ਬਿਓਰੋ। ਪੰਜਾਬ ‘ਚ ਕੋਰੋਨਾ ਦੇ ਮਾਮਲਿਆਂ ‘ਚ ਲਗਾਤਾਰ ਆ ਰਹੀ ਗਿਰਾਵਟ ਨਾਲ ਰਾਹਤ ਦੇ ਸੰਕੇਤ ਮਿਲ ਰਹੇ ਹਨ। ਪਿਠਲੇ 24 ਘੰਟਿਆਂ ‘ਚ 2627 ਨਵੇਂ ਕੇਸ ਮਿਲੇ ਹਨ, ਜੋ ਕਿ ਪਿਛਲੇ ਇੱਕ ਮਹੀਨੇ ‘ਚ ਸਭ ਤੋਂ ਘੱਟ ਹਨ। ਰਾਹਤ ਦੀ ਗੱਲ ਇਹ ਵੀ ਹੈ ਕਿ ਮੌਤਾਂ ਦਾ ਅੰਕੜਾ ਵੀ ਲਗਾਤਾਰ ਘੱਟ ਹੋ ਰਿਹਾ ਹੈ। ਕੁਝ ਦਿਨ ਪਹਿਲਾਂ ਤੱਕ ਜਿਥੇ ਔਸਤਨ 200 ਮੌਤਾਂ ਹੋ ਰਹੀਆਂ ਹਨ, ਉਥੇ ਹੀ ਹੁਣ ਇਹ ਗਿਣਤੀ 150 ਤੋਂ ਹੇਠਾਂ ਪਹੁੰਚ ਗਈ ਹੈ। ਐਤਵਾਰ ਨੂੰ ਸੂਬੇ ‘ਚ 127 ਲੋਕਾਂ ਦੀ ਮੌਤ ਰਿਪੋਰਟ ਕੀਤੀ ਗਈ।
ਸੰਕ੍ਰਮਣ ਦਰ ‘ਚ 10% ਤੋਂ ਵੱਧ ਦੀ ਿਗਰਾਵਟ
ਪੰਜਾਬ ‘ਚ 8 ਮਈ ਨੂੰ ਕੋਰੋਨਾ ਦੇ ਸਭ ਤੋਂ ਵੱਧ 9100 ਕੇਸ ਰਿਪੋਰਟ ਕੀਤੇ ਗਏ ਸਨ। ਇਸ ਤੋਂ ਬਾਅਦ ਕਈ ਦਿਨਾਂ ਤੱਕ ਇਹ ਅੰਕੜਾ 8 ਤੋਂ 9 ਹਜ਼ਾਰ ਦਰਮਿਆਨ ਹੀ ਰਿਹਾ, ਪਰ 20 ਮਈ ਦੇ ਬਾਅਦ ਤੋਂ ਇਸ ‘ਚ ਲਗਾਤਾਰ ਸੁਧਾਰ ਹੋ ਰਿਹਾ ਹੈ। ਹੁਣ ਇਹ ਅੰਕੜਾ 2500 ਦੇ ਕਰੀਬ ਪਹੁੰਚ ਚੁੱਕਿਆ ਹੈ। 8 ਮਈ ਨੂੰ ਜਿਥੇ ਪੰਜਾਬ ‘ਚ ਪਾਜ਼ੀਟਿਵਿਟੀ ਰੇਟ 15.02 ਫ਼ੀਸਦ ਸੀ, ਉਥੇ ਹੀ 30 ਮਈ ਨੂੰ ਇਹ 3.92 ਫ਼ੀਸਦ ਰਹਿ ਗਿਆ ਹੈ।
ਮੌਤਾਂ ਦੀ ਦਰ ‘ਚ ਵੀ ਕਮੀ
18 ਮਈ ਨੂੰ ਪੰਜਾਬ ‘ਚ ਕੋਰੋਨਾ ਨਾਲ ਰਿਕਾਰਡ 231 ਲੋਕਾਂ ਦੀ ਜਾਨ ਗਈ ਸੀ, ਉਸ ਵੇਲੇ ਮੌਤ ਦਰ 3.23 ਫ਼ੀਸਦ ਸੀ। ਇਹ ਹੁਣ ਡਿੱਗ ਕੇ 2.55 ਫ਼ੀਸਦ ਰਹਿ ਗਈ ਹੈ। ਹਾਲਾਂਕਿ ਅਜੇ ਵੀ ਸੂਬੇ ‘ਚ ਰੋਜ਼ਾਨਾ 100 ਤੋਂ ਵੱਧ ਲੋਕਾਂ ਦੀ ਜਾਨ ਜਾ ਰਹੀ ਹੈ, ਜੋ ਪਹਿਲੀ ਲਹਿਰ ਦੇ ਪੀਕ ਤੋਂ ਕਿਤੇ ਵੱਧ ਹੈ।
ਦੂਜੀ ਲਹਿਰ ਖਤਮ ਹੋ ਗਈ ?
