ਬਿਓਰੋ। ਪੰਜਾਬ ਦੀਆਂ ਵਿਧਾਨ ਸਭਾ ਚੋਣਾਂ ਨੂੰ ਲੈ ਕੇ ਸਿਆਸੀ ਪਾਰਾ ਪੂਰੇ ਸਿਖਰਾਂ ‘ਤੇ ਹੈ, ਪਰ ਇਹਨਾਂ ਸਿਆਸੀ ਸਰਗਰਮੀਆਂ ਵਿਚਾਲੇ ਸਾਬਕਾ ਕੇਂਦਰੀ ਮੰਤਰੀ ਹਰਸਿਮਰਤ ਬਾਦਲ ਦੇ ਇੱਕ ਟਵੀਟ ਨੇ ਸੂਬੇ ਵਿੱਚ ਨਵਾਂ ਘਮਸਾਣ ਛੇੜ ਦਿੱਤਾ ਹੈ। ਇਸ ਟਵੀਟ ਵਿੱਚ ਹਰਸਿਮਰਤ ਬਾਦਲ ਦਾਅਵਾ ਕਰ ਰਹੇ ਹਨ ਕਿ ਸ੍ਰੀ ਹਰਿਮੰਦਿਰ ਸਾਹਿਬ ਦੀ ਫੇਰੀ ਦੌਰਾਨ ਰਾਹੁਲ ਗਾਂਧੀ ਦੀ ਜੇਬ ਕੱਟੀ ਗਈ। ਹਾਲਾਂਂਕਿ ਇਹ ਦਾਅਵਾ ਉਹ ਕਿਸ ਅਧਾਰ ‘ਤੇ ਕਰ ਰਹੇ ਹਨ, ਇਹ ਸਾਫ਼ ਨਹੀਂ, ਪਰ ਰਾਹੁਲ ਗਾਂਧੀ ਜਾਂ ਕਾਂਗਰਸ ਦੇ ਕਿਸੇ ਵੀ ਆਗੂ ਵੱਲੋਂ ਅਜਿਹਾ ਕੋਈ ਦਾਅਵਾ ਨਹੀਂ ਕੀਤਾ ਗਿਆ।
ਆਪਣੇ ਟਵੀਟ ਵਿੱਚ ਹਰਸਿਮਰਤ ਬਾਦਲ ਕਹਿੰਦੇ ਹਨ, “ਸ੍ਰੀ ਹਰਿਮੰਦਰ ਸਾਹਿਬ ਵਿਖੇ ਰਾਹੁਲ ਗਾਂਧੀ ਦੀ ਜੇਬ ਕਿਸਨੇ ਕੱਟੀ? ਚਰਨਜੀਤ ਚੰਨੀ? ਨਵਜੋਤ ਸਿੱਧੂ? ਜਾਂ ਸੁਖਜਿੰਦਰ ਸਿੰਘ ਰੰਧਾਵਾ? ਜ਼ੈੱਡ-ਸੁਰੱਖਿਆ ਵੱਲੋਂ ਸਿਰਫ਼ ਇਨ੍ਹਾਂ ਤਿੰਨ ਵਿਅਕਤੀਆਂ ਨੂੰ ਉਨ੍ਹਾਂ ਦੇ ਨੇੜੇ ਜਾਣ ਦੀ ਇਜਾਜ਼ਤ ਦਿੱਤੀ ਗਈ ਸੀ। ਜਾਂ ਫਿਰ ਬੇਅਦਬੀ ਦੀਆਂ ਘਟਨਾਵਾਂ ਤੋਂ ਬਾਅਦ ਇਹ ਸਾਡੇ ਪਵਿੱਤਰ ਅਸਥਾਨ ਦਾ ਨਾਮ ਬਦਨਾਮ ਕਰਨ ਦੀ ਇੱਕ ਹੋਰ ਕੋਸ਼ਿਸ਼ ਮਾਤਰ ਹੈ?”
Who picked @RahulGandhi's pocket at Sri Harmandir Sahib?@CHARANJITCHANNI? @sherryontopp? or @Sukhjinder_INC? These were the only 3 persons allowed by Z-security to get near him. Or is it just one more attempt to bring bad name to our holiest shrine, after the 'be-adbi' incidents?
