ਬਿਓਰੋ। ਗੁਰਦਾਸਪੁਰ ਦੀ ਜਨਤਾ ਲਈ ‘ਲਾਪਤਾ’ ਕਹੇ ਜਾਣ ਵਾਲੇ ਬੀਜੇਪੀ ਸਾਂਸਦ ਸਨੀ ਦਿਓਲ ਆਪਣੀ ਪਾਰਟੀ ਦੇ ਵਿਧਾਇਕ ਦੀ ਬੇਟੀ ਪ੍ਰਤੀ ਆਪਣੀ ਜਿੰਮੇਵਾਰੀ ਬਾਖੂਬੀ ਸਮਝਦੇ ਹਨ। ਬੀਜੇਪੀ ਵਿਧਾਇਕ ਦਿਨੇਸ਼ ਬੱਬੂ ਦੀ ਬੇਟੀ ਲਈ ਸੰਨੀ ਨੇ ਆਟੋਮੋਬਾਈਲ ਏਜੰਸੀ ਨੂੰ ਬਕਾਇਦਾ ਪੱਤਰ ਲਿਖਿਆ ਹੈ।
‘ਆਊਟ ਆਫ ਟਰਨ’ ਡਿਲੀਵਰੀ ਦੀ ਮੰਗ
ਮਹਿੰਦਰਾ ਕੰਪਨੀ ਨੂੰ ਲਿਖੇ ਆਪਣੇ ਪੱਤਰ ‘ਚ ਸਾਂਸਦ ਸੰਨੀ ਦਿਓਲ ਨੇ ਵਿਧਾਇਕ ਦੀ ਬੇਟੀ ਲਈ ਥਾਰ ਗੱਡੀ ਦੀ ‘ਆਊਟ ਆਫ ਟਰਨ’ ਡਿਲੀਵਰੀ ਲਈ ਕਿਹਾ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਦਿਨੇਸ਼ ਬੱਬੂ ਦੀ ਬੇਟੀ ਦਾ ਵਿਆਹ ਹੋਣਾ ਹੈ ਅਤੇ ਥਾਰ ਦੀ ਵੇਟਿੰਗ ਲਿਸਟ ਕਾਫੀ ਲੰਮੀ ਹੈ। ਜਦੋਂ ਉਹਨਾਂ ਦਾ ਜੋਰ ਨਹੀਂ ਚੱਲਿਆ, ਤਾਂ ਸਾਂਸਦ ਸੰਨੀ ਦਿਓਲ ਤੋਂ ਸਿਫਾਰਿਸ਼ ਕਰਵਾਈ ਗਈ ਹੈ।
ਸੰਨੀ ਦਿਓਲ ਨੇ ਪੱਤਰ ‘ਚ ਕੀ ਲਿਖਿਆ?
ਸੰਨੀ ਦਿਓਲ ਵੱਲੋਂ ਗਰੋਵਰ ਆਟੋਜ਼ ਨੂੰ ਲਿਖੇ ਪੱਤਰ ‘ਚ ਕਿਹਾ ਗਿਆ ਹੈ, “ਵਿਧਾਇਕ ਦਿਨੇਸ਼ ਬੱਬੂ ਦੀ ਬੇਟੀ ਸੁਰਭੀ ਠਾਕੁਰ ਨੇ ਉਹਨਾਂ ਤੋਂ ਕਾਲੇ ਰੰਗ ਦੀ ਥਾਰ ਬੁੱਕ ਕਰਵਾਈ ਹੈ, ਜਿਸਦੇ ਬਦਲੇ 21 ਹਜਾਰ ਰੁਪਏ ਦੀ ਐਡਵਾਂਸ ਪੇਮੈਂਟ ਵੀ ਦਿੱਤੀ ਹੈ। ਉਹਨਾਂ ਦੀ ਜ਼ਰੂਰਤ ਨੂੰ ਵੇਖਦੇ ਹੋਏ ਥਾਰ ਦੀ ਡਿਲੀਵਰੀ ਪਹਿਲ ਦੇ ਅਧਾਰ ‘ਤੇ ਕੀਤੀ ਜਾਵੇ।”
BJP ਆਗੂ ਨੇ ਵੀ ਕਸਿਆ ਤੰਜ
ਸਾਬਕਾ ਮੰਤਰੀ ਅਤੇ ਬੀਜੇਪੀ ਦੇ ਸੀਨੀਅਰ ਆਗੂ ਮਾਸਟਰ ਮੋਹਨ ਲਾਲ ਨੇ ਵੀ ਇਸ ‘ਤੇ ਤੰਜ ਕਸਿਆ ਅਤੇ ਕਿਹਾ ਕਿ ਵਿਧਾਇਕ ਤੇ ਸਾਂਸਦ ਇਸ ਲਈ ਚੁਣੇ ਜਾਂਦੇ ਹਨ ਕਿ ਉਹ ਲੋਕਾਂ ਲਈ ਕੰਮ ਕਰਨ। ਉਹਨਾਂ ਨੂੰ ਵਿਅਕਤੀਗਤ ਕੰਮ ਅਤੇ ਉਸਦੀ ਸਿਫਾਰਿਸ਼ ਲਈ ਨਹੀਂ ਚੁਣਿਆ ਜਾਂਦਾ। ਚੰਗਾ ਹੁੰਦਾ ਕਿ ਵਿਧਾਇਕ ਸਾਂਸਦ ਤੋਂ ਆਪਣੇ ਵਿਧਾਨ ਸਭਾ ਹਲਕੇ ਦੇ ਵਿਕਾਸ ਲਈ ਫੰਡ ਮੰਗਦੇ।
ਲੋਕ ਵੀ ਕਰ ਰਹੇ ਕਮੈਂਟ
ਸੰਨੀ ਦਿਓਲ ਦਾ ਇਹ ਪੱਤਰ ਫਰਵਰੀ 2021 ਦਾ ਹੈ। ਹਾਲਾਂਕਿ ਹੁਣ ਇਹ ਸੋਸ਼ਲ ਮੀਡੀਆ ‘ਤੇ ਵਾਇਰਲ ਹੋ ਰਿਹਾ ਹੈ, ਤਾਂ ਲੋਕ ਇਸ ਪੱਤਰ ਨੂੰ ਪੋਸਟ ਕਰਕੇ ਉਸ ਉਤੇ ਖੂਬ ਕਮੈਂਟ ਕਰ ਰਹੇ ਹਨ
