November 4, 2022
(Amritsar)
ਅੰਮ੍ਰਿਤਸਰ ਵਿੱਚ ਸ਼ਿਵਸੈਨਾ ਆਗੂ ਸੁਧੀਰ ਸੂਰੀ ਦੇ ਦਿਨ-ਦਿਹਾੜੇ ਕਤਲ ਦੀ ਵਾਰਦਾਤ ਦੇ ਚਲਦੇ ਬਵਾਲ ਖੜ੍ਹਾ ਹੋ ਗਿਆ ਹੈ। ਇਸ ਕਤਲ ਕਾਂਡ ਤੋਂ ਬਾਅਦ ਇੱਕ ਵਾਰ ਫਿਰ ਪੰਜਾਬ ਪੁਲਿਸ ਸਵਾਲਾਂ ਵਿੱਚ ਹੈ। ਦਰਅਸਲ, ਜਿਸ ਵਕਤ ਇਹ ਕਤਲ ਹੋਇਆ, ਉਸ ਵਕਤ ਸੁਧੀਰ ਸੂਰੀ ਪੁਲਿਸ ਦੇ ਸੁਰੱਖਿਆ ਘੇਰੇ ਵਿੱਚ ਸਨ ਅਤੇ ਕੁੱਲ 8 ਜਵਾਨ ਤੈਨਾਤ ਸਨ। ਇਸਦੇ ਬਾਵਜੂਦ ਇੱਕ ਨੌਜਵਾਨ ਨੇ ਸਰੇ-ਬਜ਼ਾਰ ਫਾਇਰਿੰਗ ਕਰਕੇ ਉਹਨਾਂ ਨੂੰ ਮੌਤ ਦੇ ਘਾਟ ਉਤਾਰ ਦਿੱਤਾ।
ਦੱਸ ਦਈਏ ਕਿ ਸ਼ਿਵਸੈਨਾ ਆਗੂ ਸੁਧੀਰ ਸੂਰੀ ਨੂੰ ਅੱਤਵਾਦੀ ਧਮਕੀ ਮਿਲਣ ਤੋਂ ਬਾਅਦ 8 ਸੁਰੱਖਿਆਕਰਮੀ ਤੇ 2 ਡਰਾਈਵਰ ਮਿਲੇ ਸਨ। ਇਸ ਤੋਂ ਇਲਾਵਾ ਉਹਨਾਂ ਦੀ ਰਿਹਾਇਸ਼ ‘ਤੇ ਵੀ 5 ਹਥਿਆਰਬੰਦ ਸੁਰੱਖਿਆ ਕਰਮੀ ਤੈਨਾਤ ਸਨ। ਪਿਛਲੇ ਸਾਲ ਸੋਸ਼ਲ ਮੀਡੀਆ ‘ਤੇ ਇੱਕ ਵੀਡੀਓ ਵਾਇਰਲ ਹੋਣ ਦੇ ਬਾਅਦ ਤੋਂ ਉਹ ਦਹਿਸ਼ਤਗਰਦਾਂ ਦੇ ਨਿਸ਼ਾਨੇ ‘ਤੇ ਸਨ।
ਪਰਿਵਾਰ ਨੇ ਸਸਕਾਰ ਲਈ ਰੱਖੀ ਸ਼ਰਤ
ਸੁਧੀਰ ਸੂਰੀ ਦੇ ਕਤਲ ਤੋਂ ਬਾਅਦ ਉਹਨਾਂ ਦੇ ਬੇਟੇ ਪਾਰਸ ਨੇ ਵੱਡਾ ਐਲਾਨ ਕੀਤਾ ਹੈ। ਪਾਰਸ ਨੇ ਪਿਤਾ ਨੂੰ ਸ਼ਹੀਦ ਦਾ ਦਰਜਾ ਦੇਣ ਦੀ ਮੰਗ ਰੱਖੀ ਹੈ। ਪਾਰਸ ਦਾ ਕਹਿਣਾ ਹੈ ਕਿ ਜਦੋਂ ਤੱਕ ਉਸਦੇ ਪਿਤਾ ਨੂੰ ਸ਼ਹੀਦ ਦਾ ਦਰਜਾ ਨਹੀਂ ਦਿੱਤਾ ਜਾਂਦਾ, ਉਹਨਾਂ ਦਾ ਸਸਕਾਰ ਨਹੀਂ ਕੀਤਾ ਜਾਵੇਗਾ।
ਸੂਰੀ ਦੇ ਸਮਰਥਕਾਂ ‘ਚ ਜ਼ਬਰਦਸਤ ਗੁੱਸਾ
ਸੂਰੀ ਦੇ ਸਮਰਥਕਾਂ ਨੇ ਬੇਟੇ ਪਾਰਸ ਨੂੰ ਅੱਗੇ ਕਰਦੇ ਹੋਏ ਕਿਹਾ ਕਿ ਸੁਧੀਰ ਸੂਰੀ ਮਰੇ ਨਹੀਂ ਹਨ। ਉਹ ਜੀਵਤ ਹਨ। ਉਹ ਪਾਰਸ ਹੀ ਨਹੀਂ, ਹਰ ਹਿੰਦੂ ਵਿੱਚ ਜੀਵਤ ਰਹਿਣਗੇ। ਸੂਰੀ ਦੇ ਸਮਰਥਕ ਇਸ ਕਤਲ ਕਾਂਡ ਲਈ ਪੰਜਾਬ ਪੁਲਿਸ ਨੂੰ ਕੋਸ ਰਹੇ ਹਨ। ਉਹਨਾਂ ਦਾ ਕਹਿਣਾ ਹੈ ਕਿ ਜਿਸ ਸਮੇਂ ਗੋਲੀ ਚੱਲੀ, ਕਈ ਪੁਲਿਸ ਮੁਲਾਜ਼ਮ ਅਤੇ ਅਧਿਕਾਰੀ ਉਥੇ ਮੌਜੁੂਦ ਸਨ, ਪਰ ਗੋਲੀ ਦੀ ਅਵਾਜ਼ ਸੁਣਦੇ ਹੀ ਸਾਰੇ ਭੱਜ ਗਏ।
