ਬਿਓਰੋ। ਪੰਜਾਬੀ ਅਦਾਕਾਰ ਦੀਪ ਸਿੱਧੂ ਦੀ ਸੜਕ ਹਾਦਸੇ ਵਿੱਚ ਮੌਤ ਦੇ ਮਾਮਲੇ ‘ਚ ਹੁਣ ਉਹਨਾਂ ਦੀ ਗਰਲਫਰੈਂਡ ਰੀਨਾ ਰੌਏ ਨੇ ਚੁੱਪੀ ਤੋੜੀ ਹੈ। ਰੀਨਾ ਨੇ ਸ਼ੁੱਕਰਵਾਰ ਨੂੰ ਇੰਸਟਾਗ੍ਰਾਮ ‘ਤੇ ਇੱਕ ਪੋਸਟ ਸ਼ੇਅਰ ਕੀਤੀ, ਜਿਸ ਵਿੱਚ ਪੂਰੀ ਘਟਨਾ ਨੂੰ ਬਿਆਨ ਕੀਤਾ। ਰੀਨਾ ਨੇ ਦੱਸਣ ਦੀ ਕੋਸ਼ਿਸ਼ ਕੀਤੀ ਹੈ ਕਿ ਕਿਵੇਂ ਉਹ ਤੇ ਦੀਪ ਸਿੱਧੂ ਦਿੱਲੀ ਤੋਂ ਪੰਜਾਬ ਜਾ ਰਹੇ ਸਨ ਕਿ ਉਹਨਾਂ ਦੀ ਗੱਡੀ ਹਾਦਸੇ ਦਾ ਸ਼ਿਕਾਰ ਹੋ ਗਈ।
ਰੀਨਾ ਨੇ 120 ਘੰਟਿਆਂ ਦੇ ਪਿਆਰ, ਦਰਦ, ਮੌਤ ਅਤੇ ਘਰ ਵਾਪਸੀ ਨੂੰ ਹੀ ਜਾਹਿਰ ਕੀਤਾ। ਲਿਖਿਆ ਕਿ ਮੈਂ ਇੰਡੀਆ ਪਹੁੰਚੀ, ਪਿਆਰ ਦਾ ਦਿਨ ਵੈਲੇਂਟਾਈਨਸ ਡੇਅ ਮਨਾਇਆ, ਕਾਰ ਐਕਸੀਡੈਂਟ ਝੱਲਿਆ, ਆਪਣੇ ਪਿਆਰ ਨੂੰ ਗੁਆਇਆ ਅਤੇ ਫਿਰ ਵਾਪਸ ਆ ਗਈ।
ਰੀਨਾ ਰੌਏ ਦੀ ਭਾਵੁਕ ਪੋਸਟ
”ਜੋ ਆਤਮਾ ਨਾਲ ਜੁੜੇ ਹੁੰਦੇ ਹਨ, ਤਾਂ ਉਹ ਕਦੇ ਇੱਕ-ਦੂਜੇ ਨੂੰ ਇਕੱਲਾ ਨਹੀਂ ਛੱਡਦੇ। ਕਿਤੇ ਦੂਰ ਕਿਸੇ ਦੂਜੇ ਜਹਾਂ ਵਿੱਚ ਮੈਂ ਤੁਹਾਨੂੰ ਮਿਲਾਂਗਾ। ਤੁਹਾਡੇ ਬਿਨ੍ਹਾਂ ਮੈਂ ਅੰਦਰੋਂ ਮਰ ਚੁੱਕੀ ਹਾਂ। ਤੁਹਾਨੂੰ ਬਹੁਤ ਜਿਆਦਾ ਮਿਸ ਕਰ ਰਹੀ ਹਾਂ। ਤੁਸੀਂ ਵਾਅਦਾ ਕੀਤਾ ਸੀ ਕਿ ਕਦੇ ਮੈਨੂੰ ਨਹੀਂ ਛੱਡੋਗੇ, ਪਰ ਤੁਸੀਂ ਮੈਨੂੰ ਇਥੇ ਇਕੱਲਾ ਛੱਡ ਗਏ। ਮੈਂ ਟੁੱਟ ਚੁੱਕੀ ਹਾਂ, ਉਦਾਸ ਹਾਂ ਅਤੇ ਪਾਗਲਾਂ ਵਰਗੀ ਹੋ ਗਈ ਹਾਂ। ਮੈਂ ਸਿਰਫ਼ ਤੁਹਾਡਾ ਪਿਆਰ ਭਰਾ ਇਜ਼ਹਾਰ ਸੁਣਨਾ ਚਾਹੁੰਦੀ ਹਾਂ।
