ਮੁੰਬਈ। ਬਿੱਗ ਬੌਸ-13 ਦੇ ਵਿਨਰ ਅਤੇ ਕਰੋੜਾਂ ਕੁੜੀਆਂ ਦੇ ਦਿਲਾਂ ਦੀ ਧੜਕਨ ਸਿਧਾਰਥ ਸ਼ੁਕਲਾ ਹੁਣ ਸਾਡੇ ਵਿਚਕਾਰ ਨਹੀਂ ਰਹੇ। ਮਹਿਜ਼ 40 ਸਾਲਾਂ ਦੀ ਉਮਰ ਵਿੱਚ ਸਿਧਾਰਥ ਇਸ ਫਾਨੀ ਸੰਸਾਰ ਨੂੰ ਅਲਵਿਦਾ ਆਖ ਗਏ। ਸ਼ੁਰੂਆਤੀ ਤੌਰ ‘ਤੇ ਸਿਧਾਰਥ ਦੇ ਮੌਤ ਦੀ ਵਜ੍ਹਾ ਹਾਰਟ ਅਟੈਕ ਦੱਸੀ ਜਾ ਰਹੀ ਹੈ। ਹਾਲਾਂਕਿ ਪੋਸਟਮਾਰਟਮ ਦੀ ਰਿਪੋਰਟ ਆਉਣ ਤੋਂ ਬਾਅਦ ਹੀ ਅਸਲ ਵਜ੍ਹਾ ਪਤਾ ਲੱਗ ਸਕੇਗੀ।
ਜਾਣਕਾਰੀ ਮੁਤਾਬਕ, ਸਿਧਾਰਥ ਦੀ ਤਬੀਅਤ ਬੀਤੀ ਰਾਤ ਤੋਂ ਹੀ ਠੀਕ ਨਹੀਂ ਸੀ, ਜਿਸ ਕਾਰਨ ਉਹ ਦਵਾਈ ਲੈ ਕੇ ਜਲਦੀ ਸੋ ਗਏ ਸਨ, ਪਰ ਅਜਿਹਾ ਸੋਏ ਕਿ ਅਗਲੀ ਸਵੇਰ ਦਾ ਸੂਰਜ ਵੇਖਣ ਲਈ ਉਠੇ ਹੀ ਨਹੀਂ। ਦੱਸਿਆ ਜਾ ਰਿਹਾ ਹੈ ਕਿ ਸਵੇਰੇ ਸਿਧਾਰਥ ਦੇ ਦੀਦੀ ਤੇ ਜੀਜਾ ਉਹਨਾਂ ਨੂੰ ਕੂਪਰ ਹਸਪਤਾਲ ਲੈ ਕੇ ਗਏ, ਜਿਥੇ ਡਾਕਟਰਾਂ ਨੇ ਉਹਨਾਂ ਨੂੰ ਮ੍ਰਿਤ ਐਲਾਨ ਦਿੱਤਾ।
ਸੀਰੀਅਲ ‘ਬਾਲਿਕਾ ਵਧੂ’ ਤੋਂ ਮਿਲੀ ਪਛਾਣ
ਸਿਧਾਰਥ ਸ਼ੁਕਲਾ ਨੇ ਆਪਣੇ ਕਰੀਅਰ ਦੀ ਸ਼ੁਰੂਆਤ ਬਤੌਰ ਮਾਡਲ ਕੀਤੀ ਸੀ। ਸਾਲ 2004 ਵਿੱਚ ਉਹਨਾਂ ਨੇ ਟੀਵੀ ਵਿੱਚ ਡੈਬਿਊ ਕੀਤਾ। 2008 ਵਿੱਚ ਉਹ ਟੀਵੀ ਸੀਰੀਅਲ ‘ਬਾਬੁਲ ਕਾ ਆਂਗਨ ਛੂਟੇ ਨਾ’ ਸੀਰੀਅਲ ਵਿੱਚ ਨਜ਼ਰ ਆਏ ਸਨ, ਪਰ ਉਹਨਾਂ ਨੂੰ ਅਸਲ ਪਛਾਣ ਕਲਰਜ਼ ਟੀਵੀ ਦੇ ਸੀਰੀਅਲ ‘ਬਾਲਿਕਾ ਵਧੂ’ ਤੋਂ ਮਿਲੀ ਸੀ। ‘ਬਾਲਿਕਾ ਵਧੂ’ ਸੀਰੀਅਲ ਤੋਂ ਬਾਅਦ ਸਿਧਾਰਥ ਨੂੰ ਘਰ-ਘਰ ਜਾਣਿਆ ਜਾਣ ਲੱਗਾ।
