ਬਿਓਰੋ। ਉੱਤਰ ਪ੍ਰਦੇਸ਼ ਦੇ ਨਾਮੀ ਗੈੰਗਸਟਰ ਮੁਖਤਾਰ ਅੰਸਾਰੀ ਦਾ ਪੁੱਤਰ ਅੱਬਾਸ ਅੰਸਾਰੀ ਪੰਜਾਬ ‘ਚ ਲੁਕਿਆ ਹੋਇਆ ਹੈ। ਅੱਬਾਸ ਦੀ ਮੋਬਾਈਲ ਲੋਕੇਸ਼ਨ ਤੋੰ ਇਸਦਾ ਖੁਲਾਸਾ ਹੋਇਆ ਹੈ, ਜਿਸ ਤੋੰ ਬਾਅਦ ਲਖਨਊ ਪੁਲਿਸ ਵੱਲੋੰ ਪੰਜਾਬ ਪੁਲਿਸ ਨਾਲ ਮਿਲ ਕੇ ਉਸਦੀ ਭਾਲ ਵਿੱਚ ਛਾਪੇਮਾਰੀ ਵੀ ਕੀਤੀ ਗਈ। ਹਾਲਾੰਕਿ ਫਿਲਹਾਲ ਅੱਬਾਸ ਉਹਨਾੰ ਦੇ ਹੱਥ ਨਹੀੰ ਲੱਗਿਆ ਹੈ।
ਆਰਮਸ ਲਾਇਸੈੰਸ ‘ਚ ਫਰਜ਼ੀਵਾੜੇ ਦੇ ਮੁਲਜ਼ਮ ਅੱਬਾਸ ਅੰਸਾਰੀ ਦੇ ਖਿਲਾਫ਼ ਲਖਨਊ ਕੋਰਟ ਨੇ ਗ੍ਰਿਫ਼ਤਾਰੀ ਵਾਰੰਟ ਜਾਰੀ ਕੀਤਾ ਹੋਇਆ ਹੈ, ਪਰ ਅੰਸਾਰੀ ਫਿਲਹਾਲ ਫਰਾਰ ਹੈ ਅਤੇ ਪੁਲਿਸ ਲਗਾਤਾਰ ਉਸਦੀ ਭਾਲ ਵਿੱਚ ਛਾਪੇਮਾਰੀਆੰ ਕਰ ਰਹੀ ਹੈ। ਜਾਣਕਾਰੀ ਮੁਤਾਬਕ, ਪੰਜਾਬ ਸਣੇ 8 ਸੂਬਿਆੰ ਵਿੱਚ ਛਾਪੇ ਮਾਰੇ ਜਾ ਰਹੇ ਹਨ।
ਦੱਸ ਦਈਏ ਕਿ ਅੱਬਾਸ ਅੰਸਾਰੀ ‘ਤੇ ਇਲਜ਼ਾਮ ਹੈ ਕਿ ਉਸਨੇ ਪੁਲਿਸ ਨੂੰ ਸੂਚਿਤ ਕੀਤੇ ਬਿਨ੍ਹਾੰ ਹੀ ਲਖਨਊ ਤੋੰ ਜਾਰੀ ਡਬਲ ਬੈਰਲ ਬੰਦੂਕ ਦੇ ਲਾਇਸੈੰਸ ਨੂੰ ਨਵੀੰ ਦਿੱਲੀ ਦੇ ਪਤੇ ‘ਤੇ ਟਰਾੰਸਫਰ ਕਰਵਾ ਲਿਆ।
ਪਿਤਾ ਨੂੰ VVIP ਟ੍ਰੀਟਮੈੰਟ ‘ਤੇ ਘਿਰੀ ਕਾੰਗਰਸ
ਕਾਬਿਲੇਗੌਰ ਹੈ ਕਿ ਕਾੰਗਰਸ ਦੇ ਕਾਰਜਕਾਲ ਦੌਰਾਨ ਮੁਖਤਾਰ ਅੰਸਾਰੀ 2 ਸਲ 3 ਮਹੀਨੇ ਦੇ ਲੰਮੇ ਸਮੇੰ ਤੱਕ ਪੰਜਾਬ ਦੀ ਰੋਪੜ ਜੇਲ੍ਹ ਵਿੱਚ ਬੰਦ ਰਿਹਾ। ਤਤਕਾਲੀ ਸਰਕਾਰ ‘ਤੇ ਇਲਜ਼ਾਮ ਹੈ ਕਿ ਅੰਸਾਰੀ ਨੂੰ ਜੇਲ੍ਹ ਵਿੱਚ VVIP ਟ੍ਰੀਟਮੈੰਟ ਦਿੱਤਾ ਗਿਆ। ਮੌਜੂਦਾ ‘ਆਪ’ ਸਰਕਾਰ ‘ਚ ਜੇਲ੍ਹ ਮੰਤਰੀ ਹਰਜੋਤ ਬੈੰਸ ਨੇ ਵੀ ਇਸਦਾ ਦਾਅਵਾ ਕੀਤਾ ਹੈ। ਇਸ ਮਾਮਲੇ ਦੀ ਜਾੰਚ ਵੀ ਕਰਵਾਈ ਗਈ ਹੈ ਅਤੇ ਸੂਤਰਾੰ ਮੁਤਾਬਕ ਜਾੰਚ ਵਿੱਚ ਇਹ ਪਤਾ ਚੱਲਿਆ ਹੈ ਕਿ ਅੰਸਾਰੀ ਬੈਰਕ ਦੀ ਬਜਾਏ ਕੁਆਰਟਰ ‘ਚ ਰਹਿੰਦਾ ਸੀ। ਬੈੰਸ ਨੇ ਅੰਸਾਰੀ ‘ਤੇ ਦਰਜ 10 ਕਰੋੜ ਦੀ ਰੰਗਦਾਰੀ ਦੇ ਕੇਸ ਨੂੰ ਵੀ ਫਰਜ਼ੀ ਕਰਾਰ ਦਿੱਤਾ।
