October 27, 2022
(Bureau Report)
ਕੈਨੇਡਾ ‘ਚ ਡਰੱਗਜ਼ ਦਾ ਕਾਰੋਬਾਰ ਕਿਸ ਤਰ੍ਹਾਂ ਆਪਣੇ ਪੈਰ ਪਸਾਰ ਰਿਹਾ ਹੈ, ਇਸਦੀ ਤਾਜ਼ਾ ਮਿਸਾਲ ਮੌਜੂਦਾ ਪੁਲਸੀਆ ਕਾਰਵਾਈ ਤੋਂ ਮਿਲੀ ਹੈ। ਕੈਨੇਡਾ ਦੀ ਪੀਲ ਰੀਜਨਲ ਪੁਲਿਸ ਨੇ ਵੱਡੇ ਡਰੱਗ ਰੈਕੇਟ ਦਾ ਪਰਦਾਫਾਸ਼ ਕਰਦਿਆਂ 25 ਲੱਖ ਡਾਲਰ ਦਾ ਨਸ਼ਾ ਬਰਾਮਦ ਕੀਤਾ ਹੈ। ਜ਼ਿਕਰੇਖਾਸ ਹੈ ਕਿ ਡਰੱਗਜ਼ ਦੇ ਨਾਲ ਫੜੇ ਗਏ 5 ਸਮੱਗਲਰਾਂ ਵਿਚੋਂ 3 ਪੰਜਾਬੀ ਮੂਲ ਦੇ ਹਨ, ਜੋ ਲੰਮੇ ਸਮੇਂ ਤੋਂ ਉਥੇ ਡਰੱਗਜ਼ ਦਾ ਧੰਦਾ ਕਰ ਰਹੇ ਹਨ।
ਕਰੀਬ 11 ਮਹੀਨਿਆਂ ਤੱਕ ਡਰੱਗ ਰੈਕੇਟ ਖਿਲਾਫ਼ ਚੱਲੀ ਇਸ ਮੁਹਿੰਮ ਨੂੰ Project Zucaritas ਦਾ ਨਾਂਅ ਦਿੱਤਾ ਗਿਆ। ਫੜੇ ਗਏ ਡਰੱਗਜ਼ ਵਿਚ 182 ਕਿੱਲੋ Methamphetamine, 166 ਕਿੱਲੋ ਕੋਕੀਨ ਅਤੇ 38 ਕਿੱਲੋ Ketamine ਸ਼ਾਮਲ ਹੈ।
ਪੁਲਿਸ ਨੂੰ ਸੂਚਨਾ ਮਿਲੀ ਸੀ ਕਿ ਨਸ਼ੇ ਦੀ ਇੱਕ ਵੱਡੀ ਖੇਪ ਸਪਲਾਈ ਹੋਣ ਜਾ ਰਹੀ ਹੈ, ਜਿਸ ‘ਤੇ ਤੁਰੰਤ ਐਕਸ਼ਨ ਲੈਂਦੇ ਹੋਏ ਪੀਲ ਪੁਲਿਸ ਨੇ ਛਾਪੇਮਾਰੀ ਕੀਤੀ ਅਤੇ ਡਰੱਗਜ਼ ਦੇ ਨਾਲ 5 ਲੋਕਾਂ ਨੂੰ ਗ੍ਰਿਫ਼ਤਾਰ ਕੀਤਾ। ਫੜੇ ਗਏ 3 ਪੰਜਾਬੀਆਂ ਦੀ ਪਛਾਣ 38 ਸਾਲਾ ਗੁਰਪ੍ਰੀਤ ਸਿੰਘ ਗਾਖਲ, 28 ਸਾਲਾ ਜਸਪ੍ਰੀਤ ਸਿੰਘ ਅਤੇ 27 ਸਾਲਾ ਰਜਿੰਦਰ ਸਿੰਘ ਬੋਪਾਰਾਏ ਵਜੋਂ ਹੋਈ ਹੈ। ਇਸ ਤੋਂ ਇਲਾਵਾ ਜਿਹੜੇ 2 ਹੋਰ ਲੋਕ ਫੜੇ ਗਏ ਹਨ, ਉਹਨਾਂ ਵਿਚੋਂ ਇੱਕ ਪਾਕਿਸਤਾਨੀ ਮੂਲ ਦਾ ਖਲੀਲੁੱਲਾਹ ਖ਼ਾਨ ਅਤੇ ਇੱਕ ਚੀਨੀ ਮੂਲ ਦਾ ਨਾਗਰਿਕ ਰੇ ਆਈਪੀ ਹੈ।
