ਬਿਓਰੋ। ਪੰਜਾਬ ਕਾਂਗਰਸ ਵਿੱਚ ਉਮੀਦਵਾਰਾਂ ਦੀ ਦੂਜੀ ਲਿਸਟ ਜਾਰੀ ਹੁੰਦੇ ਹੀ ਹੰਗਾਮਾ ਮਚ ਗਿਆ ਹੈ। ਬਟਾਲਾ, ਸੁਨਾਮ, ਸਾਹਨੇਵਾਲ, ਸਮਰਾਲਾ, ਖਰੜ ਅਤੇ ਫਿਰੋਜ਼ਪੁਰ ਦਿਹਾਤੀ ਵਿੱਚ ਟਿਕਟ ਨੂੰ ਲੈ ਕੇ ਪਾਰਟੀ ਵਿੱਚ ਬਾਗੀ ਸੁਰਾਂ ਉਠੀਆਂ ਹਨ। ਇਹਨਾਂ ਵਿੱਚ ਕਈ ਥਾਵਾਂ ‘ਤੇ ਪਾਰਟੀ ਆਗੂਆਂ ਨੇ ਅਜਾਦ ਉਮੀਦਵਾਰ ਵਜੋਂ ਤਾਲ ਠੋਕਣ ਦਾ ਵੀ ਐਲਾਨ ਕਰ ਦਿੱਤਾ ਹੈ।
ਬਟਾਲਾ ‘ਚ ਬਾਜਵਾ ਦਾ ਸ਼ਕਤੀ ਪ੍ਰਦਰਸ਼ਨ
ਬਟਾਲਾ ਵਿੱਚ ਆਪਣੇ ਪੁੱਤਰ ਲਈ ਟਿਕਟ ਮੰਗ ਰਹੇ ਤ੍ਰਿਪਤ ਰਜਿੰਦਰ ਸਿੰਘ ਬਾਜਵਾ ਨੇ ਦੂਜੀ ਲਿਸਟ ਆਉਂਦੇ ਹੀ ਆਪਣੇ ਤੇਵਰ ਵਿਖਾ ਦਿੱਤੇ। ਟਿਕਟਾਂ ਦੇ ਐਲਾਨ ਤੋਂ ਬਾਅਦ ਬਾਜਵਾ ਨੇ ਬਟਾਲਾ ਵਿੱਚ ਆਪਣੇ ਸਮਮਰਥਕਾਂ ਦੇ ਨਾਲ ਮੀਟਿੰਗ ਕੀਤੀ। ਮੰਨਿਆ ਜਾ ਰਿਹਾ ਹੈ ਕਿ ਬਾਜਵਾ ਬਟਾਲਾ ਤੋਂ ਆਪਣੇ ਪੁੱਤਰ ਨੂੰ ਅਜਾਦ ਉਮੀਦਵਾਰ ਵਜੋਂ ਮੈਦਾਨ ਵਿੱਚ ਉਤਾਰ ਸਕਦੇ ਹਨ। ਦੱਸ ਦਈਏ ਕਿ ਬਟਾਲਾ ਵਿੱਚ ਪਾਰਟੀ ਨੇ ਅਸ਼ਵਨੀ ਸੇਖੜੀ ਨੂੰ ਟਿਕਟ ਦਿੱਤੀ ਹੈ।
ਸੁਨਾਮ ‘ਚ ਵੀ ਛਿੜਿਆ ਸੰਗ੍ਰਾਮ
ਸੁਨਾਮ ਤੋਂ ਪਿਛਲੀ ਵਾਰ ਕਾਂਗਰਸ ਦੀ ਟਿਕਟ ‘ਤੇ ਚੋਣ ਲੜਨ ਵਾਲੀ ਦਾਮਨ ਬਾਜਵਾ ਨੂੰ ਇਸ ਵਾਰ ਟਿਕਟ ਨਹੀਂ ਮਿਲੀ। ਦਾਮਨ ਦੀ ਥਾਂ ਪਾਰਟੀ ਨੇ ਅਮਰਗੜ੍ਹ ਤੋਂ ਵਿਧਾਇਕ ਸੁਰਜੀਤ ਧੀਮਾਨ ਦੇ ਪੁੱਤਰ ਨੂੰ ਟਿਕਟ ਦਿੱਤੀ ਹੈ। ਨਾਲ ਹੀ ਅਮਰਗੜ੍ਹ ਤੋਂ ਸਿੱਧੂ ਦੇ ਕਰੀਬੀ ਸਮਿਤ ਸਿੰਘ ਨੂੰ ਮੌਕਾ ਦਿੱਤਾ ਗਿਆ ਹੈ।
ਟਿਕਟ ਨਾ ਮਿਲਣ ਦੇ ਚਲਦੇ ਦਾਮਨ ਬਾਜਵਾ ਭੜਕ ਗਏ ਹਨ। ਉਹਨਾਂ ਨੇ ਕਿਹਾ ਕਿ ਕਾਂਗਰਸ ਨੇ ਬੇਸ਼ੱਕ ਟਿਕਟ ਖੋਹ ਲਈ ਹੋਵੇ, ਪਰ ਮੇਰੇ ਤੋਂ ਸੁਨਾਮ ਕੋਈ ਨਹੀਂ ਖੋਹ ਸਕਦਾ। ਟਿਕਟ ਲੀਡਰ ਨੂੰ ਨਹੀਂ ਬਣਾਉਂਦੀ, ਬਲਕਿ ਉਹਨਾਂ ਦੇ ਸਮਰਥਕ ਬਣਾਉਂਦੇ ਹਨ। ਜਦੋਂ ਤੱਕ ਸਮਰਥਕ ਨਾਲ ਹਨ, ਮੈਨੂੰ ਕਿਸੇ ਚੀਜ਼ ਦੀ ਕੋਈ ਫਿਕਰ ਨਹੀਂ ਹੈ। ਦਾਮਨ ਨੇ ਕਿਹਾ ਕਿ ਉਹ ਨਿਸ਼ਚਿਤ ਤੌਰ ‘ਤੇ ਚੋਣ ਮੈਦਾਨ ਵਿੱਚ ਉਤਰਣਗੇ।
ਸਤਵਿੰਦਰ ਬਿੱਟੀ ਵੀ ਹੋਏ ਬਾਗੀ
ਸਾਹਨੇਵਾਲ ਤੋਂ ਪਿਛਲੀ ਵਾਰ ਚੋਣ ਲੜਨ ਵਾਲੇ ਸਤਵਿੰਦਰ ਕੌਰ ਬਿੱਟੀ ਨੂੰ ਵੀ ਇਸ ਵਾਰ ਟਿਕਟ ਨਹੀਂ ਮਿਲੀ। ਬਿੱਟੀ ਦੀ ਥਾਂ ਸਾਬਕਾ ਸੀਐੱਮ ਰਜਿੰਦਰ ਕੌਰ ਭੱਠਲ ਦੇ ਜਵਾਈ ਨੂੰ ਟਿਕਟ ਦਿੱਤੀ ਗਈ ਹੈ। ਟਿਕਟ ਨਾ ਮਿਲਣ ਤੋਂ ਨਰਾਜ਼ ਬਿੱਟੀ ਨੇ ਕਿਹਾ ਕਿ ਪਾਰਟੀ ਇੱਕ ਪਰਿਵਾਰ ਨੂੰ ਇੱਕ ਟਿਕਟ ਦੀ ਗੱਲ ਕਹਿ ਰਹੀ ਸੀ, ਤਾਂ ਕਾਂਗਰਸ ਨੇ ਮੇਰੀ ਟਿਕਟ ਕਿਉਂ ਕੱਟੀ। ਕਾਂਗਰਸ ਪਾਰਟੀ ਦਾ ਇਹ ਕੋਈ ਤਰੀਕਾ ਨਹੀਂ ਹੈ। ਉਹਨਾਂ ਕਿਹਾ ਕਿ ਪ੍ਰਿਅੰਕਾ ਗਾਂਧੀ ਯੂਪੀ ਵਿੱਚ ‘ਲੜਕੀ ਹੂੰ, ਲੜ ਸਕਤੀ ਹੂੰ’ ਦਾ ਨਾਅਰਾ ਦਿੰਦੀ ਹੈ, ਪਰ ਪੰਜਾਬ ਵਿੱਚ ਪਾਰਟੀਆਂ ਨੇ ਸੰਘਰਸ਼ ਕਰਨ ਵਾਲੀਆਂ ਮਹਿਲਾਵਾਂ ਨੂੰ ਵੀ ਦਰਕਿਨਾਰ ਕਰ ਦਿੱਤਾ।
