ਟੋਕਿਓ। ਭਾਰਤ ਦਾ ਓਲੰਪਿਕ ‘ਚ ਐਥਲੈਟਿਕਸ ‘ਚ ਮੈਡਲ ਜਿੱਤਣ ਦਾ 121 ਸਾਲਾਂ ਦਾ ਇੰਤਜਾਰ ਆਖਰ ਖਤਮ ਹੋ ਗਿਆ ਹੈ। ਜੈਵਲਿਨ ਥ੍ਰੋਅਰ ਨੀਰਜ ਚੋਪੜਾ ਨੇ ਐਥਲੈਟਿਕਸ ‘ਚ ਗੋਲਡ ਮੈਡਲ ਜਿੱਤ ਕੇ ਭਾਰਤ ਦੀ ਝੋਲੀ ਪਾਇਆ ਹੈ। ਸ਼ਨੀਵਾਰ ਨੂੰ ਹੋਏ ਫਾਈਨਲ ਮੁਕਾਬਲੇ ‘ਚ ਨੀਰਜ ਨੇ ਆਪਣੇ ਪਹਿਲੇ ਅਟੈਂਪਟ ‘ਚ 87.03 ਮੀਟਰ ਦੂਰ ਭਾਲਾ ਸੁੱਟਿਆ ਸੀ। ਇਸ ਤੋਂ ਬਾਅਦ ਦੂਜੇ ਅਟੈਂਪਟ ‘ਚ ਉਹਨਾਂ ਨੇ 87.58 ਮੀਟਰ ਭਾਲਾ ਸੁੱਟਿਆ, ਜੋ ਅਖੀਰ ਤੱਕ ਸਭ ਤੋਂ ਬੈਸਟ ਰਿਹਾ।
ਐਥਲੈਟਿਕਸ ‘ਚ ਭਾਰਤ ਦਾ ਪਹਿਲਾ ਮੈਡਲ
ਸਾਲ 1900 ‘ਚ ਭਾਰਤ ਨੇ ਪਹਿਲੀ ਵਾਰ ਓਲੰਪਿਕ ‘ਚ ਹਿੱਸਾ ਲਿਆ ਸੀ। ਇਹਨਾਂ 121 ਸਾਲਾਂ ‘ਚ ਟ੍ਰੈਕ ਐਂਡ ਫੀਲਡ ਇਵੈਂਟਸ ‘ਚ ਇਹ ਭਾਰਤ ਦਾ ਹੁਣ ਤੱਕ ਦਾ ਪਹਿਲਾ ਮੈਡਲ ਹੈ। ਇਸ ਤੋਂ ਪਹਿਲਾਂ ਕੋਈ ਵੀ ਭਾਰਤੀ ਇਹਨਾਂ ਇਵੈਂਟਸ ‘ਚ ਮੈਡਲ ਨਹੀਂ ਜਿੱਤ ਸਕਿਆ।
13 ਸਾਲਾਂ ਬਾਅਦ “ਜਣ-ਗਣ-ਮਣ”
ਜਿਕਰੇਖਾਸ ਹੈ ਕਿ ਓਲੰਪਿਕ ਗੇਮਜ਼ ‘ਚ ਭਾਰਤ ਨੇ 13 ਸਾਲਾਂ ਬਾਅਦ ਕਿਸੇ ਇਵੈਂਟ ‘ਚ ਗੋਲਡ ਮੈਡਲ ਆਪਣੇ ਨਾਂਅ ਕੀਤਾ ਹੈ, ਜਿਸ ਤੋਂ ਬਾਅਦ ਪੋਡੀਅਮ ‘ਤੇ ਦੇਸ਼ ਦਾ ਰਾਸ਼ਟਰੀ ਗਾਨ ਸੁਣ ਕੇ ਨਾ ਸਿਰਫ਼ ਹਰ ਭਾਰਤੀ ਮਾਣ ਮਹਿਸੂਸ ਕਰ ਰਿਹਾ ਸੀ, ਬਲਕਿ ਅੱਖਾਂ ਵੀ ਭਿੱਜੀਆਂ ਨਜ਼ਰ ਆਈਆਂ। ਇਸ ਤੋਂ ਪਹਿਲਾਂ, 2008 ਦੇ ਬੀਜਿੰਗ ਓਲੰਪਿਕ ‘ਚ ਨਿਸ਼ਾਨੇਬਾਜ਼ ਅਭਿਨਵ ਬਿੰਦਰਾ ਨੇ 10 ਮੀਟਰ ਏਅਰ ਰਾਈਫਲ ਇਵੈਂਟ ‘ਚ ਗੋਲਡ ਮੈਡਲ ਆਪਣੇ ਨਾਂਅ ਕੀਤਾ ਸੀ।
ਹਰਿਆਣਾ ਸਰਕਾਰ ਦੇਵੇਗੀ 6 ਕਰੋੜ ਰੁਪਏ
