ਬਿਓਰੋ। ਸ੍ਰੀ ਹਰਿਗੋਬਿੰਦਪੁਰ ਤੋਂ ਕਾਂਗਰਸ ਦੇ ਮੌਜੂਦਾ ਵਿਧਾਇਕ ਬਲਵਿੰਦਰ ਸਿੰਘ ਲਾਡੀ ਇੱਕ ਵਾਰ ਫਿਰ ਬੀਜੇਪੀ ਵਿੱਚ ਸ਼ਾਮਲ ਹੋ ਗਏ ਹਨ। ਅੰਮ੍ਰਿਤਸਰ ਵਿੱਚ ਬੀਜੇਪੀ ਆਗੂ ਤਰੁਣ ਚੁੱਘ ਅਤੇ ਫਤਿਹਜੰਗ ਬਾਜਵਾ ਨੇ ਉਹਨਾਂ ਨੂੰ ਪਾਰਟੀ ਵਿੱਚ ਸ਼ਾਮਲ ਕਰਵਾਇਆ। ਦਿਲਚਸਪ ਹੈ ਕਿ ਲਾਡੀ ਡੇਢ ਮਹੀਨੇ ਅੰਦਰ 3 ਵਾਰ ਪਾਰਟੀ ਬਦਲ ਚੁੱਕੇ ਹਨ ਅਤੇ ਇਹਨਾਂ ‘ਚੋਂ 2 ਵਾਰ ਤਾਂ ਉਹ ਬੀਜੇਪੀ ਵਿੱਚ ਹੀ ਸ਼ਾਮਲ ਹੋਏ ਹਨ।
ਦਰਅਸਲ, ਬੀਤੀ 28 ਦਸੰਬਰ ਨੂੰ ਹੀ ਬਲਵਿੰਦਰ ਸਿੰਘ ਲਾਡੀ ਕਾਂਗਰਸ ਛੱਡ ਕੇ ਬੀਜੇਪੀ ਵਿੱਚ ਸ਼ਾਮਲ ਹੋਏ ਸਨ। ਦਿੱਲੀ ਵਿੱਚ ਬੀਜੇਪੀ ਹੈੱਡਕੁਆਰਟਰ ਵਿਖੇ ਲਾਡੀ ਅਤੇ ਵਿਧਾਇਕ ਫਤਿਹਜੰਗ ਬਾਜਵਾ ਨੇ ਬੀਜੇਪੀ ਜੁਆਇਨ ਕੀਤੀ ਸੀ। ਇਸ ਤੋਂ ਬਾਅਦ ਮਹਿਜ਼ 6 ਦਿਨਾਂ ਅੰਦਰ ਰਾਤੋ-ਰਾਤ ਉਹ ਮੁੜ ਕਾਂਗਰਸ ਵਿੱਚ ਸ਼ਾਮਲ ਹੋ ਗਏ। ਖੁਦ ਸੀਐੱਮ ਚਰਨਜੀਤ ਸਿੰਘ ਚੰਨੀ ਅਤੇ ਖਜਾਨਾ ਮੰਤਰੀ ਮਨਪ੍ਰੀਤ ਬਾਦਲ ਨੇ ਉਹਨਾਂ ਨੂੰ ਪਾਰਟੀ ਵਿੱਚ ਸ਼ਾਮਲ ਕਰਵਾਇਆ।
ਟਿਕਟ ਨਾ ਮਿਲਣ ਦੇ ਚਲਦੇ ਸਨ ਨਰਾਜ਼
ਦਰਅਸਲ, ਬਲਵਿੰਦਰ ਲਾਡੀ ਸ੍ਰੀ ਹਰਗੋਬਿੰਦਪੁਰ ਤੋਂ ਕਾਂਗਰਸ ਦੀ ਟਿਕਟ ਦੇ ਦਾਅਵੇਦਾਰ ਸਨ। ਪਰ ਕਾਂਗਰਸ ਨੇ ਉਨ੍ਹਾਂ ਦੀ ਥਾਂ ਮਨਦੀਪ ਸਿੰਘ ਨੂੰ ਟਿਕਟ ਦੇ ਦਿੱਤੀ।
