ਬਿਓਰੋ। ਫਲਾਇੰਗ ਸਿੱਖ ਮਿਲਖਾ ਸਿੰਘ ਦੇ ਦੁਨੀਆ ਨੂੰ ਅਲਵਿਦਾ ਕਹਿਣ ਦੇ ਕਰੀਬ 2 ਮਹੀਨਿਆਂ ਬਾਅਦ ਉਹਨਾਂ ਦਾ ਸੁਫਨਾ ਸਾਕਾਰ ਹੋ ਗਿਆ। ਮਿਲਖਾ ਚਾਹੁੰਦੇ ਸਨ ਕਿ ਕੋਈ ਭਾਰਤੀ ਫੀਲਡ ਅਤੇ ਟ੍ਰੈਕ ‘ਚ ਓਲੰਪਿਕ ‘ਚ ਗੋਲਡ ਮੈਡਲ ਜਿੱਤ ਕੇ ਭਾਰਤ ਦੀ ਝੋਲੀ ਪਾਏ। ਸ਼ਨੀਵਾਰ ਨੂੰ ਟੋਕਿਓ ਓਲੰਪਿਕ ‘ਚ ਮਿਲਖਾ ਸਿੰਘ ਦਾ ਇਹ ਸੁਫਨਾ ਤਾਂ ਪੂਰਾ ਹੋਇਆ, ਪਰ ਇਸ ਨੂੰ ਪੂਰਾ ਹੁੰਦਾ ਵੇਖ ਖੁਦ ਮਿਲਖਾ ਨਹੀਂ ਸਨ।
ਜੈਵਲਿਨ ਥ੍ਰੋ ‘ਚ ਗੋਲਡ ਮੈਡਲ ਹਾਸਲ ਕਰਨ ਵਾਲੇ ਨੀਰਜ ਚੋਪੜਾ ਨੇ ਆਪਣਾ ਮੈਡਲ ਮਿਲਖਾ ਸਿੰਘ ਨੂੰ ਸਮਰਪਿਤ ਕੀਤਾ। ਨਾਲ ਹੀ ਕਿਹਾ ਕਿ ਮਿਲਖਾ ਸਵਰਗ ਤੋਂ ਜ਼ਰੂਰ ਇਹ ਸਭ ਵੇਖ ਰਹੇ ਹੋਣਗੇ। ਨੀਰਜ ਨੇ ਕਿਹਾ, “ਮੈਂ ਮੈਡਲ ਦੇ ਨਾਲ ਮਿਲਖਾ ਸਿੰਘ ਨੂੰ ਮਿਲਣਾ ਚਾਹੁੰਦਾ ਸੀ। ਮੈਂ ਗੋਲਡ ਜਿੱਤਣ ਬਾਰੇ ਤਾਂ ਨਹੀਂ ਸੋਚਿਆ ਸੀ, ਪਰ ਕੁਝ ਵੱਖਰਾ ਕਰਨਾ ਚਾਹੁੰਦਾ ਸੀ। ਮੈਂ ਜਾਣਦਾ ਸੀ ਕਿ ਅੱਜ ਆਪਣਾ ਬੈਸਟ ਪ੍ਰਦਰਸ਼ਨ ਕਰਾਂਗਾ। ਮੈਂ ਓਲਿੰਪਿਕ ਦਾ ਰਿਕਾਰਡ ਤੋੜਨਾ ਚਾਹੁੰਦਾ ਸੀ, ਸ਼ਾਇਦ ਇਸੇ ਕਾਰਨ ਚੰਗਾ ਪ੍ਰਦਰਸ਼ਨ ਕਰ ਸਕਿਆ।”
ਮਿਲਖਾ ਪਰਿਵਾਰ ਤੁਹਾਡਾ ਸ਼ੁਕਰਗੁਜਾਰ ਹੈ- ਜੀਵ ਮਿਲਖਾ ਸਿੰਘ
