January 19, 2023
(Pathankot)
ਪਠਾਨਕੋਟ ਰੈਲੀ ਵਿੱਚ ਰਾਹੁਲ ਗਾਂਧੀ ਨੇ ਇੱਕ ਵਾਰ ਫਿਰ ਆਮ ਆਦਮੀ ਪਾਰਟੀ ‘ਤੇ ਜੰਮ ਕੇ ਹਮਲਾ ਬੋਲਿਆ। ਰਾਹੁਲ ਗਾਂਧੀ ਨੇ ਕਿਹਾ, “ਮੈਂ ਭਗਵੰਤ ਮਾਨ ਨੂੰ ਕਿਹਾ ਕਿ ਪੰਜਾਬ ਨੂੰ ਰਿਮੋਟ ਕੰਟਰੋਲ ਨਾਲ ਨਾ ਚੱਲਣ ਦਿਓ। ਮੈਂ ਪੰਜਾਬ ਦੇ ਸੀਐੱਮ ਨੂੰ ਕਹਿਣਾ ਚਾਹੁੰਦਾ ਹਾਂ ਕਿ ਤੁਸੀਂ ਮੇਰੇ ਨਾਲ ਲੋਕ ਸਭਾ ‘ਚ ਬੈਠਦੇ ਸੀ। ਤੁਹਾਡੇ ਅਤੇ ਅਰਵਿੰਦ ਕੇਜਰੀਵਾਲ ‘ਚ ਬਹੁਤ ਫਰਕ ਹੈ। ਮੈਂ ਕਹਿੰਦਾ ਹਾਂ ਕਿ ਭਗਵੰਤ ਮਾਨ ਮੈਨੂੰ ਚੰਗੇ ਲਗਦੇ ਹਨ, ਪਰ ਪੰਜਾਬ ਨੂੰ ਪੰਜਾਬ ਤੋਂ ਚਲਾਉਣਾ ਚਾਹੀਦਾ ਹੈ। ਪੰਜਾਬ ਨੂੰ ਦਿੱਲੀ ਤੋਂ ਨਹੀਂ ਚਲਾਇਆ ਜਾਣਾ ਚਾਹੀਦਾ।”
ਪੰਜਾਬ ‘ਚ RC ਸਰਕਾਰ- ਰਾਹੁਲ
ਰਾਹੁਲ ਨੇ ਕਿਹਾ, “ਕਿਸੇ ਕਿਸਾਨ ਨੇ ਮੈਨੂੰ ਕਿਹਾ ਕਿ ਪੰਜਾਬ ਵਿੱਚ ਰਿਮੋਟ ਕੰਟਰੋਲ ਸਰਕਾਰ ਹੈ। ਮੈਂ ਪੁੱਛਿਆ ਕਿਵੇਂ ਤਾਂ ਜਵਾਬ ਮਿਲਿਆ ਰਾਘਵ ਚੱਢਾ(RC)। ਪੰਜਾਬ ਲਈ ਇਹ ਚੰਗਾ ਨਹੀਂ ਹੈ।” ਰਾਹੁਲ ਨੇ ਕਿਹਾ ਕਿ ਅਸੀਂ ਪੰਜਾਬ ਵਿੱਚ ਆਮ ਆਦਮੀ ਪਾਰਟੀ ਨਾਲ ਲੜਾਂਗੇ ਅਤੇ ਉਸ ਨੂੰ ਹਰਾਵਾਂਗੇ।
ਰਾਹੁਲ ਨੇ ਸਰਕਾਰੀ ਇਸ਼ਤਿਹਾਰ ਨੂੰ ਲੈ ਕੇ ‘ਆਪ’ ‘ਤੇ ਹਮਲਾ ਬੋਲਿਆ। ਰਾਹੁਲ ਨੇ ਕਿਹਾ ਕਿ ਤੁਹਾਡਾ ਪੈਸਾ ਗੁਜਰਾਤ ਵਿੱਚ ਇਸਤੇਮਾਲ ਹੋਵੇ। ਪੰਜਾਬ ਦੇ ਪੈਸੇ ਨਾਲ ਗੁਜਰਾਤ ਵਿੱਚ ਇਸ਼ਤਿਹਾਰ ਦਿੱਤੇ ਜਾਣ, ਇਹ ਗਲਤ ਹੈ।
ਬੀਜੇਪੀ ‘ਤੇ ਵੀ ਬੋਲਿਆ ਹਮਲਾ
ਰਾਹੁਲ ਨੇ ਕਿਹਾ ਕਿ ਉਹਨਾਂ ਦੀ ਯਾਤਰਾ ਤੋਂ ਬੀਜੇਪੀ ਘਬਰਾ ਗਈ ਹੈ। ਉਹਨਾਂ ਨੇ ਦੇਸ਼ ਭਲਾਈ ਦਾ ਕੋਈ ਕੰਮ ਨਹੀਂ ਕਰਨਾ, ਉਹਨਾਂ ਦਾ ਧਿਆਨ ਸਿਰਫ਼ ਚੋਣ ਜਿੱਤਣ ‘ਤੇ ਹੈ। ਉਹ ਕਦੇ ਲੋਕਾਂ ਦੀ ਸਮੱਸਿਆ ਸੁਲਝਾਉਣ ਲਈ ਕੰਮ ਨਹੀਂ ਕਰਦੇ। ਜਿਥੇ ਵੀ ਜਾਣਗੇ, ਚੋਣਾਂ ਦੀ ਗੱਲ ਕਰਨਗੇ। ਜਨਤਾ ਦੇ ਸਵਾਲਾਂ ਨੂੰ ਲੈ ਕੇ ਜਦੋਂ ਅਸੀਂ ਸੰਸਦ ‘ਚ ਖੜ੍ਹੇ ਹੁੰਦੇ ਹਾਂ, ਤਾਂ ਉਹ ਚਰਚਾ ਲਈ ਤਿਆਰ ਨਹੀਂ ਹੁੰਦੇ। ਬਹਾਨਾ ਬਣਾ ਕੇ ਸਦਨ ਨੂੰ ਮੁਲਤਵੀ ਕਰ ਦਿੰਦੇ ਹਨ। ਬਾਅਦ ਵਿੱਚ ਕਹਿੰਦੇ ਹਨ ਕਿ ਅਸੀਂ ਤਿਆਰ ਸੀ, ਪਰ ਕਾਂਗਰਸ ਮੁਸ਼ਕਿਲਾਂ ਪੈਦਾ ਕਰਦੀ ਹੈ।