ਜਦੋਂ ਲਾਡੀ ਨੇ ਪਹਿਲਾਂ ਬੀਜੇਪੀ ਜੁਆਇਨ ਕੀਤੀ, ਉਦੋਂ ਕਾਂਗਰਸ ਕਹਿੰਦੀ ਰਹੀ ਕਿ ਲਾਡੀ ਨੂੰ ਟਿਕਟ ਨਹੀਂ ਮਿਲ ਰਹੀ ਸੀ, ਜਿਸ ਬਾਰੇ ਉਨ੍ਹਾਂ ਨੂੰ ਦੱਸ ਵੀ ਦਿੱਤਾ ਗਿਆ ਸੀ। ਇਸੇ ਕਾਰਨ ਉਹ ਬੀਜੇਪੀ ਵਿੱਚ ਗਏ। ਹਾਲਾਂਕਿ ਬਾਅਦ ਵਿੱਚ ਟਿਕਟ ਦਾ ਭਰੋਸਾ ਮਿਲਣ ‘ਤੇ ਹੀ ਉਨ੍ਹਾਂ ਨੇ ਕਾਂਗਰਸ ਵਿੱਚ ਵਾਪਸੀ ਦਾ ਐਲਾਨ ਕਰ ਦਿੱਤਾ। ਜ਼ਾਹਿਰ ਹੈ ਹੁਣ ਟਿਕਟ ਨਾ ਮਿਲਣ ਦੇ ਚਲਦੇ ਹੀ ਉਹ ਵਾਪਸ ਇੱਕ ਵਾਰ ਫਿਰ ਬੀਜੇਪੀ ਵਿੱਚ ਗਏ ਹਨ।
..ਤਾਂ ਕੀ ਹੁਣ ਲੋਕ ਨਰਾਜ਼ ਨਹੀਂ?
ਦਿਲਚਸਪ ਹੈ ਕਿ ਜਦੋਂ ਬੀਤੀ 3 ਜਨਵਰੀ ਨੂੰ ਲਾਡੀ ਨੇ ਕਾਂਗਰਸ ਵਿੱਚ ਘਰ ਵਾਪਸੀ ਕੀਤੀ ਸੀ, ਤਾਂ ਉਹਨਾਂ ਨੇ ਕਿਹਾ ਸੀ ਕਿ ਬੀਜੇਪੀ ਵਿੱਚ ਜਾਣ ਦੇ ਚਲਦੇ ਉਨ੍ਹਾਂ ਦੇ ਵਿਧਾਨ ਸਭਾ ਹਲਕੇ ਦੇ ਲੋਕ ਨਰਾਜ਼ ਸਨ, ਜਿਸ ਕਾਰਨ ਉਨ੍ਹਾਂ ਨੇ ਫੈਸਲਾ ਬਦਲਿਆ। ਅਜਿਹੇ ਵਿੱਚ ਇਹ ਸਵਾਲ ਲਾਜ਼ਮੀ ਹੈ ਕਿ..ਕੀ ਹੁਣ ਲੋਕਾਂ ਦੀ ਨਰਾਜ਼ਗੀ ਦੂਰ ਹੋ ਗਈ ਹੈ? ਜ਼ਾਹਿਰ ਹੈ ਸਿਆਸਤ ਵਿੱਚ ਕਦੇ ਕੋਈ ਕਿਸੇ ਦਾ ਨਹੀਂ ਹੁੰਦਾ। ਵਧੇਰੇਤਰ ਸਿਆਸਤਦਾਨਾਂ ਲਈ ਨਿੱਜੀ ਸਵਾਰਥ ਹੀ ਸਭ ਤੋਂ ਉੱਪਰ ਹੈ। ਬਲਵਿੰਦਰ ਲਾਡੀ ਵੱਲੋਂ ਡੇਢ ਮਹੀਨੇ ਅੰਦਰ ਤਿੰਨ ਵਾਰ ਪਾਲਾ ਬਦਲੇ ਜਾਣ ਤੋਂ ਇਹ ਗੱਲ ਸਹੀ ਸਾਬਿਤ ਹੁੰਦੀ ਨਜ਼ਰ ਆ ਰਹੀ ਹੈ।
