ਬਿਓਰੋ। ਚੰਡੀਗੜ੍ਹ ਵਿੱਚ ਪਹਿਲੀ ਵਾਰ ਹੀ ਧਮਾਕੇਦਾਰ ਐਂਟਰੀ ਕਰਨ ਵਾਲੀ ਆਮ ਆਦਮੀ ਪਾਰਟੀ ਨੇ ਬੀਜੇਪੀ ‘ਤੇ ਗੰਭੀਰ ਇਲਜ਼ਾਮ ਲਗਾਏ ਹਨ। ‘ਆਪ’ ਪੰਜਾਬ ਦੇ ਸਹਿ-ਇੰਚਾਰਜ ਰਾਘਵ ਚੱਢਾ ਨੇ ਕਿਹਾ ਕਿ ਉਹਨਾਂ ਦੇ 3 ਕੌਂਸਲਰਾਂ ਨੂੰ ਖਰੀਦਣ ਦੀ ਕੋਸ਼ਿਸ਼ ਕੀਤੀ ਗਈ। ਇਹਨਾਂ ‘ਚੋਂ 2 ਕੌਂਸਲਰਾਂ ਨੂੰ 50 ਲੱਖ ਅਤੇ ਇੱਕ ਨੂੰ 75 ਲੱਖ ਦਾ ਆਫਰ ਦਿੱਤਾ ਗਿਆ। ਉਹਨਾਂ ਇਲਜਾਮ ਲਾਇਆ ਕਿ ਇਹ ਆਫਰ ਬੀਜੇਪੀ ਦੇ ਸੀਨੀਅਰ ਆਗੂ ਵੱਲੋਂ ਦਿੱਤਾ ਗਿਆ।
ਚੱਢਾ ਨੇ ਕਿਹਾ, “ਅਸੀਂ ਸਾਰੇ ਕੌਂਸਲਰਾਂ ਦੇ ਘਰ ਦੇ ਬਾਹਰ ਸੀਕ੍ਰੇਟ ਕੈਮਰੇ ਲਗਵਾ ਰਹੇ ਹਾਂ। ਨਾਲ ਹੀ ਕੌਂਸਲਰਾਂ ਨੂੰ ਕੀਤੇ ਫੋਨ ਕਾਲ ਵੀ ਰਿਕਾਰਡ ਕੀਤੇ ਜਾਣਗੇ। ਇਹਨਾਂ ਨੂੰ ਬਾਅਦ ਵਿੱਚ ਜਨਤੱਕ ਕੀਤਾ ਜਾਵੇਗਾ।
ਆਮ ਆਦਮੀ ਪਾਰਟੀ ਦੀ ਪ੍ਰੈਸ ਕਾਨਫਰੰਸ ਚੰਡੀਗੜ੍ਹ ਤੋਂ LIVE https://t.co/YZ1v6u30k4
— AAP Punjab (@AAPPunjab) December 28, 2021
ਕੇਂਦਰੀ ਮੰਤਰੀ ‘ਤੇ ਲਗਾਏ ਗੰਭੀਰ ਇਲਜ਼ਾਮ
ਚੱਢਾ ਨੇ ਕਿਹਾ, “ਚੰਡੀਗੜ੍ਹ ਵਿੱਚ ਹੌਰਸ ਟ੍ਰੇਡਿੰਗ ਦੀ ਕੋਸ਼ਿਸ਼ ਵਿੱਚ ਪੰਜਾਬ ਚੋਣਾਂ ਦੀ ਜਿੰਮੇਵਾਰੀ ਨਿਭਾ ਰਹੇ ਕੇਂਦਰੀ ਮੰਤਰੀ ਵੀ ਸ਼ਾਮਲ ਹਨ।“ ਉਨ੍ਹਾਂ ਦਾਅਵਾ ਕੀਤਾ ਕਿ ਬੀਜੇਪੀ ਦੇ ਆਗੂਆਂ ਨੇ ਸਾਰੇ 14 ਕੌਂਸਲਰਾਂ ਨੂੰ ਬੀਜੇਪੀ ਵਿੱਚ ਆਉਣ ਲਈ ਕਿਹਾ। ਇੱਥੋਂ ਤੱਕ ਕਿ ਬੀਜੇਪੀ ਦੇ ਆਗੂ ਤਿੰਨ ਕੌਂਸਲਰਾਂ ਦੇ ਘਰ ਹੀ ਪਹੁੰਚ ਗਏ।
ਰਾਘਵ ਚੱਢਾ ਤੋਂ ਜਦੋਂ ਇਸ ਦਾ ਸਬੂਤ ਦੇਣ ਨੂੰ ਕਿਹਾ ਗਿਆ, ਤਾਂ ਉਨ੍ਹਾਂ ਕਿਹਾ ਕਿ ਹੁਣ ਅਸੀਂ ਰਿਕਾਰਡਿੰਗ ਆਨ ਕਰ ਲਈ ਹੈ। ਇਸ ਤੋਂ ਇਲਾਵਾ ਸੀਕ੍ਰੇਟ ਕੈਮਰੇ ਵੀ ਲਗਵਾ ਦਿੱਤੇ ਹਨ। ਜਦੋਂ ਉਨ੍ਹਾਂ ਤੋਂ ਪੁੱਛਿਆ ਗਿਆ ਕਿ ਕਿਹੜੇ-ਕਿਹੜੇ ਕੌਂਸਲਰਾਂ ਨੂੰ 50 ਤੋਂ 75 ਲੱਖ ਤੱਕ ਦੀ ਆਫਰ ਦਿੱਤੀ ਗਈ, ਤਾਂ ਉਹਨਾਂ ਨੇ ਨਾਂਅ ਦੱਸਣ ਤੋਂ ਵੀ ਇਨਕਾਰ ਕਰ ਦਿੱਤਾ।
ਕਿਸੇ ਨੂੰ ਨਹੀਂ ਮਿਲਿਆ ਬਹੁਮਤ
ਨਿਗਮ ਦੇ 35 ਵਾਰਡਾਂ ਲਈ ਹੋਈਆਂ ਚੋਣਾਂ ਵਿੱਚ ‘ਆਪ’ ਨੇ ਪਹਿਲੀ ਵਾਰ ਚੋਣ ਲੜੀ, ਜਿਹਨਾਂ ਵਿੱਚੋਂ 14 ਸੀਟਾਂ ਜਿੱਤ ਕੇ ‘ਆਪ’ ਸਭ ਤੋਂ ਵੱਡੀ ਪਾਰਟੀ ਬਣੀ। ਬੀਜੇਪੀ ਨੂੰ 12 ਅਤੇ ਕਾਂਗਰਸ ਨੂੰ 8 ਸੀਟਾਂ ਹਾਸਲ ਹੋਈਆਂ ਹਨ। ਇਸ ਤੋਂ ਬਾਅਦ ਚੰਡੀਗੜ੍ਹ ਚੋਣਾਂ ਦਾ ਪੇਚ ਫਸ ਗਿਆ ਹੈ। ਕੋਈ ਵੀ ਪਾਰਟੀ ਮੇਅਰ ਬਣਨ ਲਈ ਜ਼ਰੂਰੀ 19 ਦੇ ਅੰਕੜੇ ਨੂੰ ਹਾਸਲ ਨਹੀਂ ਕਰ ਸਕੀ।