ਹਰਿਆਣਾ ਦੇ ਪਾਣੀਪਤ ਦੇ ਰਹਿਣ ਵਾਲੇ ਨੀਰਜ ਚੋਪੜਾ ਲਈ ਹਰਿਆਣਾ ਸਰਕਾਰ ਨੇ 6 ਕਰੋੜ ਰੁਪਏ ਦੀ ਇਨਾਮੀ ਰਾਸ਼ੀ ਦਾ ਐਲਾਨ ਕੀਤਾ ਹੈ। ਇਸਦੇ ਨਾਲ ਹੀ ਸੀਐੱਮ ਮਨੋਹਰ ਲਾਲ ਨੇ ਐਲਾਨ ਕੀਤਾ ਕਿ ਪੰਚਕੂਲਾ ‘ਚ Centre of excellence for athletics ਬਣਾਇਆ ਜਾਵੇਗਾ, ਜਿਸ ਨੂੰ ਹੈੱਡ ਕਰਨ ਲਈ ਅਸੀਂ ਨੀਰਜ ਚੋਪੜਾ ਨੂੰ ਅਪੀਲ ਕਰਾਂਗੇ। ਇਸ ਤੋਂ ਇਲਾਵਾ ਇੱਕ ਪਲਾਟ ਵੀ 50 ਫੀਸਦ ਰੇਟ ਦੀ ਕਟੌਤੀ ਦੇ ਨਾਲ ਉਹਨਾਂ ਨੂੰ ਦਿੱਤਾ ਜਾਵੇਗਾ।
ਟੋਕਿਓ ਓਲੰਪਿਕ ‘ਚ ਭਾਰਤ ਨੇ ਜਿੱਤੇ 7 ਮੈਡਲ
ਜੈਵਲਿਨ ਥ੍ਰੋ ‘ਚ ਗੋਲਡ ਦੇ ਨਾਲ ਹੀ ਭਾਰਤ ਦਾ ਟੋਕਿਓ ਓਲੰਪਿਕ ‘ਚ ਇਵੈਂਟਸ ਦਾ ਸਿਲਸਿਲਾ ਵੀ ਖਤਮ ਹੋ ਗਿਆ ਹੈ। ਨੀਰਜ ਦੇ ਗੋਲਡ ਤੋਂ ਬਾਅਦ ਇਹ ਇਵੈਂਟ ਭਾਰਤ ਲਈ ਹੁਣ ਤੱਕ ਦਾ ਸਭ ਤੋਂ ਸਫਲ ਓਲੰਪਿਕ ਸਾਬਿਤ ਹੋਇਆ ਹੈ। ਭਾਰਤ ਨੇ ਇਸ ‘ਚ 7 ਮੈਡਲ (1 ਗੋਲਡ, 2 ਸਿਲਵਰ ਅਤੇ 4 ਬ੍ਰਾਨਜ਼) ਆਪਣੇ ਨਾਂਅ ਕੀਤੇ ਹਨ। ਇਸ ਤੋਂ ਪਹਿਲਾਂ 2012 ਦੇ ਲੰਡਨ ਓਲੰਪਿਕ ‘ਚ ਭਾਰਤ ਨੇ 6 ਮੈਡਲ ਜਿੱਤੇ ਸਨ।
ਨੀਰਜ ਚੋਪੜਾ ਦੇ ਗੋਲਡ ਤੋਂ ਇਲਾਵਾ ਮੀਰਾਬਾਈ ਚਾਨੂ ਨੇ ਵੇਟ ਲਿਫਟਿੰਗ ‘ਚ ਸਿਲਵਰ, ਪੀਵੀ ਸਿੰਧੂ ਨੇ ਬੈਡਮਿੰਟਨ ‘ਚ ਬ੍ਰਾਨਜ਼ ਅਤੇ ਲਵਲਿਨਾ ਬੋਰਗੋਹੇਨ ਨੇ ਬਾਕਸਿੰਗ ‘ਚ ਬ੍ਰਾਨਜ਼ ਮੈਡਲ ਆਪਣੇ ਨਾਂਅ ਕੀਤਾ ਹੈ। ਓਧਰ ਕੁਸ਼ਤੀ ‘ਚ ਰਵੀ ਦਹੀਆ ਨੇ ਸਿਲਵਰ ਅਤੇ ਬਜਰੰਗ ਪੁਨੀਆ ਨੇ ਬ੍ਰਾਨਜ਼ ਮੈਡਲ ਜਿੱਤ ਕੇ ਭਾਰਤ ਦੀ ਝੋਲੀ ਪਾਇਆ ਹੈ। ਨਾਲ ਹੀ ਭਾਰਤੀ ਪੁਰਸ਼ ਹਾਕੀ ਟੀਮ ਨੇ 41 ਸਾਲਾਂ ਦਾ ਸੋਕਾ ਖਤਮ ਕਰਦੇ ਹੋਏ ਭਾਰਤ ਨੂੰ ਬ੍ਰਾਨਜ਼ ਮੈਡਲ ਜਿਤਾ ਕੇ ਇਤਿਹਾਸ ਰਚਿਆ ਹੈ।