ਪਿਛਲੇ ਐਤਵਾਰ, ਮੈਂ ਕੁਝ ਪ੍ਰੋਜੈਕਟ ਸ਼ੁਰੂ ਕਰਨ ਅਤੇ ਦੀਪ ਦੇ ਨਾਲ ਵੈਲੇਂਟਾਈਨਸ ਡੇਅ ਮਨਾਉਣ ਲਈ ਦਿੱਲੀ ਆਈ ਸੀ, ਕਿਉਂਕਿ ਅਸੀਂ ਪਿਛਲੇ ਸਾਲ ਇਹ ਦਿਨ ਇਕੱਠੇ ਨਹੀਂ ਮਨਾਇਆ ਸੀ। ਇਹ ਇੱਕ ਜਾਦੁਈ ਦਿਨ ਸੀ, ਜਿਸ ਨੂੰ ਮੈਂ ਹਮੇਸ਼ਾ ਆਪਣੇ ਦਿਲ ਵਿੱਚ ਰੱਖਾਂਗੀ। ਅਗਲੇ ਦਿਨ ਅਸੀਂ ਮੁੰਬਈ ਜਾਂ ਤੋਂ ਪਹਿਲਾਂ ਪੰਜਾਬ ਜਾਣ ਦਾ ਫੈਸਲਾ ਕੀਤਾ। ਅਸੀਂ ਆਪਣਾ ਸਾਮਾਨ ਪੈਕ ਕੀਤਾ, ਸਕਾਰਪੀਓ ਵਿੱਚ ਲੌਡ ਕੀਤਾ ਅਤੇ ਨਿਕਲ ਗਏ। ਮੈਂ ਦੀਪ ਨਾਲ ਕੁਝ ਸਮੇਂ ਤੱਕ ਗੱਲਾਂ ਕੀਤੀਆਂ ਤੇ ਫਿਰ ਮੈਂ ਥੋੜ੍ਹਾ ਅਰਾਮ ਕਰਨ ਦਾ ਸੋਚਿਆ, ਕਿਉਂਕਿ ਮੈਨੂੰ ਫਲਾਈਟ ਦੀ ਕਾਫੀ ਥਕਾਨ ਸੀ।
ਮੈਂ ਆਪਣੀ ਸੀਟ ਪਿੱਛੇ ਕੀਤੀ, ਜੁੱਤੇ ਉਤਾਰੇ ਅਤੇ ਸੌ ਗਈ। ਮੈਨੂੰ ਬੱਸ ਇੰਨਾ ਯਾਦ ਹੈ ਕਿ ਮੈਂ ਸੀਟ ‘ਤੇ ਬੁਰੀ ਤਰ੍ਹਾਂ ਹਿਲ ਗਈ, ਅਤੇ ਏਅਰਬੈਗ ਨਾਲ ਟਕਰਾਈ। ਮੈਨੂੰ ਪਿੱਠ ‘ਤੇ ਮਹਿਸੂਸ ਹੋਇਆ ਕਿ ਜਿਵੇਂ ਅੱਗ ਲੱਗੀ ਪਈ ਹੋਵੇ ਅਤੇ ਮੈਂ ਪੂਰੀ ਤਰ੍ਹਾਂ ਸਦਮੇ ਵਿੱਚ ਸੀ। ਮੈਂ ਉੱਪਰ ਵੇਖਿਆਸ ਤਾਂ ਦੀਪ ਹਿੱਲ ਨਹੀਂ ਰਿਹਾ ਸੀ। ਮੈਂ ਵਾਹਿਗੁਰੂ ਅੱਗੇ ਅਰਦਾਸ ਕੀਤੀ ਅਤੇ ਉਹਨਾਂ ਤੋਂ ਮੈਨੂੰ ਦੀਪ ਦੀ ਮਦਦ ਕਰਨ ਦੀ ਸ਼ਕਤੀ ਦੇਣ ਦੀ ਪ੍ਰਾਰਥਨਾ ਕੀਤੀ। ਮੈਂ ਉੱਚੀ ਅਵਾਜ਼ ‘ਚ ਬੋਲੀ, “ਦੀਪ, ਵੇਕ ਅੱਪ..!” ਫਿਰ ਮੈਂ ਉਠਣ ਵਿੱਚ ਥੋੜ੍ਹੀ ਸਮਰੱਥ ਹੋਈ ਅਤੇ ਉਸਦਾ ਮੂੰਹ ਆਪਣੇ ਵੱਲ ਮੋੜਿਆ। ਉਸਦੇ ਚਿਹਰੇ ਦਾ ਸੱਜਾ ਪਾਸਾ ਪੂਰੀ ਤਰ੍ਹਾਂ ਖੂਨ ਨਾਲ ਲਥਪਥ ਸੀ। ਮੈਂ ਬੇਹੋਸ਼ ਹੋ ਗਈ, ਪਿੱਛੇ ਝੁਕੀ ਅਤੇ ਮਦਦ ਲਈ ਚੀਕਣ ਲੱਗੀ। ਇੱਕ ਰਾਹਗੀਰ ਨੇ ਆ ਕੇ ਮੈਨੂੰ ਸਕਾਰਪੀਓ ਤੋਂ ਬਾਹਰ ਕੱਢਿਆ ਅਤੇ ਜ਼ਮੀਨ ‘ਤੇ ਪਾ ਦਿੱਤਾ।
ਉਥੇ ਹੀ ਪਏ ਹੋਏ ਮੈਂ ਮਨਦੀਪ ਨੂੰ ਫੋਨ ਕੀਤਾ ਅਤੇ ਆਸਪਾਸ ਮੌਜੂਦ ਲੋਕਾਂ ਨੂੰ ਦੀਪ ਦੀ ਮਦਦ ਕਰਨ ਦੀ ਗੁਹਾਰ ਲਗਾਈ। ਉਹ ਗੱਡੀ ਵਿੱਚ ਅੱਗੇ ਦੀ ਸੀਟ ‘ਤੇ ਫਸਿਆ ਸੀ ਅਤੇ ਕਾਰ ਦਾ ਕੈਬਿਨ ਉਸਦੇ ਚਾਰੇ ਪਾਸਿਓਂ ਨੁਕਸਾਨਿਆ ਗਿਆ ਸੀ। ਪਹਿਲੀ ਐਂਬੂਲੈਂਸ ਆਉਣ ਤੋਂ ਬਾਅਦ ਮੈਨੂੰ ਉਥੇ 30 ਮਿੰਟਾਂ ਲਈ ਰੱਖਿਆ ਗਿਆ ਸੀ। ਮੈਂ ਵੇਖਿਆ ਕਿ ਉਥੇ ਮੌਜੂਦ ਲੋਕਾਂ ਅਤੇ ਮੈਡੀਕਲ ਟੀਮ ਨੇ ਪੂਰੀ ਕੋਸ਼ਿਸ਼ ਕੀਤੀ ਅਤੇ ਆਖਰ ਦੀਪ ਨੂੰ ਸਕਾਰਪੀਓ ਵਿੱਚੋਂ ਕੱਢਣ ‘ਚ ਸਫਲ ਰਹੇ। ਪੈਰਾਮੈਡੀਕਲ ਟੀਮ ਨੇ ਦੀਪ ਨੂੰ ਦੂਜੀ ਐਂਬੂਲੈਂਸ ਵਿੱਚ ਬਿਠਾਇਆ ਅਤੇ ਸਾਨੂੰ ਦੋਵਾਂ ਨੂੰ ਹਸਪਤਾਲ ਪਹੁੰਚਾਇਆ ਗਿਆ। ਮੈਂ ਕਿਸੇ ਤੋਂ ਇਹੀ ਪੁੱਛਦੀ ਰਹੀ ਕਿ ਦੀਪ ਕਿਵੇਂ ਹੈ ਅਤੇ ਹਰ ਕੋਈ ਮੈਨੂੰ ਕਹਿੰਦਾ ਰਿਹਾ ਕਿ ਉਹ ਠੀਕ ਹੈ। ਮੇਰਾ ਦਿਲ ਮੈਨੂੰ ਕੁਝ ਹੋਰ ਹੀ ਦੱਸ ਰਿਹਾ ਸੀ ਅਤੇ ਮੈਂ ਉਸ ਨੂੰ ਪੁਕਾਰਦੀ ਰਹੀ।
ਅਮਰੀਕਾ ਵਿੱਚ ਰਹਿ ਰਹੇ ਮੇਰੇ ਪਰਿਵਾਰ ਨੇ ਵੀ ਦੀਪ ਦੀ ਮੌਤ ਬਾਰੇ ਮੈਨੂੰ ਉਦੋਂ ਤੱਕ ਨਹੀਂ ਦੱਸਿਆ, ਜਦੋਂ ਤੱਕ ਕਿ ਮੇਰੇ ਕੋਲ ਮੇਰੇ ਪਰਿਵਾਰ ਦਾ ਕੋਈ ਮੈਂਬਰ ਹਸਪਤਾਲ ਨਹੀਂ ਪਹੁੰਚ ਗਿਆ ਸੀ। ਆਖਰਕਾਰ ਕਰੀਬ 5 ਘੰਟਿਆਂ ਬਾਅਦ ਮੇਰਾ ਚਚੇਰਾ ਭਰਾ ਪੰਜਾਬ ਤੋਂ ਹਸਪਤਾਲ ਪਹੁੰਚਿਆ। ਮੇਰੇ ਪਰਿਵਾਰ ਦੇ ਕਹਿਣ ‘ਤੇ ਮੈਨੂੰ ਇਲਾਜ ਲਈ ਦਿੱਲੀ ਦੇ ਨੈਸ਼ਨਲ ਹਾਰਟ ਇੰਸਟੀਚਿਊਟ ਵਿੱਚ ਸ਼ਿਫਟ ਕਰ ਦਿੱਤਾ ਗਿਆ। ਉਥੇ ਹੀ ਮੇਰੇ ਪਰਿਵਾਰ ਨੇ ਮੈਨੂੰ ਦੱਸਿਆ ਕਿ ਦੀਪ ਦੀ ਮੌਤ ਹੋ ਗਈ ਹੈ। ਦਿਲ ਟੁੱਟ ਗਿਆ ਅਤੇ ਸਦਮਾ ਲੱਗਿਆ। ਇਸੇ ਦੌਰਾਨ ਮੈਨੂੰ ਹਸਪਤਾਲ ਤੋਂ ਛੁੱਟੀ ਮਿਲ ਗਈ। ਮੈਂ ਆਪਣੇ ਪਰਿਵਾਰ ਦੀ ਅਪੀਲ ‘ਤੇ ਵਾਪਸ ਅਮਰੀਕਾ ਲਈ ਉਡਾਣ ਭਰੀ। ਹੁਣ ਮੈਂ ਘਰ ‘ਚ ਹੀ ਸਪਾਈਨਲ ਫ੍ਰੈਕਚਰ ਤੋਂ ਉੱਭਰ ਰਹੀ ਹਾਂ।