ਟਰਾਂਸਪੋਰਟ ਦੀ ਆੜ ‘ਚ ਚੱਲ ਰਿਹਾ ਸੀ ਧੰਦਾ
ਪੀਲ ਪੁਲਿਸ ਦੇ ਡਿਪਟੀ ਚੀਫ ਨਿਕ ਮਿਲੋਵਿਚ ਨੇ ਦੱਸਿਆ ਕਿ ਪੀਲ ਰੀਜਨਲ ਦੇ ਇਤਿਹਾਸ ‘ਚ ਅੱਜ ਤੱਕ ਦੀ ਇਹ ਨਸ਼ੇ ਦੀ ਸਭ ਤੋਂ ਵੱਡੀ ਖੇਪ ਹੈ, ਜਿਸ ਨੂੰ ਪੁਲਿਸ ਨੇ ਬਰਾਮਦ ਕੀਤਾ ਹੈ। ਉਹਨਾਂ ਦੱਸਿਆ ਕਿ ਇਹ ਧੰਦਾ ਟਰਾਂਸਪੋਰਟ ਦੇ ਮਾਧਿਅਮ ਨਾਲ ਚਲਾਇਆ ਜਾ ਰਿਹਾ ਸੀ। ਉਹਨਾਂ ਦੱਸਿਆ ਕਿ ਅਮਰੀਕੀ ਪੁਲਿਸ ਦੀ ਮਦਦ ਨਾਲ ਬਾਰਡਰ ਏਰੀਆ ਤੋ ਇਹਨਾਂ ਨੂੰ ਫੜਿਆ ਗਿਆ ਹੈ।
ਪੁਲਿਸ ਨੇ 2 ਟਰਾਂਸਫਰ ਹਬ ਦੀ ਵੀ ਪਛਾਣ ਕੀਤੀ ਹੈ, ਜੋ ਗੈਰ-ਕਾਨੂੰਨੀ ਡਰੱਗਜ਼ ਦੇ ਗੋਰਖਧੰਦੇ ਵਿੱਚ ਸ਼ਾਮਲ ਹਨ ਅਤੇ ਜਿਹਨਾਂ ਦੀ ਮਦਦ ਨਾਲ ਇਹ ਰੈਕੇਟ ਚਲਾਇਆ ਜਾ ਰਿਹਾ ਸੀ। ਇਹਨਾਂ ਵਿੱਚ ਮਿਲਟਨ ਦੇ 50 ਸਟੀਲਸ ਐਵਨਿਊ ‘ਚ ਮੌਜੂਦ ਇੱਕ ਕਮਰਸ਼ੀਅਲ ਟਰੱਕਿੰਗ ਕੰਪਨੀ North king logistics ਅਤੇ ਮਿੱਸੀਸੌਗਾ ਦੇ 2835 ਅਰਜੇਂਟੀਆ ਰੋਡ ਵਿਖੇ ਮੌਜੂਦ Friend furniture ਸ਼ਾਮਲ ਹਨ।
Learn more about Project Zucaritas, a narcotics investigation by the Specialized Enforcement Bureau that led to the seizure of illicit drugs and numerous drug trafficking arrests. https://t.co/QzbVzA5lTa
— Peel Regional Police (@PeelPolice) October 26, 2022
