ਬਿਓਰੋ। ਪੰਜਾਬ ਵਿੱਚ ਪ੍ਰਧਾਨ ਮੰਤਰੀ ਨਰੇਂਦਰ ਮੋਦੀ ਤੋਂ ਬਾਅਦ ਹੁਣ ਰਾਹੁਲ ਗਾਂਧੀ ਦੀ ਸੁਰੱਖਿਆ ਵਿੱਚ ਕੁਤਾਹੀ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਲੁਧਿਆਣਾ ਪਹੁੰਚੇ ਰਾਹੁਲ ਗਾਂਧੀ ਦੀ ਕਾਰ ‘ਤੇ ਇੱਕ ਨੌਜਵਾਨ ਨੇ ਝੰਡਾ ਸੁੱਟ ਦਿੱਤਾ, ਜੋ ਉਨ੍ਹਾਂ ਦੇ ਮੂੰਹ ‘ਤੇ ਜਾ ਲੱਗਿਆ। ਹਾਲਾਂਕਿ ਉਸ ਤੋਂ ਬਾਅਦ ਰਾਹੁਲ ਗਾਂਧੀ ਨੇ ਸ਼ੀਸ਼ਾ ਬੰਦ ਕਰ ਲਿਆ। ਝੰਡਾ ਸੁੱਟਣ ਵਾਲਾ ਕਾਂਗਰਸ ਦਾ ਹੀ ਵਰਕਰ ਦੱਸਿਆ ਜਾ ਰਿਹਾ ਹੈ। ਇਸ ਲਈ ਪੰਜਾਬ ਪੁਲਿਸ ਨੇ ਇਹ ਮਾਮਲਾ ਰਫ਼ਾ-ਦਫ਼ਾ ਕਰ ਦਿੱਤਾ। ਹਾਲਾਂਕਿ ਹੁਣ ਕੇਂਦਰੀ ਸੁਰੱਖਿਆ ਏਜੰਸੀਆਂ ਨੇ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।
ਇਹ ਘਟਨਾ ਐਤਵਾਰ ਦੀ ਹੈ, ਜਦੋਂ ਰਾਹੁਲ ਗਾਂਧੀ ਪੰਜਾਬ ਵਿੱਚ ਸੀਐੱਮ ਚਿਹਰੇ ਦੇ ਐਲਾਨ ਲਈ ਲੁਧਿਆਣਾ ਆਏ ਸਨ। ਜਿਸ ਵਕਤ ਘਟਨਾ ਹੋਈ, ਕਾਰ ਪੰਜਾਬ ਕਾਂਗਰਸ ਦੇ ਸਾਬਕਾ ਪ੍ਰਧਾਨ ਸੁਨੀਲ ਜਾਖੜ ਚਲਾ ਰਹੇ ਸਨ। ਰਾਹੁਲ ਗਾਂਧੀ ਉਨ੍ਹਾਂ ਦੇ ਨਾਲ ਅੱਗੇ ਬੈਠੇ ਸਨ। ਪਿੱਛੇ ਸੀਐੱਮ ਚਰਨਜੀਤ ਚੰਨੀ ਅਤੇ ਨਵਜੋਤ ਸਿੰਘ ਸਿੱਧੂ ਬੈਠੇ ਹੋਏ ਸਨ।
NSUI ਦੇ ਵਰਕਰ ਨੇ ਹੀ ਸੁੱਟਿਆ ਸੀ ਝੰਡਾ