ਮਿਲਖਾ ਸਿੰਘ ਨੂੰ ਆਪਣਾ ਮੈਡਲ ਸਮਰਪਿਤ ਕਰਨ ਦੇ ਨੀਰਜ ਚੋਪੜਾ ਦੇ ਫੈਸਲੇ ‘ਤੇ ਉਹਨਾਂ ਦੇ ਪੁੱਤਰ ਜੀਵ ਮਿਲਖਾ ਸਿੰਘ ਨੇ ਨੀਰਜ ਨੂੰ ਸ਼ੁਕਰੀਆ ਕਿਹਾ। ਉਹਨਾਂ ਨੇ ਟਵੀਟ ਕੀਤਾ, “ਨਾ ਸਿਰਫ਼ ਤੁਸੀਂ ਓਲੰਪਿਕ ਐਥਲੈਟਿਕਸ ‘ਚ ਪਹਿਲਾ ਗੋਲਡ ਮੈਡਲ ਸਾਨੂੰ ਜਿਤਾਇਆ, ਬਲਕਿ ਇਹ ਮੈਡਲ ਤੁਸੀਂ ਮੇਰੇ ਪਿਤਾ ਨੂੰ ਸਮਰਪਿਤ ਕੀਤਾ। ਇਸ ਸਨਮਾਨ ਲਈ ਮਿਲਖਾ ਪਰਿਵਾਰ ਤੁਹਾਡਾ ਬੇਹੱਦ ਸ਼ੁਕਰਗੁਜਾਰ ਹੈ।”
Not only did you win us a first-ever athletics gold medal in the #OlympicGames, you even dedicated it to my father.
The Milkha family is eternally grateful for this honour. pic.twitter.com/0gxgF8mmNQ
— Jeev Milkha Singh (@JeevMilkhaSingh) August 7, 2021
ਚੰਗੇ ਪ੍ਰਦਰਸ਼ਨ ਦੇ ਬਾਵਜੂਦ ਮੈਡਲ ਤੋਂ ਖੁੰਝੇ ਮਿਲਖਾ
ਕਾਬਿਲੇਗੌਰ ਹੈ ਕਿ ਮਿਲਖਾ ਸਿੰਘ ਨੇ 1956 ਦੇ ਮੈਲਬਰਨ ਓਲੰਪਿਕ, 1960 ਦੇ ਰੋਮ ਓਲੰਪਿਕ ਅਤੇ 1964 ਦੇ ਟੋਕਿਓ ਓਲੰਪਿਕ ‘ਚ ਹਿੱਸਾ ਲਿਆ ਸੀ, ਪਰ ਉਹ ਮੈਡਲ ਨਹੀਂ ਜਿੱਤ ਸਕੇ ਸਨ। ਉਹਨਾਂ ਨੇ ਰੋਮ ਓਲੰਪਿਕ ‘ਚ 400 ਮੀਟਰ ਰੇਸ ‘ਚ ਹਿੱਸਾ ਲਿਆ ਸੀ, ਪਰ ਮੈਡਲ ਜਿੱਤਣਂ ਤੋਂ ਸੈਕੰਡ ਦੇ 10ਵੇਂ ਹਿੱਸੇ ਤੋਂ ਉਹ ਚੂਕ ਗਏ ਸਨ ਅਤੇ ਚੌਥੇ ਨੰਬਰ ‘ਤੇ ਰਹੇ। ਇਸ ਤੋਂ ਬਾਅਦ ਜਦੋਂ ਵੀ ਕਦੇ ਓਲੰਪਿਕ ਦੀ ਗੱਲ ਹੁੰਦੀ, ਤਾਂ ਮਿਲਖਾ ਸਿੰਘ ਅਕਸਰ ਇਹ ਖੁਆਹਿਸ਼ ਜਾਹਿਰ ਕਰਦੇ ਕਿ ਉਹ ਕਿਸੇ ਭਾਰਤੀ ਨੂੰ ਐਥਲੈਟਿਕਸ ‘ਚ ਗੋਲਡ ਮੈਡਲ ਜਿੱਤਦੇ ਵੇਖਣਾ ਚਾਹੁੰਦੇ ਹਨ।