ਅਮਰੀਕ ਢਿੱਲੋਂ ਨੇ ਵੀ ਵਿਖਾਏ ਬਾਗੀ ਤੇਵਰ
ਸਮਰਾਲਾ ਤੋਂ ਟਿਕਟ ਕੱਟਣ ਤੋਂ ਬਾਅਦ ਕਾਂਗਰਸ ਦੇ ਸਿਟਿੰਗ ਵਿਧਾਇਕ ਅਮਰੀਕ ਸਿੰਘ ਢਿੱਲੋਂ ਨੇ ਕਿਹਾ ਕਿ ਜਿਸ ਰਾਜਾ ਗਿੱਲ ਨੂੰ ਟਿਕਟ ਦਿੱਤੀ ਗਈ, ਉਸਦਾ ਕੋਈ ਅਧਾਰ ਨਹੀਂ ਹੈ। ਸਮਰਾਲਾ ਦੇ 180 ਵਿੱਚੋਂ 170 ਸਰਪੰਚ ਮੇਰੇ ਸਮਰਥਕ ਹਨ। ਕਾਂਗਰਸ ਨੂੰ ਇਸਦਾ ਜਵਾਬ ਮਿਲਗਾ। ਮੈਂ ਉਥੋਂ ਚੋਣ ਜ਼ਰੂਰ ਲੜਾਂਗਾ।
ਜਗਮੋਹਨ ਕੰਗ ਨੇ ਸਿੱਧੇ CM ‘ਤੇ ਬੋਲਿਆ ਹਮਲਾ
ਖਰੜ ਸੀਟ ‘ਤੇ ਵੀ ਬਗਾਵਤ ਹੋ ਗਈ ਹੈ। ਸਾਬਕਾ ਮੰਤਰੀ ਜਗਮੋਹਨ ਕੰਗ ਨੇ ਕਿਹਾ, “ਕਾਂਗਰਸ ਹਾਈਕਮਾਂਡ ਮੇਰੇ ਹੱਕ ਵਿੱਚ ਸੀ, ਪਰ ਸੀਐੱਮ ਚਰਨਜੀਤ ਸਿੰਘ ਚੰਨੀ ਨੇ ਮੇਰੀ ਟਿਕਟ ਕਟਵਾ ਦਿੱਤੀ। ਉਹ ਨਹੀਂ ਚਾਹੁੰਦੇ ਸਨ ਕਿ ਮੈਂ ਖਰੜ ਤੋਂ ਚੋਣ ਲੜਾਂ।” ਉਹਨਾਂ ਕਿਹਾ ਕਿ ਇਹ ਸੀਐੱਮ ਦੀ ਕਮੀਨੀ ਹਰਕਤ ਹੈ। ਕੰਗ ਨੇ ਕਿਹਾ ਕਿ ਜਿਸ ਵਿਜੇ ਸ਼ਰਮਾ ਟਿੰਕੂ ਨੂੰ ਟਿਕਟ ਦਿੱਤੀ ਗਈ ਹੈ, ਉਹ ਸ਼ਰਾਬ ਠੇਕੇਦਾਰ ਹੈ। ਕੰਗ ਨੇ ਟਿਕਟ ਨੂੰ ਲੈ ਕੇ ਸੀਐੱਮ ਚੰਨੀ ਦੇ ਨਾਲ-ਨਾਲ ਪੰਜਾਬ ਕਾਂਗਰਸ ਇੰਚਾਰਜ ਹਰੀਸ਼ ਚੌਧਰੀ ‘ਤੇ ਵੀ ਸਵਾਲ ਚੁੱਕੇ।
ਮਹਿਲਾ ਵਿਧਾਇਕ ਦੇ ਪਤੀ ਦੇ ਨਿਕਲੇ ਹੰਝੂ
