ਨਵੀਂ ਦਿੱਲੀ। 2022 ਦੀਆਂ ਵਿਧਾਨ ਸਭਾ ਚੋਣਾਂ ਤੋਂ ਪਹਿਲਾਂ ਪੰਜਾਬ ਕਾਂਗਰਸ ਦੇ ਅੰਦਰੂਨੀ ਰੱਫੜ ‘ਤੇ ਵਿਰਾਮ ਲਗਾਉਣ ਦੀ ਕਾਂਗਰਸ ਹਾਈਕਮਾਂਡ ਦੀ ਕੋਸ਼ਿਸ਼ ਰੰਗ ਲਿਆਂਦੀ ਨਜ਼ਰ ਆ ਰਹੀ ਹੈ। ਦਿੱਲੀ ‘ਚ ਤਾਜ਼ਾ ਹਲਚਲ ਤੋਂ ਸੰਕੇਤ ਮਿਲ ਰਹੇ ਹਨ ਕਿ ਪਹਿਲਾਂ ਸਿੱਧੂ ਤੇ ਹੁਣ ਕੈਪਟਨ ਅਮਰਿੰਦਰ ਸਿੰਘ, ਦੋਵਾਂ ਨੂੰ ਹੀ ਹਾਈਕਮਾਂਡ ਨੇ ਆਪਣੇ ਐਡਜਸਟਮੈਂਟ ਵਾਲੇ ਫਾਰਮੂਲੇ ‘ਤੇ ਰਾਜ਼ੀ ਕਰ ਲਿਆ ਹੈ।
ਹਾਈਕਮਾਂਡ ਦਾ ਫ਼ੈਸਲਾ ਮਨਜ਼ੂਰ- CM
ਕਾਂਗਰਸ ਪ੍ਰਧਾਨ ਸੋਨੀਆ ਗਾਂਧੀ ਨਾਲ ਕਰੀਬ ਡੇਢ ਘੰਟੇ ਦੀ ਮੁਲਾਕਾਤ ਤੋਂ ਬਾਅਦ ਸੀਐੱਮ ਕੈਪਟਨ ਅਮਰਿੰਦਰ ਸਿੰਘ ਨੇ ਮੀਡੀਆ ਨਾਲ ਗੱਲਬਾਤ ਕਰਦਿਆਂ ਕਿਹਾ, “ਕਾਂਗਰਸ ਪ੍ਰਧਾਨ ਨਾਲ ਪੰਜਾਬ ਦੇ ਅੰਦਰੂਨੀ ਮਾਮਲਿਆਂ ‘ਤੇ ਗੱਲਾਂ ਹੋਈਆਂ ਹਨ, ਜਾਂ ਵਿਕਾਸ ਦੀ ਗੱਲ ਹੋਵੇ ਜਾਂ ਫਿਰ ਸੂਬੇ ਦੇ ਸਿਆਸੀ ਮੁੱਦੇ। ਹੁਣ ਜੋ ਵੀ ਫ਼ੈਸਲਾ ਹਾਈਕਮਾਂਡ ਦਾ ਹੋਵੇਗਾ, ਉਸਦੇ ਲਈ ਅਸੀਂ ਸਾਰੇ ਤਿਆਰ ਹਾਂ। ਹਾਈਕਮਾਂਡ ਦੇ ਫ਼ੈਸਲੇ ਨੂੰ ਜ਼ਰੂਰ ਸਿਰੇ ਚੜ੍ਹਾਇਆ ਜਾਵੇਗਾ।” ਕੈਪਟਨ ਨੇ ਕਿਹਾ ਕਿ ਉਹਨਾਂ ਦੀ ਪਾਰਟੀ ਅਗਾਮੀ ਵਿਧਾਨ ਸਭਾ ਚੋਣਾਂ ਲਈ ਪੂਰੀ ਤਰ੍ਹਾਂ ਤਿਆਰ ਹੈ।
ਨਵਜੋਤ ਸਿੱਧੂ ਬਾਰੇ ਬੋਲਣ ਤੋਂ ਬਚੇ ਕੈਪਟਨ
ਪਾਰਟੀ ਦਾ ਅੰਦਰੂਨੀ ਘਮਸਾਣ ਖਤਮ ਕਰਨ ਦੇ ਮਕਸਦ ਨਾਲ ਚੱਲੇ ਮੈਰਾਥਨ ਮੰਥਨ ਵਿਚਾਲੇ ਜਦੋਂ ਪਹਿਲੀ ਵਾਰ ਸੀਐੱਮ ਕੈਪਟਨ ਮੀਡੀਆ ਸਾਹਮਣੇ ਆਏ, ਤਾਂ ਜ਼ਾਹਿਰ ਹੈ ਕਿ ਉਹਨਾਂ ਨੂੰ ਸਿੱਧੂ ਬਾਰੇ ਸਵਾਲ ਪੁੱਛਿਆ ਜਾਣਾ ਵੀ ਲਾਜ਼ਮੀ ਸੀ। ਪਰ ਜਦੋਂ ਸਿੱਧੂ ਦਾ ਸਵਾਲ ਆਇਆ, ਤਾਂ ਮੁੱਖ ਮੰਤਰੀ ਕਹਿੰਦੇ ਹਨ, “ਸਿੱਧੂ ਬਾਰੇ ਮੈਨੂੰ ਕੁਝ ਨਹੀਂ ਪਤਾ। ਮੈਂ ਸਰਕਾਰ ਦਾ ਕੰਮ ਅਤੇ ਸਿਆਸੀ ਮੁੱਦੇ ਵਿਚਾਰਨ ਲਈ ਇਥੇ ਆਇਆ ਹਾਂ।” ਇਸ ਵਿਚਾਲੇ ਜਦੋਂ ਇੱਕ ਵਾਰ ਫਿਰ ਸਿੱਧੂ ਦਾ ਸਵਾਲ ਕੈਪਟਨ ਦੇ ਸਾਹਮਣੇ ਆਇਆ, ਤਾਂ ਉਹਨਾਂ ਨੇ ਸਵਾਲ ਨੂੰ ਹੀ ਅਣਸੁਣਾ ਕਰ ਦਿੱਤਾ।
ਬਹਿਰਹਾਲ, ਬੇਸ਼ੱਕ ਕੈਪਟਨ ਅਮਰਿੰਦਰ ਿਸੰਘ ਮੀਡੀਆ ਸਾਹਮਣੇ ਇਹ ਕਹਿੰਦੇ ਹਨ ਕਿ ਉਹਨਾਂ ਨੂੰ ਹਾਈਕਮਾਂਡ ਦਾ ਹਰ ਫ਼ੈਸਲਾ ਮਨਜ਼ੂਰ ਹੈ, ਪਰ ਨਾਲ ਹੀ ਉਹਨਾਂ ਦੀ ਬੌਡੀ ਲੌਂਗਵੇਜ ਇਸ ਵੱਲ ਵੀ ਇਸ਼ਾਰਾ ਕਰਦੀ ਹੈ ਕਿ ਸਿਆਸਤ ਦੇ ਇਸ ਖੇਡ ‘ਚ ਉਹ ਵੀ ਕੋਈ ਕੱਚੇ ਖਿਡਾਰੀ ਨਹੀਂ।