— Harsimrat Kaur Badal (@HarsimratBadal_) January 29, 2022
ਹਰਸਿਮਰਤ ਕੌਰ ਬਾਦਲ ਦੇ ਇਸ ਟਵੀਟ ‘ਤੇ ਕਾਂਗਰਸ ਦੀ ਤਿੱਖੀ ਪ੍ਰਤੀਕਿਰਿਆ ਲਾਜ਼ਮੀ ਸੀ। ਕਾਂਗਰਸੀ ਆਗੂ ਰਣਦੀਪ ਸੁਰਜੇਵਾਲਾ ਨੇ ਹਰਸਿਮਰਤ ‘ਤੇ ਝੂਠੀ ਖ਼ਬਰ ਫੈਲਾਉਣ ਦਾ ਇਲਜ਼ਾਮ ਲਾਇਆ ਅਤੇ ਨਾਲ ਹੀ ਇਸ ਨੂੰ ਗੁਰੂ ਘਰ ਦਾ ਅਪਮਾਨ ਕਰਾਰ ਦਿੱਤਾ। ਪੰਜਾਬੀ ਵਿੱਚ ਟਵੀਟ ਕਰਦਿਆਂ ਸੁਰਜੇੇਵਾਲਾ ਨੇ ਕਿਹਾ ਕਿ ਅਜਿਹਾ ਕੁਝ ਹੋਇਆ ਹੀ ਨਹੀਂ ਹੈ। ਇਸਦੇ ਨਾਲ ਹੀ ਉਹਨਾਂ ਨੇ ਹਰਸਿਮਰਤ ਬਾਦਲ ਨੂੰ ਕਾਲੇ ਕਾਨੂੰਨਾਂ ‘ਤੇ ਘੇਰਦਿਆਂ ਇਥੋ ਤੱਕ ਕਿਹਾ ਕਿ ਉਹਨਾਂ ਨੇ ਤਾਂ ਦੇਸ਼ ਦੇ ਕਿਸਾਨਾਂ ਦੀ ਜੇਬ ਕੱਟਣ ਦਾ ਕੰਮ ਕੀਤਾ ਹੈ।
ਹਰਸਿਮਰਤ ਜੀ,
ਜਦੋਂ ਅਜਿਹਾ ਹੋਇਆ ਹੀ ਨਹੀਂ ਤਾਂ ਅਜਿਹੀਆਂ ਝੂਠੀਆਂ ਖ਼ਬਰਾਂ ਫਲਾਉਣਾ ਪਵਿੱਤਰ ਗੁਰੂ ਘਰ ਦੀ ਬੇਅਦਬੀ ਹੈ।ਚੋਣਾਵੀ ਵਿਰੋਧ ਚੱਲੂਗਾ ਪਰ ਤੁਹਾਨੂੰ ਜ਼ਿੰਮੇਵਾਰੀ,ਸਿਆਣਪ ਦਿਖਾਉਣੀ ਚਾਹੀਦੀ ਹੈ।ਮੋਦੀ ਸਰਕਾਰ ਦੇ ਮੰਤਰੀ ਮੰਡਲ ਚ ਬੈਠ ਕੇ ਕਾਲੇ ਕਾਨੂੰਨਾਂ ਤੇ ਮੋਹਰ ਲਾਉਣਾ ਲਾਜ਼ਮੀ ਤੌਰ ਤੇ ਕਿਸਾਨਾਂ ਦੀਆਂ ਜੇਬਾਂ ਕੱਟਣ ਦੇ ਬਰਾਬਰ ਹੈ। https://t.co/QTgvPwLWCt
— Randeep Singh Surjewala (@rssurjewala) January 29, 2022
ਪੰਜਾਬ ਕਾਂਗਰਸ ਦੇ ਆਫੀਸ਼ੀਅਲ ਟਵਿਟਰ ਹੈਂਡਲ ਤੋਂ ਵੀ ਹਰਸਿਮਰਤ ਬਾਦਲ ਦੇ ਇਸ ਟਵੀਟ ਦਾ ਜਵਾਬ ਦਿੱਤਾ ਗਿਆ ਅਤੇ ਕਿਹਾ ਗਿਆ, “ਡਰੱਗਜ਼ ਦੇ ਸਰਗਨਾ ਅਤੇ ਅਕਾਲੀ ਦਲ ਦੇ ਲੀਡਰ ਬਿਕਰਮ ਮਜੀਠੀਆ ਦੀ ਭੈਣ ਹੁਣ ਜੇਬਾਂ ਕੱਟਣ ਦੇ ਭਰਮ ਵਿੱਚ ਫੈਲਾਉਣ ਦੀ ਹੱਦ ਤੱਕ ਡਿੱਗ ਗਏ ਹਨ। ਆਪਣੀ ਭੈੜੀ ਸਿਆਸਤ ਲਈ ਸ੍ਰੀ ਹਰਿਮੰਦਿਰ ਸਾਹਿਬ ਬਾਰੇ ਅਜਿਹੀਆਂ ਅਫ਼ਵਾਹਾਂ ਫੈਲਾਉਣੀਆਂ ਬੰਦ ਕਰੋ। ਤੁਹਾਡੇ ਅਤੇ ਤੁਹਾਡੇ ਪਰਿਵਾਰ ਨੇ ਪੰਜਾਬੀਆਂ ਦੀਆਂ ਬੜੀਆਂ ਜੇਬਾਂ ਕੱਟੀਆਂ ਹਨ। ਤੁਹਾਡੇ ਅਤੇ ਬੀਜੇਪੀ ਦੀ ਅਪਵਿੱਤਰ ਸੰਗਤ ਨੇ ਹੀ ਪੰਜਾਬ ਨੂੰ ਬਦਕਿਸਮਤੀ ਅਤੇ ਬਦਨਾਮੀ ਵੱਲ ਧੱਕਿਆ।”
Stop spreading rumours refering to Sri Harmandir Sahib for your petty politics @HarsimratBadal_.
You & your family stole enough from the pockets of Punjab and it's the unholy association of your cartel with the BJP that has brought misfortune, bad name & infamy to Punjab. (2/2)
— Punjab Congress (@INCPunjab) January 29, 2022
ਬੇਸ਼ੱਕ ਹਰਸਿਮਰਤ ਬਾਦਲ ਦੇ ਇਸ ਟਵੀਟ ਨੇ ਸੂਬੇ ਦੀ ਸਿਆਸਤ ਭਖਾ ਦਿੱਤੀ ਹੈ, ਪਰ ਇਹ ਵੀ ਸੋਚਣ ਵਾਲੀ ਗੱਲ ਹੈ ਕਿ ਹਰਸਿਮਰਤ ਬਾਦਲ ਨੂੰ ਅਜਿਹੀ ਜਾਣਕਾਰੀ ਕਿਥੋਂ ਮਿਲੀ ਕਿ ਰਾਹੁਲ ਗਾਂਧੀ ਦੀ ਦਰਬਾਰ ਸਾਹਿਬ ਅੰਦਰ ਜੇਬ ਕੱਟੀ ਗਈ ਹੈ। ਦਿਲਚਸਪ ਹੈ ਕਿ ਹਰਸਿਮਰਤ ਦੇ ਇਸ ਟਵੀਟ ਦੀ ਪੁਸ਼ਟੀ ਲਈ ਉਹਨਾਂ ਵੱਲੋਂ ਕਿਸੇ ਖ਼ਬਰ ਦਾ ਕੋਈ ਲਿੰਕ ਜਾਂ ਕੋਈ ਸੋਸ਼ਲ ਮੀਡੀਆ ਸਟੇਟਸ ਵੀ ਸ਼ੇਅਰ ਨਹੀਂ ਕੀਤਾ ਗਿਆ ਅਤੇ ਨਾ ਹੀ ਅਜਿਹੀ ਕੋਈ ਜਾਣਕਾਰੀ ਕਿਸੇ ਕਾਂਗਰਸ ਵਰਕਰ ਵੱਲੋਂ ਦਿੱਤੀ ਗਈ। ਬਹਿਰਹਾਲ, ਇਸਦਾ ਜਵਾਬ ਤਾਂ ਖੁਦ ਹਰਸਿਮਰਤ ਬਾਦਲ ਹੀ ਦੇ ਸਕਦੇ ਹਨ।
