੈ। ਸਿੱਧੂ ਨੇ ਬੱਸ ਇੰਨਾ ਹੀ ਕਿਹਾ ਹੈ ਕਿ ਇਲਜ਼ਾਮ ਲੱਗਣ ਨਾਲ ਕੋਈ ਮੁਜਰਿਮ ਨਹੀਂ ਹੋ ਜਾਂਦਾ, ਪਰ ਨਾਲ ਹੀ ਇਹ ਵੀ ਕਹਿ ਦਿੱਤਾ ਕਿ ਜਿਸ ‘ਤੇ ਇਲਜ਼ਾਮ ਲੱਗੇ ਹਨ, ਉਨ੍ਹਾਂ ਨੂੰ ਖ਼ੁਦ ਹੀ ਸਪਸ਼ਟੀਕਰਨ ਦੇਣਾ ਪਏਗਾ।
ਚੋਰ ਮਚਾਏ ਸ਼ੋਰ- ਬੀਜੇਪੀ
ਪੰਜਾਬ ਬੀਜੇਪੀ ਦੇ ਜਨਰਲ ਸਕੱਤਰ ਸੁਭਾਸ਼ ਸ਼ਰਮਾ ਨੇ ਕਿਹਾ ਕਿ ਕਾਂਗਰਸ ਦੀ ਹਾਲਤ ‘ਚੋਰ ਮਚਾਏ ਸ਼ੋਰ’ ਵਾਲੀ ਹੋ ਚੁੱਕੀ ਹੈ। ਚੋਰੀ ਕਰਨ ਤੋਂ ਬਾਅਦ ਸੀਨਾਜ਼ੋਰੀ ਕੀਤੀ ਜਾ ਰਹੀ ਹੈ। ਸਵਾਲ ਤਾਂ ਇਹ ਹੈ ਕਿ 10 ਕਰੋੜ ਕਿੱਥੋਂ ਆਏ? 12 ਲੱਖ ਦੀ ਘੜੀ ਕੌਣ ਪਾ ਰਿਹਾ ਸੀ? ਬੇਰੁਜ਼ਗਾਰ ਸੜਕਾਂ ‘ਤੇ ਧੱਕੇ ਖਾ ਰਹੇ ਹਨ, ਪਰ ਇਹ ਰਕਮ ਕਿੱਥੋਂ ਆਈ? ਸਵਾਲ ਇਹ ਹੈ ਕਿ ਪੰਜਾਬ ਵਿੱਚ ਗ਼ੈਰ-ਕਾਨੂੰਨੀ ਰੇਤ ਮਾਫੀਆ ਨੂੰ ਕੌਣ ਸ਼ਹਿ ਦੇ ਰਿਹਾ ਹੈ? ਉਨ੍ਹਾਂ ਤੋਂ ਪੈਸਾ ਕੌਣ ਕਮਾ ਰਿਹਾ ਹੈ? ਬੀਜੇਪੀ ਨੇ ਕਿਹਾ ਕਿ ਕਾਂਗਰਸ ਬੇਨਕਾਬ ਹੋਣ ਦੇ ਚਲਦੇ ਘਬਰਾ ਗਈ ਹੈ।
ਚੰਨੀ ਦੇ ਭਾਣਜੇ ਦੇ ਠਿਕਾਣਿਆਂ ਤੋਂ ਮਿਲੇ ਹਨ ਕਰੋੜਾਂ ਰੁਪਏ
ਇਸ ਮਾਮਲੇ ਵਿਚ ED ਨੇ ਸਿਰਫ਼ ਚਰਨਜੀਤ ਚੰਨੀ ਦੇ ਭਾਣਜੇ ਭੁਪਿੰਦਰ ਹਨੀ ਦੇ ਟਿਕਾਣਿਆਂ ‘ਤੇ ਰੇਡ ਮਾਰੀ ਸੀ। ED ਦਾ ਦਾਅਵਾ ਹੈ ਕਿ ਭੁਪਿੰਦਰ ਅਤੇ ਉਸਦੇ ਸਾਥੀਆਂ ਤੋਂ ਕਰੀਬ 10 ਕਰੋੜ ਦੀ ਨਕਦੀ ਬਰਾਮਦ ਹੋਈ ਹੈ। ਇਸ ਵਿੱਚ ਇਕੱਲੇ 8 ਕਰੋੜ ਸੀਐੱਮ ਦੇ ਭਾਣਜੇ ਤੋਂ ਬਰਾਮਦ ਹੋਏ ਹਨ। ਇਸ ਤੋਂ ਇਲਾਵਾ ਪ੍ਰਾਪਰਟੀ ਦੇ ਕਾਗਜ਼ਾਤ ਅਤੇ ਕੀਮਤੀ ਸਾਮਾਨ ਜ਼ਬਤ ਕੀਤਾ ਗਿਆ ਹੈ।
