ਬਿਓਰੋ। ਪੰਜਾਬ ਵਿਧਾਨ ਸਭਾ ਚੋਣਾਂ ਵਿੱਚ ਬੇਸ਼ੱਕ ਇਸ ਵਾਰ ਹਰ ਸਿਆਸੀ ਪਾਰਟੀ ਆਪਣੇ ਦਿੱਗਜਾਂ ਨੂੰ Safe Game ਖਿਡਾਉਣ ਦੀ ਤਿਆਰੀ ਕਰ ਚੁੱਕੀ ਹੈ, ਪਰ ਅੰਮ੍ਰਿਤਸਰ ਪੂਰਬੀ ਸੀਟ ‘ਤੇ ਇਸ ਵਾਰ ਪੰਜਾਬ ਦੀ ਸਭ ਤੋਂ ਵੱਡੀ ਜੰਗ ਹੋਣ ਜਾ ਰਹੀ ਹੈ। ਨਵਜੋਤ ਸਿੱਧੂ ਦੇ ਗੜ੍ਹ ਵਿੱਚ ਇਸ ਵਾਰ ਸ਼੍ਰੋਮਣੀ ਅਕਾਲੀ ਦਲ ਨੇ ਮਾਝੇ ਦੇ ਜਰਨੈਲ ਬਿਕਰਮ ਸਿੰਘ ਮਜੀਠੀਆ ਨੂੰ ਚੋਣ ਮੈਦਾਨ ਵਿੱਚ ਉਤਾਰ ਦਿੱਤਾ ਹੈ। ਅਕਾਲੀ ਦਲ ਪ੍ਰਧਾਨ ਸੁਖਬੀਰ ਬਾਦਲ ਨੇ ਅੰਮ੍ਰਿਤਸਰ ਪੂਰਬੀ ਹਲਕੇ ਤੋਂ ਮਜੀਠੀਆ ਦੀ ਉਮੀਦਵਾਰੀ ਦਾ ਐਲਾਨ ਕੀਤਾ।
ਮਾਝੇ ਦਾ ਸ਼ੇਰ ਤੋੜੇਗਾ ਸਿੱਧੂ ਦਾ ਹੰਕਾਰ- ਸੁਖਬੀਰ
ਮਜੀਠੀਆ ਦੀ ਉਮੀਦਵਾਰੀ ਦਾ ਐਲਾਨ ਕਰਦੇ ਹੋਏ ਸੁਖਬੀਰ ਬਾਦਲ ਨੇ ਕਿਹਾ, “ਨਵਜੋਤ ਸਿੱਧੂ ਦੇ ਖਿਲਾਫ਼ ਮਾਝੇ ਦਾ ਸ਼ੇਰ ਬਿਕਰਮ ਮਜੀਠੀਆ ਲੜੇਗਾ।“ ਉਹਨਾਂ ਕਿਹਾ, “ਨਵਜੋਤ ਸਿੱਧੂ ਵਿੱਚ ਹੰਕਾਰ ਭਰਿਆ ਹੈ। ਉਹ ਨਾ ਕਾਂਗਰਸ ਨੂੰ ਕੁਝ ਸਮਝਦਾ ਹੈ ਤੇ ਨਾ ਹੀ ਕਾਂਗਰਸ ਦੇ ਲੀਡਰਾਂ ਨੂੰ ਕੁਝ ਸਮਝਦਾ ਹੈ। ਅੰਮ੍ਰਿਤਸਰ ‘ਚ ਸ਼੍ਰੋਮਣੀ ਅਕਾਲੀ ਦਲ ਦੇ ਵਰਕਰਾਂ ਨੇ ਮੈਨੂੰ ਕਿਹਾ ਕਿ ਸਿੱਧੂ ਦਾ ਹੰਕਾਰ ਤੋੜਨਾ ਹੈ ਤੇ ਇਸਦੇ ਲਈ ਜਰਨੈਲ ਨੂੰ ਮੈਦਾਨ ‘ਚ ਲਿਆਓ।“ ਸਿੱਧੂ ਨੂੰ ਲਲਕਾਰਦਿਆਂ ਸੁਖਬੀਰ ਨੇ ਕਿਹਾ, “ਤੇਰਾ ਟਾਕਰਾ ਸ਼੍ਰੋਮਣੀ ਅਕਾਲੀ ਦਲ ਦੀ ਬਹਾਦਰ ਫੌਜ ਦੇ ਨਾਲ ਹੈ।” ਉਹਨਾਂ ਦਾਅਵਾ ਕੀਤਾ ਕਿ ਬਿਕਰਮ ਮਜੀਠੀਆ ਇਸ ਵਾਰ ਸਿੱਧੂ ਦੀ ਜ਼ਮਾਨਤ ਜ਼ਬਤ ਕਰਵਾਉਣਗੇ।
ਝੂਠੇ ਕੇਸਾਂ ਦਾ ਇਨਸਾਫ਼ ਜਨਤਾ ਕਰੇਗੀ- ਸੁਖਬੀਰ
