ਚੰਡੀਗੜ੍ਹ। ਕੋਟਕਪੂਰਾ ਗੋਲੀ ਕਾੰਡ ਦੀ ਜਾੰਚ ਕਰ ਰਹੀ ਸਪੈਸ਼ਲ ਜਾੰਚ ਟੀਮ(SIT) ਨੇ ਸ਼੍ਰੋਮਣੀ ਅਕਾਲੀ ਦਲ ਦੇ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਨੂੰ ਤਲਬ ਕੀਤਾ ਹੈ। ਸੁਖਬੀਰ ਨੂੰ 30 ਅਗਸਤ ਨੂੰ ਸਵੇਰੇ ਸਾਢੇ 10 ਵਜੇ ਪੇਸ਼ ਹੋਣ ਲਈ ਕਿਹਾ ਗਿਆ ਹੈ। ਇਸ ਤੋੰ ਪਹਿਲਾੰ ਵੀ ਸੁਖਬੀਰ ਸਿੰਘ ਬਾਦਲ ਤੋੰ ਇਸ ਮਾਮਲੇ ‘ਚ ਪੁੱਛਗਿੱਛ ਕੀਤੀ ਜਾ ਚੁੱਕੀ ਹੈ।
ਦਰਅਸਲ, ਸਾਲ 2015 ਵਿੱਚ ਕੋਟਕਪੂਰਾ ਵਿੱਚ ਬੇਅਦਬੀ ਦੇ ਖਿਲਾਫ਼ ਪ੍ਰਦਰਸ਼ਨ ਕਰਨ ਵਾਲੇ ਲੋਕਾੰ ‘ਤੇ ਪੁਲਿਸ ਵੱਲੋੰ ਫਾਇਰਿੰਗ ਕੀਤੀ ਗਈ ਸੀ। ਫਾਇਰਿੰਗ ਦੇ ਵਕਤ ਸੁਖਬੀਰ ਬਾਦਲ ਸੂਬੇ ਦੇ ਉਪ ਮੁੱਖ ਮੰਤਰੀ ਸਨ ਅਤੇ ਗ੍ਰਹਿ ਵਿਭਾਗ ਦਾ ਜ਼ਿੰਮਾ ਵੀ ਉਹਨਾੰ ਕੋਲ ਹੀ ਸੀ। ਇਹ ਸਵਾਲ ਅੱਜ ਵੀ ਬਣਿਆ ਹੋਇਆ ਹੈ ਕਿ ਪੁਲਿਸ ਨੂੰ ਫਾਇਰਿੰਗ ਦੇ ਆਰਡਰ ਕਿਸਨੇ ਦਿੱਤੇ। ਇਸੇ ਦੇ ਚਲਦੇ ਸੁਖਬੀਰ ਨੂੰ ਪੁੱਛਗਿੱਛ ਲਈ ਸੱਦਿਆ ਗਿਆ ਹੈ।
‘ਮੈਨੂੰ ਸੰਮਨ ਨਹੀੰ ਮਿਲਿਆ, ਜਦੋੰ ਮਿਲੇਗਾ ਉਦੋੰ ਵੇਖਾੰਗੇ’
ਓਧਰ ਇਸ ਮਾਮਲੇ ‘ਚ ਜਦੋੰ ਸੁਖਬੀਰ ਤੋੰ ਸਵਾਲ ਕੀਤਾ ਗਿਆ, ਤਾੰ ਉਹਨਾੰ ਨੇ ਕਿਹਾ, “ਮੈਨੂੰ ਅਜੇ ਸੰਮਨ ਨਹੀੰ ਮਿਲਿਆ ਹੈ। ਕੋਟਕਪੂਰਾ ‘ਚ ਫਾਇਰਿੰਗ ਦੇ ਆਰਡਰ SDM ਨੇ ਦਿੱਤੇ ਸਨ। SDM ਅਜੇ ਵੀ ਕਹਿ ਰਹੇ ਹਨ ਕਿ ਉਹਨਾੰ ਨੇ ਬਿਨ੍ਹਾੰ ਦਬਾਅ ਦੇ ਆਰਡਰ ਦਿੱਤੇ। ਇਸਦੇ ਲਿਖਿਤ ਆਰਡਰ ਜਾਰੀ ਹੋਏ ਸਨ। ਸੰਮਨ ਜਦੋੰ ਆਉਣਗੇ, ਉਦੋੰ ਵੇਖਾੰਗੇ, ਮੈਨੂੰ ਕੋਈ ਡਰ ਨਹੀੰ ਹੈ।”
ਸੁਖਬੀਰ ਨੂੰ ਜਾਰੀ ਸੰਮਨ ਦੀ ਕਾਪੀ…
ਸਾਬਕਾ DGP ਤੋੰ ਵੀ ਹੋਏ ਸਵਾਲ-ਜਵਾਬ
ਕਾਬਿਲੇਗੌਰ ਹੈ ਕਿ ADGP ਐੱਲ.ਕੇ. ਯਾਦਵ ਦੀ ਅਗਵਾਈ ਵਾਲੀ ਸਪੈਸ਼ਲ ਜਾੰਚ ਟੀਮ ਨੇ ਇਸ ਮਾਮਲੇ ਵਿੱਚ 3 ਅਗਸਤ ਨੂੰ ਹੀ ਸਾਬਕਾ DGP ਸੁਮੇਧ ਸੈਣੀ ਤੋੰ ਵੀ ਲੰਮੀ ਪੁੱਛਗਿੱਛ ਕੀਤੀ। SIT ਨੇ ਸੈਣੀ ਤੋੰ ਕਰੀਬ 4 ਘੰਟਿਆੰ ਤੱਕ ਸਵਾਲ-ਜਵਾਬ ਕੀਤੇ। ਸੁਮੇਧ ਸੈਣੀ ਕੋਟਕਪੂਰਾ ਫਾਇਰਿੰਗ ਦੇ ਵਕਤ ਸੂਬੇ ਦੇ DGP ਸਨ।
