ਬਿਓਰੋ। ਪੰਜਾਬ ਵਿੱਚ ਕਾਂਗਰਸ ਦੇ ਮੁੱਖ ਮੰਤਰੀ ਅਹੁਦੇ ਦੇ ਦਾਅਵੇਦਾਰ ਚਰਨਜੀਤ ਸਿੰਘ ਚੰਨੀ ਇਸ ਵਾਰ 2 ਹਲਕਿਆਂ ਤੋਂ ਵਿਧਾਨ ਸਭਾ ਚੋਣ ਲੜ ਰਹੇ ਹਨ। ਚੰਨੀ ਆਪਣੀ ਪਰੰਪਰਾਗਤ ਸੀਟ ਚਮਕੌਰ ਸਾਹਿਬ ਦੇ ਨਾਲ-ਨਾਲ ਭਦੌੜ ਤੋਂ ਵੀ ਕਿਸਮਤ ਅਜ਼ਮਾ ਰਹੇ ਹਨ। ਖੁਦ ਮੁੱਖ ਮੰਤਰੀ ਦੇ ਮੈਦਾਨ ਵਿੱਚ ਆਉਣ ਨਾਲ ਇਹ ਸੀਟ ਪੰਜਾਬ ਦੀਆਂ ਹੌਟ ਸੀਟਾਂ ਵਿੱਚ ਸ਼ੁਮਾਰ ਹੋ ਗਈ ਹੈ। ਜਾਤੀਗਤ ਸਮੀਕਰਨਾਂ ਦੇ ਲਿਹਾਜ਼ ਨਾਲ ਪਹਿਲਾਂ ਇਹ ਸੀਟ ਚੰਨੀ ਲਈ ਸੇਫ ਸੀਟ ਦੱਸੀ ਜਾ ਰਹੀ ਹੈ, ਪਰ ਹੁਣ ਇਥੇ ਕਰੜਾ ਮੁਕਾਬਲਾ ਦੱਸਿਆ ਜਾ ਰਿਹਾ ਹੈ।
ਸਿਆਸੀ ਜਾਣਕਾਰਾਂ ਮੁਤਾਬਕ, ਇਸ ਸੀਟ ‘ਤੇ ਸੀਐੱਮ ਚੰਨੀ ਨੂੰ ਆਮ ਆਦਮੀ ਪਾਰਟੀ ਦੇ ਉਮੀਦਵਾਰ ਲਾਭ ਸਿੰਘ ਓਗੋਕੇ ਤੋਂ ਕਰੜੀ ਟੱਕਰ ਮਿਲ ਰਹੀ ਹੈ। ਇਸ ਤੋਂ ਇਲਾਵਾ ਅਕਾਲੀ ਦਲ ਦੇ ਸਤਨਾਮ ਸਿੰਘ ਰਾਹੀ ਅਤੇ ਬੀਜੇਪੀ ਗਠਜੋੜ ਦੇ ਧਰਮ ਸਿੰਘ ਫੌਜੀ ਵੀ ਮੁਕਾਬਲੇ ਵਿੱਚ ਹਨ।
ਕਿਸ ਉਮੀਦਵਾਰ ਦੀ..ਕੀ ਤਾਕਤ, ਕੀ ਕਮਜੋਰੀ?
