ਬਿਓਰੋ। ਪੰਜਾਬ ਵਿੱਚ ਵੋਟਿੰਗ ਨੂੰ ਹੁਣ 12 ਦਿਨ ਬਾਕੀ ਰਹਿ ਗਏ ਹਨ ਅਤੇ ਚੋਣਾਂ ਤੋਂ ਠੀਕ ਪਹਿਲਾਂ ਕਰੱਪਸ਼ਨ ਦੇ ਮੁੱਦੇ ‘ਤੇ ਸੀਐੱਮ ਚਰਨਜੀਤ ਸਿੰਘ ਚੰਨੀ ਦੀਆਂ ਮੁਸ਼ਕਲਾਂ ਵੱਧ ਸਕਦੀਆਂ ਹਨ। ਦਰਅਸਲ, ED ਨੇ ਦਾਅਵਾ ਕੀਤਾ ਹੈ ਕਿ ਗੈਰ-ਕਾਨੂੰਨੀ ਮਾਈਨਿੰਗ ਦੇ ਮਾਮਲੇ ਵਿੱਚ ਗ੍ਰਿਫ਼ਤਾਰ ਚੰਨੀ ਦੇ ਭਾਣਜੇ ਭੁਪਿੰਦਰ ਸਿੰਘ ਹਨੀ ਨੇ ਆਪਣਾ ਗੁਨਾਹ ਕਬੂਲ ਕਰ ਲਿਆ ਹੈ। ED ਮੁਤਾਬਕ, ਹਨੀ ਨੇ ਕਸਟਡੀ ਵਿੱਚ ਪੁੱਛਗਿੱਛ ਦੌਰਾਨ ਮੰਨਿਆ ਹੈ ਕਿ ਉਸਨੇ ਰੇਤ ਮਾਫੀਆ ਤੋਂ ਮਾਈਨਿੰਗ ਅਧਿਕਾਰੀਆਂ ਦੇ ਤਬਾਦਲੇ ਅਤੇ ਪੋਸਟਿੰਗ ਕਰਵਾਉਣ ਦੀ ਇਵਜ਼ ਵਿੱਚ 10 ਕਰੋੜ ਰੁਪਏ ਨਗਦ ਲਏ ਸਨ।
ਪਹਿਲਾਂ ਟਾਲਮਟੋਲ ਕਰਦਾ ਰਿਹਾ, ਬਾਅਦ ਵਿੱਚ ਮੰਨਿਆ
ED ਦੇ ਅਧਿਕਾਰੀਆਂ ਨੇ ਦੱਸਿਆ ਕਿ ਜਦੋਂ 10 ਕਰੋੜ ਕੈਸ਼ ਹਨੀ ਅਤੇ ਉਸਦੇ ਦੋਸਤ ਦੇ ਘਰੋਂ ਬਰਾਮਦ ਕੀਤਾ ਗਿਆ, ਤਾਂ ਉਸਨੇ ਕਿਹਾ ਕਿ ਉਹ ਰੇਤ ਦਾ ਧੰਦਾ ਕਰਦਾ ਹੈ ਅਤੇ ਉਸ ਦੀਆਂ ਆਪਣੀਆਂ ਕੰਪਨੀਆਂ ਵੀ ਹਨ, ਜਿਸ ਤੋਂ ਉਸਨੇ ਪੈਸਾ ਕਮਾਇਆ ਹੈ। 3 ਫਰਵਰੀ ਨੂੰ ਉਸ ਨੂੰ ਸੰਮਨ ਭੇਜ ਕੇ ED ਦੇ ਜਲੰਧਰ ਆਫਿਸ ਵਿੱਚ ਪੁੱਛਗਿੱਛ ਲਈ ਬੁਲਾਇਆ ਗਿਆ।
ਘੰਟਿਆਂ ਤੱਕ ਪੁੱਛਗਿੱਛ ਹੋਈ, ਪਰ ਜਵਾਬ ਨਹੀਂ ਮਿਲੇ..ਤਾਂ ED ਨੇ ਹਨੀ ਨੂੰ ਗ੍ਰਿਫ਼ਤਾਰ ਕਰ ਲਿਆ। 4 ਫਰਵਰੀ ਨੂੰ ਹਨੀ ਨੂੰ ਕੋਰਟ ਵਿੱਚ ਪੇਸ਼ ਕਰਕੇ ਰਿਮਾਂਡ ‘ਤੇ ਲਿਆ ਗਿਆ। ਰਿਮਾਂਡ ਦੇ ਦੂਜੇ ਦਿਨ ਸਖਤੀ ਕਰਨ ‘ਤੇ ਉਸਨੇ ਸਾਰੇ ਰਾਜ਼ ਖੋਲ੍ਹ ਦਿੱਤੇ। ਹਨੀ ਦਾ ਰਿਮਾਂਡ ਮੰਗਲਵਾਰ ਨੂੰ ਖ਼ਤਮ ਹੋ ਰਿਹਾ ਹੈ। ED ਹਨੀ ਨੂੰ ਕੋਰਟ ਵਿੱਚ ਪੇਸ਼ ਕਰੇਗੀ। ਜਾਣਕਾਰੀ ਮੁਤਾਬਕ, ED ਕੋਰਟ ਵਿੱਚ ਹਨੀ ਦਾ ਰਿਮਾਂਡ ਵਧਾਉਣ ਦੀ ਮੰਗ ਕਰੇਗੀ।
ਹਨੀ ਦੇ ਘਰ ਤੋਂ ਮਿਲੇ ਸਨ 8 ਕਰੋੜ ਰੁਪਏ
ED ਦੀ ਟੀਮ ਨੇ 18 ਜਨਵਰੀ ਨੂੰ ਭੁਪਿੰਦਰ ਸਿੰਘ ਅਤੇ ਉਸਦੇ ਨਾਲ ਕੰਮ ਕਰਨ ਵਾਲੇ ਲੋਕਾਂ ਦੇ ਘਰਾਂ ਵਿੱਚ ਛਾਪੇ ਮਾਰੇ ਸਨ। ਕੇਂਦਰੀ ਏਜੰਸੀ ਨੇ ਹਨੀ ਦੇ ਘਰੋਂ ਕਰੀਬ 7.9 ਕਰੋੜ ਰੁਪਏ ਨਗਦ ਅਤੇ ਇੱਕ ਹੋਰ ਸ਼ਖਸ ਸੰਦੀਪ ਕੁਮਾਰ ਤੋਂ ਕਰੀਬ 2 ਕਰੋੜ ਰੁਪਏ ਨਗਦ ਜ਼ਬਤ ਕੀਤੇ ਸਨ।
