ਬਿਓਰੋ। ਬੀਜੇਪੀ ਨੇ ਪੰਜਾਬ ਵਿਧਾਨ ਸਭਾ ਚੋਣਾਂ ਲਈ ਆਪਣੇ 27 ਹੋਰ ਉਮੀਦਵਾਰਾਂ ਦਾ ਐਲਾਨ ਕਰ ਦਿੱਤਾ ਹੈ। ਉਮੀਦਵਾਰਾਂ ਦੀ ਇਸ ਸੂਚੀ ਵਿੱਚ ਕਈ ਵੱਡੇ ਨਾਂਅ ਸ਼ਾਮਲ ਹਨ। ਸਾਬਕਾ ਕੇਂਦਰੀ ਮੰਤਰੀ ਵਿਜੇ ਸਾਂਪਲਾ ਨੂੰ ਫਗਵਾੜਾ ਤੋਂ ਚੋਣ ਮੈਦਾਨ ‘ਚ ਉਤਾਰਿਆ ਗਿਆ ਹੈ। ਸਾਂਪਲਾ ਇਸ ਵਕਤ ਕੌਮੀ SC ਕਮਿਸ਼ਨ ਦੇ ਚੇਅਰਮੈਨ ਹਨ। ਸਾਂਪਲਾ ਹੁਸ਼ਿਆਰਪੁਰ ਤੋਂ ਸਾਂਸਦ ਰਹਿ ਚੁੱਕੇ ਹਨ। 2019 ਵਿੱਚ ਉਹਨਾਂ ਦੀ ਟਿਕਟ ਕੱਟ ਦਿੱਤੀ ਗਈ ਸੀ।
ਸੀਨੀਅਰ ਬੀਜੇਪੀ ਆਗੂ ਅਤੇ ਕੌਮੀ ਘੱਟ ਗਿਣਤੀ ਕਮਿਸ਼ਨ ਦੇ ਚੇਅਰਮੈਨ ਇਕਬਾਲ ਸਿੰਘ ਲਾਲਪੁਰਾ ਵੀ ਚੋਣ ਲੜਨਗੇ। ਉਹਨਾਂ ਨੂੰ ਪਾਰਟੀ ਨੇ ਰੋਪੜ ਤੋਂ ਟਿਕਟ ਦਿੱਤੀ ਹੈ।
भारतीय जनता पार्टी की केंद्रीय चुनाव समिति ने आगामी पंजाब विधानसभा चुनाव-2022 के लिए निम्नलिखित प्रत्याशियों के नामों पर अपनी स्वीकृति प्रदान की है। @BJP4Punjab pic.twitter.com/3pb64m6eP3
— BJP (@BJP4India) January 27, 2022
ਕਾਂਗਰਸ ਤੋਂ ਆਏ ਵਿਧਾਇਕਾਂ ਨੂੰ ਵੀ ਟਿਕਟ
ਮੋਗਾ ਤੋਂ ਮੌਜੂਦਾ ਵਿਧਾਇਕ ਹਰਜੋਤ ਕਮਲ ਅਤੇ ਕਾਦੀਆਂ ਤੋਂ ਵਿਧਾਇਕ ਫਤਿਹਜੰਗ ਬਾਜਵਾ ਨੂੰ ਵੀ ਬੀਜੇਪੀ ਨੇ ਟਿਕਟ ਦਿੱਤੀ ਹੈ। ਹਰਜੋਤ ਕਮਲ ਨੂੰ ਉਹਨਾਂ ਦੀ ਹੀ ਸੀਟ ਮੋਗਾ ਤੋਂ ਚੋਣ ਮੈਦਾਨ ਵਿੱਚ ਉਤਾਰਿਆ ਗਿਆ ਹੈ, ਜਦਕਿ ਬਾਜਵਾ ਨੂੰ ਕਾਦੀਆਂ ਦੀ ਥਾਂ ਬਟਾਲਾ ਤੋਂ ਟਿਕਟ ਮਿਲੀ ਹੈ।