ਚਰਨਜੀਤ ਸਿੰਘ ਚੰਨੀ, ਕਾਂਗਰਸ
ਤਾਕਤ: ਚਰਨਜੀਤ ਸਿੰਘ ਚੰਨੀ ਸੂਬੇ ਦੇ ਮੌਜੂਦਾ ਮੁੱਖ ਮੰਤਰੀ ਹਨ। ਕਾਂਗਰਸ ਉਹਨਾਂ ਦੇ ਚਿਹਰੇ ‘ਤੇ ਚੋਣ ਲੜ ਰਹੀ ਹੈ। SC-ST ਵੋਟਰਾਂ ਵਿੱਚ ਉਹਨਾਂ ਦਾ ਚੰਗਾ ਪ੍ਰਭਾਵ ਹੈ।
ਕਮਜੋਰੀ: ਚੰਨੀ ਦਾ ਬਾਹਰੀ ਉਮੀਦਵਾਰ ਹੋਣਾ ਇਸ ਹਲਕੇ ਵਿੱਚ ਉਹਨਾਂ ਲਈ ਨੁਕਸਾਨਦੇਹ ਸਾਬਿਤ ਹੋ ਸਕਦਾ ਹੈ।
ਲਾਭ ਸਿੰਘ ਓਗੋਕੇ, ਆਮ ਆਦਮੀ ਪਾਰਟੀ
ਤਾਕਤ: ਓਗੋਕੇ ਦੀ ਪੈਦਾਇਸ਼ ਇਸੇ ਹਲਕੇ ਦੀ ਹੈ, ਜਿਸਦੇ ਚਲਦੇ ਉਹਨਾਂ ਦਾ ਹਲਕੇ ਦੇ ਲੋਕਾਂ ਵਿੱਚ ਚੰਗਾ ਅਧਾਰ ਹੈ।
ਕਮਜੋਰੀ: ਫਿਲਹਾਲ ਲਾਭ ਸਿੰਘ ਓਗੋਕੇ ਲਈ ਇਸ ਹਲਕੇ ਵਿੱਚ ਸਭ ਤੋਂ ਵੱਡਾ ਨੁਕਸਾਨ ਇਹੀ ਹੋ ਸਕਦਾ ਹੈ ਕਿ ਉਹਨਾਂ ਦਾ ਮੁਕਾਬਲਾ ਸੂਬੇ ਦੇ ਵੱਡੇ ਚਿਹਰੇ ਨਾਲ ਹੈ।
ਧਰਮ ਸਿੰਘ ਫੌਜੀ, ਬੀਜੇਪੀ ਗਠਜੋੜ
ਤਾਕਤ: ਧਰਮ ਸਿੰਘ ਸੂਬੇ ਦੇ ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਦੇ ਕਰੀਬੀ ਮੰਨੇ ਜਾਂਦੇ ਹਨ। ਇਹਨਾਂ ਦਾ ਵੀ ਹਲਕੇ ਦੇ ਲੋਕਾਂ ਵਿੱਚ ਚੰਗਾ ਅਧਾਰ ਹੈ।
ਕਮਜੋਰੀ: ਖੇਤੀ ਕਾਨੂੰਨਾਂ ਦੇ ਚਲਦੇ ਪਿੰਡਾਂ ਵਿੱਚ ਬੀਜੇਪੀ ਦਾ ਵਿਰੋਧ ਅਤੇ ਸਾਥੀ ਬੀਜੇਪੀ ਆਗੂਆਂ ਦੀ ਨਰਾਜ਼ਗੀ ਉਹਨਾਂ ਲਈ ਨੁਕਸਾਨਦੇਹ ਹੋ ਸਕਦੀ ਹੈ
ਸਤਨਾਮ ਸਿੰਘ ਰਾਹੀ, SAD-BSP ਗਠਜੋੜ
ਤਾਕਤ: ਸਤਨਾਮ ਸਿੰਘ ਰਾਹੀ ਪੇਸ਼ੇ ਤੋਂ ਵਕੀਲ ਹਨ ਅਤੇ ਉਹਨਾਂ ਦਾ ਹਲਕੇ ਦੇ ਲੋਕਾਂ ਵਿੱਚ ਚੰਗਾ ਅਧਾਰ ਹੈ।
ਕਮਜੋਰੀ: ਸਤਨਾਮ ਸਿੰਘ ਰਾਹੀ ਦਾ ਬਾਹਰੀ ਹੋਣਾ ਉਹਨਾਂ ਦੀ ਜਿੱਤ ਵਿੱਚ ਰੌੜਾ ਹੋ ਸਕਦਾ ਹੈ।
ਕੀ ਕਹਿੰਦਾ ਹੈ ਭਦੌੜ ਦਾ ਜਾਤੀਗਤ ਸਮੀਕਰਨ?