ਕਾਂਗਰਸ ਨੇ ਫਿਰੋਜ਼ਪੁਰ ਦਿਹਾਤੀ ਤੋਂ ਵਿਧਾਇਕ ਸਤਿਕਾਰ ਕੌਰ ਦੀ ਵੀ ਟਿਕਟ ਕੱਟ ਦਿੱਤੀ। ਟਿਕਟ ਨਾ ਮਿਲਣ ਦੇ ਚਲਦੇ ਸਤਿਕਾਰ ਕੌਰ ਦੇ ਪਤੀ ਜਸਮੇਲ ਸਿੰਘ ਲਾਡੀ ਗਹਿਰੀ ਕੈਮਰੇ ਦੇ ਸਾਹਮਣੇ ਫੁੱਟ-ਫੁੱਟ ਕੇ ਰੋ ਪਏ। ਜਸਮੇਲ ਨੇ ਕਿਹਾ ਕਿ ਪਾਰਟੀ ਹਮੇਸ਼ਾ ਗਰੀਬ ਦੀ ਕੁਰਬਾਨੀ ਦਿੰਦੀ ਹੈ। ਉਹਨਾਂ ਤੋਂ ਪੁੱਛਿਆ ਗਿਆ ਕਿ ਉਹ ਪਾਰਟੀ ਨੂੰ ਟਿਕਟ ਲਈ ਕਹਿਣਗੇ ਤਾਂ ਜਸਮੇਲ ਨੇ ਕਿਹਾ ਕਿ ਉਹ ਤਾਂ ਸਿਰਫ਼ ਵਿਨਤੀ ਕਰ ਸਕਦੇ ਹਨ। ਬਾਕੀ ਤਾਂ ਪਾਰਟੀ ਨੇ ਵੇਖਣਾ ਹੈ। ਉਹਨਾਂ ਕਿਹਾ, “ਮੇਰੇ ਛੋਟੇ-ਛੋਟੇ ਬੱਚੇ ਹਨ। ਕਾਂਗਰਸ ਨੂੰ ਉਹਨਾਂ ‘ਤੇ ਤਰਸ ਖਾਣਾ ਚਾਹੀਦਾ ਹੈ। ਮੈਂ ਬਹੁਤ ਮਿਹਨਤ ਕੀਤੀ ਹੈ, ਇਹ ਪਾਰਟੀ ਨੂੰ ਵੇਖਣਾ ਚਾਹੀਦਾ ਹੈ।”
ਦੱਸ ਦਈਏ ਕਿ ਫਿਰੋਜ਼ਪੁਰ ਦਿਹਾਤੀ ਵਿਧਾਨ ਸਭਾ ਸੀਟ ਤੋਂ ਕਾਂਗਰਸ ਨੇ ਆਸ਼ੂ ਬਾਂਗੜ ਨੂੰ ਟਿਕਟ ਦਿੱਤੀ ਹੈ। ਆਸ਼ੂ ਨੂੰ ਪਹਿਲਾਂ ਇਸੇ ਸੀਟ ਤੋਂ ਆਮ ਆਦਮੀ ਪਾਰਟੀ ਨੇ ਚੋਣ ਮੈਦਾਨ ਵਿੱਚ ਉਤਾਰਿਆ ਸੀ। ਹਾਲ ਹੀ ਵਿੱਚ ਉਹਨਾਂ ਨੇ ‘ਆਪ’ ਲੀਡਰਾਂ ‘ਤੇ ਗੰਭੀਰ ਇਲਜਾਮ ਲਗਾਉਂਦੇ ਹੋਏ ਪਾਰਟੀ ਛੱਡ ਦਿੱਤੀ ਸੀ, ਜਿਸ ਤੋਂ ਬਾਅਦ ਸੀਐੱਮ ਚਰਨਜੀਤ ਸਿੰਘ ਚੰਨੀ ਨੇ ਉਹਨਾਂ ਨੂੰ ਕਾਂਗਰਸ ਵਿੱਚ ਸ਼ਾਮਲ ਕਰਦੇ ਹੋਏ ਪਾਰਟੀ ਦੇ ਫੈਸਲੇ ਤੋਂ ਪਹਿਲਾਂ ਉਮੀਦਵਾਰ ਐਲਾਨ ਦਿੱਤਾ।
