ਅੰਮ੍ਰਿਤਸਰ। ਪੰਜਾਬ ਦੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਅਤੇ ਪੰਜਾਬ ਪ੍ਰਦੇਸ਼ ਕਾਂਗਰਸ ਕਮੇਟੀ ਦੇ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਵਿਚਾਲੇ ਇੱਕ ਵਾਰ ਤਲਖੀ ਮੁੜ ਵਧਦੀ ਨਜ਼ਰ ਆ ਰਹੀ ਹੈ। ਬਿਜਲੀ ਦੇ ਮੁੱਦੇ ‘ਤੇ ਸਿੱਧੂ ਆਪਣੀ ਹੀ ਸਰਕਾਰ ‘ਤੇ ਸਿੱਧੇ ਹਮਲੇ ਬੋਲ ਰਹੇ ਹਨ।
ਅੰਮ੍ਰਿਤਸਰ ‘ਚ ਸਿੱਧੂ ਨੇ ਕੈਪਟਨ ਨੂੰ ਚੁਣੌਤੀ ਦਿੰਦੇ ਹੋਏ ਸਾਫ ਕਿਹਾ ਕਿ ਜੇਕਰ ਵਿਧਾਨ ਸਭਾ ਸੈਸ਼ਨ ‘ਚ ਸਰਕਾਰ ਨੇ ਬਿਜਲੀ ਸਮਝੌਤੇ ਰੱਦ ਨਹੀਂ ਕੀਤੇ, ਤਾਂ ਫਿਰ ਕਾਂਗਰਸ ਦੇ ਵਿਧਾਇਕ ਇਹ ਕੰਮ ਕਰਨਗੇ। ਉਹਨਾਂ ਕਿਹਾ ਕਿ ਇਸ ਵਾਰ ਮਾਨਸੂਨ ਸੈਸ਼ਨ ‘ਚ ਨਿੱਜੀ ਕੰਪਨੀਆਂ ਨਾਲ ਹੋਏ ਬਿਜਲੀ ਸਮਝੌਤੇ ਰੱਦ ਕਰਵਾਏ ਜਾਣਗੇ। ਨਾਲ ਹੀ ਉਹਨਾਂ ਕਿਹਾ ਕਿ ਪੰਜਾਬ ਦੇ ਲੋਕਾਂ ਨੂੰ ਹਰ ਹਾਲ ‘ਚ 3-5 ਰੁਪਏ ਪ੍ਰਤੀ ਯੂਨਿਟ ਦੀ ਦਰ ‘ਤੇ ਬਿਜਲੀ ਦਿੱਤੀ ਜਾਵੇਗੀ।
ਨਸ਼ੇ ਦੇ ਮੁੱਦੇ ‘ਤੇ ਵੀ ਹਮਲਾਵਰ
3 ਦਿਨ ਪਹਿਲਾਂ ਸਿੱਧੂ ਨੇ ਨਸ਼ੇ ਦੇ ਮੁੱਦੇ ਨੂੰ ਲੈ ਕੇ ਵੀ ਆਪਣੀ ਹੀ ਸਰਕਾਰ ਨੂੰ ਘੇਰਿਆ ਸੀ। ਸਿੱਧੂ ਨੇ ਟਵਿਟਰ ਜ਼ਰੀਏ ਸਰਕਾਰ ‘ਤੇ ਤਾਬੜਤੋੜ ਸਵਾਲਾਂ ਦੀ ਬੁਛਾੜ ਕਰਦੇ ਹੋਏ ਪੁੱਛਿਆ ਸੀ ਕਿ ਹਾਲੇ ਤੱਕ STF ਦੀ ਰਿਪੋਰਟ ਜਨਤਕ ਕਿਉਂ ਨਹੀਂ ਕੀਤੀ ਗਈ। ਬਿਕਰਮ ਮਜੀਠੀਆ ‘ਤੇ ਕਾਰਵਾਈ ਕਰਨ ਲਈ ਪੁਲਿਸ ਨੇ ਕੀ ਕੀਤਾ।
…ਤਾਂ ਵਿਧਾਨ ਸਭਾ ਸੈਸ਼ਨ ‘ਚ ਸਿੱਧੂ ਵਿਰੋਧ ‘ਚ !
ਪੰਜਾਬ ਵਿਧਾਨ ਸਭਾ ਦਾ ਮਾਨਸੂਨ ਸੈਸ਼ਨ ਜਲਦ ਸ਼ੁਰੂ ਹੋਣ ਵਾਲਾ ਹੈ। 16 ਅਗਸਤ ਨੂੰ ਹੋਣ ਵਾਲੀ ਕੈਬਨਿਟ ਦੀ ਬੈਠਕ ‘ਚ ਇਸ ਦੀਆਂ ਤਾਰੀਖਾਂ ਦਾ ਐਲਾਨ ਸੰਭਵ ਹੈ। ਇਸ ਵਾਰ ਸੈਸ਼ਨ ‘ਚ ਕੈਪਟਨ ਨੂੰ ਦੋਹਰੀ ਚੁਣੌਤੀ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ। ਵਿਰੋਧੀਆਂ ਦੇ ਨਾਲ-ਨਾਲ ਸਿੱਧੂ ਧੜਾ ਵੀ ਕੈਪਟਨ ਦੀ ਟੈਂਸ਼ਨ ਵਧਾ ਸਕਦਾ ਹੈ। ਸਿੱਧੂ ਜਿਸ ਤਰ੍ਹਾਂ ਦੇ ਤੇਵਰ ਵਿਖਾ ਰਹੇ ਹਨ, ਜੇਕਰ ਇਹੀ ਬਰਕਰਾਰ ਰਹੇ ਤਾਂ ਵਿਧਾਨ ਸਭਾ ‘ਚ ਕਾਂਗਰਸ 2 ਧੜਿਆਂ ‘ਚ ਵੰਡੀ ਨਜ਼ਰ ਆ ਸਕਦੀ ਹੈ।
ਹਰੀਸ਼ ਰਾਵਤ ਘੱਟ ਕਰਨਗੇ ਤਲਖੀ !
ਕੈਪਟਨ-ਸਿੱਧੂ ਵਿਚਾਲੇ ਤਲਖੀ ਤੋਂ ਹਾਈਕਮਾਂਡ ਵੀ ਵਾਕਿਫ ਹਨ। ਖੁਦ ਸੀਐੱਮ ਕੈਪਟਨ ਅਮਰਿੰਦਰ ਸਿੰਘ ਨੇ ਸੋਨੀਆ ਗਾਂਧੀ ਦੇ ਸਾਹਮਣੇ ਸਿੱਧੂ ਦੀ ਬਿਆਨਬਾਜੀ ਦਾ ਮੁੱਦਾ ਚੁੱਕਿਆ ਸੀ। ਮਾਮਲੇ ਦੇ ਹੱਲ ਲਈ ਸੋਨੀਆ ਗਾਂਧੀ ਨੇ ਇੱਕ ਵਾਰ ਫਿਰ ਕਾਂਗਰਸ ਇੰਚਾਰਜ ਹਰੀਸ਼ ਰਾਵਤ ਦੀ ਡਿਊਟੀ ਲਾਈ ਹੈ। ਰਾਵਤ ਅਗਲੇ ਹਫਤੇ ਚੰਡੀਗੜ੍ਹ ਆਉਣਗੇ ਅਤੇ ਦੋਵੇਂ ਆਗੂਆਂ ਨਾਲ ਗੱਲ ਕਰਨਗੇ।