ਸੁਖਬੀਰ ਬਾਦਲ ਨੇ ਕਿਹਾ, “ਪੰਜਾਬ ਦੀ ਸਰਕਾਰ, ਕਾਂਗਰਸ ਪਾਰਟੀ ਅਤੇ ਸਾਰੀਆਂ ਹੋਰ ਪਾਰਟੀਆਂ ਮਜੀਠੀਆ ਦੇ ਪਿੱਛੇ ਲੱਗੀਆਂ ਹਨ, ਕਿਉਂਕਿ ਉਹ ਪੰਜਾਬ ਅਤੇ ਪੰਜਾਬੀਆਂ ਦੀ ਅਵਾਜ਼ ਚੁੱਕਦਾ ਹੈ। ਚੰਨੀ ਸਰਕਾਰ ਖਾਸਕਰ ਨਵਜੋਤ ਸਿੱਧੂ ਨੇ ਮਜੀਠੀਆ ਦੇ ਖਿਲਾਫ਼ ਝੂਠਾ ਕੇਸ ਕੀਤਾ, ਇੱਕ ਗੁਰਸਿੱਖ ਪਰਿਵਾਰ ‘ਤੇ ਡਰੱਗਜ਼ ਦਾ ਝੂਠਾ ਇਲਜਾਮ ਲਾਇਆ। ਪਰ ਹੁਣ ਝੂਠਾ ਕੇਸ ਕਰਨ ਵਾਲੇ ਤਿਆਰ ਹੋ ਜਾਓ, ਕਿਉਂਕਿ ਫੈਸਲਾ ਹੁਣ ਜਨਤਾ ਦੀ ਕਚਹਿਰੀ ਵਿੱਚ ਹੋਵੇਗੀ। ਅੰਮ੍ਰਿਤਸਰ ਦੀ ਜਨਤਾ ਚੋਣਾਂ ਵਿੱਚ ਪੂਰਾ ਇਨਸਾਫ਼ ਕਰੇਗੀ।”
‘ਕਦੇ ਹਲਕੇ ‘ਚ ਨਹੀਂ ਵੜਿਆ, ਗੱਲ ਪੰਜਾਬ ਮਾਡਲ ਦੀ’
ਸੁਖਬੀਰ ਬਾਦਲ ਨੇ ਇਸ ਦੌਰਾਨ ਨਵਜੋਤ ਸਿੱਧੂ ਦੇ ਪੰਜਾਬ ਮਾਡਲ ‘ਤੇ ਵੀ ਹਮਲਾ ਬੋਲਿਆ। ਉਹਨਾਂ ਕਿਹਾ, “ਸਿੱਧੂ ਨੇ ਅੱਜ ਤੱਕ ਆਪਣੇ ਹਲਕੇ ਵਿੱਚ ਇੱਕ ਇੱਟ ਵੀ ਨਹੀਂ ਲਾਈ। ਕਿਸੇ ਨੂੰ ਜਾ ਕੇ ਮਿਲਿਆ ਨਹੀਂ। ਉਹ ਸ਼ਖਸ ਪੰਜਾਬ ਮਾਡਲ ਦੀ ਗੱਲ ਕਰਦਾ ਹੈ, ਜਾ ਕੇ ਪਹਿਲਾਂ ਉਸਦੇ ਹਲਕੇ ਦਾ ਹਾਲ ਵੇਖੋ। ਉਸਨੇ ਕਦੇ ਆਪਣੇ ਹਲਕੇ ਦੀ ਸੀਵਰੇਜ ਤੇ ਪਾਣੀ ਤੱਕ ਦੀ ਸਮੱਸਿਆ ਵੱਲ ਗੌਰ ਨਹੀਂ ਕੀਤਾ। ਇਥੋਂ ਤੱਕ ਕਿ ਸਥਾਨਕ ਸਰਕਾਰਾਂ ਮੰਤਰੀ ਰਹਿੰਦਿਆਂ ਉਸਨੇ ਅੰਮ੍ਰਿਤਸਰ ਸ਼ਹਿਰ ਦੇ ਸਾਰੇ ਵਿਕਾਸ ਕਾਰਜ ਰੋਕ ਦਿੱਤੇ।”
ਇਹ ਸਿੱਧੂ ਦਾ ਆਖਰੀ ਇਲੈਕਸ਼ਨ- ਸੁਖਬੀਰ
ਨਵਜੋਤ ਸਿੱਧੂ ਬਾਰੇ ਬੋਲਦਿਆਂ ਸੁਖਬੀਰ ਬਾਦਲ ਨੇ ਇਹ ਵੀ ਦਾਅਵਾ ਕਰ ਦਿੱਤਾ ਕਿ ਇਹ ਸਿੱਧੂ ਦੀ ਆਖਰੀ ਚੋਣ ਹੋਵੇਗੀ। ਇਸ ਚੋਣ ਵਿੱਚ ਉਹਨਾਂ ਨੂੰ ਅਜਿਹੀ ਹਾਰ ਦਾ ਸਾਹਮਣਾ ਕਰਨਾ ਪਏਗਾ ਕਿ ਉਹ ਖੁਦ ਹੀ ਭੱਜ ਜਾਣਗੇ।
