December 7, 2022
(New Delhi)
ਦਿੱਲੀ ਨਗਰ ਨਿਗਮ(MCD) ਵਿੱਚ ਪਿਛਲੇ 15 ਸਾਲਾਂ ਤੋਂ ਕਾਬਿਜ਼ ਬੀਜੇਪੀ ਦਾ ਪੱਤਾ ਹੁਣ ਸਾਫ਼ ਹੋ ਗਿਆ ਹੈ। ਆਮ ਆਦਮੀ ਪਾਰਟੀ(AAP) ਨੇ ਨਿਗਮ ਚੋਣਾਂ ਵਿੱਚ ਸ਼ਾਨਦਾਰ ਜਿੱਤ ਹਾਸਲ ਕੀਤੀ ਹੈ। 250 ਵਾਰਡਾਂ ਵਾਲੇ MCD ਵਿੱਚ ‘ਆਪ’ ਨੂੰ 134 ਸੀਟਾਂ ਹਾਸਲ ਹੋਈਆਂ ਹਨ, ਜਦਕਿ 104 ਸੀਟਾਂ ‘ਤੇ ਬੀਜੇਪੀ ਨੇ ਜਿੱਤ ਹਾਸਲ ਕੀਤੀ ਹੈ। ਕਾਂਗਰਸ ਨੂੰ 9 ਅਤੇ ਅਜ਼ਾਦ ਉਮੀਦਵਾਰਾਂ ਨੂੰ 3 ਸੀਟਾਂ ‘ਤੇ ਬਹੁਮਤ ਹਾਸਲ ਹੋਇਆ ਹੈ।
‘ਆਪ’ ਦੀ ਜਿੱਤ ਤੋਂ ਬਾਅਦ ਦਿੱਲੀ ਦੇ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਨੇ ਦਿੱਲੀ ਦੀ ਜਨਤਾ ਨੂੰ ਵਧਾਈ ਦਿੱਤੀ। ਪਾਰਟੀ ਦਫ਼ਤਰ ਵਿੱਚ ਵਰਕਰਾਂ ਨੂੰ ਸੰਬੋਧਿਤ ਕਰਦੇ ਹੋਏ ਉਹਨਾਂ ਕਿਹਾ, “ਦਿੱਲੀ ਦੀ ਜਨਤਾ ਨੇ ਆਪਣੇ ਪੁੱਤਰ ਅਤੇ ਭਰਾ ਨੂੰ ਦਿੱਲੀ ਦੀ ਸਫ਼ਾਈ ਅਤੇ ਭ੍ਰਿਸ਼ਟਾਚਾਰ ਖਤਮ ਕਰਨ ਦੀ ਜ਼ਿੰਮੇਵਾਰੀ ਦਿੱਤੀ ਹੈ। ਅਸੀਂ ਪੀਐੱਮ ਮੋਦੀ ਦੇ ਸਹਿਯੋਗ ਨਾਲ ਵਿਕਾਸ ਕਰਾਂਗੇ।”
PM ਤੋਂ ਅਸ਼ੀਰਵਾਦ ਚਾਹੀਦਾ ਹੈ- ਕੇਜਰੀਵਾਲ
ਜਿੱਤ ਤੋਂ ਬਾਅਦ ਇੱਕ ਇੱਕ ਸਭਾ ਨੂੰ ਸੰਬੋਧਿਤ ਕਰਦਿਆਂ ਕੇਜਰੀਵਾਲ ਨੇ ਪੀਐੱਮ ਦਾ ਅਸ਼ੀਰਵਾਦ ਵੀ ਮੰਗਿਆ। ਉਨ੍ਹਾਂ ਕਿਹਾ, “ਸਾਨੂੰ ਦਿੱਲੀ ਨੂੰ ਠੀਕ ਕਰਨ ਲਈ ਸਾਰਿਆਂ ਦੇ ਸਗਿਯੋਗ ਕਰਨ ਦੀ ਲੋੜ ਹੈ, ਖ਼ਾਸਕਰ ਕੇਂਦਰ ਸਰਕਾਰ ਦੇ ਸਹਿਯੋਗ ਦੀ ਲੋੜ ਹੈ। ਅੱਜ ਮੈਂ ਇਸ ਮੰਚ ਤੋਂ ਕੇਂਦਰ ਸਰਕਾਰ ਨੂੰ ਖ਼ਾਸਕਰ ਪ੍ਰਧਾਨ ਮੰਤਰੀ ਜੀ ਤੋਂ ਦਿੱਲੀ ਨੂੰ ਠੀਕ ਕਰਨ ਦਾ ਅਸ਼ੀਰਵਾਦ ਚਾਹੁੰਦਾ ਹਾਂ, ਕੇਂਦਰ ਸਰਕਾਰ ਅਤੇ ਪ੍ਰਧਾਨ ਮੰਤਰੀ ਦਾ ਅਸ਼ੀਰਵਾਦ ਚਾਹੀਦਾ ਹੈ।”
ਵੋਟ ਸ਼ੇਅਰ ਨਾਲ ਸਮਝੋ ਕਿਵੇਂ ਪਲਟੀ ਬਾਜ਼ੀ..?