ਬਾਲੀਵੁੱਡ ‘ਚ ਵੀ ਕੀਤਾ ਕੰਮ
ਸੀਰੀਅਲ ‘ਬਾਲਿਕਾ ਵਧੂ’ ਵਿੱਚ ਸਫਲਤਾ ਪਾਉਣ ਤੋਂ ਬਾਅਦ ਸਿਧਾਰਥ ਨੂੰ ਵਰੁਣ ਧਵਨ ਅਤੇ ਆਲਿਆ ਭੱਟ ਸਟਾਰਰ ਮੂਵੀ ‘ਹੰਪਟੀ ਸ਼ਰਮਾ ਕੀ ਦੁਲਹਨੀਆ’ ਵਿੱਚ ਬਤੌਰ ਸੁਪੋਰਟਿੰਗ ਐਕਟਰ ਕੰਮ ਮਿਲਿਆ। ਇਸ ਫਿਲਮ ਵਿੱਚ ਵੀ ਸਿਧਾਰਥ ਦੇ ਕੰਮ ਨੂੰ ਕਾਫੀ ਪਸੰਦ ਕੀਤਾ ਗਿਆ। ਹਾਲ ਹੀ ਵਿੱਚ ਉਹਨਾਂ ਦੀ ‘ਬਰੋਕਨ ਬਟ ਬਿਊਟੀਫੁੱਲ’ ਵੈੱਬ ਸੀਰੀਜ਼ ਵੀ ਆਈ, ਜਿਸ ਨੂੰ ਲੋਕਾਂ ਦਾ ਖੂਬ ਪਿਆਰ ਮਿਲਿਆ।
ਰਿਅਲਟੀ ਸ਼ੋਅਜ਼ ਦੀ ਵੀ ‘ਜਾਨ’ ਰਹੇ
ਸਿਧਾਰਥ ਸ਼ੁਕਲਾ ਦੇ ਕਰੀਅਰ ਨੂੰ ਬੁਲੰਦੀਆਂ ‘ਤੇ ਪਹੁੰਚਾਉਣ ਵਿੱਚ ਰਿਅਲਟੀ ਸ਼ੋਅਜ਼ ਦਾ ਵੀ ਭਰਪੂਰ ਯੋਗਦਾਨ ਰਿਹਾ। ਸਿਧਾਰਥ ਨੂੰ ‘ਝਲਕ ਦਿਖਲਾ ਜਾ’ ਡਾਂਸ ਰਿਅਲਟੀ ਸ਼ੋਅ ਵਿੱਚ ਵੇਖਿਆ ਗਿਆ। ਇਸ ਤੋਂ ਇਲਾਵਾ ਉਹ ‘ਖਤਰੋਂ ਕੇ ਖਿਲਾੜੀ ਸੀਜ਼ਨ-7’ ਅਤੇ ‘ਬਿੱਗ ਬੌਸ-13’ ਦੇ ਵਿਨਰ ਰਹਿ ਚੁੱਕੇ ਹਨ।
ਬਿੱਗ ਬੌਸ ਵਿੱਚ ਸਿਧਾਰਥ ਤੇ ਸ਼ਹਿਨਾਜ਼ ਦੀ ਜੋੜੀ ਨੂੰ ਦਰਸ਼ਕਾਂ ਦਾ ਭਰਪੂਰ ਪਿਆਰ ਮਿਲਿਆ। #Sidnaaz ਦੇ ਨਾਂਅ ਤੋਂ ਦੋਵਾਂ ਦੀ ਜੋੜੀ ਘਰ-ਘਰ ਮਸ਼ਹੂਰ ਹੋਈ ਅਤੇ ਸੋਸ਼ਲ ਮੀਡੀਆ ‘ਤੇ ਵੀ ਇਸ ਜੋੜੀ ਨੇ ਖੂਬ ਵਾਹੋ-ਵਾਹੀ ਬਟੋਰੀ। ਹਾਲ ਹੀ ਵਿੱਚ ਦੋਵਾਂ ਨੂੰ ਬਿੱਗ ਬੌਸ-14(OTT) ਵਿੱਚ ਬਤੌਰ ਗੈਸਟ ਵੀ ਵੇਖਿਆ ਗਿਆ।
