ਸੋਨੀਪਤ। ਸਿੰਘੂ ਬਾਰਡਰ ‘ਤੇ ਦਲਿਤ ਨੌਜਵਾਨ ਲਖਬੀਰ ਸਿੰਘ ਦੇ ਕਤਲ ਦੇ ਮੁਲਜ਼ਮ ਸਰਬਜੀਤ ਸਿੰਘ ਨੂੰ ਸ਼ਨੀਵਾਰ ਨੂੰ ਅਦਾਲਤ ਵਿੱਚ ਪੇਸ਼ ਕੀਤਾ ਗਿਆ। ਦੁਪਹਿਰ ਦੇ ਕਰੀਬ ਸਵਾ 1 ਵਜੇ ਪੁਲਿਸ ਸਰਬਜੀਤ ਨੂੰ ਲੈ ਕੇ ਅਦਾਲਤ ਪਹੁੰਚੀ। ਬੰਦ ਕਮਰੇ ਵਿੱਚ ਕਰੀਬ ਇੱਕ ਘੰਟੇ ਤੱਕ ਚੱਲੀ ਬਹਿਸ ਤੋਂ ਬਾਅਦ ਅਦਾਲਤ ਨੇ ਨਿਹੰਗ ਸਰਬਜੀਤ ਸਿੰਘ ਨੂੰ 7 ਦਿਨਾਂ ਦੇ ਪੁਲਿਸ ਰਿਮਾਂਡ ‘ਤੇ ਭੇਜ ਦਿੱਤਾ।
ਜਾਣਕਾਰੀ ਮੁਤਾਬਕ, ਸੁਣਵਾਈ ਦੌਰਾਨ ਕੋਰਟ ਵਿੱਚ ਪੁਲਿਸ ਨੇ ਦਲੀਲ ਦਿੱਤੀ ਕਿ ਬੇਸ਼ੱਕ ਸਰਬਜੀਤ ਸਿੰਘ ਨੇ ਆਪਣਾ ਗੁਨਾਹ ਕਬੂਲ ਕਰ ਲਿਆ ਹੈ, ਪਰ ਅਜੇ ਉਸ ਤੋਂ ਕਤਲ ਵਿੱਚ ਇਸਤੇਮਾਲ ਕੀਤੇ ਗਏ ਹਥਿਆਰਾਂ ਦੀ ਬਰਾਮਦਗੀ ਬਾਕੀ ਹੈ। ਇਸਦੇ ਨਾਲ ਹੀ ਮਾਮਲੇ ਵਿੱਚ ਕੁਝ ਹੋਰ ਲੋਕਾਂ ਦੀ ਵੀ ਪਛਾਣ ਹੋਈ ਹੈ, ਜਿਹਨਾਂ ਦੀ ਗ੍ਰਿਫ਼ਤਾਰੀ ਲਈ ਪੁਲਿਸ ਨੂੰ ਉਸਨੂੰ ਲੈ ਕੇ ਪੰਜਾਬ ਦੇ ਗੁਰਦਾਸਪੁਰ ਅਤੇ ਚਮਕੌਰ ਸਾਹਿਬ ਵੀ ਜਾਣਾ ਪੈ ਸਕਦਾ ਹੈ।
ਕੋਰਟ ਦੇ ਅੰਦਰ-ਬਾਹਰ ਸਨ ਸੁਰੱਖਿਆ ਦੇ ਪੁਖਤਾ ਪ੍ਰਬੰਧ
ਨਿਹੰਗ ਸਰਬਜੀਤ ਸਿੰਘ ਦੀ ਪੇਸ਼ੀ ਦੇ ਮੱਦੇਨਜ਼ਰ ਸੋਨੀਪਤ ਕੋਰਟ ਪਰੀਸਰ ਵਿੱਚ ਸੁਰੱਖਿਆ ਦੇ ਪੁਖਤਾ ਪ੍ਰਬੰਧ ਕੀਤੇ ਗਏ ਸਨ। ਕੋਰਟ ਦਾ ਗੇਟ ਅੰਦਰੋਂ ਬੰਦ ਕੀਤਾ ਗਿਆ ਸੀ। ਸੁਣਵਾਈ ਦੌਰਾਨ ਕੋਰਟ ਵਿੱਚ ਸਿਵਲ ਡ੍ਰੈੱਸ ਵਿੱਚ ਵੀ ਪੁਲਿਸਕਰਮੀ ਤੈਨਾਤ ਰਹੇ।
ਧੱਕਾਮੁੱਕੀ ‘ਚ ਲੱਥੀ ਸਰਬਜੀਤ ਦੀ ਪੱਗ
ਕੋਰਟ ਦੀ ਸੁਣਵਾਈ ਪੂਰੀ ਹੋਣ ਤੋਂ ਬਾਅਦ ਕਰੀਬ ਢਾਈ ਵਜੇ ਪੁਲਿਸ ਜਦੋਂ ਸਰਬਜੀਤ ਸਿੰਘ ਨੂੰ ਲੈ ਕੇ ਅਦਾਲਤ ‘ਚੋਂ ਬਾਹਰ ਨਿਕਲੀ, ਤਾਂ ਧੱਕਾਮੁੱਕੀ ‘ਚ ਨਿਹੰਗ ਸਰਬਜੀਤ ਸਿੰਘ ਦੀ ਪੱਗ ਲੱਥ ਗਈ। ਇਸਦੇ ਚਲਦੇ ਸਰਬਜੀਤ ਭੜਕ ਗਿਆ ਅਤੇ ਉਸਨੇ ਗੁੱਸੇ ਵਿੱਚ ਮੀਡੀਆਕਰਮੀਆਂ ਨੂੰ ਅਪਸ਼ਬਦ ਕਹਿਣੇ ਸ਼ੁਰੂ ਕਰ ਦਿੱਤੇ।
ਸਰਬਜੀਤ ਨੇ ਕੱਲ੍ਹ ਸ਼ਾਮ ਕੀਤਾ ਸੀ ਸਰੰਡਰ
ਬੇਅਦਬੀ ਦੇ ਮੁਲਜ਼ਮ ਲਖਬੀਰ ਸਿੰਘ ਦੇ ਕਤਲ ਦੇ ਮੁਲਜ਼ਮ ਸਰਬਜੀਤ ਸਿੰਘ ਨੇ ਇਸ ਕਤਲ ਤੋਂ ਕਰੀਬ 15 ਘੰਟਿਆਂ ਬਾਅਦ ਪੁਲਿਸ ਦੇ ਸਾਹਮਣੇ ਸਰੰਡਰ ਕੀਤਾ ਸੀ। ਕਤਲ ਦੀ ਵਾਰਦਾਤ ਸ਼ੁੱਕਰਵਾਰ ਤੜਕ ਸਵੇਰੇ ਕਰੀਬ ਸਾਢੇ 3 ਵਜੇ ਹੋਈ, ਪਰ ਪੁਲਿਸ ਨੂੰ ਮੁਲਜ਼ਮ ਦੇ ਸਰੰਡਰ ਲਈ ਕਰੀਬ 15 ਘੰਟਿਆਂ ਤੱਕ ਇੰਤਜਾਰ ਕਰਨਾ ਪਿਆ। ਹਾਲਾਂਕਿ ਘਟਨਾ ਦੇ ਕਥਿਤ ਹੋਰ ਮੁਲਜ਼ਮ ਅਜੇ ਵੀ ਪੁਲਿਸ ਦੀ ਗ੍ਰਿਫ਼ਤ ਤੋਂ ਬਾਹਰ ਹਨ।