ਰਾਹੁਲ ਗਾਂਧੀ ਲੁਧਿਆਣਾ ਵਿੱਚ ਰੈਲੀ ਲਈ ਪਹੁੰਚੇ ਸਨ। ਹਲਵਾਰਾ ਏਅਰਪੋਰਟ ਤੋਂ ਹੋਟਲ ਆਉਂਦੇ ਵਕਤ ਰਸਤੇ ਵਿੱਚ ਵਰਕਰਾਂ ਨੂੰ ਵੇਖ ਕੇ ਉਹਨਾਂ ਦਾ ਅਭਿਵਾਦਨ ਸਵੀਕਾਰ ਕਰਨ ਲੱਗੇ। ਰਾਹੁਲ ਨੇ ਉਸ ਵਕਤ ਸ਼ੀਸ਼ਾ ਖੋਲ੍ਹਿਆ ਹੋਇਆ ਸੀ। ਇਸੇ ਦੌਰਾਨ ਕਿਸੇ ਨੇ ਕਾਰ ‘ਤੇ ਝੰਡਾ ਸੁੱਟਿਆ, ਜੋ ਰਾਹੁਲ ਗਾਂਧੀ ਦੇ ਮੂੰਹ ‘ਤੇ ਜਾ ਲੱਗਿਆ। ਇਸ ਤੋਂ ਬਾਅਦ ਸੁਰੱਖਿਆ ਕਰਮੀ ਸਤਰਕ ਹੋਏ ਅਤੇ ਰਾਹੁਲ ਨੇ ਸ਼ੀਸ਼ਾ ਬੰਦ ਕਰ ਲਿਆ।
ਰਾਹੁਲ ਗਾਂਧੀ ‘ਤੇ ਸੁੱਟਿਆ ਝੰਡਾ ਕਾਂਗਰਸ ਦਾ ਹੀ ਸੀ। ਜਾਂਚ ਵਿੱਚ ਪਤਾ ਚੱਲਿਆ ਕਿ ਕਾਂਗਰਸ ਦੇ ਸਟੂਡੈਂਟ ਵਿੰਗ NSUI ਦੇ ਵਰਕਰ ਨੇ ਹੀ ਜੋਸ਼ ਵਿੱਚ ਝੰਡਾ ਸੁੱਟ ਦਿੱਤਾ ਸੀ। ਉਸਦੀ ਰਾਹੁਲ ਗਾਂਧੀ ਨੂੰ ਨੁਕਸਾਨ ਪਹੁੰਚਾਉਣ ਦੀ ਕੋਈ ਉਮੀਦ ਨਹੀਂ ਸੀ। ਇਸੇ ਕਾਰਨ ਪੂਰੇ ਮਾਮਲੇ ਦੀ ਪੁਲਿਸ ਨੂੰ ਸ਼ਿਕਾਇਤ ਨਹੀਂ ਦਿੱਤੀ ਗਈ।
PM ਦੀ ਸੁਰੱਖਿਆ ‘ਚ ਕੁਤਾਹੀ ‘ਤੇ ਘਿਰੀ ਸੀ ਚੰਨੀ ਸਰਕਾਰ
ਇਸ ਤੋਂ ਪਹਿਲਾਂ 5 ਫਰਵਰੀ ਨੂੰ ਪੀਐੱਮ ਨਰੇਂਦਰ ਮੋਦੀ ਦੀ ਸੁਰੱਖਿਆ ‘ਚ ਕੁਤਾਹੀ ਦੇ ਮਾਮਲੇ ‘ਤੇ ਸੂਬੇ ਦੀ ਚੰਨੀ ਸਰਕਾਰ ਘਿਰ ਗਈ ਸੀ। ਪੀਐੱਮ ਫ਼ਿਰੋਜ਼ਪੁਰ ਵਿੱਚ ਰੈਲੀ ਨੂੰ ਸੰਬੋਧਤ ਕਰਨ ਆਏ ਸਨ। ਹਾਲਾਂਕਿ ਹਾਈਵੇ ਬਲਾਕ ਹੋਣ ਦੇ ਚੱਲਦੇ ਉਨ੍ਹਾਂ ਨੂੰ ਪਿਆਰੇਆਣਾ ਪਿੰਡ ਦੇ ਫਲਾਈਓਵਰ ‘ਤੇ ਕਰੀਬ 20 ਮਿੰਟ ਰੁਕਣਾ ਪਿਆ। ਇਸ ਤੋਂ ਬਾਅਦ ਉਹ ਵਾਪਸ ਪਰਤ ਗਏ। ਇਸ ਮਾਮਲੇ ਦੀ ਹੁਣ ਸੁਪਰੀਮ ਕੋਰਟ ਵੱਲੋਂ ਬਣਾਈ ਜਾਂਚ ਕਮੇਟੀ ਪੜਤਾਲ ਕਰ ਰਹੀ ਹੈ।
