ਬਿਓਰੋ। ਡਿਪਟੀ ਸੀਐੱਮ ਸੁਖਜਿੰਦਰ ਰੰਧਾਵਾ ਨੇ ਪਹਿਲੀ ਵਾਰ ਕਬੂਲ ਕੀਤਾ ਹੈ ਕਿ ਕੈਪਟਨ ਅਮਰਿੰਦਰ ਸਿੰਘ ਨੂੰ ਹਟਾਉਣ ਤੋਂ ਬਾਅਦ ਸੀਐੱਮ ਲਈ ਉਹਨਾਂ ਦਾ ਹੀ ਨਾਂਅ ਸੀ। ਉਹਨਾਂ ਨੂੰ ਮੁੱਖ ਮੰਤਰੀ ਬਣਾਉਣ ਲਈ ਹਾਂ ਵੀ ਹੋ ਚੁੱਕੀ ਸੀ, ਪਰ ਬਾਅਦ ਵਿੱਚ ਉਹਨਾਂ ਦੇ ਨਾਲ ਬੈਠੇ ਚਰਨਜੀਤ ਸਿੰਘ ਚੰਨੀ ਮੁੱਖ ਮੰਤਰੀ ਬਣ ਗਏ।
ਹਾਲਾਂਕਿ ਰੰਧਾਵਾ ਨੇ ਇਹ ਨਹੀਂ ਦੱਸਿਆ ਕਿ ਆਖਰੀ ਸਮੇਂ ਵਿੱਚ ਉਹ ਮੁੱਖ ਮੰਤਰੀ ਦੀ ਰੇਸ ਤੋਂ ਬਾਹਰ ਕਿਵੇਂ ਹੋ ਗਏ? ਵੈਸੇ ਉਸ ਵਕਤ ਚਰਚਾ ਇਹ ਸੀ ਕਿ ਪੰਜਾਬ ਕਾਂਗਰਸ ਪ੍ਰਧਾਨ ਨਵਜੋਤ ਸਿੱਧੂ ਨੇ ਸੀਐੱਮ ਬਣਨ ਦਾ ਦਾਅਵਾ ਠੋਕ ਦਿੱਤਾ ਸੀ। ਇਸ ਤੋਂ ਬਾਅਦ ਰੰਧਾਵਾ ਦੀ ਥਾਂ ਚੰਨੀ ਸੀਐੱਮ ਬਣ ਗਏ।
ਚੰਨੀ-ਸਿੱਧੂ ਦੇ ਝਗੜੇ ‘ਤੇ ਵੀ ਬੋਲੇ ਰੰਧਾਵਾ
ਸੁਖਜਿੰਦਰ ਰੰਧਾਵਾ ਨੇ ਭਵਿੱਖ ਵਿੱਚ ਮੁੱਖ ਮੰਤਰੀ ਬਣਨ ਦੇ ਸਵਾਲ ‘ਤੇ ਕਿਹਾ ਕਿ ਜੇਕਰ 2 ਦੀ ਲੜਾਈ ਖਤਮ ਹੋਵੇ, ਤਾਂ ਕਿਸੇ ਤੀਸਰੇ ਨੂੰ ਮੌਕਾ ਮਿਲੇਗਾ। ਇਸ਼ਾਰਿਆਂ ਵਿੱਚ ਉਹਨਾਂ ਦੀਆਂ ਇਹ ਗੱਲਾਂ ਨਵਜੋਤ ਸਿੱਧੂ ਅਤੇ ਚਰਨਜੀਤ ਚੰਨੀ ਲਈ ਸਨ, ਜੋ ਲਗਾਤਾਰ ਸੀਐੱਮ ਚਿਹਰੇ ਲਈ ਦਾਅਵਾ ਠੋਕ ਰਹੇ ਹਨ।
ਸੀਐੱਮ ਨੂੰ ਲੈ ਕੇ ਇਸ ਤਰ੍ਹਾਂ ਬਦਲੇ ਸਮੀਕਰਨ
ਕੈਪਟਨ ਅਮਰਿੰਦਰ ਸਿੰਘ ਨੇ 18 ਸਤੰਬਰ ਨੂੰ ਸੀਐੱਮ ਅਹੁਦੇ ਤੋਂ ਅਸਤੀਫਾ ਦਿੱਤਾ ਸੀ। ਉਸ ਤੋਂ ਬਾਅਦ ਨਵੇਂ ਸੀਐੱਮ ਦੀ ਤਲਾਸ਼ ਸ਼ੁਰੂ ਹੋ ਗਈ। ਕਾਂਗਰਸ ਹਾਈਕਮਾਂਡ ਪੰਜਾਬ ਦੇ ਇਤਿਹਾਸ ਦਾ ਪਹਿਲਾ ਹਿੰਦੂ ਸੀਐੱਮ ਬਣਾਉਣਾ ਚਾਹੁੰਦੀ ਸੀ। ਇਸਦੇ ਲਈ ਸੁਨੀਲ ਜਾਖੜ ਦਾ ਨਾਂਅ ਤੈਅ ਹੋਇਆ, ਪਰ ਪਾਰਟੀ ਦੇ ਅੰਦਰੋਂ ਹੀ ਇਸਦਾ ਵਿਰੋਧ ਹੋਇਆ ਤਾਂ ਰੰਧਾਵਾ ਦਾ ਨਾਂਅ ਅੱਗੇ ਆਇਆ। ਹਾਈਕਮਾਂਡ ਇਸਦੇ ਲਈ ਰਾਜੀ ਵੀ ਹੋ ਗਿਆ, ਪਰ ਕਿਹਾ ਜਾਂਦਾ ਹੈ ਕਿ ਫਿਰ ਸਿੱਧੂ ਨਰਾਜ਼ ਹੋ ਗਏ ਅਤੇ ਕਿਹਾ ਕਿ ਜੇਕਰ ਕਿਸੇ ਜੱਟ ਸਿੱਖ ਨੂੰ ਹੀ ਸੀਐੱਮ ਬਣਾਉਣਾ ਹੈ, ਤਾਂ ਫਿਰ ਉਹ ਕਿਉਂ ਨਹੀਂ। ਆਖਰ ਵਿੱਚ ਹਾਈਕਮਾਂਡ ਨੇ ਵਿਚਲਾ ਰਸਤਾ ਕੱਢਿਆ ਅਤੇ ਦਲਿਤ ਕਾਰਡ ਖੇਡਦੇ ਹੋਏ ਚਰਨਜੀਤ ਸਿੰਘ ਚੰਨੀ ਨੂੰ ਸੀਐੱਮ ਬਣਾ ਦਿੱਤਾ।
