ਬਿਓਰੋ। ਪੰਜਾਬ ਦਾ CM ਬਣਨ ਦੀ ਦੌੜ ਵਿੱਚ ਲੱਗੇ ਕਾਂਗਰਸ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਪਰਿਵਾਰਕ ਵਿਵਾਦ ਵਿੱਚ ਘਿਰ ਗਏ ਹਨ। ਸਿੱਧੂ ਦੀ ਵੱਡੀ ਭੈਣ ਸੁਮਨ ਤੂਰ ਨੇ ਉਹਨਾਂ ਤੇ ਆਪਣੀ ਮਾਂ ਨੂੰ ਬੁਢਾਪੇ ਵਿੱਚ ਪੈਸਿਆਂ ਦੀ ਖਾਤਰ ਛੱਡਣ ਦਾ ਇਲਜ਼ਾਮ ਲਗਾਇਆ ਹੈ। ਅਮਰੀਕਾ ਦੀ ਰਹਿਣ ਵਾਲੀ ਸੁਮਨ ਤੂਰ ਨੇ ਕਿਹਾ ਕਿ 1986 ਵਿੱਚ ਜਦੋਂ ਪਿਤਾ ਭਗਵੰਤ ਸਿੱਧੂ ਦੀ ਭੋਗ ਸੈਰੇਮਨੀ ਹੋਈ, ਤਾਂ ਉਸ ਤੋਂ ਤੁਰੰਤ ਬਾਅਦ ਸਿੱਧੂ ਨੇ ਮਾਂ ਦੇ ਨਾਲ ਨਾਲ ਉਹਨਾਂ ਨੂੰ ਵੀ ਘਰ ਤੋਂ ਬਾਹਰ ਕੱਢ ਦਿੱਤਾ। ਸੁਮਨ ਨੇ ਕਿਹਾ ਕਿ ਉਹਨਾਂ ਦੀ ਮਾਂ ਨੇ ਆਪਣੀ ਸਾਖ ਬਚਾਉਣ ਲਈ ਦਿੱਲੀ ਦੇ ਚੱਕਰ ਕੱਟੇ ਅਤੇ ਅਖੀਰ ਵਿੱਚ ਦਿੱਲੀ ਰੇਲਵੇ ਸਟੇਸ਼ਨ ਤੇ ਉਹਨਾਂ ਦੀ ਲਵਾਰਿਸ ਹਾਲਾਤ ਵਿੱਚ ਮੌਤ ਹੋ ਗਈ।
ਭੈਣ ਨੇ ਭਰਾ ਸਿੱਧੂ ਨੂੰ ਕਿਹਾ ਕਰੂਰ
ਸੁਮਨ ਤੂਰ ਨੇ ਕਿਹਾ, “ਨਵਜੋਤ ਸਿੰਘ ਸਿੱਧੂ ਨੇ ਪੈਸਿਆਂ ਲਈ ਸਾਡੀ ਮਾਂ ਨੂੰ ਛੱਡ ਦਿੱਤਾ। ਸਾਨੂੰ ਸਿੱਧੂ ਤੋਂ ਕੋਈ ਪੈਸਾ ਨਹੀਂ ਚਾਹੀਦਾ।” ਨਵਜੋਤ ਸਿੰਘ ਸਿੱਧੂ ਨੂੰ ਕਰੂਰ ਵਿਅਕਤੀ ਦੱਸਦੇ ਹੋਏ ਸੁਮਨ ਤੂਰ ਨੇ ਦਾਅਵਾ ਕੀਤਾ ਕਿ ਉਹਨਾਂ ਨੇ 1987 ਵਿੱਚ ਇੰਡੀਆ ਟੂਡੇ ਨਾਲ ਇੱਕ ਇੰਟਰਵਿਊ ਵਿੱਚ ਆਪਣੇ ਮਾਤਾ ਪਿਤਾ ਦੇ ਵੱਖ ਹੋਣ ਬਾਰੇ ਝੂਠ ਕਿਹਾ ਸੀ। ਸੁਮਨ ਤੂਰ ਨੇ ਆਪਣੇ ਭਰਾ ਤੋਂ ਉਸ ਦਾਅਵੇ ਦੇ ਸਬੂਤ ਮੰਗੇ, ਜਿਸ ਵਿੱਚ ਸਿੱਧੂ ਨੇ ਉਹਨਾਂ ਦੀ ਮਾਂ ਅਤੇ ਪਿਤਾ ਦੇ ਕਾਨੂੰਨੀ ਤੌਰ ‘ਤੇ ਵੱਖ ਹੋਣ ਦੀ ਗੱਲ ਕਹੀ ਸੀ।