ਕਰੀਬ ਡੇਢ ਲੱਖ ਵੋਟਰਾਂ ਵਾਲੇ ਭਦੌੜ ਵਿੱਚ ਸਭ ਤੋਂ ਵੱਧ ਵੋਟਾਂ SC-ST ਭਾਈਚਾਰੇ ਦੀਆਂ ਹਨ। ਕਰੀਬ 76 ਹਜਾਰ ਵੋਟਰ ਇਸੇ ਭਾਈਚਾਰੇ ਤੋਂ ਹਨ, ਜਦਕਿ ਜੱਟ ਸਿੱਖ ਵੋਟਰਾਂ ਦੀ ਗਿਣਤੀ 53 ਹਜਾਰ ਹੈ ਅਤੇ ਹਿੰਦੂ ਵੋਟਰ 26 ਹਜਾਰ ਹਨ। ਮੁਸਲਿਮ ਵੋਟਰਾਂ ਦੀ ਗਿਣਤੀ 2800 ਹੈ।
SAD ਦਾ ਗੜ੍ਹ ਰਿਹਾ, 2017 ‘ਚ ਜਿੱਤੀ AAP
ਸਾਲ 1967 ਵਿੱਚ ਹੋਂਦ ‘ਚ ਆਈ ਭਦੌੜ ਸੀਟ ਕਿਸੇ ਵਕਤ ਅਕਾਲੀ ਦਲ ਦਾ ਗੜ੍ਹ ਮੰਨੀ ਜਾਂਦੀ ਸੀ। ਇਥੇ ਸਭ ਤੋਂ ਵੱਧ 7 ਵਾਰ ਅਕਾਲੀ ਦਲ ਦੇ ਵਿਧਾਇਕ ਜੇਤੂ ਰਹੇ ਹਨ। 1972, 1977, 1980, 1985, 1997, 2002 ਅਤੇ 2007 ਦੀਆਂ ਚੋਣਾਂ ਵਿੱਚ ਭਦੌੜ ਤੋਂ ਅਕਾਲੀ ਦਲ ਦੇ ਉਮੀਦਵਾਰ ਜਿੱਤ ਹਾਸਲ ਕਰਕੇ ਵਿਧਾਨ ਸਭਾ ਪਹੁੰਚੇ। ਕਾਂਗਰਸ ਪਾਰਟੀ ਇਸ ਹਲਕੇ ਤੋਂ 2 ਵਾਰ 1969 ਅਤੇ 2012 ਵਿੱਚ ਜੇਤੂ ਰਹੀ ਹੈ। 2012 ਵਿੱਚ ਪੰਜਾਬੀ ਗਾਇਕ ਮੁਹੰਮਦ ਸਦੀਕ ਇਥੋਂ ਵਿਧਾਇਕ ਚੁਣੇ ਗਏ ਸਨ। ਇਸ ਤੋਂ ਇਲਾਵਾ 1967 ਵਿੱਚ ਇਥੋਂ ਲੈਫਟ ਪਾਰਟੀ ਅਤੇ 1992 ਵਿੱਚ ਬਹੁਜਨ ਸਮਾਜ ਪਾਰਟੀ ਨੇ ਜਿੱਤ ਹਾਸਲ ਕੀਤੀ ਸੀ। 2017 ਦੀਆਂ ਵਿਧਾਨ ਸਭਾ ਚੋਣਾਂ ਵਿੱਚ ਇਸ ਹਲਕੇ ਦੇ ਲੋਕਾਂ ਨੇ ਆਮ ਆਦਮੀ ਪਾਰਟੀ ਦੇ ਉਮੀਦਵਾਰ ਪਿਰਮਲ ਸਿੰਘ ਖਾਲਸਾ ‘ਤੇ ਭਰੋਸਾ ਜਤਾਇਆ ਸੀ। ਹਾਲਾਂਕਿ ਹੁਣ ਖਾਲਸਾ ਆਮ ਆਦਮੀ ਪਾਰਟੀ ਨੂੰ ਅਲਵਿਦਾ ਆਖ ਕੇ ਕਾਂਗਰਸ ਵਿੱਚ ਸ਼ਾਮਲ ਹੋ ਚੁੱਕੇ ਹਨ।