ਵੋਟ ਸ਼ੇਅਰ ‘ਤੇ ਨਜ਼ਰ ਪਾਈਏ, ਤਾਂ ਇਸ ਵਾਰ ‘ਆਪ’ ਨੂੰ 42.05 ਫ਼ੀਸਦ, ਬੀਜੇਪੀ ਨੂੰ 39.09 ਫ਼ੀਸਦ ਅਤੇ 11.68 ਫ਼ੀਸਦ ਵੋਟ ਹਾਸਲ ਹੋਏ ਹਨ, ਜਦਕਿ ਹੋਰਾਂ ਦੇ ਖਾਤੇ ‘ਚ 7.18 ਫ਼ੀਸਦ ਵੋਟਾਂ ਗਈਆਂ। ਜੇਕਰ ਪਿਛਲੀ ਵਾਰ ਦੇ ਨਤੀਜਿਆਂ ਨੂੰ ਵੇਖੀਏ, ਤਾਂ ਇਹ ਸਮਝਣਾ ਮੁਸ਼ਕਿਲ ਨਹੀਂ ਕਿ MCD ਵਿੱਚ ਬੀਜੇਪੀ ਦਾ ਕਿਲ੍ਹਾ ਕਿਵੇਂ ਢਹਿ ਗਿਆ। ਪਿਛਲੀਆਂ ਚੋਣਾਂ ਦੀ ਤੁਲਨਾ ‘ਚ ਬੀਜੇਪੀ ਦੇ ਵੋਟ ਸ਼ੇਅਰ ਵਿੱਚ ਕੋਈ ਬਦਲਾਅ ਨਹੀਂ ਹੈ। ਬੀਜੇਪੀ ਨੂੰ ਪਿਛਲੀ ਵਾਰ ਵੀ ਕਰੀਬ 39 ਫ਼ੀਸਦ ਵੋਟਾਂ ਹਾਸਲ ਹੋਈਆਂ ਸਨ। ਹਾਲਾਂਕਿ ‘ਆਪ’ ਦੀ ਵੋਟ ਫ਼ੀਸਦ ਕਰੀਬ 17 ਫ਼ੀਸਦ ਵਧਿਆ ਹੈ। 2017 ਵਿਚ ‘ਆਪ’ ਨੂੰ 25 ਫ਼ੀਸਦ ਵੋਟਾਂ ਮਿਲੀਆਂ ਸਨ, ਪਰ ਹੁਣ ਇਹ ਅੰਕੜਾ 42 ਫ਼ੀਸਦ ਤੱਕ ਪਹੁੰਚ ਗਿਆ ਹੈ।
ਸਾਫ਼ ਹੈ ਕਿ ਆਮ ਆਦਮੀ ਪਾਰਟੀ ਨੇ ਮੋਟੇ ਤੌਰ ‘ਤੇ ਕਾਂਗਰਸ ਦੇ ਵੋਟ ਬੈਂਕ ਵਿੱਚ ਸੰਨ੍ਹ ਲਾਈ ਹੈ। ਪਿਛਲੀ ਵਾਰ ਕਾਂਗਰਸ ਨੂੰ 21 ਫ਼ੀਸਦ ਵੋਟਾਂ ਮਿਲੀਆਂ ਸਨ, ਜੋ ਕਿ ਇਸ ਵਾਰ 11 ਫ਼ੀਸਦ ਹੀ ਰਹਿ ਗਈ। ਇਸ ਤੋਂ ਇਲਾਵਾ ਹੋਰਾਂ ਦੇ ਖਾਤੇ ‘ਚ ਪਿਛਲੀ ਵਾਰ 14.99 ਫ਼ੀਸਦ ਵੋਟ ਗਈ ਸੀ, ਜੋ ਇਸ ਵਾਰ 7.18 ਫ਼ੀਸਦ ਹੈ। ਕਾਂਗਰਸ ਅਤੇ ਹੋਰਾਂ ਦੇ ਖਾਤੇ ਵਿੱਚ ਘੱਟ ਹੋਏ ਵੋਟ ਸ਼ੇਅਰ ਨੇ ਹੀ ‘ਆਪ’ ਦੇ ਵੋਟ ਸ਼ੇਅਰ ਨੂੰ 40 ਫ਼ੀਸਦ ਦੇ ਪਾਰ ਪਹੁੰਚਾ ਦਿੱਤਾ ਅਤੇ MCD ਵਿੱਚ ਆਖਰਕਾਰ ਝਾੜੂ ਚੱਲ ਗਿਆ।
