ਬਿਓਰੋ। ਸੀਐੱਮ ਚਰਨਜੀਤ ਚੰਨੀ ਦੇ ਭਰਾ ਡਾ. ਮਨੋਹਰ ਸਿੰਘ ਨੇ ਬਗਾਵਤ ਕਰ ਦਿੱਤੀ ਹੈ। ਉਹਨਾਂ ਨੇ ਬੱਸੀ ਪਠਾਣਾ ਸੀਟ ਤੋਂ ਆਜ਼ਾਦ ਉਮੀਦਵਾਰ ਦੇ ਤੌਰ ‘ਤੇ ਨਾਮਜ਼ਦਗੀ ਕਾਗਜ਼ ਦਾਖਲ ਕੀਤੇ ਹਨ। ਡਾ. ਮਨੋਹਰ ਬੱਸੀ ਪਠਾਣਾ ਸੀਟ ਤੋਂ ਕਾਂਗਰਸ ਦੀ ਟਿਕਟ ‘ਤੇ ਦਾਅਵੇਦਾਰੀ ਜਤਾ ਰਹੇ ਸਨ, ਪਰ ਕਾਂਗਰਸ ਨੇ ‘ਇੱਕ ਪਰਿਵਾਰ ਇੱਕ ਟਿਕਟ’ ਦੇ ਫਾਰਮੂਲੇ ਦਾ ਹਵਾਲਾ ਦਿੰਦੇ ਹੋਏ ਮੌਜੂਦਾ ਵਿਧਾਇਕ ਗੁਰਪ੍ਰੀਤ ਜੀਪੀ ਨੂੰ ਹੀ ਟਿਕਟ ਦੇ ਦਿੱਤੀ।
ਚੋਣ ਲੜਨ ਲਈ ਛੱਡੀ ਸੀ ਨੌਕਰੀ
ਸੀਐੱਮ ਚੰਨੀ ਦੇ ਭਰਾ ਦੇ ਚੋਣ ਲੜਨ ਦੇ ਪਿੱਛੇ ਦੀ ਵਜ੍ਹਾ ਵੀ ਦਿਲਚਸਪ ਹੈ। ਡਾ. ਮਨੋਹਰ ਪੰਜਾਬ ਸਿਹਤ ਵਿਭਾਗ ਵਿੱਚ ਕੰਮ ਕਰਦੇ ਸਨ। ਕੋਰੋਨਾ ਕਾਲ ਵਿੱਚ ਡਾ. ਮਨੋਹਰ ਦੀ ਤੈਨਾਤੀ ਬੱਸੀ ਪਠਾਣਾ ਵਿੱਚ ਲੱਗੀ। ਇਸੇ ਦੌਰਾਨ ਉਹਨਾਂ ਦੀ ਸਿਆਸੀ ਇੱਛਾ ਵੀ ਜਾਗਣ ਲੱਗੀ। ਕਿਹਾ ਜਾਂਦਾ ਹੈ ਕਿ ਜਦੋਂ ਹਲਕੇ ਵਿੱਚ ਡਾ. ਮਨੋਹਰ ਦੀਆਂ ਗਤੀਵਿਧੀਆਂ ਵਧਣ ਲੱਗੀਆਂ, ਤਾਂ ਬੱਸੀ ਪਠਾਣਾ ਤੋਂ ਕਾਂਗਰਸ ਦੇ ਵਿਧਾਇਕ ਗੁਰਪ੍ਰੀਤ ਜੀਪੀ ਨੇ ਉਹਨਾਂ ਦਾ ਟਰਾਂਸਫਰ ਕਰਵਾ ਦਿੱਤਾ। ਉਸ ਵਕਤ ਕੈਪਟਨ ਅਮਰਿੰਦਰ ਸਿੰਘ ਪੰਜਾਬ ਦੇ ਮੁੱਖ ਮੰਤਰੀ ਸਨ। ਜਦੋਂ ਚੰਨੀ ਸੀਐੱਮ ਬਣੇ, ਤਾਂ ਭਰਾ ਨੇ ਨੌਕਰੀ ਛੱਡ ਕੇ ਸਿਆਸਤ ਵਿੱਚ ਉਤਰਨ ਦਾ ਐਲਾਨ ਕਰ ਦਿੱਤਾ ਅਤੇ ਬੱਸੀ ਪਠਾਣਾ ਨੂੰ ਹੀ ਆਪਣੀ ਕਰਮਭੂਮੀ ਬਣਾਉਣ ਦਾ ਮਨ ਬਣਾ ਲਿਆ।
ਭਰਾ ਨੂੰ ਨਹੀਂ ਮਨਾ ਸਕੇ ਸੀਐੱਮ
ਖੁਦ ਸੀਐੱਮ ਚੰਨੀ ਨੇ ਵੀ ਇਹ ਗੱਲ ਕਹੀ ਕਿ ਵਿਧਾਇਕ ਗੁਰਪ੍ਰੀਤ ਜੀਪੀ ਨੇ ਉਹਨਾਂ ਦੇ ਭਰਾ ਦਾ ਟਰਾਂਸਫਰ ਕਰਵਾਇਆ ਸੀ, ਇਸੇ ਨਰਾਜ਼ਗੀ ਦੇ ਚਲਦੇ ਉਹ ਚੋਣ ਲੜਨਾ ਚਾਹੁੰਦੇ ਹਨ। ਹਾਲਾਂਕਿ ਸੀਐੱਮ ਨੇ ਕਿਹਾ ਸੀ ਕਿ ਉਹ ਭਰਾ ਨੂੰ ਮਨਾ ਲੈਣਗੇ, ਪਰ ਉਹ ਅਜਿਹਾ ਨਹੀਂ ਕਰ ਸਕੇ।