ਰੀਨਾ ਨੇ ਦੀਪ ਸਿੱਧੂ ਲਈ ਆਪਣੇ ਦਿਨ ਦੇ ਹਾਲ ਨੂੰ ਤਾਂ ਬਿਆਨ ਕੀਤਾ ਹੀ, ਪਰ ਨਾਲ ਹੀ ਬੇਹੱਦ ਭਾਵੁਕ ਤਰੀਕੇ ਨਾਲ ਪੰਜਾਬ ਦੇ ਭਵਿੱਖ ਲਈ ਉਸਦੀ ਕੁਰਬਾਨੀ ਨੂੰ ਵੀ ਜਾਹਿਰ ਕੀਤਾ। ਰੀਨਾ ਨੇ ਲਿਖਿਆ ਕਿ ਤੁਸੀਂ ਹਮੇਸ਼ਾ ਕਹਿੰਦੇ ਸੀ ਕਿ ਵੱਡੇ ਬਦਲਾਅ ਲਈ ਵੱਡਾ ਬਲੀਦਾਨ ਜ਼ਰੂਰੀ ਹੈ। ਇਸ ਲਈ ਮੇਰੀ ਜਾਨ ਜਾਓ। ਮੈਂ ਹਮੇਸ਼ਾ ਤੁਹਾਨੂੰ ਯਾਦ ਕਰਦੀ ਰਹਾਂਗੀ।”
ਹਾਦਸੇ ‘ਚ ਹੋਈ ਸੀ ਦੀਪ ਦੀ ਮੌਤ
ਦੀਪ ਸਿੱਧੂ ਦੀ ਕੁੰਡਲੀ-ਮਾਨੇਸਰ-ਪਲਵਲ ਐਕਸਪ੍ਰੈੱਸ ਵੇਅ ‘ਤੇ ਸੜਕ ਹਾਦਸੇ ਵਿੱਚ ਮੌਤ ਹੋ ਗਈ ਸੀ। ਉਹਨਾਂ ਦੀ ਸਕਾਰਪੀਓ ਗੱਡੀ ਇੱਕ ਟਰਾਲੇ ਨਾਲ ਟਕਰਾ ਗਈ ਸੀ। ਹਾਦਸੇ ਵਕਤ ਦੀਪ ਸਿੱਧੂ ਦੇ ਨਾਲ ਗਰਲਫਰੈਂਡ ਰੀਨਾ ਰੌਏ ਵੀ ਸੀ। ਉਹਨਾਂ ਨੂੰ ਜ਼ਖਮੀ ਹਾ ਵਿੱਚ ਖਰਖੌਦਾ ਦੇ ਹਸਪਤਾਲ ਵਿੱਚ ਦਾਖਲ ਕਰਵਾਇਆ ਗਿਆ। ਹੁਣ ਉਹ ਠੀਕ ਹੋ ਕੇ ਅਮਰੀਕਾ ਜਾ ਚੁੱਕੇ ਹਨ। ਰੀਨਾ ਰੌਏ ਵੀ ਪੰਜਾਬੀ ਅਦਾਕਾਰਾ ਹੈ। ਉਹਨਾਂ ਨੇ ਦੀਪ ਸਿੱਧੂ ਦੇ ਨਾਲ ‘ਰੰਗ ਪੰਜਾਬ’ ਅਤੇ ‘ਦੇਸੀ’ ਫਿਲਮਾਂ ਵਿੱਚ ਕੰਮ ਕੀਤਾ ਹੈ। ‘ਰੰਗ ਪੰਜਾਬ’ ਦੇ ਸੈੱਟ ‘ਤੇ ਹੀ ਦੀਪ ਸਿੱਧੂ ਤੇ ਰੀਨਾ ਰੌਏ ਨਾਲ ਮੁਲਾਕਾਤ ਹੋਈ ਸੀ, ਜਿਸ ਤੋਂ ਬਾਅਦ ਦੋਵਾਂ ਦਾ ਪਿਆਰ ਪਰਵਾਨ ਚੜ੍ਹਿਆ। ਇਹਨਾਂ ਵਿੱਚੋਂ ‘ਰੰਗ ਪੰਜਾਬ’ ਫਿਲਮ 2018 ਵਿੱਚ ਰਿਲੀਜ਼ ਹੋ ਚੁੱਕੀ ਹੈ, ਜਦਕਿ ‘ਦੇਸੀ’ ਅਜੇ ਰਿਲੀਜ਼ ਹੋਣੀ ਬਾਕੀ ਹੈ।