ਦੱਸ ਦਈਏ ਕਿ ਪਿਛਲੀ ਵਾਰ ਦਿੱਲੀ ‘ਚ ਨਗਰ ਨਿਗਮ ਤਿੰਨ ਹਿੱਸਿਆਂ ‘ਚ ਸੀ ਅਤੇ ਤਿੰਨਾਂ ਨਿਗਮਾਂ ਦੇ ਕੁੱਲ 272 ਵਾਰਡ ਸਨ। ਬੀਜੇਪੀ ਨੇ 181, ‘ਆਪ’ ਨੇ 48, ਕਾਂਗਰਸ ਨੇ 30 ਅਤੇ ਹੋਰਾਂ ਨੇ 11 ਸੀਟਾਂ ਹਾਸਲ ਕੀਤੀਆਂ ਸਨ। ਮੁੜ ਹੱਦਬੰਦੀ ਤੋਂ ਬਾਅਦ ਇਹ ਪਹਿਲੀਆਂ ਨਿਗਮ ਚੋਣਾਂ ਹਨ ਅਤੇ ਇਨ੍ਹਾਂ 250 ਸੀਟਾਂ ਲਈ 4 ਦਸੰਬਰ ਨੂੰ ਵੋਟਾਂ ਪਈਆਂ ਸਨ।
ਦਿੱਲੀ ਦੀ ਸਿਆਸਤ ‘ਚ MCD ਅਹਿਮ ਕਿਉਂ..?
ਦਿੱਲੀ ਦੀ ਸੱਤਾ ਦੇ ਤਿੰਨ ਪਾਵਰ ਸੈਂਟਰ ਹਨ। ਦਿੱਲੀ ਸਰਕਾਰ, ਕੇਂਦਰ ਸਰਕਾਰ ਅਤੇ MCD। ਕੇਂਦਰ ਸਰਕਾਰ ਦੀਆਂ ਸ਼ਕਤੀਆਂ ਤਾਂ ਉਸਦੇ ਕੋਲ ਹੀ ਰਹਿਣਗੀਆਂ। ਜੇਕਰ ਇਹ ਮੰਨ ਲਿਆ ਜਾਵੇ, ਕਿ ਦਿੱਲੀ ‘ਚ ਅਤੇ ਕੇਂਦਰ ‘ਚ ਵਿਰੋਧੀ ਪਾਰਟੀਆਂ ਦੀਆਂ ਸਰਕਾਰਾਂ ਹਨ, ਤਾਂ ਕੇਂਦਰ ‘ਚ ਸੱਤਾ ਧਿਰ ਚਾਹੁੰਦੀ ਹੈ ਕਿ MCD ਉਸਦੇ ਕੋਲ ਰਹੇ ਅਤੇ ਉਹ ਦਿੱਲੀ ਨੂੰ ਆਪਣੇ ਹਿਸਾਬ ਨਾਲ ਰੈਗੁਲੇਟ ਕਰ ਸਕੇ। ਓਧਰ ਦੂਜੇ ਪਾਸੇ ਦਿੱਲੀ ਦੀ ਸਰਕਾਰ ਚਾਹੁੰਦੀ ਹੈ ਕਿ MCD ਵੀ ਉਸਦੇ ਕਬਜ਼ੇ ਵਿੱਚ ਆ ਜਾਵੇ, ਤਾਂ ਜੋ ਉਹ ਹੋਰ ਅਜ਼ਾਦੀ ਨਾਲ ਅਤੇ ਆਪਣੇ ਹਿਸਾਬ ਨਾਲ ਵਿਕਾਸ ਕਰ ਸਕੇ।
