ਚੰਡੀਗੜ੍ਹ। ਕਰੀਬ 2 ਸਾਲਾਂ ਤੱਕ ਕੈਪਟਨ ਅਮਰਿੰਦਰ ਸਿੰਘ ਦੀ ਸਰਕਾਰ ਵਿੱਚ ਰਹਿੰਦਿਆਂ ਨਵਜੋਤ ਸਿੰਘ ਸਿੱਧੂ ਨੇ ਜਿਸ ਸਰਕਾਰੀ ਰਿਹਾਇਸ਼ ਵਿੱਚ ਮੰਤਰੀ ਅਹੁਦੇ ਦਾ ਸੁੱਖ ਮਾਣਿਆ, ਅੱਜ ਉਸੇ ਕੋਠੀ ਵਿੱਚੋਂ ਸਿੱਧੂ ਨੂੰ ਸਾਫ ਸੰਦੇਸ਼ ਦੇ ਦਿੱਤਾ ਗਿਆ ਕਿ ਪੰਜਾਬ ਵਿੱਚ ਕਾਂਗਰਸ ਦੇ ‘ਕੈਪਟਨ’ ਅਮਰਿੰਦਰ ਸਿੰਘ ਹੀ ਹਨ। 58 ਵਿਧਾਇਕਾਂ ਅਤੇ 8 ਸਾਂਸਦਾਂ ਸਣੇ ਆਗੂਆਂ ਦੀ ਵੱਡੀ ਫੌਜ ਇਹ ਦੱਸਣ ਲਈ ਕਾਫੀ ਹੈ ਕਿ ਪੰਜਾਬ ਵਿੱਚ ਤਖਤਾ ਪਲਟ ਦੀ ਸਿੱਧੂ ਧੜੇ ਦੀ ਕੋਸ਼ਿਸ਼ ਕਿਸੇ ਕੰਮ ਨਹੀਂ ਆਉਣ ਵਾਲੀ।
Glimpses from the evening at dinner hosted by @iranasodhi for @INCPunjab MPs & MLAs joined by @capt_amarinder https://t.co/7BUbhVGnEM pic.twitter.com/YNvGDkgwr3
— Raveen Thukral (@RT_MediaAdvPBCM) August 26, 2021
ਦਰਅਸਲ, ਕੈਪਟਨ ਅਮਰਿੰਦਰ ਸਿੰਘ ਖਿਲਾਫ ਖੁੱਲ੍ਹ ਕੇ ਬਗ਼ਾਵਤ ਕਰਨ ਵਾਲੇ ਮੰਤਰੀਆਂ ਨੂੰ ਜਵਾਬ ਦੇਣ ਲਈ ਸੂਬੇ ਦੇ ਖੇਡ ਮੰਤਰੀ ਰਾਣਾ ਗੁਰਮੀਤ ਸਿੰਘ ਸੋਢੀ ਵੱਲੋਂ ਵੀਰਵਾਰ ਨੂੰ ਆਪਣੀ ਚੰਡੀਗੜ੍ਹ ਰਿਹਾਇਸ਼ ਵਿਖੇ ਸਿਆਸੀ ਡਿਨਰ ਰੱਖਿਆ ਗਿਆ। ਸੂਬੇ ਦੇ ਕਾਂਗਰਸੀ ਵਿਧਾਇਕਾਂ ਅਤੇ ਸਾਂਸਦਾਂ ਨੂੰ ਇਹ ਸੁਨੇਹਾ ਵੀ ਦਿੱਤਾ ਗਿਆ ਕਿ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਖੁਦ ਇਸ ਡਿਨਰ ਵਿੱਚ ਸ਼ਾਮਲ ਹੋਣਗੇ। ਇਸ ਤੋਂ ਬਾਅਦ ਜਦੋਂ ਡਿਨਰ ਦੀਆਂ ਤਸਵੀਰਾਂ ਸਾਹਮਣੇ ਆਈਆਂ, ਤਾਂ ਉਹ ਜ਼ਾਹਿਰ ਤੌਰ ‘ਤੇ ਸਿੱਧੂ ਧੜੇ ਦੀ ਚਿੰਤਾ ਵਧਾਉਣ ਵਾਲੀਆਂ ਸਨ। ਦਾਅਵਾ ਕੀਤਾ ਗਿਆ ਕਿ ਇਸ ਸਿਆਸੀ ਡਿਨਰ ਵਿੱਚ 58 ਵਿਧਾਇਕ, 8 ਸਾਂਸਦ ਅਤੇ ਕਰੀਬ 30 ਉਹ ਆਗੂ ਸ਼ਾਮਿਲ ਹੋਏ, ਜੋ ਪਿਛਲੀ ਵਾਰ ਵਿਧਾਨ ਸਭਾ ਦੀ ਚੋਣ ਹਾਰ ਗਏ ਸਨ।