ਨਵੇਂ ਮਾਮਲਿਆਂ ਅਤੇ ਮੌਤਾਂ ਦੇ ਅੰਕੜਿਆਂ ‘ਚ ਲਗਾਤਾਰ ਸੁਧਾਰ ਤੋਂ ਬਾਅਦ ਹੁਣ ਸਵਾਲ ਹੈ..ਕੀ ਦੂਜੀ ਲਹਿਰ ਦਾ ਪ੍ਰਕੋਪ ਖਤਮ ਹੋ ਗਿਈ ਹੈ। ਪੰਜਾਬ ਸਰਕਾਰ ਦੀ ਕੋਵਿਡ ਰਿਵਿਊ ਮੀਟਿੰਗ ਦੇ ਚੇਅਰਮੈਨ ਡਾ. ਕੇ.ਕੇ. ਤਲਵਾੜ ਤੋਂ ਜਦੋਂ ਇਹ ਸਵਾਲ ਪੁੱਛਿਆ ਗਿਆ, ਤਾਂ ਉਹਨਾਂ ਨੇ ਕਿਹਾ ਕਿ ਹਾਲੇ ਇਹ ਕਹਿਣਾ ਮੁਸ਼ਕਿਲ ਹੈ ਕਿ ਦੂਜੀ ਲਹਿਰ ਖਤਮ ਹੋ ਗਈ ਹੈ। ਕਿਸੇ ਵੀ ਨਤੀਜੇ ‘ਤੇ ਪਹੁੰਚਣ ਲਈ 1-2 ਹਫਤੇ ਦਾ ਇੰਤਜ਼ਾਰ ਕਰਨਾ ਪਏਗਾ। ਹਾਲਾਂਕਿ ਉਹਨਾਂ ਨੇ ਕਿਹਾ ਕਿ ਲਗਾਤਾਰ ਹੋ ਰਹੀ ਗਿਰਾਵਟ ਰਾਹਤ ਦੇ ਸੰਕੇਤ ਹਨ।
CM ਵੀ ਬੋਲੇ, “ਹਾਲੇ ਸਾਵਧਾਨ ਰਹਿਣ ਦੀ ਲੋੜ”
ਕੋਰੋਨਾ ਦੇ ਘੱਟ ਹੁੰਦੇ ਮਾਮਲਿਆਂ ਵਿਚਾਲੇ ਸੀਐੱਮ ਕੈਪਟਨ ਅਮਰਿੰਦਰ ਸਿੰਘ ਨੇ ਵੀ ਟਵੀਟ ਕਰ ਕਿਹਾ ਹੈ, “ਪਾਜ਼ੀਟਿਵਿਟੀ ਰੇਟ ਘੱਟ ਜ਼ਰੂਰ ਹੋਇਆ ਹੈ, ਪਰ ਅਸੀਂ ਆਪਣੀ ਸੁਰੱਖਿਆ ਕਰਨਾ ਬੰਦ ਨਹੀਂ ਕਰ ਸਕਦੇ। ਸਾਡਾ ਮਕਸਦ ਪਾਜ਼ੀਟਿਵਿਟੀ ਰੇਟ ਨੂੰ 1 ਫ਼ੀਸਦ ਤੋਂ ਵੀ ਹੇਠਾਂ ਲਿਆਉਣਾ ਹੈ।”
Positive #Covid19 cases in Punjab declined today to 3102 with 125 deaths. Positivity has also dipped below 5% at 4.56%. However, we cannot let our guard down & need to work hard to bring positivity <1%. Appeal to all, observe full safeguards and to get tested & treated properly.
— Capt.Amarinder Singh (@capt_amarinder) May 29, 2021
ਕੋਰੋਨਾ ਦੀ ਦੂਜੀ ਲਹਿਰ ਬੇਸ਼ੱਕ ਕਮਜ਼ੋਰ ਪੈ ਰਹੀ ਹੋਵੇ, ਪਰ ਕੋਰੋਨਾ ਦਾ ਖਤਰਾ ਅਜੇ ਤੱਕ ਟਲਿਆ ਨਹੀਂ ਹੈ। ਤੀਜੀ ਲਹਿਰ ਦੇ ਖਦਸ਼ੇ ਦੇ ਚਲਦੇ ਕੋਰੋਨਾ ਨਿਯਮਾਂ ਦੀ ਲਗਾਤਾਰ ਸਖਤੀ ਨਾਲ ਪਾਲਣਾ ਕਰਨ ਦੀ ਲੋੜ ਹੈ। ਕਿਉਂਕਿ ਕਿਹਾ ਜਾ ਰਿਹਾ ਹੈ ਕਿ ਜੇਕਰ ਦੇਸ਼ ‘ਚ ਤੀਜੀ ਲਹਿਰ ਆਈ, ਤਾਂ ਉਹ ਦੂਜੀ ਲਹਿਰ ਨਾਲੋਂ ਵੀ ਵੱਧ ਖਤਰਨਾਕ ਹੋ ਸਕਦੀ ਹੈ।