ਸਿੱਧੂ ਨੇ ਮਿਲਣ ਤੋਂ ਇਨਕਾਰ ਕੀਤਾ
ਸੁਮਨ ਤੂਰ ਨੇ ਦਾਅਵਾ ਕੀਤਾ ਕਿ ਉਹ 20 ਜਨਵਰੀ ਨੂੰ ਸਿੱਧੂ ਨੂੰ ਮਿਲਣ ਗਏ ਸਨ, ਪਰ ਉਹਨਾਂ ਨੇ ਮਿਲਣ ਤੋਂ ਇਨਕਾਰ ਕਰ ਦਿੱਤਾ ਅਤੇ ਦਰਵਾਜ਼ਾ ਨਹੀਂ ਖੋਲ੍ਹਿਆ। ਸੁਮਨ ਤੂਰ ਨੇ ਕਿਹਾ, “ਨਵਜੋਤ ਸਿੰਘ ਸਿੱਧੂ ਨਾਲ ਸੰਪਰਕ ਕਰਨ ਦੀ ਕੋਸ਼ਿਸ਼ ਨਾਕਾਮ ਹੋਣ ਤੋਂ ਬਾਅਦ ਮੈਨੂੰ ਪ੍ਰੈੱਸ ਕਾਨਫਰੰਸ ਕਰਨ ਲਈ ਮਜਬੂਰ ਹੋਣਾ ਪਿਆ। ਮੈਂ ਆਪਣੀ ਮਾਂ ਲਈ ਨਿਆਂ ਚਾਹੁੰਦੀ ਹਾਂ।”
ਟਾਈਮਿੰਗ ‘ਤੇ ਉਠੇ ਸਵਾਲ
ਸਿੱਧੂ ‘ਤੇ ਲਗਾਏ ਗਏ ਇਹਨਾਂ ਇਲਜ਼ਾਮਾਂ ਦੇ ਟਾਈਮਿੰਗ ਨੂੰ ਲੈ ਕੇ ਸਵਾਲ ਉਠ ਰਹੇ ਹਨ। ਕਰੀਬ 30 ਸਾਲ ਪੁਰਾਣੇ ਮਾਮਲੇ ਨੂੰ ਹੁਣ ਕਿਉਂ ਚੁੱਕਿਆ ਗਿਆ, ਇਹ ਸਵਾਲ ਸੁਮਨ ਤੂਰ ਤੋਂ ਵੀ ਪੁੱਛਿਆ ਗਿਆ, ਤਾਂ ਉਹਨਾਂ ਨੇ ਪੁੱਛਿਆ, “ਕੀ ਸਹੀ ਇਨਸਾਫ਼ ਪਾਉਣ ਲਈ ਵੀ ਕਿਸੇ ਸਹੀ ਵਕਤ ਦਾ ਇੰਤਜ਼ਾਰ ਕਰਨਾ ਚਾਹੀਦਾ ਹੈ?” ਉਹਨਾਂ ਨੇ ਖੁਦ ਦੇ ਕਿਸੇ ਵੀ ਸਿਆਸੀ ਪਾਰਟੀ ਨਾਲ ਸਬੰਧ ਹੋਣ ਤੋਂ ਇਨਕਾਰ ਕੀਤਾ।
ਇਲਜ਼ਾਮ ਲਗਾਉਣ ਵਾਲੀ ਭੈਣ ਤੋਂ ਨਵਜੋਤ ਕੌਰ ਦਾ ਕਿਨਾਰਾ
ਇਹਨਾਂ ਇਲਜ਼ਾਮਾਂ ਬਾਰੇ ਜਦੋਂ ਨਵਜੋਤ ਸਿੱਧੂ ਦੀ ਪਤਨੀ ਡਾ. ਨਵਜੋਤ ਕੌਰ ਤੋਂ ਪੁੱਛਿਆ ਗਿਆ ਤਾਂ ਉਹਨਾਂ ਕਿਹਾ ਕਿ ਉਹ ਸੁਮਨ ਤੂਰ ਨੂੰ ਨਹੀਂ ਜਾਣਦੇ। ਉਹਨਾਂ ਕਿਹਾ, “ਨਵਜੋਤ ਸਿੱਧੂ ਦੇ ਪਿਤਾ ਦੇ 2 ਵਿਆਹ ਹੋਏ ਸਨ। ਪਹਿਲੇ ਵਿਆਹ ਤੋਂ ਉਹਨਾਂ ਦੀਆਂ 2 ਬੇਟੀਆਂ ਸਨ, ਪਰ ਮੈਂ ਉਹਨਾਂ ਨੂੰ ਨਹੀਂ ਜਾਣਦੀ।”