ਹਰਜੀਤ ਗਰੇਵਾਲ ਦੀ ਟਿਕਟ ਕੱਟੀ
ਪੰਜਾਬ ਬੀਜੇਪੀ ਦੇ ਤੇਜ਼-ਤਰਾਰ ਆਗੂ ਹਰਜੀਤ ਗਰੇਵਾਲ ਨੂੰ ਟਿਕਟ ਨਹੀਂ ਮਿਲੀ ਹੈ। ਗਰੇਵਾਲ ਦੀ ਥਾਂ ਜਗਦੀਸ਼ ਜੱਗਾ ਨੂੰ ਟਿਕਟ ਦਿੱਤੀ ਗਈ ਹੈ। ਖਾਸ ਗੱਲ ਹੈ ਕਿ ਕੈਪਟਨ ਦੀ ਪਾਰਟੀ ਛੱਡ ਕੇ ਇੱਕ ਦਿਨ ਪਹਿਲਾਂ ਹੀ ਜੱਗਾ ਬੀਜੇਪੀ ਵਿੱਚ ਸ਼ਾਮਲ ਹੋਏ ਸਨ।
VIP ਸੀਟਾਂ ‘ਤੇ ਵੀ ਉਤਾਰੇ ਉਮੀਦਵਾਰ
ਚਮਕੌਰ ਸਾਹਿਬ ਤੋਂ ਸੀਐੱਮ ਚਰਨਜੀਤ ਚੰਨੀ ਦੇ ਖਿਲਾਫ਼ ਦਰਸ਼ਨ ਸਿੰਘ ਸ਼ਿਵਜੋਤ ਨੂੰ ਟਿਕਟ ਦਿੱਤੀ ਗਈ ਹੈ। ਲੰਬੀ ਤੋਂ ਪ੍ਰਕਾਸ਼ ਸਿੰਘ ਬਾਦਲ ਦੇ ਖਿਲਾਫ਼ ਰਾਕੇਸ਼ ਢੀਂਗੜਾ ਚੋਣ ਲੜਨਗੇ। ਧੂਰੀ ਤੋਂ ‘ਆਪ’ ਦੇ ਸੀਐੱਮ ਫੇਸ ਭਗਵੰਤ ਮਾਨ ਦੇ ਖਿਲਾਫ਼ ਰਣਦੀਪ ਸਿੰਘ ਦਿਓਲ ਚੋਣ ਲੜਨਗੇ। ਮਜੀਠਾ ਤੋਂ ਬਿਕਰਮ ਮਜੀਠੀਆ ਦੇ ਖਿਲਾਫ਼ ਪ੍ਰਦੀਪ ਸਿੰਘ ਭੁੱਲਰ ਨੂੰ ਟਿਕਟ ਦਿੱਤੀ ਗਈ ਹੈ। ਡਿਪਟੀ ਸੀਐੱਮ ਸੁਖਜਿੰਦਰ ਰੰਧਾਵਾ ਦੇ ਖਿਲਾਫ਼ ਕੁਲਦੀਪ ਸਿੰਘ ਨੂੰ ਮੌੰਕਾ ਦਿੱਤਾ ਗਿਆ ਹੈ।
ਅੰਮ੍ਰਿਤਸਰ ਈਸਟ ‘ਤੇ ਨਹੀਂ ਖੋਲ੍ਹੇ ਪੱਤੇ
ਕੈਪਟਨ ਅਤੇ ਢੀਂਡਸਾ ਦੇ ਨਾਲ ਗਠਜੋੜ ਦੇ ਤਹਿਤ ਬੀਜੇਪੀ 65 ਸੀਟਾਂ ‘ਤੇ ਚੋਣ ਲੜ ਰਹੀ ਹੈ। ਬੀਜੇਪੀ ਹੁਣ ਤੱਕ ਇਹਨਾਂ ‘ਚੋਂ 62 ਸੀਟਾਂ ‘ਤੇ ਉਮੀਦਵਾਰਾਂ ਦਾ ਐਲਾਨ ਕਰ ਚੁੱਕੀ ਹੈ, ਪਰ ਜਿਹਨਾਂ 3 ਸੀਟਾਂ ‘ਤੇ ਅਜੇ ਤੱਕ ਐਲਾਨ ਨਹੀਂ ਹੋਇਆ, ਉਹਨਾਂ ਵਿੱਚ ਅੰਮ੍ਰਿਤਸਰ ਈਸਟ ਦੀ ਸੀਟ ਵੀ ਸ਼ਾਮਲ ਹੈ। ਇਥੇ ਸਿੱਧੂ ਅਤੇ ਮਜੀਠੀਆ ਵਿਚਕਾਰ ਸਿੱਧੀ ਟੱਕਰ ਹੈ।
