ਅੰਮ੍ਰਿਤਸਰ। 2022 ਦੀਆਂ ਵਿਧਾਨ ਸਭਾ ਚੋਣਾਂ ਤੋਂ ਪਹਿਲਾਂ ਪੰਜਾਬ ‘ਚ ਇੱਕ ਵਾਰ ਫਿਰ ਗੈਂਗਸਟਰਾਂ ਦਾ ਮੁੱਦਾ ਗਰਮਾਉਣ ਲੱਗਿਆ ਹੈ। ਪਹਿਲਾਂ ਅੰਮ੍ਰਿਤਸਰ ‘ਚ ਗੈਂਗਸਟਰ ਰਾਣਾ ਕੰਧੋਵਾਲੀਆ ਅਤੇ ਫਿਰ ਮੋਹਾਲੀ ‘ਚ ਯੂਥ ਅਕਾਲੀ ਆਗੂ ਵਿੱਕੀ ਮਿੱਠਾਪੁਰ ਦੇ ਕਤਲ ਦੀ ਵਾਰਦਾਤ ਤੋਂ ਬਾਅਦ ਸਿਆਸੀ ਸੰਗ੍ਰਾਮ ਛਿੜਿਆ ਹੈ।
ਸਾਬਕਾ ਮੰਤਰੀ ਬਿਕਰਮ ਸਿੰਘ ਮਜੀਠੀਆ ਨੇ ਸੂਬੇ ‘ਚ ਹੋ ਰਹੀਆਂ ਇਹਨਾਂ ਵਾਰਦਾਤਾਂ ਦਾ ਜਿੰਮੇਵਾਰ ਕਾਂਗਰਸੀ ਆਗੂਆਂ ਨੂੰ ਠਹਿਰਾਇਆ ਹੈ। ਉਹਨਾਂ ਕਿਹਾ ਕਿ ਰਾਣਾ ਕੰਧੋਵਾਲੀਆ ਮਰਡਰ ਕੇਸ ‘ਚ ਮੁਲਜ਼ਮਾਂ ਦੀ ਮਦਦ ਕਰਨ ਵਾਲਾ ਪ੍ਰਭਜੋਤ ਸਿੰਘ ਚੱਠਾ ਬਟਾਲਾ ‘ਚ ਕਾਂਗਰਸ ਦਾ ਕੌਂਸਲਰ ਹੈ। ਮਜੀਠੀਆ ਨੇ ਕਿਹਾ ਕਿ ਰਾਣਾ ਕੰਧੋਵਾਲੀਆ ਦਾ ਮਰਡਰ ਕਰਨ ਤੋਂ ਬਾਅਦ ਮੁਲਜ਼ਮ ਸਿੱਧੇ ਵੀ ਬਟਾਲਾ ਪਹੁੰਚ ਗਏ ਸਨ, ਜਿਥੇ ਪ੍ਰਭਜੋਤ ਸਿੰਘ ਚੱਠਾ ਨੇ ਆਪਣੇ ਸਾਥੀਆਂ ਦੇ ਨਾਲ ਮਿਲ ਕੇ ਹੈਪੀ ਦਾ ਇਲਾਜ ਕਰਵਾਇਆ ਸੀ।
ਮਜੀਠੀਆ ਦੇ ਮੁਤਾਬਕ, ਜਿਸ ਹਸਪਤਾਲ ‘ਚ ਕੰਧੋਵਾਲੀਆ ਦਾ ਮਰਡਰ ਕਰਨ ਵਾਲੇ ਮੁਲਜ਼ਮ ਹੈਪੀ ਸ਼ਾਹ ਦਾ ਇਲਾਜ ਹੋਇਆ, ਉਸਦੇ ਵੀ ਕਾਂਗਰਸ ਦੇ ਮੰਤਰੀਆਂ ਨਾਲ ਸਬੰਧ ਹਨ। ਉਹਨਾਂ ਨੇ ਦਾਅਵਾ ਕੀਤਾ ਕਿ ਮੰਤਰੀ ਤ੍ਰਿਪਤ ਰਜਿੰਦਰ ਸਿੰਘ ਬਾਜਵਾ, ਸੁਖ ਸਰਕਾਰੀਆ ਅਤੇ ਸੁੱਖੀ ਰੰਧਾਵਾ ਦੇ ਡਾਕਟਰ ਨਾਲ ਸਬੰਧ ਹਨ।
ਮਜੀਠੀਆ ਨੇ ਕਿਹਾ ਕਿ ਉਹਨਾਂ ਦੇ ਸਾਹਮਣੇ ਕਈ ਵੀਡੀਓ ਫੁਟੇਜ ਆਈਆਂ ਹਨ, ਜਿਹਨਾਂ ‘ਚ ਡਾਕਟਰਾਂ ਅਤੇ ਗੈਂਗਸਟਰਾਂ ਦਾ ਕਰੀਬੀਪਣ ਨਜ਼ਰ ਆ ਰਿਹਾ ਹੈ। ਜਦਕਿ ਜੇਕਰ ਡਾਕਟਰ ਸਹੀ ਸੀ, ਤਾਂ ਉਸ ਨੂੰ ਪੁਲਿਸ ਨੂੰ ਸੂਚਨਾ ਦੇਣੀ ਚਾਹੀਦੀ ਸੀ। ਪੂਰੇ ਇਲਾਜ ਸਮੇਂ ਡਾਕਟਰ, ਗੈਂਗਸਟਰ ਹੈਪੀ ਸ਼ਾਹ ਦੇ ਸਾਹਮਣੇ ਹੀ ਖੜ੍ਹਿਆ ਸੀ। ਇੰਨਾ ਹੀ ਨਹੀਂ, ਇਲਾਜ ਤੋਂ ਬਾਅਦ ਹੈਪੀ ਨੇ ਡਾਕਟਰ ਦੀ ਪਿੱਠ ਵੀ ਥਪਥਪਾਈ ਸੀ।
ਕੀ ਹੈ ਪੂਰਾ ਮਾਮਲਾ?
ਦੱਸ ਦਈਏ ਕਿ ਪਿਛਲੇ ਦਿਨੀਂ ਅੰਮ੍ਰਿਤਸਰ ਦੇ ਇੱਕ ਹਸਪਤਾਲ ‘ਚ ਗੈਂਗਸਟਰ ਰਾਣਾ ਕੰਧੋਵਾਲੀਆ ਦਾ ਸ਼ਰੇਆਮ ਗੋਲੀਆਂ ਮਾਰ ਕੇ ਕਤਲ ਕਰ ਦਿੱਤਾ ਗਿਆ ਸੀ। ਪੁਲਿਸ ਇਸ ਮਾਮਲੇ ‘ਚ 2 ਮੁੱਖ ਮੁਲਜ਼ਮਾਂ ਸਣੇ ਹੁਣ ਤੱਕ 3 ਲੋਕਾਂ ਨੂੰ ਗ੍ਰਿਫ਼ਤਾਰ ਕਰ ਚੁੱਕੀ ਹੈ।
